Nzambi udi tshinyemenu tshianyi ne bukole buanyi

BU MUDIBI BILONDA KUDI CHARLOTTE MÜLLER

“Bidimu biebe tshitema bia dikenga mu bukokeshi bua Hitler mbikupeshe lumu,” ke muakamba nzuji kampanda wa ba-koministe. “Bushuwa kuvua munange mvita, kadi mpindieu udi ubenga midimu yetu milongolola bua kukeba ditalala!”

UVUA wakula bua diedibua dianyi dia kumpala mu buloko kudi bena Nazi ne kudi bena socialisme mu ditunga dia Allemagne Démocratique. Kumpala tshivua ngakula kadi pashishe ngakandamuna ne: “Muena nkristo kêna uditatshisha bua ditalala dilelela mushindu wa muomumue ne udi bantu bakuabu benza. Ndi nteta anu bua kulonda dîyi-dituma dia mu Bible dia kunanga Nzambi ne muntu nanyi. Dîyi dia Nzambi didi dingambuluisha bua kulama ditalala mu miaku ne mu bienzedi.”

Mu dituku adi, dia 4 Kabitende 1951, ba-koministe bakankosela bidimu muanda-mukulu bia buloko​—kumbusha tshidimu tshimue ku bivua mbulamatadi wa bena Nazi mukose.

Patuvua tuetu Bantemu ba Yehowa bakengeshibue kudi bena tshisumbu tshia Socialisme National ne kudi ba-koministe, ngakapeta busambi mu Musambu 46:1 (NW): “Nzambi udi tshinyemenu tshietu ne bukole buetu, udi dikuatshisha dietu mu makenga didi kadiyi di[p]anga tshiendelele.” Yehowa nkayende wakampesha bukole bua kutantamena, ne pamvua ntamba kupukila Dîyi diende, mvua ntamba kukola.

Mukolesha bua matuku atshilualua

Mvua muledibue mu 1912 mu tshimenga tshia Gotha-Siebleben mu Thuringia, mu Allemagne. Nansha muvua baledi banyi bikale bena Mishonyi, tatu uvua mu dikeba dia bulelela bua mu Bible ne mbulamatadi muakane. Pakamona baledi banyi “Foto-Drama wa Bufuki,” bakatshionkomoka ne disanka.a Tatu wakapeta tshivuaye ukeba​—Bukalenge bua Nzambi.

Tatu ne mamu, pamue ne tuetu bana basambombo, tuakalekela ekleziya mu dia 2 Luabanya 1923. Tuvua basombele mu tshimenga tshia Chemnitz mu Saxony, ne muinamu tuvua tudisangisha ne Balongi ba Bible. (Basatu ba ku bana betu ba balume ne ba bakaji bakalua Bantemu ba Yehowa.)

Mu bisangilu bia Balongi ba Bible, Mifundu ya mu Bible ne malelela a mpatshi biakandenga bikole ku muoyo, ne Mifundu eyi yakuuja mutshima mutekete wanyi ne disanka. Nangananga kuvua dishidimuna divuabu batupeshe tuetu bansonga bena nkristo, bapite pa 50, mu Dia lumingu, ne tuakadipeta meme ne muanetu wa bakaji Käthe bua tshikondo kampanda. Mu kasumbu ketu muvua Konrad Franke, nsonga uvua ulongolola ngendu ya didiolola ne utuimbisha misambu. Panyima, kumbukila mu 1955 too ne mu 1969, muanetu wa balume Franke wakasadila bu mutangidi wa filiale wa Watch Tower mu Allemagne.

Bidimu bia 1920 bivua bidimu bia nyomanyoma, imue misangu nansha munkatshi mua bantu ba Nzambi. Bamue bakalekela bua kuitaba Tshibumba tshia Nsentedi bu “biakudia mu tshikondo tshiakanyine,” kabavua bitaba mudimu wa diyisha ku nzubu ne ku nzubu. (Matayo 24:45, NW) Ebi biakafikisha ku butontolodi. Kadi tshibejibeji etshi ke tshivua “biakudia” mene biakatupetesha bukole butuvua tukengela menemene mu tshikondo atshi. Tshilejilu, kuvua biena-bualu bia mu Tshibumba tshia Nsentedi “Babeneshibue mbadi kabayi ne buôwa” (1919) ne “Nnganyi wambika Yehowa lumu?” (1926) Mvua musue kuambika Yehowa lumu ku dienza mudimu ne dikima, pa nanku ngakabanya mikanda mivule ne broshire bifunda kudi muanetu Rutherford.

Mu Luabanya 1933, bakantambuisha bu Ntemu wa Yehowa. Mu tshidimu tshimue tshimue atshi, mudimu wetu wa dimuangalaja dia evanjeliyo wakakandikibua mu Allemagne. Pa batismo, Buakabuluibua 2:10 (NW) wakafidibua bu mubelu bua matuku atshilualua: “Kutshinyi bua makenga aukadi pa kupetangana nawu. Mona! Diabolo neatungunuke ne kuela bamue ba kunudi mu buloko bua nuenu kutetshibua tshishiki, ne bua nuenu kupetangana ne dikenga munkatshi mua matuku dikumi. Udileje wewe nkayebe muena lulamatu nansha ne ku lufu, ne nenkupeshe tshifulu tshia butumbi tshia muoyo.” Ngakateka mvese eu mu mutshima, tshiyi ne mpata se: ntatu mikole ivua mingindile. Ebi biakamueneka bilelela.

Bu mutuvua bashale ne ndubidilu mu malu a tshididi, bena mutumba netu bavule bavua batuelela meji mabi. Panyima pa masungulangana a tshididi, batumibue ba bisumbu bia bena Nazi bavuale bilamba kumuekumue bakela mbila kumpala kua nzubu wetu bamba ne: “Batungidianganyi badi muaba eu!” Tshiena-bualu tshia “Kanubatshinyi,” tshiakapatuka mu Tshisua-munene 1933, mu nimero wa Tshibumba tshia Nsentedi mu tshiena-Allemagne, tshivua dikankamija dia pa buadi kundi. Mvua musue kushala Ntemu wa Yehowa wa lulamatu nansha mu nsombelu mitamba bubi.

Diandamuna dia muluishi​—Buloko

Kuvua mushindu wa kupatula Tshibumba tshia Nsentedi mu musokoku mu Chemnitz too ne mu muvu wa automne wa 1935. Pashishe bakatuma tshiamu tshivuabu batumika natshi bua kuenza kopi ku Beierfeld mu Mikuna ya Erzgebirge, muaba wakatumikabu natshi bua kupatula mikanda too ne mu Tshimungu 1936. Meme ne Käthe tuakabanya mikanda kudi bana betu bavua tatu mutupeshe adrese yabu. Malu onso akenda bimpe bua tshikondo kampanda. Kadi kunyima Gestapo (tshisumbu tshia bampulushi) wakantentekela, ne mu Tshimungu 1936 bakankuata kumbelu kuanyi e kungelabu mu buloko, muaba umvua muindile dilumbuluisha.

Mu Luishi 1937, bana betu ba balume 25 ne bana betu ba bakaji 2​—kusangisha ne meme muine—​tuakimana kumpala kua kabadi ka pa buaku mu Saxony. Biakambibua ne: bulongolodi bua Bantemu ba Yehowa mbukodiakane. Bana betu abu bavua bapatula Tshibumba tshia Nsentedi bakapeta bidimu bitanu bia buloko. Bakankosela meme bidimu bibidi.

Meme mumane kujikija bidimu bia tshibawu tshianyi pamutu pa kundekela, ngakakuatshibua kudi Gestapo. Bavua basue bua meme kutua tshiala ku mukanda uvua wamba ne: tshiakuikala kabidi ngenza mudimu bu Ntemu wa Yehowa. Ngakabenga kuosha ne munu muiku, muena mbulamatadi e kufiika munda, kujukilaye kuulu, e kuenza mukanda bua kungelabu mu buloko. Mukanda au mmuleja mu foto. Tshiyi muitabila bua kumonangana ne baledi banyi, bakangela diakamue mu kamponya kakese ka disubishilangana ka bantu bakaji mu musoko wa Lichtenburg ku musulu wa Elbe. Mutantshi mukese pashishe ngakamonangana ne Käthe. Uvua mu kamponya ka disubishilangana ka mu tshimenga tshia Moringen kubangila mu Tshisua-munene 1936, kadi pakakangabu kamponya aku, yeye, pamue ne bana betu bakuabu bavule ba bakaji, bakalua mu Lichtenburg. Tatu uvua pende mu buloko, ne tshiakamumona kabidi too ne mu 1945.

Mu Lichtenburg

Tshivua muitabila bua kudisangisha diakamue ne Bantemu bakaji bakuabu, bu muvuabu mu dinyokibua bua kabingila kampanda. Mu umue wa ku nzubu mikuabu, ngakabambisha bisumbu bibidi bia bena buloko​—bakaji bavua misangu yonso badia ne eku Bantemu bakaji bavua ne bua kusomba dituku dijima pa tutambua ne kabayi bapeshibua tshintu nansha tshimue tshia kudia.b

Mvua ngitaba ne lukasa mudimu kayi wonso, ne ditekemena dia kutuilangana ne Käthe mu mishindu yonso. Ne ke tshiakenzeka bushuwa. Uvua mu njila mutangile ku mudimu ne bena buloko bakuabu babidi patuakasambakena nende. Ne disanka dipite, ngakamuela mu tshitupa bikole. Kadi muntu mukaji mutulami wakatufunda diakamue. Bakatuela nkonko, ne kubangila anu pinapu, bakatuabulula ku budisuile. Bivua bikole menemene bua kutantamena.

Malu makuabu abidi akenzeka mu Lichtenburg mmajame mu lungenyi luanyi. Musangu kampanda bena buloko bonso bavua ne bua kusangila mu lubanza bua kuteleja ku tshisanji umue wa ku miyuki ya tshididi ya Hitler. Tuetu Bantemu ba Yehowa tuakabenga, bualu ngenzelu ya malu a buena ditunga ivua mibuelelamu. Nunku balami bakatangija tiyo ya dijima nayi mudilu kutudi, batuela mâyi avua apatukila mu mbungulu ne atututa bikole ne batuipata tuetu bantu bakaji katuyi ne mushindu wa kudikuba kumbukila ku tshisasa tshinayi too ne panshi mu lubanza. Amu tuvua ne bua kuimana kulu, babole bolabola.

Musangu mukuabu mvua, pamue ne Gertrud Oehme ne Gertel Bürlen, mulombibue bua kulengeja nzubu ya tshilombuelu ya bamfumu ne midilu ya nzembu, bu muvua dituku dia diledibua dia Hitler disemena pabuipi. Tuakabenga, bajingulule ngenzelu ya Satana ya kuteta kutuenzeja bua tunyanga muoyo mutoke wetu ku ditupa ku mikenji mu malu makese. Bu dinyoka, bana betu bonso bansonga bakaji ba kutudi bavua ne bua kuenza mbingu isatu ivua ilonda muntu pa nkayende mu kazubu kafimpakane, ka mîdima. Kadi Yehowa wakashala netu pabuipi ne, nansha mu muaba eu mukuate buôwa, wakadileja muikale tshinyemenu.

Mu Ravensbrück

Mu Lumungulu 1939 bena buloko ba mu Lichtenburg bakatumibua mu kamponya ka disubishilangana ka ku Ravensbrück. Emu ngakatumibua ku mudimu wa disukula bilamba, pamue ne bana betu ba bakaji bakuabu Bantemu. Tshitupa tshîpi panyima pa dibudika dia mvita, bakatulomba bua kukeba ne kutuala dibendela divua ne tshimanyinu tshia bena Nazi, tshituakabenga bua kuenza. Bu tshipeta, babidi ba kutudi, meme ne Mielchen Ernst, tuakedibua mu nzubu wa dinyoka wa bampulushi. Au uvua umue wa ku mishindu mitamba bukole ya dinyoka ne bivua biumvuija ne: tuvua ne bua kuenza midimu mikole dituku dionso, nansha mu Dia lumingu, nansha kuikala mashika peshi munya. Pa tshibidilu, tshibawu tshitambe bunene tshivua tshia ngondo isatu, kadi tuakashalamu tshidimu tshijima. Bu kabuyi bua diambuluisha dia Yehowa, tshivua mua kuikala mupanduke.

Mu 1942, nsombelu wetu wa bena buloko wakakanaku, ne bakantuma bua kutumika bu muena mudimu wa mu nzubu mu dîku dia mpulushi wa SS pabuipi ne kamponya. Dîku edi diakampesha ndambu wa budikadidi. Tshilejilu, umue musangu umvua ngendakana ne bana, ngakamonangana ne Josef Rehwald ne Gottfried Mehlhorn, bena buloko babidi bikale ne bitampi bia triangle, tuakapeta mushindu wa kushintakajangana nabu amue mêyi a dikankamija.c

Bidimu bikole bia panyima pa mvita

Mu 1945 pakasemena biluilu bia mvita pabuipi, dîku dimvua ngenzela mudimu diakanyema, ne mvua ne bua kuya nadi. Pamue ne mêku makuabu a ba SS, bakenza musumba munene wa bena luendu batangile ku Ouest.

Matuku makese a kundekelu kua mvita avua makondakane ne muule tente ne njiwu. Ndekelu wa bionso, tuakapetangana ne bamue basalayi ba bena Amerike bakangitabila bua kudifundisha bu muntu muena budikadidi mu tshimenga tshivua kumpala kuetu. Nnganyi ungakapetangana nende muinamu? Josef Rehwald ne Gottfried Mehlhorn. Bavua bapete lumu ne: Bantemu bonso ba mu kamponya ka disubishilangana ka mu Sachsenhausen bavua bafike mu tshimenga tshia Schwerin benze luendu lubenzeja bua kubashipa. Nunku basatu ba kutudi bakaya batangile ku tshimenga atshi, tshivua ku mutantshi wa kilometre 75. Ndisanka kayipu dituvua nadi mu Schwerin bua kupetangana ne bana betu aba bonso bena lulamatu, bapanduki ba mu tumponya tua disubishilangana, pamue ne Konrad Franke.

Pabuipi ne Tshisua-munene 1945 nsombelu wa ditunga wakakana mu mushindu mualabale wa se: mvua ne mushindu wa kuenzela luendu ku kawulu. Nunku ngakalukila mutangile kumbelu! Kadi, mu luendu mvua ndala matuku makuabu pa mutu pa kawulu peshi ngimanyina pa bibandilu bia ku biibi. Mu Chemnitz, ngakumbuka mu ngala mutangile ku muaba utuvua basombele ne dîku dijima. Kadi mu musesu muvua biluilu bia bena Nazi bimanyine biela mbila ne: “Batungidianganyi badi muaba eu!” nzubu nansha umue kavua mupanduke. Tshijengu tshijima tshia muaba uvua bantu basombele tshivua tshibutula butubutu. Nansha nanku, ngakumvua disulakana pangakasangana mamu, tatu, Käthe, ne bana betu ba balume ne ba bakaji batshikale ne muoyo.

Nsombelu wa malu a mfranga uvua ukuatshisha buôwa mu Allemagne wa panyima pa mvita. Nansha nanku, bisumbu bia bantu ba Nzambi biakatuadija kuvulangana mu Allemagne mujima. Société Watch Tower wakenza muenda muonso bua kutupesha biamu bia mudimu wa buambi. Mudimu wa ku Betele wa mu Magdeburg, uvua bena Nazi bakange, wakatuadijilula. Mu 1946, bakambikila bua kutumika ku Betele ne bakantuma bua kuenza mudimu ku tshikuku.

Tshiakabidi mu dikandika ne mu buloko anu bua buambi

Magdeburg udi mu teritware au wa Allemagne wakafika ku dikokeshibua kudi ba-koministe. Bakakandika mudimu wetu mu dia 31 Tshimungu 1950, ne kukangabu Betele wa mu Magdeburg. Nenku mudimu wanyi wa ku Betele wakajika, tshivua tshikondo tshia dishidimunyibua dia mushinga. Ngakapingana mu Chemnitz, mupangadije bua kulamata kashendende ku bulelela ne kumanyisha Bukalenge bua Nzambi bu ditekemena dimuepele didiku bua bukua-bantu budi mu lutatu nansha mutuvua ku bukokeshi bua ba-koministe.

Mu Tshisanga 1951, ngakenza luendu pamue ne muanetu wa balume kampanda batangile ku Berlin bua kuangata nimero ya Tshibumba tshia Nsentedi. Patuakalukila, tuakabazuka bua mutuvua basangane ngala wa kawulu wa mu Chemnitz munyungulula kudi bampulushi. Bimueneke patoke ne: bavua batuelela meji, ne tuakakuatshibua diakamue.

Patuakafika mu buloko bua dindila dilumbuluishibua, mvua ne mikanda ivua ileja ne: mvua mukuatshibue mu buloko bua bidimu bivule kudi bena Nazi. Nunku, balami bakangangata ne kanemu. Umue wa ku bamfumu bakaji balami wakamba ne: “Nuenu Bantemu ba Yehowa kanuena babundi ba bibawu; kanuena bakanyine buloko.”

Wakalua umue musangu mu kazubu kanyi, mumvua ne bana betu bakuabu ba bakaji babidi e kuelaye mu musokoku tshintu kampanda muinshi mua bumue bua ku malalu etu. Tshivua tshinyi? Bible wende mene, uvuaye mulue kutushila. Musangu mukuabu, wakakumbula baledi banyi kumbelu, bualu kabavua mutantshi mule ne buloko. Wakapeta nimero ya Tshibumba tshia Nsentedi ne ndambu wa biakudia, wakasokoka bionso ebi mu yeye nkayende e kuluaye nabi bionso mu musokoku mu kazubu kanyi.

Kudi bualu bukuabu bundi musue kuvuluka. Imue misangu mu Dia lumingu mu dinda, tuvua tuimba misambu yetu ya teokrasi ne dîyi dikole mu mushindu wa se: bena buloko bakuabu bavua batutshila musambu wonso bikashi ne disanka.

Bukole ne diambuluisha bia kudi Yehowa

Mu dia 4 Kabitende 1951 munkatshi mua dilumbuluisha ku kabadi, nzuji kampanda wakela nseka mitela ku ntuadijilu kua tshiena-bualu etshi. Ngakenza tshibawu tshianyi tshia buloko mu tshimenga tshia Waldheim, pashishe mu Halle, ne kutshijikijila ku Hoheneck. Bualu bumue peshi abidi a mu tshikoso nealeje muvua Nzambi muikale tshinyemenu ne bukole kutudi tuetu Bantemu ba Yehowa ne muvua Dîyi diende ditupeteshe makanda.

Mu buloko bua mu Waldheim, bana betu Bantemu bakaji bonso bavua badisangisha pa tshibidilu mu nzubu umue, nunku tuakapeta mushindu wa kuenza bisangilu bia Buena-nkristo. Katuvua bitabila bua kuikala ne keleyo ne dibeji, kadi bamue bana betu ba bakaji bakapeta bimue bipesa bia bilamba ne bakaditatshisha bua kuenza tshilamba tshikese tshikale ne mufundu wa tshidimu tshia 1953, uvua wamba ne: “Tendelelayi Yehowa mu tshivualu tshinsantu.”​—Musambu 29:2, NW.

Umue wa ku balami bakaji wakatujikila mu tshimpitshimpi e kutufundaye diakamue. Mfumu wa buloko wakalua e kuambilaye babidi ba ku bana betu ba bakaji bua kuolola tshipesa tshia tshilamba atshi. “Nnganyi udi mutshienze?” ke muakebejaye. “Tshidi tshiumvuija tshinyi?”

Umue wa ku bana betu ba bakaji wakajinga bua kuitaba ne kutuambuila bujitu, kadi ne lukasa luonso tuakanungena panshipanshi munkatshi muetu nkayetu, bitabe bua se: tuvua ne bua kuabanyangana bujitu abu buonso buetu. Nunku tuakandamuna ne: “Tuvua batshienza bua kukolesha ditabuja dietu.” Bakanyenga tshilamba atshi, ne bu dinyoka, bakatupala biakudia. Kadi munkatshi mua diedibua nkonko edi, bana betu ba bakaji bavua bajule tshilamba etshi mulu bua se: tumone mua kukuata mufundu mukankamiji eu mu ngenyi yetu.

Pakakangabu buloko bua bantu bakaji mu Waldheim, bakatutuma tuetu ku Halle. Emu bakatuitabila bua kupeta mabuki, ne ntshinyi tshivua tshitelela mu mukolo wa mapapa uvua tatu muntumine? Biena-bualu bia Tshibumba tshia Nsentedi! Ntshidi mua kuvuluka ebi bivua biamba ne: “Dinanga dilelela didi ne dikuatshisha” ne “Mashimi adi afikisha ku dijimija dia muoyo.” Biena-bualu ebi ne bikuabu bivua bushuwa bishême, ne patuakabipitshishilangana umue kudi mukuabu mu musokoku, muntu yonso wakadiangatshila note yende nkayende.

Mu dibabuelela mu tuzubu tuabu, umue wa ku balami wakasangana note yanyi misokoka mu bisosa bia matela anyi. Panyima, wakambikila bua kungebeja e kuambaye ne: uvua musue kumanya bushuwa diumvuija dia tshiena-bualu tshia “Matekemena a batshinyi ba Yehowa bua 1955.” Bu muvuaye muena koministe, uvua mulengibue bikole ku muoyo bua lufu lua ntunga-mulongo wabu, Staline, mu 1953, ne matuku atshilualua avua amueneka mafiike. Buetu tuetu, matuku atshilualua avua ne bua kutuala mashintuluka mimpe kampanda mu nsombelu wetu wa mu buloko, kadi tshivua muanji kumanya bualu abu. Ngakamumvuija ne dieyemena dionso ne: matuku atshilualua bua Bantemu ba Yehowa avua matambe buimpe. Bua tshinyi? Ngakatela mufundu wa ntaku wa tshiena-bualu, Musambu 112:7: “Kena utshina ngumu mibi; mutshima w[e]nd[e] udi mushindame, udi weyemena Yehowa.”

Yehowa mmushale tshinyemenu tshianyi ne bukole buanyi

Kunyima kua kusama kukole, bakampatula mu buloko bidimu bibidi kumpala kua kujikija tshibawu, mu Luabanya 1957. Bena mbulamatadi ba ku Allemagne wa ku Est bakamfimpakaja kabidi bua bimvua ngenza mu mudimu wa Yehowa. Nunku, mu dia 6 Lumungulu 1957, ngakapeta mushindu wa kunyema ku tshimenga tshia Berlin wa ku Ouest, ne kumbukila kuinaku ngakaya ku Allemagne wa ku Ouest.

Ngakapetulula makanda a mubidi panyima pa bidimu bivule. Kadi too ne mpindieu ntshidi amu ne nzala mikole ya biakudia bia mu nyuma ne mutekemene nimero yonso mupiamupia wa Tshibumba tshia Nsentedi. Ku musangu ne ku musangu, ntu ndikonkonona meme nkayanyi. Ntshidi mutabale mu nyuma anyi? Ndiku mudime ngikadilu milenga anyi? Ditabuja dianyi diteta didi kabingila bua disamuna ne ditumbisha Yehowa anyi? Kusankisha Yehowa mu malu onso, bua kushalaye kashidi tshinyemenu tshianyi ne bukole buanyi, ke tshipatshila tshianyi.

[Mêyi adi kuinshi]

[Tshimfuanyi mu dibeji 26]

Biro bia SS ku Ravensbrück

[Mêyi a dianyisha]

Ku mutu: Stiftung Brandenburgische Gedenkstätten

[Tshimfuanyi mu dibeji 26]

Mukanda wanyi wa dianyisha bua kuenza mudimu pambelu pa kamponya