Bapandisha mu tshikondo tshia makenga
NZUBU wa bisasa bitanu bia disumbishila bintu mu Séoul, ku Corée, wakabumbuka musangu umue, kupukila nkama ya bantu munda muende! Bena mudimu wa dipandishangana bakatumika bikole munya ne butuku bua kupandisha mioyo mivule mitambe. Bu muakapita matuku, diakalenga dia kupeta bapanduke bakuabu bavua bajika mu mushiki wa bibumba bia milonda ne biamu diakabanga kukepela.
Bu muvuaku kakutshiyi ditekemena nansha dimue, tshintu kampanda tshia dikema tshiakenzeka. Dîyi dipombe ne dia kanyinganyinga diakumvuika difumina muinshi mua bibumba biupuke. Bapandishanganyi bakumbula ne lukasa luonso ne bianza biabu bitupu bua kumona mua kupikula mukaji wa bidimu 19 uvua muikale mujika ne muoyo munkatshi mua matuku 16 majima. Tshikuepa tshitshibuke mu bule tshiakenza ditubu dia bukubi pa mutu pende ne kumukubatshi ku tone ne tone ya bibumba bia milonda bivua bikuluka. Nansha muvuaye mufubidile bikole ne mutapike, uvua mupanduke ku lufu!
Matuku etu aa, mbualu bukole bua ngondo mujima kupitaye kabayi bamanyishe tshipupu kampanda, bu mudi tshikumina, mvula mukole wa mabue, mikuna iluka mudilu, njiwu, anyi nzala. Ne miyuki idi ivuayija mubidi ya dipandisha ne dipanduka idi ikemesha ne ikoka ntema ya miliyo mivule ya bantu badi balonda ngumu. Kadi, didimuija dia dikenga didi dilua—ditambe bunene kupita dikenga dionso dikuabu dia mu miyuki ya bantu—pa tshibidilu mbadilengulule. (Matayo 24:21) Bible udi umvuija muanda eu utshilualua mu mêyi aa: ‘Makenga neamuangalake mu tshisamba ne mu tshisamba tshia bantu, tshipupu tshinene netshibike, tshifume kumfudilu kua buloba. Badi Yehowa ushipa mu dituku adi nebikale pa buloba ku ditengu diabu dimue too ne kumfudilu kuabu. Kabena babajinga, kabena babasangisha, kabena babajika, kadi nebikale anu bu tumvi panshi pa buloba.’—Yelemiya 25:32, 33.
Mêyi a dikema! Kadi, dishilangane ne bipupu bia ku bintu bifuka ne njiwu mivule, dikenga edi kadiakuikala bu dishipangana kadiyi disunguluja. Bushuwa, lupandu—lupandu luebe—ludi mua kuenzeka!
Tshikondo tshia mitalu
Bua kujingulula bualu ebu tshishiki, muntu udi ne bua kumvua bua tshinyi dikenga edi dia buloba bujima didi ne bua kuanji kulua. Bushuwa, ke mushindu umuepele mulelela wa kujikija ntatu ya bukua-bantu. Bantu bakese lelu’eu ke badi badiumvua mu bupole ne mu bukubi. Nansha mudiku madikolela matambe buimpe a bena sianse, masama a tshiambu adi atungunuka ne kukengesha bantu pa buloba. Mvita idi ifumina ku makokangana a bitendelelu, bisa, ne a bena tshididi idi ishipesha mioyo ya bantu binunu ne binunu. Nzala idi ivudija ntatu ne makenga bia balume, bakaji, ne bana badi kabayi ne bualu. Dinyanguka dia malu a tshitembu didi dimungutula nshindamenu muine wa nsangilu wa bantu; nansha bana bine mbanyanguke.
Ne bujalame bua pa buabu, mulayi wa mu Bible mufunda kukadi bidimu bipite pa 1 900 udi umvuija nsombelu wetu’eu. Udi wamba ne: “Manya kabidi bimpe ne: matuku a nshikidilu neikale matuku makole.”—2 Timoteyi 3:1, Mukanda wa Mvidi Mukulu; fuanyikija ne Matayo 24:3-22.
Buebe wewe mbimueneke bia meji bua se: Nzambi wa dinanga udi mua kupua dikenga dietu muoyo anyi? Bible udi wamba ne: ‘Nzambi mene wakafuka buloba ne wakabuenza, . . . kakabufuka bu tshintu tshia patupu, wakabufuka bua bantu bashikamepu.’ (Yeshaya 45:18) Eyowa, pamutu pa kulekela banyanga dibulunge edi dilengele ne bonso badi basombapu bafua, Nzambi neakose tshilumbu etshi. Lukonko ludi ne: Mmunyi muenzaye nunku?
Sungula muoyo!
Bible udi wandamuna mu Musambu 92:7 ne: ‘Biadiunda bantu babi bu mudi mashinde atoloka, ne bikala benji ba malu mabi bonso ne diakalengele, budi bua bobo kujimijibua tshiendelele.’ Bua Nzambi, mushindu wa kujikija ntatu ya pa buloba nkumbusha bubi buine. Diakalenga, ebi kabiena biumvuija ne: bantu bonso badi ne bua kubutuka nansha. Musambu 37:34 udi utujadikila ne: ‘Windile Yehowa, ulamate njila wende, yeye neakubandishe bua wewe kupiana buloba. Pabutulabu bantu babi, wewe neumone muanda eu.’
Mêyi aa adi aleja ne: kudi mushindu wa kupanduka ku dikenga dipite bunene diatulukila bukua-bantu mu mishindu yonso. Nzambi mmutupeshe disungula. Mêyi avua Mozese musengelele nawu bena Izalele pavuabu badilongolola bua kubuela mu Buloba Bulaya adi bia muomumue atutangila lelu’eu: ‘Ngakuteka muoyo ne lufu, ne disanka ne mulawu kumpala kuenu lelu: nunku nudisunguile muoyo, nenuikale ne muoyo ne nuenu ne bana benu.’ (Dutelonome 30:19) Kadi mmunyi mudi muntu ‘udisunguila muoyo’ ne upanduka? Lupandu lulelela ludi lumvuija tshinyi menemene?
[Mêyi a dianyisha bua tshimfuanyi mu dibeji 2]
TSHIZUBU: Ditayika: Copyright © Gene Blevins/Los Angeles Daily News
[Mêyi a dianyisha bua tshimfuanyi mu dibeji 3]
Yunhap News Agency/Sipa Press