Bamanyishi ba Bukalenge badi balonda

Kujikija nzala ya mu nyuma​—mu ekole

“BA DIAKALENGA ng’aba badi bamanye bidibo bakengela mu nyuma,” ke tshivua Yezu muamba mu dilongesha diende pa mukuna. (Matayi 5:3) Balongi bavule badi ne nyota ya kumanya Nzambi ne malongolola ende a dikema. Badi bajinga kupeta mandamuna ku nkondo idi itangila malu a mu nsombelu ne kumanya nsombelu udibo ne bua kuikala nende bua kuanyishibuabo kudi Nzambi ne kuikala ne disanka. Nyota eyi ya mu nyuma ivua imueneka patoke mu ekole kampanda wa mu tshidiila tshia Vierges Britanike. Ntemu kampanda wa Yehowa udi ulonda ne:

◻ “Mu ekole, mvua mubuele mu tshisangilu kampanda tshivua tshisangishe baledi ba bana ne balongeshi. Muine emu, bavua batambe kuakula pa bidi bitangila kunua diamba, maluvu, kutantshilangana kabiyi bua dibaka, televizion, bipeta bia bana mu tulasa ne bua malu makuabo kabidi; ke meme kupangadija bua kuangata mukanda wa Les jeunes s’interrogent​—Réponses pratiques ne kuupesha mulombodi mukaji wa ekole. Kunyima kua diwukonkonona, wakamba ne: ke tshivua ekole ukengela menemene, ke kulombaye né udi mua kuupeta umue umue bua yonso wa ku balongi bende 120. Bakulu ba mu tshisumbu bakayukidilangana pa muanda eu, e kuangata dipangadika dia kufila mikanda eyi mu ekole bu dipa. Patuakabamanyisha dipangadika edi, balongeshi bakalomba bua tuetu kuuleja kumpala kua balongi buonso. Bantemu babidi bakalua ne kalasa kavua kuwule tente ne balongi bavua babindile. Bana betu bakakula munkatshi mua minute makumi asatu ne kubala bibejibeji bia Société Watch Tower muvua miyuki idi ileja mushindu udi mukanda eu muambuluishe bansonga ne bakulumpe. Pashishe, bakafila mikanda eyi kudi balongi aba bavua bayindile ne muoyo kulu-kulu.”

Bidi bienza disanka bua kumvua ne: ekole eu uvua muangate dipangadika dia kutumika ne mukanda eu mu tulasa tupuekele: kinayi ne kitanu. Kabiyi mpata, newandamune ku nkonko idi balongi aba badiebeja pa bidi bitangila nsombelu wabo ne pa matuku atshivuavua.

Kujikija nzala ya mu nyuma​—ku Papouasie-Nouvelle-Guinée

Muanda udi ulonda eu, mulonda kudi mutangidi kampanda muena-ngendu, udi uleja mushindu udi bena mu rejon eu bikale bafua ne nzala ya mu nyuma, ne mushindu udi mikanda yetu idi yumvuija Bible mua kujikija nzala yabo.

◻ Mutangidi eu udi wamba ne: “Bu mumvua tshiyi mua kuya ku musoko wa Kamberatoro, ngakapitshisha dîba dianyi mu kupatuka mu buambi pamue ne tshisumbu tshikese tshia Vanimo. Muine emu, bantu bavule badi basankidila mukenji [wa Bukalenge]. Bantu bavule bavua bafumina ku Bewani bakanyisha mikanda. Muntu kampanda wakandomba bua kukumbula bantu bavua base mu musoko eu, e kusakidila se: neankebele muaba wa kulala. Bantu bavule mbamanye mikanda yetu. Musangu wonso utuvua tuya ku Vanimo, tuvua tuabanya turto tusatu tua mikanda ituvua tuya nayi. Badi bangata mukanda wa Miyuki ya mu Mukanda wa Nzambi ne mushinga mukole kupita or. Bantu badi bawukeba bikole. Mikanda imvua muangate yakabanyibua ne lukasa luonso. Patuvua tuleja mikanda yetu, bamue bavua bebeja ne: ‘Mukanda wa manyimanyi udi kuepi?’ Muntu kampanda wakayilombesha isambombo. Wakampesha dîna diende ne adresse wende bua meme kuenzeja dimanyisha ku radio bua kumumanyisha pamvua ne bua kuyipeta; apu, neumbuke ku musoko kudiye bua kulua kuyikeba.” Mutangidi muena-ngendu udi utungunuka ne: “Ku Vanimo, bantu bavule bakanyisha mukanda wa L’humanité à la recherche de Dieu ne wa Les jeunes s’interrogent​—Réponses pratiques.”

Malu mamonamona aa adi aleja se: bantu badi ne muoyo mululame badi ne nzala ya biakudia bidi mu Bible ne mu mikanda idi Yehowa ufila ku butuangaji bua “mupika wa lulamatu ne wa budimu.” (Matayi 24:45-47) Ndisanka kayipu didi nadi Bantemu ba Yehowa bua kumona mua kuambuluisha bantu aba badi ne nzala ya bulelela!

[Tshimfuanyi mu dibeji 19]

Difila bumanyishi ku Papouasie-Nouvelle-Guinée