Lamayi bikole dituku dia Yehowa mu lungenyi
“Mu matuku a ku nshikidilu, nekulue basekianganyi.”—2 PETELO 3:3, NW.
1. Mmuenenu kayi wa mitalu uvua nende muena nkristo mukuabu wa matuku etu aa?
MINISTRE mukuabu udi muenze bidimu bipite pa 66 mu mudimu wa ku dîba ne ku dîba wakafunda ne: “Misangu yonso ntu muikale ne ngumvuilu kampanda wa mitalu. Mu lungenyi luanyi, Armagedone utu misangu yonso anu bu dituku diabuabua. (Buakabuluibua 16:14, 16) Anu bu tatu, ne tatuende uvua kumpala kuende, ndi muikale ne nsombelu anu bu muakabela mupostolo [Petelo], ‘mulame bikole mu lungenyi dikalaku dia dituku dia Yehowa.’ Misangu yonso ntu mmona bulongolodi bupiabupia bulaya bu ‘bulelela nansha mudibu kabuyi bumueneka.’”—2 Petelo 3:11, 12, NW; Ebelu 11:1, NW; Yeshaya 11:6-9; Buakabuluibua 21:3, 4.
2. Kulama bikole mu lungenyi dituku dia Yehowa kudi kumvuija tshinyi?
2 Tshiambilu tshia Petelo tshia ‘kulama bikole mu lungenyi’ padiye wakula bua dituku dia Yehowa tshidi tshiumvuija ne: katuena tudisemeja kule mu lungenyi luetu. Katuena ne bua kupua muoyo se: dituku dialua Yehowa kubutula ndongoluelu eu wa malu bua kushisha kuasa bulongolodi buende bupiabupia bulaya dikadi pabuipi menemene. Didi ne bua kuikala dilelela kutudi mu mushindu wa se: tudi tudimona patoke, bu didi buludiludi kumpala kuetu. Au ke mushindu uvuadi dilelela kudi baprofete ba Nzambi ba kale, ne misangu mivule bakakula bua dikala diadi pabuipi.—Yeshaya 13:6; Yoele 1:15; 2:1; Obadaya 15; Sefanya 1:7, 14.
3. Ntshinyi tshivua tshimueneke ne: ke tshiakajudija mubelu wa Petelo udi utangila dituku dia Yehowa?
3 Bua tshinyi Petelo uvua mutubele bua kumona dituku dia Yehowa anu bu divua mua kulua, mutudi mua kuamba, “dituku diabuabua”? Bualu mbimueneke se: bamue bakavua batuadije kuseka lungenyi lua dikalaku dia Kristo dilaya, tshikondo tshivuabu ne bua kunyoka benji ba malu mabi. (2 Petelo 3:3, 4) Nenku mu nshapita 3 wa mukanda wende muibidi, utuamona mpindieu, Petelo udi wandamuna mabanda a basekianganyi aba.
Dilomba dia musangelu dia kuvuluka
4. Ntshinyi tshidi Petelo musue bua tuetu kuvuluka?
4 Disuangana dia Petelo bua bana babu ndileja mu mushindu udiye ubabikila misangu mivule mu nshapita eu ne: “bananga.” Muikale ubalomba ne musangelu wonso bua kabapu muoyo bikavuabu babalongeshe, Petelo udi utuadija ne: ‘Bananga, . . . ndi ntabuluja mitshima yenu miakane bua kunuvuluija bua nuenu kuvuluka mêyi akambibua diambedi kudi baprofete ba tshijila, ne mukenji wa Mukalenge ne Musungidi wakanuambilaye kudi bapostolo benu.’—2 Petelo 3:1, 2, 8, 14, 17; Yuda 17.
5. Ntshinyi tshiakamba bamue baprofete bua dituku dia Yehowa?
5 ‘Mmêyi kayi akambibua diambedi kudi baprofete ba tshijila,’ adi Petelo ubela babadi ba mukanda wende bua kuvulukabu? Ee, ng’aa adi atangila dikalaku dia Kristo mu bukokeshi bua Bukalenge ne adi atangila dilumbuluisha dia bantu badi kabayi bena Nzambi. Petelo ukavua mudianjile kukoka ntema ku mêyi aa. (2 Petelo 1:16-19; 2:3-10) Yuda udi wakula bua Enoke, eu uvua muprofete wa kumpala udibu bafunde bualu buende wakadimuija bua dilumbuluisha dia Nzambi bua kupisha benji ba bubi. (Yuda 14, 15) Baprofete bakuabu bakalonda Enoke, ne Petelo ki mmusue bua tuetu kupua muoyo biakafundabu.—Yeshaya 66:15, 16; Sefanya 1:15-18; Zekâya 14:6-9.
6. Mmêyi kayi a Kristo ne a bapostolo bende adi atupesha butoke pa bidi bitangila dituku dia Yehowa?
6 Kabidi, Petelo udi wambila babadi ba mukanda wende bua kuvuluka ‘mukenji wa Mukalenge ne Musungidi.’ Mukenji wa Yezu udi ne mubelu eu: “Ikalayi badimuke bua mitshima yenu kayinemi . . . ne diakamue dituku adi kadilu kunudi mu tshimpitshimpi bu buteyi.” “Nuikale badimuke, nutabale, bualu kanuena bamanye diakumbana tshikondo atshio.” (Luka 21:34-36, NW; Markuse 13:33, MMM) Petelo udi kabidi utubela bua kuteya ntema ku mêyi a bapostolo. Tshilejilu, mupostolo Paulo wakafunda ne: ‘Dituku dia Mukalenge dilualua bu mudi muibi ulua butuku. Nunku katuladi tulu bu mudi bakuabu benza; kadi tutabale, tuikale ne meji mapole.’—1 Tesalonike 5:2, 6.
Majinga a basekianganyi
7, 8. (a) Mbantu ba mushindu kayi badi baseka mikenji ya didimuija ya Nzambi? (b) Ntshinyi tshidi basekianganyi bamba?
7 Anu bu mutukadi bamone, kabingila ka mubelu wa Petelo kadi se: bamue bakavua batuadije kuseka madimuija a nunku, anu bu muvua bena Izalele ba mu bikondo bia kumpala baseke baprofete ba Yehowa. (2 Kulondolola 36:16) Petelo udi umvuija ne: “Bualu, kumpala nudi bamanye bualu ebu se: mu matuku a ku nshikidilu, nekulue basekianganyi ne tuseku tuabu, benza malu bilondeshile majinga abu buobu bine.” (2 Petelo 3:3, NW) Yuda udi wamba ne: majinga a basekianganyi aba adi “bua malu akena a buena Nzambi.” Udi ubabikila ne: “bantu badi bu nyama, kabayi ne bumuntu bua mu nyuma.”—Yuda 17-19, NW.
8 Balongeshi ba dishima bavua Petelo muambe ne: bavua “balonda malu a mubidi mu lukuka ludi lubabi[p]isha” badi pamu’apa munkatshi mua basekianganyi aba badi kabayi ne bumuntu bua mu nyuma. (2 Petelo 2:1, 10, 14) Ne kapeja konso, badi bakonka bena nkristo ba lulamatu ne: “Dikalaku diende edi dilaya didi kuepi? Bualu, katshia ku dituku diakalala bankambua betu mu lufu, malu onso adi atungunuka anu bu ku tshibangidilu tshia bufuki.”—2 Petelo 3:4, NW.
9. (a) Bua tshinyi basekianganyi badi bateta bua kutekesha mmuenenu wa mitalu udi mu Dîyi dia Nzambi? (b) Mmunyi mudi kulama bikole mu lungenyi dituku dia Yehowa kuikale bukubi buetu tuetu?
9 Bua tshinyi tuseku etu? Bua tshinyi kufila lungenyi lua se: dikalaku dia Kristo kadienaku mua kuenzeka, ne: katshia Nzambi ki mmubuele mu malu a bantu ne kakubuelamu nansha? Ee, pa kutekesha ngumvuilu wa mitalu udi mu Dîyi dia Nzambi, basekianganyi aba bafuane nyama badi bakeba bua kuladisha bakuabu tulu mu nsombelu wa kalèngù ka mu nyuma, bua kubavuija nenku bapepele ku bilobeshi bia budisui. Ndikankamija kayipu dikole buetu tuetu lelu’eu bua kushala batabale mu nyuma! Tulamayiku bikole mu lungenyi dituku dia Yehowa ne tuvulukayi misangu yonso ne: udi utumona! Nenku netusakibue ku disadila Yehowa ne lukunukunu ne ku dilama bupeluke buetu mu nsombelu.—Musambu 11:4; Yeshaya 29:15; Yehezekele 8:12; 12:27; Sefanya 1:12.
Bienzedi bia ku bukole bidi binyingalaja
10. Mmunyi mudi Petelo ujadika ne: basekianganyi badi badishima?
10 Basekianganyi ba nunku mbapue muoyo bualu bumue bua mushinga mukole. Badi babupua muoyo ku bukole ne bakeba bua kufikisha bakuabu ku dibupua muoyo. Bua tshinyi? Bua kumona mua kulobesha bantu bipepele. Petelo udi ufunda ne: “Bualu, bilondeshile dijinga diabu, bualu ebu budi bubajimina mu lungenyi.” Mbualu kayi abu? Mbua “se: kuvua muulu katshia ku kale ne buloba bumueneka bukamakane pa mutu pa mâyi ne buikale munkatshi mua mâyi ku dîyi dia Nzambi; ne anu ku bine ebi buloba bua tshikondo atshi buakapeta kabutu pakabubuikilabu kudi mâyi.” (2 Petelo 3:5, 6, NW) Eyowa, Yehowa wakumbusha bubi pa buloba mu tshikondo tshia Mvula munene mu matuku a Nowa, bualu buvua Yezu pende muzangike. (Matayo 24:37-39; Luka 17:26, 27; 2 Petelo 2:5) Nenku, bishilangane ne tshidi basekianganyi bamba, malu onso ki mmatungunuke “anu bu ku tshibangidilu tshia bufuki” nansha.
11. Mmatekemena kayi a bena nkristo ba kumpala avua dîba diawu kadiyi dianji kukumbana akafikisha bamue ku dibaseka?
11 Basekianganyi bavua mua kuikala baseke bikole bena nkristo ba lulamatu bualu buobu aba bavua ne matekemena avua kaayi manji kukumbana. Katupa kîpi kumpala kua Yezu kufuaye, bayidi bende ‘bavua belangana meji ne: bukalenge bua Nzambi bukadi pa kulua katataka.’ Pashishe, kunyima kua dibiishibua diende bakamukonka bikala Bukalenge buvua mua kujadikibua anu pine apu. Kabidi, bidimu bu dikumi kumpala kua Petelo kufundaye mukanda wende muibidi, bamue bavua ‘batshinyishibue’ kudi ‘dîyi’ kampanda peshi “mukanda,” uvuabu batshinka ne: ng’wa kudi mupostolo Paulo anyi banyanende, wamba ne: ‘dituku dia [“Yehowa,” NW] dikadi apa.’ (Luka 19:11; 2 Tesalonike 2:2; Bienzedi 1:6) Nansha nanku, matekemena bu nunku a bayidi ba Yezu kaavua a dishima to, tshidibi, dîba diawu kadivua dianji kukumbana. Dituku dia Yehowa divua ne bua kulua!
Dîyi dia Nzambi ndia kueyemena
12. Mmunyi mudi Dîyi dia Nzambi dileje mudidi dia kueyemena mu milayi yadi bua “dituku dia Yehowa”?
12 Anu bu mutuamonyi kuulu eku, baprofete ba kumpala kua Buena-nkristo bakadimuija misangu mivule ne: dituku dia disombuela dia Yehowa divua pabuipi. “Dituku dia Yehowa” dileja mu bukese diakalua mu 607 K.B.B. pakadisombuela Yehowa pa tshisamba tshiende tshia mutu mukole. (Sefanya 1:14-18) Pashishe, bisamba bikuabu, pamue ne Babilone ne Ejipitu, biakamona pabi “dituku dia Yehowa” dia muomumue. (Yeshaya 13:6-9; Yelemiya 46:1-10; Obadaya 15) Bakavua badianjile kumanyisha kabidi nshikidilu wa ndongoluelu wa malu wa bena Yuda wa mu siekele wa kumpala, ne wakenzeka pakabutulabu Yudeya kudi biluilu bia bena Roma mu 70 B.B. (Luka 19:41-44; 1 Petelo 4:7) Kadi Petelo udi ufunkuna “dituku dia Yehowa” ditshidi dilua, edi diapita kule ne kule Mvula munene wa buloba bujima ku bukole!
13. Ntshilejilu kayi tshia malu a kale tshidi tshileja ne: nshikidilu wa ndongoluelu eu wa malu mbualu bulelela?
13 Petelo udi utuadija diumvuija diende dia kabutu aku kalualua, wamba ne: ‘Kadi bua dîyi diodimue.’ Ukavua mumane kuamba ne: “ku dîyi dia Nzambi,” buloba bua kumpala kua Mvula munene buakamueneka “pa mutu pa mâyi ne buikale munkatshi mua mâyi.” Nsombelu eu, mumvuija mu muyuki wa bufuki wa mu Bible, wakenzeja ku bulombodi bua Nzambi, peshi dîyi diende, bua Mvula wa kabutu kupongololaye mâyi a bungi. Petelo udi utungunuka ne: ‘Bua dîyi diodimue [dia Nzambi] diulu didiku katataka ne buloba kabidi biakabutshidibua bua kupia ne kapia bilamibue too ne ku dituku dia dilumbulula ne dia dibutuka dia bantu badi babenga Nzambi.’ (2 Petelo 3:5-7; Genese 1:6-8) Tudi ne dîyi dia Yehowa dia kueyemena bua bualu ebu! Neafikishe ‘diulu ne buloba’—ndongoluelu eu wa malu—ku ndekelu mu tshiji tshidi tshitema kapia tshia dituku diende dinene! (Sefanya 3:8) Kadi ndîba kayi?
Dijinga dikole bua nshikidilu kuluaye
14. Bua tshinyi tudi mua kuikala ne dieyemena dia se: tudi mpindieu mu “matuku a ku nshikidilu”?
14 Bayidi ba Yezu bavua basue kumanya tshikondo tshivua nshikidilu ne bua kulua, ke kumukonkabu ne: “Ntshinyi tshikala tshimanyinu tshia dikalaku diebe ne tshia nkomenu wa ndongoluelu eu wa malu?” Mbimueneke se: bavua bakonka bua dîba divua ndongoluelu wa bena Yuda ne bua kutua ku ndekelu, kadi diandamuna dia Yezu diakashindamena bangabanga pa tshikondo tshivua ‘diulu ne buloba’ bia mpindieu ne bua kubutuka. Yezu wakadianjila kumanyisha malu bu mudi mvita minene, dipangika dia biakudia, bikumina, masama, ne dibunda dia bibawu. (Matayo 24:3-14; Luka 21:5-36) Kubangila mu tshidimu tshia 1914, tudi bamone dikumbana dia tshimanyinu etshi tshiakafila Yezu bua “nkomenu wa ndongoluelu eu wa malu” ne dia malu akamba mupostolo Paulo avua mua kusunguluja “matuku a ku nshikidilu.” (2 Timote 3:1-5) Bulelela, kudi tshijadiki tshikole tshia se: tudi mu tshikondo tshia nshikidilu wa ndongoluelu eu wa malu!
15. Ntshinyi tshiakateta bena nkristo mua kuenza nansha muvuaku didimuija dia Yezu?
15 Bantemu ba Yehowa bavua bajinge bikole bua kumanya tshikondo tshiafika dituku dia Yehowa. Mu dijinga diabu dikole, kutetabu imue misangu bua kutshinka tshikondo tshivuadi mua kulua. Kadi mu dienza nunku bakapangila, anu bu muakapangila bayidi ba Yezu ba kumpala, bua kuteya ntema ku didimuija dia Mfumuabu dia se: ‘katuena bamanye diakumbana tshikondo atshio.’ (Markuse 13:32, 33, MMM) Basekianganyi mbaseke bena nkristo ba lulamatu bua matekemena abu avua dîba diawu kadiyi dianji kukumbana. (2 Petelo 3:3, 4) Nansha nanku, Petelo udi ushindika ne: dituku dia Yehowa nedilue bilondeshile dîba Diende dilongolola.
Tuikale ne mmuenenu wa Yehowa
16. Nku mubelu kayi kutudi tuteya ntema ne meji onso?
16 Tudi ne bua kuikala ne mmuenenu wa Yehowa bua dîba, bu mudi Petelo utuvuluija mpindieu ne: ‘Kadi bananga, kanupu muoyo bua bualu ebu bumue ne: dituku dimue kudi Mukalenge [“Yehowa,” NW] didi bu bidimu tshinunu, ne bidimu tshinunu bidi bu dituku dimue.’ Pa kufuanyikija, bidimu bietu 70 anyi 80 bia muoyo mbîpi be! (2 Petelo 3:8; Musambu 90:4, 10) Nenku biamueneka dikumbana dia malaya a Nzambi bu didi dijanguluka, tudi ne bua kuitaba mubelu wa muprofete wa Nzambi wa se: ‘Biajangulukatshi [tshikondo tshijadika], utshindile; bualu bua netshimueneke bulelela, katshiena tshipanga kulua.’—Habakuka 2:3.
17. Nansha mudi matuku a ku nshikidilu matungunuke ne kulepa kupita muvua bavule batekemene, ntshinyi tshitudi mua kueyemena?
17 Bua tshinyi matuku a nshikidilu a ndongoluelu eu mmatungunuke ne kulepa kupita muvua bavule batekemene? Mbua kabingila aka kimpe, bu mudi Petelo umvuija pashishe ne: “Yehowa kêna ujanguluka bua bidi bitangila dilaya diende, bu mudi bamue bantu bamona dijanguluka, kadi udi nenu lutulu bualu kêna ujinga bua muntu nansha umue abutudibue kadi udi ujinga ne: bonso bafike ku dinyingalala.” (2 Petelo 3:9, NW) Yehowa udi wangata ne mushinga tshintu tshidi bua diakalenga dia bukua-bantu buonso. Udi uditatshisha bua mioyo ya bantu, anu bu mudiye wamba ne: ‘Tshiena ne disanka bua lufu lua muntu mubi, kadi ndi nsanka bua muntu mubi umuke mu njila wende mubi bua ikale ne muoyo.’ (Yehezekele 33:11) Nenku tudi mua kuikala ne dieyemena dia se: nshikidilu nealue anu pa dîba diakane bua kukumbaja dilongolola dia Mufuki wetu wa meji onso ne wa dinanga!
Ntshinyi tshiajimina?
18, 19. (a) Bua tshinyi Yehowa mmupangadije bua kubutula ndongoluelu eu wa malu? (b) Mmunyi mudi Petelo umvuija nshikidilu wa ndongoluelu eu, ne ntshinyi tshiabutulabu bushuwa?
18 Bu mudi Yehowa munange bushuwa aba badi bamusadila, neumbushe aba bonso badi babakengesha. (Musambu 37:9-11, 29) Anu bu muakenza Paulo kumpala, uleja ne: kabutu aka kavua ne bua kulua mu tshikondo katshiyi tshitekemena, Petelo udi ufunda ne: “Dituku dia Yehowa nedilue bu muivi, ndiodi diajimina muulu ne diyoyo dikole, kadi bintu bidi ne kapia kakole menemene nebienguluke, ne buloba ne midimu idimu nebisokolodibue.” (2 Petelo 3:10, NW; 1 Tesalonike 5:2) Muulu ne buloba biena dîna kabiakajimina mu Mvula wa kabutu, ne kabiakujimina mu dituku dia Yehowa. Nenku, ntshinyi ‘tshiajimina,’ peshi tshiabutulabu?
19 Mbulamatadi ya bantu idi mikokeshe bukua-bantu bu “muulu” neijike, ne ke muenza kabidi “buloba,” peshi nsangilu wa bantu badi kabayi bena Nzambi. “Diyoyo dikole” didi pamu’apa dileja dipita dia lukasa dia muulu. “Bintu” bidi bienze nsangilu munyanguke wa bantu wa lelu “nebienguluke,” peshi kubutuka. Ne “buloba,” pamue ne “midimu idimu,” “nebisokolodibue.” Yehowa neele patoke menemene bienzedi bibi bia bantu patuishaye ndongoluelu yonso wa buloba bujima ku nshikidilu wende mumuakanyine.
Shalayi bashindamene pa ditekemena dienu
20. Mmunyi mudi nsombelu wetu ne bua kuikala muenzeja kudi dimanya dietu dia malu atshidi kumpala?
20 Bu mudi malu aa a dikema mikale pabuipi, Petelo udi wamba ne: tudi ne bua kuditua mu “bienzedi binsantu bia nsombelu ne malu a bulamate kudi Nzambi, bindile ne balame bikole mu lungenyi dikalaku dia dituku dia Yehowa.” Kakuena mua kuikala mpata bua bualu buadi! “Muulu mikale ne kapia neenguludibue ne bintu bipie bikole menemene nebienguluke!” (2 Petelo 3:11, 12, NW) Bu mudibi ne: malu aa a dikema adi mua kutuadija kuenzeka makelela, bidi ne bua kuikala ne buenzeji mu bualu buonso butudi tuenza anyi tulongolola mua kuenza.
21. Ntshinyi tshiapingana pa muaba wa muulu ne buloba bia mpindieu?
21 Mpindieu Petelo udi utuambila tshiapingana pa muaba wa ndongoluelu eu wa kale, wamba ne: “Kadi kudi muulu mapiamapia ne buloba bupiabupia bitudi bindile bilondeshile dilaya diende, ne muine emu buakane nebuikale ne bua kuasa.” (2 Petelo 3:13, NW; Yeshaya 65:17) Aka! ndisulakana kayipu dinene! Kristo ne bakokeshi pamue nende 144 000 nebenze mbulamatadi wa “muulu mapiamapia,” ne bantu bapanduka ku nshikidilu wa bulongolodi ebu nebenze “buloba bupiabupia.”—1 Yone 2:17; Buakabuluibua 5:9, 10; 14:1, 3.
Lamayi mitalu ne bupeluke mu bikadilu
22. (a) Ntshinyi tshiatuambuluisha bua kuepuka katoba anyi kalema konso ka mu nyuma? (b) Petelo udi udimuija bua njiwu kayi?
22 Petelo udi utungunuka ne: ‘Nunku, bananga, bualu bua nudi nutekemena malu aa, nanukilayi bua banusangane mu ditalala kanuyi ne katoba, kanuyi ne kadiwu kudiye. Numanye ne: lutulu lua Mukalenge wetu ndupandu.’ Dindila ne ditekemena dikole ne diangata tshionso tshidi mua kumueneka bu dijanguluka dia dituku dia Yehowa bu tshidi tshileja lutulu lua Nzambi nebituambuluishe bua kuepuka katoba anyi kalema konso ka mu nyuma. Kadi, kudi njiwu! Petelo udi udimuija ne: mu mikanda ya ‘muanetu munanga Paulo . . . munda muayi mudi manga malu adi makole pa kuajingulula, adi bantu badi kabayi bayishibue ne ba mitshima mitekete bakonyangaja mêyi, bu mudibu benzela mêyi makuabu mu Mukanda wa Nzambi, bua dibutuka diabu.’—2 Petelo 3:14-16.
23. Mmubelu kayi udi Petelo ufila bua kukoma?
23 Mbimueneke patoke se: balongeshi ba dishima bavua bakonyangaja mifundu ya Paulo pa bidi bitangila bulenga bua Nzambi bukena butuakanyine, pa kutumika nayi bu kabingila bua bienzedi binyanguke. Pamu’apa Petelo udi ne bualu ebu mu lungenyi padiye ufunda mubelu wende wa ku ndekelu kua mukanda ne: “Pa nanku, nuenu bananga, bu munudi badianjile kumanya bualu ebu, dimukayi bua kanupambushibu nabu ku ditupakana dia bantu badi batupa ku mikenji, ne bua kanupangidi mu bushindame buenu.” Pashishe udi ukoma mukanda wende, ubela ne: “Tungunukayi ne kudiunda mu bulenga bukena butuakanyine ne mu dimanya dia Mfumu wetu ne Mupandishi Yezu Kristo.”—2 Petelo 3:17, 18, NW.
24. Mmuenenu kayi udi basadidi bonso ba Yehowa ne bua kuikala nende?
24 Mu butoke buonso, Petelo mmusue bua kukolesha bana babu ku muoyo. Udi ujinga bua bonso bikale ne mmuenenu mumvuija kudi Ntemu wa lulamatu wa bidimu 82 utuatedi ku ntuadijilu: “Ndi muikale ne nsombelu anu bu muakabela mupostolo, ‘mulame bikole mu lungenyi dikalaku dia dituku dia Yehowa.’ Misangu yonso ntu mmona bulongolodi bupiabupia bulaya bu ‘bulelela nansha mudibu kabuyi bumueneka.’” Buonso buetu tuikalayiku ne nsombelu wa buena eu.
Newandamune munyi?
◻ “Kulama bikole mu lungenyi” dituku dia Yehowa kudi kumvuija tshinyi?
◻ Ntshinyi tshidi basekianganyi bapua muoyo ku bukole, ne mbua tshinyi?
◻ Mbua bualu kayi budi basekianganyi basekele bena nkristo ba lulamatu?
◻ Mmuenenu kayi utudi ne bua kulama?
[Tshimfuanyi mu dibeji 23]
Lamayi bikole mu lungenyi dituku dia Yehowa . . .
[Tshimfuanyi mu dibeji 24]
. . . ne bulongolodi bupiabupia bualonda