Bamanyishi ba Bukalenge badi balonda

Ditangalaja mamiinu a Bukalenge mu tshikondo tshionso

DÎYI dia Nzambi, Bible, didi dikankamija dienza bivule. Mukalenge Solomo wakamba ne: “Kuna maminu ebe ne dinda, kuikishi dilolo; bualu bua kuena mumanye ne bidi bidiunda ngebi anyi mbiabia, anyi bubidi buabi nebidiunde.”​—Muambi 11:6.

Mu tshikondo tshionso tshiakanyine, Bantemu ba Yehowa badi bakuna “maminu” pa kuyisha lumu luimpe lua Bukalenge bua Nzambi. Mu matunga ne bisumbu bia bidiila bipite pa 230, badi batungunuka ‘kabayi balekela kulongesha ne kumanyisha mukenji mulenga wa Kristo Yezu.’ (Malu Menza 5:42, MMM) Malu mamonamona àdì alonda aa adi aleja mushindu udi Bantemu ba Yehowa ‘kabayi bikisha’ mu mudimu wa diyisha.

◻ Mu République du Cap-Vert, umue wa ku Bantemu ba Yehowa uvua upitshila pabuipi ne nzubu wa buloko pavuaye munkatshi mua mudimu wa budimi. Bamue bena buloko bavua basombe kuulu kua mutshi mu lubanza lua nzubu wa buloko. Bamona Ntemu eu muinshi, bena buloko bakela mbila bua bimue bibejibeji. Ntemu wakasuikila bungi kampanda bua bibejibeji bia Tshibumba tshia Nsentedi ne Réveillez-vous! ku dibua e kubikupila pa mutu pa tshimanu tshia nzubu wa buloko. Bu tshipeta tshia disankidila edi dia kumpala, malonga a Bible 12 akatuadija. Basatu ba ku bena buloko aba bakalambula mioyo yabu kudi Nzambi ne kudifila bua batismo wa mâyi. Umue wa ku bena lukanu udi usadila bu mumuangalaji wa evanjeliyo wa ku dîba ne ku dîba, peshi mpanda-njila, kukadi mpindieu tshidimu tshimue tshipite. Kadi, mmunyi mudibu balombola midimu ya mudimu wa budimi mu nzubu wa buloko? Tshia kumpala nzubu wa buloko mmukosolola mu teritware. Pashishe teritware mmuabanyina Bantemu basatu aba ne mutumika mu kazubu ne mu kazubu. Bamanyishi ba Bukalenge aba badi balonda disankidila mu mushindu wa muomumue bu mudi Bantemu ba Yehowa pa buloba bujima benza​—pa kuenza makumbulula. Kadi, dishilangana dimuepele ndia bungi bua misangu idi malonga a Bible alombodibua. Pamutu pa kulonga Bible musangu umue peshi ibidi patupu ku lumingu mu dîba dimue peshi kupita apu, bamue bena buloko badi balonga dituku dionso! Kabidi, Bantemu mbapeshibue dianyisha kudi direktere munene wa nzubu wa buloko bua kulombola bisangilu bionso bia tshisumbu munda mua nzubu wa buloko.

◻ Mukaji kampanda mu Portugal wakapiana bungi kansanga bua mikanda ya Watch Tower panyima pa lufu lua kakuende muntu mukaji. Bu muvuaye kayi umue wa ku Bantemu ba Yehowa, kavua bualu ne kulama mikanda eyi. Kadi, kavua musue kuyinyanga to. Dimue dituku wakambila umue wa ku Bantemu ba Yehowa wakamukumbula mu mudimu wa ku tshiibi ne ku tshiibi bua mikanda ayi. Ntemu eu wakamuebeja né uvua mumanye mushinga menemene wa mikanda ayi. Mukaji wakandamuna se: “Bushuwa, tshiena mumanye mushinga wayi menemene to, kadi mmunyi mundi mua kuumanya?” Mukaji eu wakitaba dilonga dia Bible, ne mutantshi mukese wakafika ku dianyisha mikanda ya kakuende muntu mukaji. Mpindieu udi pende Ntemu wa Yehowa mutambule. Kabidi, muanende wa bakaji ne mulunda wa dîku diabu badi balonga pabu Bible. Mmunyipu mudi tshisumbu tshia mikanda eyi tshikale bumpianyi bua mushinga!