Kuondo ka muoyo​—Mbujitu anyi ndikuatshisha?

‘KUONDO kanyi ka muoyo kadi kantatshisha!’ Ku misangu, pabuipi ne buonso buetu tutu tumvua kuondo ka muoyo katakanyika. Nyanji ya nunku idi mua kutuadijila ku dilubakana dia mu lungenyi mitangile ku kanyinganyinga kakole. Kuondo ka muoyo kalubakane kadi mene mua kulundula dibungama anyi ngumvuilu mukole wa dipangila.

Nenku, patudi tukatangila mushindu’eu, kuondo ka muoyo ki mbujitu anyi? Bamue badi mua kumvua ne: bidi nanku. Bipungu bia diambedi bia bena meji bivua pa tshibidilu biangata kuondo ka muoyo bu bukole bupiana ne bua ku tshilelelu. Bavule bakajingulula ne: kuondo ka muoyo kavua bulombodi bua mu lungenyi bufila buludiludi kudi Nzambi nkayende. Nenku mbabikile kuondo ka muoyo bu “dikalaku dia Nzambi mu muntu,” “ngikadilu wetu wa ku ntuadijilu,” ne kabidi bu “dîyi dia Nzambi.”

Kadi, mu bidimu bishalebi, mbilue bualu butangalake bua kuamba ne: kuondo ka muoyo kadi nangananga bukole budipetela​—tshipeta tshia buenzeji bua baledi ne bua mu nsombelu wa bantu. Tshilejilu, bamue bashikuluji ba malu a lungenyi badi baleja ne: muana udi ulonga mua kukandamena ngikadilu mubi nangananga bua buôwa bua dinyoka, pa kuitaba ne: tshitudi tubikila ne: kuondo ka muoyo ndipeta patupu dia malu a mushinga ne mitabuja a baledi betu nkayabu. Bakuabu badi bafunkuna mudimu utu nawu nsangilu wa bantu pa tshibidilu mu disambulujilangana malu a mushinga ne mêyi-makulu. Bamue badi bangata ditakanyika dia kuondo ka muoyo bu dikokangana dia patupu pankatshi pa tshitudi basue kuenza ne tshidi nsangilu wa bantu mutatshishanganyi utulomba bua kuenza!

Nansha mudiku mêyi mamba adi atangila kuondo ka muoyo, misangu ya bungi bantu bakashala bashindamene ku bualu kampanda nansha muvuaku baledi, mêku, ne nsangilu yonso bualu kuondo kabu ka muoyo kavua kabambile bua kuenza nanku. Bamue bavua mene badiakaje bua kujimija muoyo wabu anu bua kulonda kuondo ka muoyo! Ne nansha mudiku dishilangana dinene mu nshidimukilu ya mu bulongolodi ebu, bienzedi ebi bu mudi dishipangana, buivi, masandi, mashimi, ne tshibindi mbiangatshibue bu malu mabi miaba ya bungi pa buloba. Ebi kabienaku bifila tshijadiki tshia se: kuondo ka muoyo nka ku tshilelelu ne nkapiana anyi?

Kuondo ka muoyo​—Mmuenenu wa mu Bible

Muena bukenji bulelela mu tshilumbu etshi n’Yehowa Nzambi. Kakuyi bua diamba, “nyeye mene [Nzambi] wakatufuka, tudi bantu bende.” (Musambu 100:3) Mmumanye bimpe menemene mutudi benjibue. Bible, Dîyi dia Nzambi, udi umvuija ne: muntu uvua muenza mu “tshimfuanyi” tshia Nzambi. (Genese 1:26, NW) Muntu uvua mufukibue ne mgumvuilu wa tshidi tshiakane ne tshidi tshibi; katshia anu ku ntuadijilu, kuondo ka muoyo kavua tshitupa tshisuikakaja ku ngikadilu wa muntu.​—Fuanyikija ne Genese 2:16, 17.

Mupostolo Paulo udi ushindika bualu ebu mu mukanda wende mutumina bena Roma, pa kufunda ne: “Padi bantu ba bisamba bikuabu bidi kabiyi ne mikenji [ya Nzambi] benza pa tshibidilu malu a mu mikenji, bantu aba, nansha mudibu kabayi ne mikenji, badi mikenji buabu buobu bine. Mbuobu bine badi baleja ne: malu a mu mikenji mmafunda mu mitshima yabu, eku kuondo kabu ka muoyo kafila bumanyishi pamue nabu ne, mu ngenyi yabu buobu bine, badi bikale bapishibua anyi babingishibua.” (Lomo 2:14, 15, NW) Bambisha ne: bavule bavua kabayi bakolesha muinshi mua Mikenji ya Nzambi mipesha bena Yuda batshivua balonda amue a ku mêyi-maludiki a mikenji ya Nzambi, kabiyi ku buenzeji bua bantu, kadi “pa tshibidilu”!

Nenku, kuondo ka muoyo ki mbujitu nansha, ndipa dia kudi Nzambi, ndikuatshisha. Bushuwa, kadi mua kutukebela kanyinganyinga. Kadi patudi tukateleja bimpe, kadi kabidi mua kutufuta ne nyanji ya disankishibua diondoke ne ditalala dia munda. Kadi mua kutulombola, kutukuba, ne kutusonsola. Mukanda kampanda (The Interpreter’s Bible) udi umvuija ne: “Makanda a mu lungenyi ne a mubidi adi mua kulamibua anu padi muntu uteta mua kujibikila dijimba pankatshi pa tshidiye wenza ne tshidiye umvua ne: udi ne bua kuenza.” Mmunyi mudi muntu mua kujibikila dijimba adi? Kudiku mushindu wa kufumba ne kulongesha kuondo ketu ka muoyo anyi? Netukonkonone nkonko eyi mu tshiena-bualu tshidi tshilonda.