Bamanyishi ba Bukalenge badi balonda
Ditshimuna ntatu mu “Buloba bua mpukapuka”
MUPOSTOLO Paulo wakakonka bena nkristo ba mu Kolinto ba mu siekele wa kumpala ne: “Pikala mpungi upatula diyi kadiyi disunguluke, nganyi udi mua kudilongolola ku mvita? Bia muomumue kabidi ne nuenu: pikala miaku inudi nuamba ne ludimi luenu kayiyi yumvuika, mmunyi mumvuabo tshinudi nuamba?”—1 Bena Korente 14:8, 9, MMM.
Mu ditunga dia Papouasie-Nouvelle-Guinée, ditubu babikila imue misangu ne: Buloba bua Mpukapuka, Bantemu ba Yehowa badi batutakena ne bipumbishi bia dikema mu dipatula mukenji mumvuike wa mu Bible. Badi bayisha bantu badi bakula miakulu mishilangane mipite pa 700 ne badi ne bilele kabukabu. Bantemu badi kabidi baluangana ne buloba bua mikuna, dipangika dia njila, ne dibunda divule dia bibawu. Kusakidila ku ntatu yonso eyi, kudi buluishi bua kudi bimue bisumbu bia malu a Nzambi, ne imue misangu, bufumina mene kudi banene ba bilongelu.
Nansha nanku, dishidimuka dimpe dia mu nyuma ne divulangana dia mikanda idi yambuluisha bua kulonga Bible mu miakulu ya muaba eu bidi bienda bikumbaja Bantemu bua buobu kumanyisha lumu luimpe bienze bu mpungi upatula dîyi disunguluke. Misangu mivule bantu batu banyisha, bu mudi malu adi alonda aa aleja:
• Ku ntuadijilu wa tshidimu tshipiatshipia tshia tulasa, mulongeshi mukuabu uvua musue kumanya bua tshinyi bana ba Bantemu ba Yehowa kabatu banemekela dibendele anyi bimba musambu wa ditunga. Lukonko luende wakaluela Maiola, mulongi wa bidimu 13 udi Ntemu mutambule. Maiola wakafila diumvuija ditoke ne diashila pa Mifundu. Mulongeshi eu wakitaba ngelelu wa meji wa muana eu bualu uvua wa mu Bible. Balongeshi bakuabu ba mu tshilongelu atshi bakanyisha kabidi diumvuija diende.
Pashishe, pakapeshabu balongi diteta dia difunda, Maiola wakasungula tshiena-bualu tshia Busatu Bunsantu. Diteta diende dia difunda diakapeta mpué mipite ya bakuabu bonso mu kalasa, ne mulongeshi wakamukonka kuvuaye mupetele mamanyisha au. Wakamuleja mukanda wa Udi mua kuikala ne muoyo wa kashidi pa buloba bukudimuna mparadizu mu muakulu wa Anglais. Mulongeshi e kutuadija kuleja kalasa kajima mukanda eu, ne bavule bakasua bua kuupeta. Dituku diakalonda, Maiola wakabanyina balongi nende mikanda 14 ne bibejibeji 7, ne wakatuadija malonga a Bible ne basatu ba kudibu. Tshipatshila tshia Maiola ntshia kulua ministre wa ku dîba ne ku dîba.
• Kasumbu kakuabu kaditole ka Bantemu ba Yehowa mu musoko kampanda wa ku muelelu kua mbuu pabuipi ne Port Moresby nkatuilangane ne buluishi katshia ku ntuadijilu wa bidimu bia 1970. Kadi, matuku adi panshi aa, mbapete diambuluisha kadiyi ditekemena. Dimue edi, muepiskopo wa Ekleziya Misanga kuine aku, muena Papouasie-Nouvelle-Guinée udi mulongele tulasa ku ba-bende, wakalomba bateleji bua kumuelabu nkonko mu ekleziya. Muntu mukuabu kukonka ne: “Kudi bitendelelu bibidi mu musoko wetu—Ekleziya Misanga ne Bantemu ba Yehowa. Ntshinyi tshitudi ne bua kuenza padi Bantemu balua ku metu?” Muanji kupuwa mutantshi mule, muepiskopo eu e kuandamuna ne: “Nudi bamanya’s, tshiena mumanye bushuwa tshindi mua kunuambila. Matuku mashale aa, Bantemu babidi bansongalume bakalua kuanyi. Bakangela lukonko, kadi ne dimanya dianyi dionso dia mu université, tshiakapeta diandamuna. Kadi bakampesha bipepele diandamuna dia mu Bible. Nenku tshiena nnuambila tshinudi ne bua kuenza—nganupuidi muanda au. Kanuena ne bua kubateleja binuikala kanuyi basue, kadi kanubenji tshimvundu.”
Muleji-mpala muena ngendu wa Société Watch Tower wakakumbula pashishe kasumbu aka ka Bantemu wakamanyisha ne: “Pamue ne muntu yonso mu musoko au uvua uteleja Bantemu pavuabu baya kuyisha. Bamue bavua mene bababikila ku mabu. Muaba eu udi mpindieu mparadizu bua diyisha.”