Nkonko ya babadi
Bidi mua kuambibua ne: ngumvuilu mupiamupia wa matuku mashale aa wa muaku “tshipungu” udi mu Matayo 24:34 (NW) udi ufila lungenyi lua se: nshikidilu wa ndongoluelu eu wa malu udi mua kusemejibua mutantshi mule mu matuku atshilualua anyi?
Nansha kakese. Bishilangane, ngumvuilu muakajilula pa muanda eu mu matuku mashale aa udi ne bua kutuambuluisha bua kuikala misangu yonso mu dindila dia nshikidilu. Bua tshinyi bidi mua kuambibua nanku?
Bushuwa, anu muakumvuija Tshibumba tshia Nsentedi tshia dia 1 Kasuabanga 1995, Yezu wakatumika ne tshiambilu “tshipungu etshi” bua kufunkuna bantu babi ba mu tshikondo tshiende. (Matayo 11:7, 16-19; 12:39, 45; 17:14-17; Bienzedi 2:5, 6, 14, 40) Katshivua diumvuija dia bule bujadika bua tshikondo tshituadije mu dituku kampanda disunguluke nansha.
Bushuwa, “Nkonko ya Babadi” ya mu muine nimero au wa Tshibumba tshia Nsentedi ivua miele kashonyi pa malu manene abidi: “Tshipungu tshia bantu katshiena mua kuangatshibua bu lupolu ludi ne bungi bua bidimu bujadika” ne: “Bantu ba tshipungu kampanda batu ne muoyo bua lupolu luipi mu bualabale kansanga.”
Tutu tutumika misangu mivule ne muaku “tshipungu” mu ngumvuilu eu. Tshilejilu, tudi mua kuamba ne: ‘Masalayi a mu tshipungu tshia Napoléon kaavua mamanye tshintu nansha tshimue pa ndeke ne bombe ya nikleere.’ Tudi mua kuikala tutela anu masalayi avua maledibue mu tshidimu tshimue mene ne Napoléon anyi? Tudi mua kuikala tutela anu masalayi a bena France avua mafue kumpala kua Napoléon anyi? Kabiena nanku to; bia muomumue, katuena mua kuteta kutumika ne muaku “tshipungu” bua kujadika bungi kampanda bua bidimu. Nansha nanku, tudi mua kuela meji ku lupolu luipi ndambu, ki nnkama ya bidimu miangatshile ku tshikondo tshia Napoléon too ne mu matuku atshilualua to.
Mbia muomumue ne ngumvuilu wetu wa tshiakamba Yezu mu mulayi wende mufila pa Mukuna wa Oleve. Dikumbana dia malu mashilashilangane a mu mulayi eu didi dileja ne: nshikidilu wa ndongoluelu eu ukadi pabuipi. (Matayo 24:32, 33) Vuluka ne: bilondeshile Buakabuluibua 12:9, 10, ne dijalamibua dia Bukalenge bua Nzambi bua mu diulu mu 1914, Satana wakedibua panshi pabuipi ne buloba. Buakabuluibua udi usakidila ne: mpindieu Satana udi ne tshiji tshikole. Bua tshinyi? Bualu mmumanye ne: “udi ne tshikondo tshîpi.”—Buakabuluibua 12:12, NW.
Nunku bivua biakanyine bua Tshibumba tshia Nsentedi tshia dia 1 Kasuabanga kuikalatshi ne ka-tshiena-bualu kakese ka se: “Shala mutabale!” Tshikoso tshivua tshilonda tshivua tshiamba ne: “Kabiena bikengela bua tumanye tshikondo tshijalame tshia malu aa. Bishilangane, ntema yetu idi ne bua kuteyibua pa dikala batabale, didima ditabuja dikole, ne ditungunuka ne kuikala ne bivule bia kuenza mu mudimu wa Yehowa—ki mpa dienza makumi bua kumanya matuku.” Pashishe tshiakatela mêyi a Yezu a ne: “Tungunukayi ne kutentekela, nuikale batabale, bualu kanuena bamanye dîba diakumbana tshikondo tshijadika. Kadi tshindi nnuambila ndi ntshiamba kudi bonso, nushale batabale.”—Mâko 13:33, 37, NW.