Dimukila ditumpilangana ngenyi mibi

MUAMBI kampanda wa evanjeliyo mutambe kumanyika ku televizion wakasonguela ne dîsu dikole muyishi nende bua dienda dia masandi. Kadi, mu tshidimu tshimuepele, bakajikidila muambi wa evanjeliyo mufundianganyi eu ne mukaji wa ndumba.

Mu tshilumbu tshikuabu, bukokeshi kampanda bunene bua buloba buakatuma bantu bua kufikisha bitupa bivua biluangana mvita ku dikeba ditalala. Eku, ditunga dimuedimue edi diakatuma mu musokoko bangenda badi ba bingoma mu matunga menyi bua kusumbisha bingoma bia mushinga wa dolare miliyare ya bungi.

Bu mudi nsombelu muanyika patoke wa buena mpala ibidi mutampakane mu bantu, bidiku bikemesha mudi diela mpata dipingane mu bualabale bunene dieyemenangana anyi? Bua bantu bavule, diela mpata bua ngenyi ya bakuabu ndilue tshibidilu.

Bu mutudi bena nkristo, tudi ne bua kuikala badimuke bua kubenga kulekela mmuenenu bu nunku inyanga malanda etu ne bena kuitabuja netu bena lulamatu. Nansha muakatubela Yezu Kristo bua kuikala “ne budimu bu bua nyoka” patudi munkatshi mua baluishi betu, kakamba ne: tudi ne bua kuikala batentekedi ba balondi bende balelela nansha. (Matayo 10:16) Pa nanku, nnjiwu kayi idi nayi ditumpila bakuabu ngenyi mibi? Mmu bitupa kayi mutudi ne bua kuikala nangananga badimuke bua kuepuka dinyikibua bu nunku? Ne mmunyi mutudi mua kulama malanda etu a mushinga ne bena nkristo netu?

Dilongesha dipetela ku malu a kale

Ditumpila bakuabu ngenyi mibi kakuyi kabingila kajadiki ka bualu didi mushindu umue ne dibalumbuluisha. Bidi bu se: tudi tuya lukasa ku dikomesha ne: mêyi peshi bienzedi biabu bidi amu mushindu kampanda udi usokoka bualu kansanga bukena bulonda mulongo ne bua budimu. Misangu mivule tshiledi tshia tshilumbu tshitu mmuenenu mubi wa malu, bu mutudi mua kubimona mu muyuki wa mu Bible udi mu Yoshua nshapita wa 22.

Bena Izalele bakavua bajikije dikuata diabu dia Buloba Bulaya ne batshifumina ku dipeta teritware ya bisa biabu. Bisa bia Rubene ne Gade ne tshitupa tshia tshisa tshia Manasé biakasa tshioshelu “tshinene tshia dikema” ku muelelu kua Musulu wa Yordane. Bisa bikuabu biakatshinka mu mushindu mubi ne: tshivuabu benze tshivua tshienzedi tshia butontolodi. Bivua bitekemena se: bisa bisatu ebi bivua ne bua kutumika ne tshintu tshiibaka etshi tshinene bua milambu, pamutu pa kuya ku ntenta wa disambakena ku Shilo, muaba uvua musungula bua ntendelelu. Diakamue, bisa bifundianganyi ebi biakenza malongolola a mvita.​—Yoshua 22:10-12.

Bivua bimpe muakakulanganabu ne bana babu bena Izalele pa kutuma kasumbu ka baleji-mpala kalombola kudi Pinehasa. Pakamanabi kumvua mabanda a dipanga lulamatu, ditomboka, ne butontolodi kudi Yehowa, bisa bivuabu belele meji ne: mbienze bibi biakumvuija kabingila kabi bua tshioshelu etshi tshinenanenayi. Pamutu pa kuikalatshi tshioshelu bua milambu, tshivua ne bua ‘kuikala bu mumanyi wa bualu’ bua buobumue bua bisa bia Izalele mu ditendelela Yehowa. (Yoshua 22:26, 27) Kasumbu ka baleji-mpala kakalukila kasankishibue muvua bualu bubi nansha bumue kabuyi kudi bana babu. Nenku mvita ya bena ditunga ne diela mashi panshi dinene biakepudibua.

Ndilongesha kayipu buetu tuetu bua kubenga kuikala ne zukuzuku bua kutumpila bakuabu ngenyi mibi! Misangu mivule tshidi tshimueneka tshikale tshilelela ku dibambisha dia pa mutu pa mutu tshianana tshitu tshimueneka tshikale tshishilangane menemene panyima pa dikonkonona diondoke. Ebi mbilelela mu mishindu mivule ya nsombelu wa muena nkristo.

Mmuenenu wetu wa bakulu

Mu dikumbaja majitu abu a “kudiisha tshisumbu tshia Nzambi,” imue misangu bakulu batu bamona dikengela dia kubela bantu kabukabu mu tshisumbu. (Bienzedi 20:28, NW) Tshilejilu, mmunyi mututu tuandamuna bikala mukulu kampanda muakulangane netu bua bana betu pa malu kansanga bu mudi malunda mabi peshi bienzedi bikena bilonda mulongo ne muntu ukena ne bitupa bia mubidi bia muomumue nabu? Tutu tuela meji ne: mukulu eu udi ne lungenyi kampanda lusokome ne tudiambila ne: ‘Katu musue dîku dietu nansha kakese’ anyi? Bitualekela meji bu nunku atunyanga, tudi mua kunyingalala pashishe. Diakalenga dia mu nyuma dia bana betu didi mua kuikala mu njiwu, ne tudi ne bua kuanyisha mibelu ya mu Mifundu idi ne diambuluisha.​—Nsumuinu 12:15.

Padi mukulu kampanda wa mu tshisumbu utubela, katukebi lungenyi kampanda lusokome nansha. Kadi, tudiebeje tuetu nkayetu né kudi mushindu kampanda utudi mua kubabidila mibelu yende miashila pa Bible. Mupostolo Paulo wakafunda ne: “Bushuwa, diba didibo banyoka muntu, dinyoka didi dimueneka bu bualu bua dibungama, kabuyi bua disanka. Kadi pashishe, didi dipetesha bavua badipete tshimuma tshia bupole ne buakane.” (Bena Hebreyi 12:11, MMM) Pa nanku tuikalayi ne dianyisha ne tuele lungenyi pa malu mu mushindu muimpe. Uvuluke ne: misangu mivule bitu bikole bua bakulu kutupesha mibelu bu mudibi bitukolela petu bua kuyitaba.

Nyanji bua baledi

Padibu bapetangana ne mikandu kampanda ya baledi, bansonga bakuabu batu bela mpata bua ngenyi idi nayi baledi babu. Bamue bansonga badi mua kuamba ne: ‘Bua tshinyi baledi banyi badi bela mikenji bungi nunku? Ki mbanange bua meme kusankidila muoyo.’ Kadi, pamutu pa kuenza nkomenu bu nunku, bansonga badi bakengela bua kukonkononabu bualu ebu mu mushindu muimpe.

Baledi mbapitshishe bidimu bivule mu ditabalela bana babu. Ebi biakalomba didipangisha bintu bivule bia ku mubidi ne mikuabu mishindu. Kudiku kabingila kampanda bua kukoma ne: mpindieu mbangate dipangadika dia kukengesha nsombelu wa bana babu bansonga anyi? Kabienaku bitambe kuikala bia meji bua kuela lungenyi ne: dinanga didi disonsola baledi aba bua kukuba bana babu ne kubatabalela anyi? Kabienaku mua kuikala diodi dinanga edi didi dibasaka bua kuteka imue mikandu bua bana babu, badi mpindieu bakama ntatu mipiamipia mu nsombelu anyi? Mmunyipu mudibi mua kuikala dibula bulenga ne dianyisha bua kutumpila baledi bena dinanga ngenyi mibi!​—Efeso 6:1-3.

Mmuenenu wetu kudi bena nkristo netu

Bavule batu bateta bua kudianjila kudiwula bakuabu ne kubateka mu mulongo kampanda. Bidi munyi bituikala tuvua ne mmuenenu wa nunku ne bikale mu mushindu kampanda batentekedi ba bantu bakuabu? Tudi mua kuikala banyanga kudi bulongolodi ebu pa muanda eu anyi?

Tshilejilu, ela meji ne: umue wa ku bana betu ba mu nyuma udi ne nzubu muimpe ne mashinyi a mushinga mukole. Tudi ne bua kukoma diakamue ne: muanetu eu mmunangi munekeshi wa bintu bia ku mubidi udi kayi uteka bipatshila bia Bukalenge pa muaba wa kumpala mu nsombelu anyi? Bamue bena nkristo badi mua kuikala ne mushindu wa kupeta bintu bilenga, kadi abi kabiena biumvuija ne: badi ne ngenyi mibi peshi ne: kabena ‘bakeba diambedi bukalenge.’ Badi mua kuikala ne bivule bia kuenza mu midimu ya mu nyuma, ne kalolo konso batumika ne bintu biabu bia ku mubidi bua kulubuluja bipatshila bia Bukalenge, pamu’apa mu mushindu ukena usuya bantu.​—Matayo 6:1-4, 33.

Tshisumbu tshia bena nkristo tshia mu siekele wa kumpala tshivua tshienza ne bantu ba mishindu yonso​—babanji ne bapele. (Bienzedi 17:34; 1 Timote 2:3, 4; 6:17; Yakobo 2:5) Nzambi kêna utshinkila bantu pa nshindamenu wa nsombelu wabu wa malu a mfranga to, ne tuetu petu katuena ne bua kuenza nanku. Tudi ne bua kunanga bena kuitabuja netu batetshibue ne bena lulamatu, ‘katuyi ne kansungasunga.’​—1 Timoteyi 5:21, MMM.

Mu bulongolodi ebu budi bulale mu bukokeshi bua Satana, diteka bantu mu milongo kampanda ne ditentekelangana bidi bimueneka mu mishindu kabukabu. Tshilejilu, muntu udi mua kuikala wangatshibua bu muena tshikisu peshi munangi munekeshi wa bintu bia ku mubidi amu bua nsombelu wende wa kale. Kadi mutudi bena nkristo, katuena ne bua kupona mu mmuenenu ya nunku. Bulongolodi bua Yehowa ki mmuaba wa dinanga dia lubombo ne ditentekelangana. Bena nkristo bonso balelela badi bakengela bua kuidikija Yehowa Nzambi, kudiye “kakuena dipanga buakane peshi kansungasunga.”​—2 Kulondolola 19:7, NW; Bienzedi 10:34, 35.

Ikala musonsola kudi dinanga

Mifundu idi yamba patoke ne: “bonso bakenza malu mabi, ne badi ba[p]anga ku[p]eta butumbi kudi Nzambi.” (Lomo 3:23) Pa nanku tudi tukengela bua kuangata batendeledi netu bu bantu badi mu buobumue netu mu didienzeja bua kufila mudimu muanyishibue kudi Nzambi. Bituikala balekele ditentekelangana peshi nyanji mikuabu mibi inyanga malanda etu ne muanetu wa mu nyuma kampanda, tulombe diambuluisha dia Nzambi bua kuluisha mmuenenu bu nunku bua se: katukuatshibu kudi Satana. (Matayo 6:13) Wakatuisha Eva ne: Yehowa uvua ne ngenyi mibi, kavua ne ditabalela bua diakalenga diende, ne uvua mulame madikadidi avua mua kuikala mamuenze bushuwa muena disanka. (Genese 3:1-5) Ditumpila dietu dia bana betu ngenyi mibi didi diambuluisha amu bipatshila biende.​—2 Kolinto 2:11; 1 Petelo 5:8.

Bituamona se: tudi ne dinyikibua dia kutumpila bakuabu ngenyi mibi, tukonkonone tshilejilu tshia Yezu Kristo. Nansha muvuaye Muana mupuangane wa Nzambi, kakakeba ngenyi mibi mu bayidi bende. Kadi, Yezu wakakeba bivua bimpe mu buobu. Pavua bayidi bende bafuilakana miaba ya ku mutu, kakatshinkakaja ne: bavua ne ngenyi mibi ne kupingaja bapostolo bakuabu bapiabapia 12 pa muaba wabu to. (Mâko 9:34, 35) Kabayi bapuangane, bavua mua kuikala mu mushindu mukuabu benzejibue kudi nshidimukilu wa Buena-Yuda butontolodi, buvua buzangika diditambisha ne mashilangana a milongo mu bantu. Yezu uvua mumanye ne: tshisonsodi tshia nshindamenu tshia balondi bende tshivua dinanga dia Yehowa. Bua dileja dinanga bu nunku ne dilamata Yezu, bakafutshibua bia bungi menemene.​—Luka 22:28-30.

Bituikala ne bua kutangila bena kuitabuja netu mu mushindu wa ditentekela, ebi nebikale bu badi batangidila bintu mu lumuenu ludi lubipisha bintu. Tshintu nansha tshimue katshiakumueneka mu mushindu ututshi bushuwa. Pa nanku tutangidilayi mu lumuenu lua dinanga. Kudi bijadiki bivule bidi bileja ne: bena nkristo netu bena bulamatshi mbatunange ne mbakanyine ditabalela dietu dilenga. (1 Kolinto 13:4-8) Nenku tubaleje dinanga ne tudimukile ditumpilangana ngenyi mibi.

[Tshimfuanyi mu dibeji 26]

Mmunyi muutu wangata bakuabu badi batendelela Nzambi ne lulamatu luonso?

[Tshimfuanyi mu dibeji 27]

Dieyemena ne kanemu bidi bienza Bantemu ba Yehowa dîku dimue dia disanka