‘Mbalamate ku dilongeshibua diabu dia malu a Nzambi’

MUKAJI kampanda wa mu tshimenga tshia Miami, mu Floride, ku États-Unis, wakatumina tshikandakanda kampanda tshia muaba uvuaye musombele mukanda ne: “Mu dia 10 Tshisua-munene bakiba kabuta ka ku bianza ka muananyi wa balume mu kasalu kakese. Kabuta aka kavua ne mukanda wende wa bu-kanyemesha, karte ka Bukubi bua Bantu, ne bikuabu, pamue ne dolare 260.

“Panyima pa yeye mumane kumanyisha mfumu wa mudimu dijimina edi, wakalua kumbelu. Ku dilolo kuisu kutshivua kutoke bakamubikila ku nshinga kudi nsongakaji kampanda muena muakulu wa tshiena-Espagne, ne muena mudimu [wa telefone] bua kukudimuna bivuaye wamba, wakamuambila ne: uvua mupete kabuta kende ka ku bianza.

“Wakamupesha adresse wende. . . . Wakamupesha kabuta, katshivua anu muvuaku, pamue ne dolare 260.

“Uvua mumone muivi wiba kabuta kende e kuelaye mbila. Muivi kulekelela kabuta e kunyema. Mu tshine tshikondo atshi muananyi wa balume uvua mumujimine kuisu, nunku kuluaye ne kabuta aka kumbelu e kubikilaye ku nshinga.

“Yeye eu ne dîku diende m’Bantemu ba Yehowa. Mbimueneke patoke se: mbalamate ku dilongeshibua diabu dia malu a Nzambi.”

Bantemu ba Yehowa kabena baleja bululame bua kupetabu butumbi kudi bantu nansha. (Efeso 6:7) Kadi, badi bajinga ne muoyo mujima bua kuambika Tatuabu wa mu diulu, Yehowa, butumbi. (1 Kolinto 10:31) Dinanga diabu dia Nzambi ne dia muntu nabu didi dibasaka bua kumanyisha “lumu luimpe” pa bidi bitangila Bukalenge bua Nzambi. (Matayo 24:14) Ku diambuluisha dia Bukalenge ebu, Nzambi udi ulaya bua kukudimuna buloba mu mparadizu mulenga. Pashishe buloba nebuikale muaba ki ng’anu wa bulenga bua ku mubidi kadi bua nsombelu wa tshitembu mutamba buimpe, muaba wikala bululame mua kutshimuna kashidi.​—Ebelu 13:18; 2 Petelo 3:13.