Ngakalongela bulelela bua mu Bible mu Roumanie

BU MUDIBI BILONDA KUDI GOLDIE ROMOCEAN

Mu 1970, ngakakumbula bena dîku dianyi mu Roumanie bua musangu wa kumpala mu bidimu bu 50. Bantu bavua ku bukokeshi bua tshinyangu bua ba-Communiste, ne bavua bandimuija misangu ne misangu bua kuikala mudimuke bua bimvua ngamba. Pashishe, umue musangu pamvua muimane mu biro bia mbulamatadi mu musoko wetu, mfumu kampanda wakangambila bua kumbuka diakamue mu ditunga adi. Kumpala kua meme kumvuija bua tshinyi, nganji kunulondela mungakalongela bulelela bua mu Bible mu Roumanie.

NDI mulela mu dia 3 Luabanya 1903, mu musoko wa Ortelec ku Nord-Ouest kua Roumanie pabuipi ne tshimenga tshia Zalău. Tuvua basombele mu nyunguluilu muimpe be. Mâyi ne kapepe bivua bikezuke. Tuakakolesha biakudia bietu nkayetu ne katuakapangila tshintu nansha tshimue tshia ku mubidi. Mu bidimu bianyi bia ntuadijilu, ditunga divua mu ditalala.

Bantu bavua batendelela. Nenku, dîku dietu divua dilonda bitendelelu bisatu bishilangane. Umue wa ku bakakuanyi bakaji uvua muena Katolike Ortodokse, mukuabu uvua Adventiste, ne baledi banyi bavua ba-Baptiste. Bualu tshivua nganyisha nansha tshimue tshia ku bitendelelu biabu ebi, dîku dianyi diakamba ne: mvua mua kulua muvidi wa dikalaku dia Nzambi. ‘Bikalaku Nzambi umue,’ ke mungakela meji, ‘kudi ne bua kuikala anu tshitendelelu tshimue​—ki mbisatu mu dîku dimuepele nansha.’

Malu angakamona mu bitendelelu akambungamija bikole. Tshilejilu, nsaserdose uvua ukumbula nzubu mivule bua kusangisha bintu bia ekleziya. Pavua bantu kabayi ne mfranga ya kufila, uvua wangata mbulankete yabu mitambe buimpe ya buoyoya pamutu pa mfranga. Mu Ekleziya Katolike, ngakatangila kaku mukaji utua binu bua kusambila kumpala kua tshimfuanyi tshia Mariya. ‘Bua tshinyi kusambila tshimfuanyi?’ ke mungakadikonka.

Bikondo bia bimvundu

Tatu wakaya ku États-Unis mu 1912 bua kupeta mfranga ya kufuta dibanza kampanda. Katupa kîpi pashishe mvita yakabudika, ne bantu balume ba mu musoko wetu bakaya kuluangana​—anu bakaji, bana, ne balume bakulakaje ke bakashala. Musoko wetu wakalua ku bukokeshi bua bena Hongrie mu lupolo kampanda lua tshikondo, kadi pashishe basalayi bena Roumanie bakapingana ne kukuata tshiakabidi musoko. Bakatutumina dîyi bua kumbuka diakamue. Kadi, mu dilubakana ne dikondakana dia kuela bintu ne bana mu ditempu dikoka kudi ngomba, bakampua muoyo. Udi ne bua kumvua ne: mvua mukulu wa bana batanu.

Ngakanyemena kua muena mutumba, mulume mukulakaje mukuabu uvua mushale pende ku nyima, ne wakamba ne: “Ndaku kumbelu. Ukange biibi biebe, ne muntu nansha umue kabuedi.” Ngakatumikila ne lukasa luonso. Pashishe ngakadia losa luela ku bisekiseki ne nsupu wa nzolo bivuabu bashiye mu dilubakana dia luendu, ngakatua binu panshi pabuipi ne bulalu buanyi ne meme kusambila. Mutantshi eu tulu kunkuata ne lukasa luonso.

Pangakatabala, tukavua mu munya, ne ngakamba ne: “Oh, tuasakidila Nzambi! Ndi ne muoyo!” Bimanu bivua biûle ne masoso a masashi, bualu bavua bakume bingoma butuku abu bujima. Pakamanya Mamu ne: tshivua nabu mu musoko uvua ulonda, wakatuma nsongalume kampanda, George Romocean, wakansangana ne tuetu kuya nende kuvuabu. Mutantshi kaulepi, tuakapingana mu musoko wetu ne kubangulula tshiakabidi nsombelu wetu.

Dijinga dianyi dia bulelela bua mu Bible

Mamuanyi wakajinga bua bantambuishe bu Baptiste, kadi tshivua mua kuenza nanku nansha bualu tshivua mua kuitaba se: Nzambi wa dinanga uvua mua kuosha bantu bua kashidi mu inferno. Ukeba bua kumvuija, Mamu wakamba ne: “Ee, bikalabu bantu babi.” Kadi ngakamuandamuna se: “Bikalabu bantu babi, bashipayi, kadi kanubakengeshi to. Tshiena mene mua kukengesha mbua nansha kampusu to.”

Ndi mvuluka ne: mu dituku kampanda dilenga mu muvu wa printemps, pamvua ne bidimu 14, Mamu wakangambila bua kuya kudisha ngombe. Pamvua mulale mu bisonsa kumpenga kua musulu, muela nyima ku ditu, ngakatangila muulu ne meme kuamba ne: “Nzambi, ndi mumanye se: udi muulu amu; kadi tshiena musue nansha tshimue tshia ku bitendelelu ebi. Udi ne bua kuikala ne tshitendelelu tshimue tshidi tshimpe.”

Ndi ngitaba bushuwa ne: Nzambi wakateleja disambila dianyi bualu mu tshine tshidimu atshi tshia 1917, Balongi ba Bible babidi (muvua Bantemu ba Yehowa babikidibua mu tshikondo atshi) bakalua mu musoko wetu. Bavua ba-kolportere, peshi ba-ministre ba ku dîba ne ku dîba, ne bakalua ku ekleziya wa ba-Baptiste pavuabu benza masangisha.

Bulelela bua mu Bible budi butangalaka mu Roumanie

Bidimu bikese kumpala, mu 1911, Carol Szabo ne Josif Kiss, bakavua balue Balongi ba Bible mu États-Unis, bakapingana mu Roumanie bua kubuejamu bulelela bua mu Bible. Bakasombela mu Tîrgu-Mureş, kilometre mishadile ku 160 ku Sud-Est kua musoko wetu. Mu bidimu bikese patupu, bushuwa nkama ya bantu yakandamuna ku mukenji wa Bukalenge ne kutuadijabu kuenza mudimu wa Buena-nkristo.​—Matayo 24:14.

Eyo, pakalua Balongi ba Bible babidi aba batshivua bansonga ku ekleziya wa ba-Baptiste mu musoko wetu wa Ortelec, George Romocean, nansha muvuaye anu ne bidimu 18, uvua ulombola masangisha ne uvua uteta bua kufila diumvuija dia Lomo 12:1. Ndekelu wa bionso, umue wa ku ba-kolportere aba bansonga wakimana kuulu ne kuamba ne: “Bana betu, balunda, ntshinyi tshidi mupostolo Paulo usua kutuambila muaba eu?”

Pangakumvua nanku, mvua ne disanka dia bungi! Ngakela meji ne: ‘Bantu aba badi ne bua kuikala bamanye mua kumvuija Bible.’ Kadi bantu bavule ba ku aba bavuapu bakela mbila ne: “Baprofete ba mashimi! Tudi banumanye!” Tshimvundu tshiakalonda panyima. Kadi pashishe tatuende wa George wakimana kuulu e kuamba ne: “Puwayi nuenu bonso! Elu ndungenyi lua mushindu kayi elu​—ndua bakuatshiki ba maluvu? Pikala bantu aba ne bualu kampanda bua kutuambila ne kanuyi basue bua kuteleja, meme ndi mbabikila kuanyi. Eu yonso udi musue bua kulua ndi mmujingila difika dilenga.”

Ne disanka dionso, ngakaya kumbelu lubilu ne kuambila Mamu tshivua tshienzeke etshi. Mvua umue wa ku aba bakitaba dibikila dia kuya kumbelu kua Romocean. Mmunyipu mumvua mulengibue ku muoyo dilolo adi bua kulongela mu Bible ne: kakuena inferno wa kapia, ne bua kumona mu Bible wanyi nkayanyi wa tshiena-Roumanie dîna dia Nzambi, Yehowa! Ba-kolportere aba bakalongolola bua Mulongi wa Bible umue kuikalaye ukumbula nzubu wa Romocean mu Dia lumingu dionso bua kutulongesha. Mu tshidimu tshiakalonda, pamvua ne bidimu 15, ngakatambuishibua mu dileja dia diditshipa dianyi kudi Yehowa.

Ndekelu wa bionso, pabuipi ne dîku dijima dia Prodan ne dia Romocean akitaba bulelela bua mu Bible ne kulambulawu mioyo yawu kudi Yehowa. Bantu bavule bakuabu ba mu musoko wetu bakenza nanku, pamue ne bena dibaka babidi batshivua bansonga bena nzubu wakambuluisha diambedi bu ekleziya wa ba-Baptiste. Pashishe bakamukudimuna bu muaba wa Balongi ba Bible kudisangishila bua dilonga. Bulelela bua mu Mifundu buakatangalaka ne lukasa luonso mu misoko ya pabuipi, ne mu 1920 kuvua bamanyishi ba Bukalenge batue ku 1 800 mu Roumanie!

Ku États-Unis

Tuvua ne dijinga dikole dia kuabanyangana bituvua balonge ne tatuanyi, Peter Prodan. Kadi, mu mushindu udi ukemesha, kumpala kua tuetu kumona mua kufunda, tuakapeta mukanda ufumina kudiye, utuambila ne: ukavua mulue musadidi mutambule wa Yehowa. Ukavua mulonge ne Balongi ba Bible mu Akron, ku Ohio, ne uvua ujinga bua tuetu bonso kuya mu États-Unis muvuaye. Kadi, Mamu wakabenga bua kumbuka mu Roumanie. Nenku, mu 1921, pa kutumika ne mfranga ivua Tatu muntumine, ngakaya mu Akron muvuaye. George Romocean ne tutuende bakavua bamane kuya ku États-Unis tshidimu tshimue kumpala.

Pangakafika ne mazuwa a mâyi ku tshidiila tshia Ellis, mu New York, mfumu wa tshibambalu tshia dimuangala kavua mumanye mua kukudimuna dîna dianyi, Aurelia, mu Anglais nansha, nenku wakamba ne: “Wewe udi Goldie.” Adi ke dîna dianyi katshia kuine aku. Katupa kakese pashishe, mu dia 1 Lumungulu 1921, George Romocean ne meme tuakaselangana. Bu tshidimu tshijima pashishe, Tatu wakapingana ku Roumanie ne mu 1925 wakapingaja muakunyanyi wa bakaji, Mary ku Akron. Pashishe Tatu wakapingana kabidi ku Roumanie bua kusomba ne Mamu ne bakuabu bena dîku.

Mudimu wetu wa kumpala mu États-Unis

George uvua muena bulamatshi bukole, musadidi muditshipe wa Yehowa. Pankatshi pa 1922 ne 1932, tuvua babeneshibue ne bana ba bakaji banayi balengele​—Esther, Anne, Goldie Elizabeth, ne Irene. Bakenza tshisumbu tshia tshiena-Roumanie mu Akron, ne ku ntuadijilu bisangilu bivua bienzekela mu nzubu muetu. Ndekelu wa bionso, ngondo yonso isambombo muleji-mpala wa ku bilombuelu bia buloba bujima bia Balongi ba Bible mu Brooklyn, ku New York, uvua ukumbula tshisumbu tshietu ne uvua ushala netu.

Matuku mavule a Dia lumingu tuvua tupitshisha dituku dijima mu mudimu wa diyisha. Tuvua tukanga bibuta bietu bia mikanda ne biakudia, tuela bana ba bakaji mu mashinyi etu a Ford T, ne tuvua tupitshisha dituku dijima mu diyisha mu teritware ya mu musoko. Pashishe mu dilolo, tuvua tubuela mu Dilonga dia Tshibumba tshia Nsentedi. Bana betu ba bakaji bakafika ku dinanga mudimu wa diyisha. Mu 1931, mvuapu mu Columbus, ku Ohio, pakangata Balongi ba Bible dîna diabu dibasunguluji dia Bantemu ba Yehowa.

Diakaja dimvua nkengela

Bidimu bikese pashishe, ngakafiikila Joseph F. Rutherford munda, uvua tshikondo atshi mulombodi wa Watch Tower Bible and Tract Society. Ntemu kampanda mupiamupia wakumvua ne: Muanetu Rutherford uvua mumuenzele bibi, pa kubenga kumuteleja bimpe ne tshilumbu tshiende. Ngakumvua ne: Muanetu Rutherford uvua ne tshilema. Eyo, mu Dia lumingu dikuabu muanetu wa bakaji Mary ne bayende, Dan Pestrui, bakalua kutukumbula. Panyima pa didia, Dan wakamba ne: “Tudilongololayi bua kuya mu tshisangilu.”

“Katuena tuya kabidi mu bisangilu nansha,” ke mungakamba. “Tudi bafikile Muanetu Rutherford munda bikole.”

Dan wakadikuata bianza pa nyima pende ne kutuaye makasa ku nyima ne ku mpala, ne pashishe kuambaye ne: “Uvua mumanye Muanetu Rutherford pakakutambuishabu anyi?”

“Nansha,” ke mungakandamuna. “Udi mumanye ne: bakantambuisha mu Roumanie.”

“Bua tshinyi bakakutambuisha?” ke muakakonkaye.

“Bualu ngakalonga ne: Yehowa udi Nzambi mulelela, ne ngakajinga bua kulambula muoyo wanyi bua kumusadila,” ke mungakamuandamuna.

“Kupu bualu abu muoyo nansha kakese!” ke muakambaye. “Netuambe tshinyi bu Muanetu Rutherford mua kumbuka mu bulelela, udi mua kumbukamu pebe anyi?”

“Nansha kakese, nansha kakese!” ke mungakamba. Abi biakapingaja meji anyi, ne ngakamba ne: “Muntu yonso adilongolole bua tshisangilu.” Katuakimanyika katshia muine musangu au. Mmunyipu mumvua ne dianyisha kudi Yehowa bua diakaja dia dinanga dia kudi bukonde buanyi!

Dilubuluka mu Dipueka Dinene

Mu tshikondo tshia Dipueka Dinene mu bidimu bia 1930, matuku avua makole. Dimue dituku George wakafika kumbelu ufuma ku mudimu muzengele, pa kummanyisha ne: uvua muipatshibue ku mudimu wende ku tshiapu tshia bindundu. “Kunyingaladi to,” ke mungakamuambila, “tudi ne Tatu mubanji udi mu diulu, ne kakutulekela nansha.”

Dine dituku adi George wakasambakena ne mulunda kampanda uvua ne tshitunga tshinene tshia buowa. Pakamanya George muaba uvuaye mubuangule, wakalua kumbelu ne buowa bupite bungi. Pashishe wakatula dolare yetu isatu ivua mishale bua kusumba bitunga bikese bisatu. “Mmunyi muuvua mua kuenza nanku,” ke mungakamukonka, “tuetu ne bana bakese ba bakaji badi bakengela mabele?”

“Kunyingaladi to,” ke muakandamunaye, “enza anu mundi ngamba.” Mu mbingu mikese yakalonda, tuakapeta tshiapu tshikese mu nzubu muetu, tshisukula ne tshikuta buowa. Tuvua tubupanyisha ku bisumbishidi bia biakudia bia mushinga mubandile ne tuvua tupeta makasa mabangile ku dolare 30 too ne 40 ku dituku, mfranga mipite bungi buetu tuetu mu tshikondo atshi. Muena ferme mukuabu wakatupesha dianyisha dia kuangula buowa mu mpata wende wakamba ne: uvua musombelamu kukavua bidimu 25 ne katshia kavua muanji kumona buowa bungi abu. Katupa kîpi tshiapu tshia bindundu tshiakapingaja George ku mudimu.

Dilama ditabuja dietu

Mu 1943 tuakaya ku Los Angeles, mu Californie, ne bidimu binayi pashishe tuakasombela mu Elsinore. Tuakunzulula nzubu wa tshisumbishidi tshia bintu bia tshikuku kuine aku, ne dîku dietu dijima diakabanga kutumikamu. Musangu au, Elsinore uvua tshimenga tshikese patupu tshivua ne bantu batue ku 2 000, ne tuvua ne bua kuenda kilometre 30 batangile ku tshikuabu tshimenga bua kubuela mu bisangilu bia bena nkristo. Ndisankapu kayi dimvua nadi bua kumona tshisumbu tshikese tshienjibua mu Elsinore mu 1950! Mpindieu mu tshine tshitupa etshi mudi bisumbu 13.

Mu 1950 muanetu wa bakaji Goldie Elizabeth (udi bavule bamanye bu Beth) wakapeta dipolome dia Tshilongelu tshia Bible tshia Watchtower tshia Gilada mu South Lansing, ku New York, ne wakatumibua mu Venezuela bu misionere. Mu 1955 mukala wetu wa bakaji, Irene, uvua ne disanka bua muvua bayende mubikidibue bua kusadila bu ministre muena ngendu mu mudimu wa tshijengu. Pashishe mu 1961, panyima pa dibuela mu Kalasa ka Mudimu wa Bukalenge mu South Lansing, ku New York, bakatumibua ku Thaïlande. Imue misangu pamvua tshiyi mmona bana banyi ba bakaji, mvua ndila bikole, kadi pashishe mvua ngela meji ne: ‘Ke tshimvua musue bua buobu kuenza.’ Nenku mvua mbakula tshibuta tshianyi tshia mikanda ne mpatuka mu mudimu wa diyisha. Mvua mpingana kumbelu misangu yonso ne disanka.

Mu 1966 bayanyi munanga, George, wakapeta disama dia mpalu. Beth, ukavua mupingane ku Venezuela bua ntatu ya mubidi, wakambuluisha mu dimutabalela. George wakafua tshidimu tshiakalonda, ne mvua musambibue kudi muanda wa se: uvua mushale ne lulamatu kudi Yehowa ne uvua mupete difutu diende dia mu diulu. Pashishe Beth wakaya ku Espagne kuvua dijinga dia bamanyishi ba Bukalenge dikale ditambe bunene. Muananyi wa bakaji mukulu wa bonso, Esther, wakasama kansere ne wakafua mu 1977, ne mu 1984, Anne wakafua disama dia leucémie. Bonso babidi bavua bikale basadidi ba lulamatu ba Yehowa mu muoyo wabu mujima.

Mu tshikondo tshia lufu lua Anne, Beth ne Irene bakavua bapingane bafumine ku babende kuvuabu babatume bua kuyisha. Bakambuluisha pa kutabalela bana babu ba bakaji, ne tuetu bonso tuakanyingalala bikole. Panyima pa tshikondo kampanda ngakambila bana banyi ba bakaji ne: “Anng, biakumbanyi! Tudi basambe bantu bakuabu ne malaya a mu Bible a mushinga mukole. Mpindieu tudi ne bua kuenza mushindu wa kutusambabu petu. Satana mmusue kutunyenga disanka dietu mu disadila Yehowa, kadi katuena mua kumuanyishila nansha.”

Dîku dietu dia lulamatu mu Roumanie

Muakunyanyi wa bakaji Mary ne meme tuakenza luendu alu lukena kupua muoyo bua kukumbula dîku dietu mu Roumanie mu 1970. Umue wa ku bana betu ba bakaji ukavua mufue, kadi tuvua ne mushindu wa kukumbula muakunyetu wa balume John ne muakunyetu wa bakaji Lodovica, batshivua basombele mu musoko wa Ortelec. Mu tshikondo tshia dikumbula dietu, Tatu ne Mamu bakavua bafue, bikale bashale ne lulamatu kudi Yehowa. Bantu bavule bakatuambila ne: Tatu uvua muikale dikunji mu tshisumbu. Nansha bamue ba ku bana ba bankana bende badi mu Roumanie badi mpindieu Bantemu. Tuakakumbula kabidi balela bavule ba ku luseke lua bayanyi ba mu dîku bavua bashale bashindame mu bulelela bua mu Bible.

Mu 1970, Roumanie uvua ku bukokeshi bua tshikisu tshia ba-Communiste bua Nicolae Ceauşescu, ne Bantemu ba Yehowa bavua bikale bakengeshibua mu mushindu wa kanyawu. Muana wa John, muanetu wa balume, Flore, pamue ne bakuabu balela banyi, bakapitshisha bidimu bivule mu tumponya tua disubishangana bua ditabuja diabu dia Buena-nkristo, ne bivua kabidi nanku bua Gabor Romocean, muana wa muanabu ne bayanyi. Kakuvua bualu bua dikema pakatutumabu ne mikanda ya kufila ku bilombuelu bia Bantemu ba Yehowa mu New York, bana betu ba mu Roumanie bakamba ne: kabavua ne bua kuikisha too ne pavuabu mua kumvua ne: tuvua bapatuke pambelu pa ditunga kakuyi bualu bubi!

Patuakajingulula ne: viza wetu wakajikila matuku, tuakaya ku biro bia mbulamatadi mu Ortelec. Tuvua mu Ditanu dilolo, ne kuvua anu mfumu umuepele uvua utumika. Umanya batuvua tukumbula, ne se: muipu wetu uvua muikale mu kamponya ka disubishangana, wakamba ne: “Bakajana, umbukayi muab’eu!”

“Kadi kakuena mazuwa adi umbuka lelu to,” ke muakandamuna muanetu wa bakaji.

“Ki mbualu to,” ke muakambaye ne tshisumi tshionso. “Buelayi mu bise. Buelayi mu mazuwa. Buelayi mu taksi. Ndayi ku makasa. Tshidibi umbukayi muab’eu ne lukasa luonso!”

Tumbusha anu makasa, bakatubikila ku nyima ne kutumanyisha ne: mazuwa a basalayi avua kaayi malongolola bua kuluawu avua ne bua kufika mu 6:00 wa dilolo. Mmunyipu muvuabi dikasa dimpe! Mu mazuwa a pa tshibidilu, bavua ne bua kukontolola mikanda yetu ya luendu misangu ne misangu, kadi bu muvua mazuwa aa mambule bena mudimu wa busalayi ne mutuvua anu bamuena-muabu babidi bavua mu mazuwu amu, muntu nansha umue kakakonka bua kumona mikanda yetu ya njila. Bavua mua kuikala bafuanyikije ne: tuvua bakakuende ba bamue ba ku bamfumu bavuamu.

Tuakafika mu Timisoara mu dinda diakalonda, ne ku diambuluisha dia mulunda wa mulela wanyi kampanda, tuakapeta viza yetu. Dituku diakalonda tuakapatuka mu ditunga. Tuakalua kumbelu ne bivulukidi bivule bia dinanga ne bikena kupua muoyo bia bana betu bena nkristo ba bulamatshi balume ne bakaji ba mu Roumanie.

Mu bidimu biakalonda dikumbula dietu mu Roumanie, tuakumvua tunungu anu tukese tuvua tutangila mudimu wa diyisha mu tshitupa tshivua ku bukokeshi bua URSS wa kale. Nenku, tuvua ne dieyemena se: bana betu bena nkristo balume ne bakaji bavua mua kushala ne bulamatshi kudi Nzambi wetu​—nansha bia munyi. Ne bushuwa ke muakenzabu! Ndisanka kayipu dia kumanya ne: Bantemu ba Yehowa bavua banyishibue kudi mikenji bu bulongolodi bua malu a ntendelelu mu Roumanie mu Tshisanga 1990! Tshidimu tshiakalonda tuakatshionkomoka bua luapolo pa mpuilu yakenjibua mu Roumanie. Ee, bantu bapite pa 34 000 bakabuelamu mu bimenga muanda-mukulu, ne bantu 2 260 bakatambuishibua! Mpindieu kudi bantu bapite pa 35 000 badi benza mudimu wa diyisha mu Roumanie, ne tshidimu tshishale bantu 86 034 bakabuela mu Tshivulukilu tshia lufu lua Kristo.

Bulelela butshidi ne mushinga mukole kundi

Munkatshi mua bidimu bikese, ngakalekela didia bimanyinu mu Tshivulukilu. Ngakamona bana betu balume bapite kukumbana bavua kabayi badia, ne ngakela meji ne: ‘Bua tshinyi Yehowa uvua mua kumpesha dibenesha dia kuikala mupianyi pamue ne Muanende mu diulu padi bakuabu bikale bangamba-malu balenga ba nunku?’ Kadi pamvua tshiyi ndia, mvua ndiumvua mutatshishibue bikole. Bivua anu bu se: mvua mbenga tshintu kampanda. Panyima pa dilonga divumvuke ne milombu ya muoyo mujima, ngakatuadija kudia tshiakabidi. Ditalala dianyi ne disanka biakapingana, ne ki mbianji kumbuka kundi nansha.

Nansha mundi tshiyi mua kumona bimpe bua kubala, dituku dionso ntu nteleja tusete tua Bible ne tua bibejibeji bia Tshibumba tshia Nsentedi ne Réveillez-vous! Kabidi ntshitshidi ngenza mudimu wa diyisha. Pa tshibidilu ntu ngabanya bibejibeji pankatshi pa 60 ne 100 ku ngondo yonso, kadi patuvua ne kampanye ka pa buaku ka bibejibeji bia Réveillez-vous! mu ngondo wa Tshisanga mushale, ngakabanya 323. Ne diambuluisha dia kudi bana banyi ba bakaji, ndi kabidi ne mushindu wa kuenza midimu mimpesha mu Kalasa ka Mudimu wa Teokrasi. Ndi ne disanka bua mundi mua kutungunuka ne dikankamija bakuabu. Pabuipi ne muntu yonso mu Nzubu wa Bukalenge udi umbikila ne: Kaku.

Mu ditangila kunyima bidimu bipite pa 79 bia mudimu wa diditshipa kudi Yehowa, ntu mmuela tuasakidila dituku dionso bua mudiye muanyishe bua meme kumanya bulelela buende bua mushinga mukole ne bua kutumika ne muoyo wanyi mu mudimu wende. Ndi ne dianyisha dia bungi bua mundi mushale ne muoyo bua kumona dikumbana dia milayi ya dikema ya mu Bible yakadianjila kuamba bua disangisha dia bantu badi bu mikoko ya Nzambi mu matuku aa a ku nshikidilu.​—Yeshaya 60:22; Zekâya 8:23.

[Tshimfuanyi mu dibeji 23]

Muanetu wa bakaji Mary ne Tatu biimane kuulu, ne meme, George, ne bana betu ba bakaji Esther ne Anne

[Tshimfuanyi mu dibeji 24]

Ne bana banyi ba bakaji Beth ne Irene ne bayende wa Irene ne bana babu ba balume babidi, buonso buabu badi basadila Yehowa ne lulamatu luonso