“Tutungunukayi ne kuenda bu bana ba butoke”
“Tuvualayi bumuntu bupiabupia buakafukibua bilondeshile disua dia Nzambi mu buakane ne bulamatshi ku mikenji bilelela.”—EFESO 4:24.
1. Batendeledi ba Yehowa badi bapeta mabenesha kayi? Ne mbua tshinyi?
YEHOWA NZAMBI udi “Tatu wa butoke bua mu diulu,” ne “kakuena mîdima mu buobumue nende.” (Yakobo 1:17; 1 Yone 1:5) Muanende Yezu Kristo, wakadiamba ne: “Ndi butoke bua pa buloba. Eu udi undonda kêna mua kuenda mu mîdima, kadi neikale ne butoke bua muoyo.” (Yone 8:12) Nenku, batendeledi balelela ba Yehowa, balongi ba Muanende, mbabeneshibue ne ditokeshibua—dia mu lungenyi, mu nsombelu, ne mu nyuma—ne badi “benda bakenka bu bimunyi bia kapia mu bulongolodi ebu.”—Filipoi 2:15.
2. Ndibengangana kayi diakamanyishibua pankatshi pa basadidi ba Nzambi ne bena mu bulongolodi ebu?
2 Mutantshi mule ku kale, muprofete Yeshayi muenzeja ku spiritu wa Nzambi, wakamanyisha dishilangana edi: “Mona! mîdima neijingile buloba, ne mufitu mukole neubuikile bisumbu bia bantu ba matunga; kadi wewe, Yehowa neakutemene, ne butumbi buende nebumueneke pambidi pebe.” Bushuwa, bantu buonso badi kule ne Nzambi mbalejibue ne: badi ku bukokeshi ne ku buenzeji bia “balombodi ba bulongolodi ebu bua mîdima.”—Yeshayi 60:2; Efeso 6:12.
3. Bua tshinyi tudi tutabalela muetu muonso mubelu mufila pa tshikondo tshiawo kudi Paulo?
3 Mupostolo Paulo uvua uditatshisha bikole bua bena nkristo nende kudilamabo ku mîdima ya mushindu’eu. Wakababela bua “kabatungunuki ne kuenda bu mudibo benda kudi bena matunga,” kadi bua “batungunuke ne kuenda bu bana ba butoke.” (Efeso 4:17; 5:8) Wakumvuija kabidi mushindu udibo mua kulubuluka mu dienza nenku. Lelu’eu, mîdima ne mufitu bidi bibuikile buloba mbitambe kukola. Bulongolodi ebu mbudiine mu tshisense tshia dinyanguka dia mu nsombelu ne mu nyuma. Batendeledi ba Yehowa badi ne mvita ya katshi ku dînu idi anu yenda ikola. Nenku, tudi tutabalela ne ntema yonso ku mêyi a Paulo.
Tulongayi mua kumanya Kristo
4. Paulo wakatuma meji ku tshinyi pakambaye ne: “Ki mmushindu’eu unuvua balonge mua kumanya Kristo nansha”?
4 Kunyima kua yeye mumane kuakula bua bipatshila bia patupu bia bena mu bulongolodi ebu ne bua kupanga kuabo kua bukezuke, mupostolo Paulo udi utangija ntema yende kudi bena nkristo nende bavua ku Efeso. (Kubala Efeso 4:20, 21.) Paulo uvua mumane kupitshisha bidimu bu bisatu mu kuamba kua lumu luimpe ne dilongesha mu tshimenga atshi, ne uvua ne bua kuikala muibidilangane ne bena mu tshisumbu atshi bavule. (Bienzedi 20:31-35) Nenku, pakambaye ne: “Ki mmushindu’eu unuvua balonge mua kumanya Kristo nansha,” uvua uleja dimanya divuaye nadi dia se: bena Efeso kabakalongeshibua mushindu kampanda wa bulelela butuuyisha buvua bulengulula ngikadilu mibi idibo bamba mu mvese wa 17 too ne wa 19. Uvua mumanye se: bakabalongesha bu mudibi njila mulelela wa buena-nkristo, anu bu muakafilabo tshilejilu kudi Yezu Kristo. Bua kabingila aka, kabakenda kabidi mu mîdima bu bena matunga, kadi bavua bana ba butoke.
5. Ndishilangana kayi didi pankatshi pa kuikala mu bulelela kua pamutu pamutu ne kuikala ne bulelela munda muetu?
5 Nenku, bidi bia mushinga mukole bua “kulonga mua kumanya Kristo” mu mushindu muakane! Kudi mishindu mibi ya kulonga mua kumanya Kristo anyi? Eyowa, bidi nanku. Ku mutu kua mvese eu, mu Efeso 4:14, Paulo wakadimuija bana betu bua se: “Katuikadi kabidi bana batekete badi batenkakajibua bu ku mavuala ne batambakajibua eku ne kuaka kudi lupepele lua dilongesha kayi dionso, kudi mashimi a bantu, kudi budimu buabu bua dibuejangana mu ntupakanyi nansha.” Biakamueneka patoke se: kuvua bamue bakalonga mua kumanya Kristo, kadi batshivua benda mu njila ya bena mu bulongolodi ebu ne bakeba nansha mua kusaka bakuabo bua kuenza bia muomumue. Abi bidi bituleja njiwu ya kuikala amu mu bulelela, bu mudibo bamba kudi bamue, pamutu pa bulelela kuikalabo munda muetu anyi? Mu tshikondo tshia Paulo, bavua bapambula aba bavua ne dimanya dia pamutu pamutu ne lukasa luonso kakuyi lutatu mu njila wa bulelela kudi bakuabo, ne bidi kabidi nanku lelu’eu. Bua kuepuka bualu ebu, Paulo udi usakidila ne: bena Efeso bavua bakengela ‘kumvua Kristo ne kuikala balongeshibue ku butuangaji bua Yezu.’—Efeso 4:21.
6. Mmunyi mutudi mua kulonga, kuteleja, ne kulongeshibua kudi Kristo lelu’eu?
6 Miaku “kulonga,” “kuteleja,” ne “kulongeshibua” miangata kudi Paulo idi yumvuija anu bu mudibi bienjibua mu kulonga kua mu tulasa. Bushuwa, katuena mua kuteleja, kulonga, anyi kulongeshibua buludiludi kudi Yezu nkayende lelu’eu to. Kadi, udi ulombola kampanye ka dilongesha dia Bible pa buloba bujima ku butuangaji bua “mupika wende wa lulamatu ne wa budimu.” (Matayi 24:45-47; 28:19, 20) Tudi mua “kulonga mua kumanya Kristo” bu mudibi bikengedibua bituikala misangu ne misangu tuangata dîba dia kudia bia kudia bia mu nyuma bifila kudi kasumbu ka mupika, tulonga ne disuminyina pa nkayetu ne mu tshisumbu, tueleelapu meji, ne tutumikila bitudi tulonga. Tuikalayi bashindike se: tudi tutumika menemene ne biakudia ebi bionso bua tuetu kuamba bulelela ne: tuvua “bamuteleje ne tuakalongeshibua ku butuangaji buende.”
7. Ndiumvuija kayi didi mua kumueneka mu mêyi a Paulo a se: “bulelela budi mu Yezu”?
7 Ntema yetu idi ikokibua pa kumona se: mu Efeso 4:21, kunyima kua yeye mumane kushindamena pa kulonga, Paulo wakasakidila ne: “Anu bu mudi bulelela buikale mu Yezu.” Bamue bumvuiji ba Bible badi baleja se: mu mikanda yende, Paulo kêna upita kutela dîna dia Yezu nkayadi to. Bushuwa, eu ke musangu anu umu’epele udiye utela dîna edi nkayadi mu mukanda wende mutumina bena Efeso. Kudi diumvuija dia pa buadi dia bualu ebu anyi? Imue misangu, Paulo uvua ukoka ntema ku tshilejilu tshifila kudi Yezu patshivuaye muntu. Tuvulukayi ne: Yezu wakadiamba musangu kampanda se: “Ndi njila ne bulelela ne muoyo.” (Yone 14:6; Kolosai 2:3) Yezu wakamba ne: “Ndi . . . bulelela” bualu kavu’anu ubuakula ne ubulongesha, kadi wakabutumikila ne wakabufuanyikija. Eyowa, buena-nkristo bulelela kabuena anu bualu bua mu lungenyi, kadi budi mushindu wa nsombelu. “Kulonga mua kumanya Kristo” kudi kumvuija kabidi kulonga mua kumuidikija pa kuikala ne bulelela mu nsombelu wetu. Udi wakaja nsombelu webe bua kuikalaye bu wa Yezu anyi? Utu ulonda dikasa diende ku dituku ne ku dituku anyi? Anu pa kuenza nenku ke patudi mua kutungunuka ne kuenda bu bana ba butoke.
“Tuvuulayi bumuntu bukulukulu”
8. Ntshimfuanyi kayi tshiakatumika natshi Paulo mu Efeso 4:22, 24, ne bua tshinyi mbiakanyine?
8 Bua kuleja mushindu utudi mua kulubuluka mu “kulonga bua kumanya Kristo” ne kuenda bu bana ba butoke, Paulo udi usakidila mu Efeso 4:22-24, ne: kudi biidia bisatu bitudi ne bua kuela. Tshia kumpala: “Nudi ne bua kuvuula bumuntu bukulukulu budi tshimuenekelu tshia nsombelu wenu wa diambedi ne udi wenda unyanguka bilondeshile nkuka yende ya didinga.” (Efeso 4:22) Miaku “kuvuula” (“kuumusha,” Mukanda wa Nzambi) ne “kuvuala” (mvese wa 24) idi yelesha meji ku diumusha ne divuala tshilamba. Eyi mmiaku ya tshimfuanyikiji tshimpe tshitambe tshidi Paulo wangata misangu ne misangu. (Lomo 13:12, 14; Efeso 6:11-17; Kolosai 3:8-12; 1 Tesalonike 5:8) Padi tshilamba tshietu tshinyanguka anyi tshikale ne makeji, bu mu dîba dia kudia, tudi tutshishintulula ne lukasa luonso. Katuena ne bua kuditatshisha bia muomumue bua matoba adi mua kuikala mu nsombelu wetu wa mu nyuma anyi?
9. Mmushindu kayi udi muntu mua kuvuula bumuntu bukulukulu?
9 Kadi, mmunyi mudi muntu mua kuumusha bumuntu bukulukulu? Muaku wa pa muanda wa tshiena-Greke “kuvuula” udi uleja bualu buenza musangu anu umu’epele ne bua kashidi. Ebi bidi bileja se: “bumuntu bukulukulu” (“muntu mukulukulu,” Mukenji Mulenga) ne “nsombelu wetu wa kale” bidi ne bua kumushibua mu mushindu wa kashidi ne dipangadika dikole, mu mushindu mondoke ne mujima. Ki mbualu butudi ne bua kuelakana. Mbua tshinyi?
10. Bua tshinyi muntu udi ne bua kuikala ne dipangadika dikole ne dia kashidi mu divuula dia bumuntu bukulukulu?
10 Miaku eyi “udi wenda unyanguka” idi ileja se: “muntu mukulukulu” udi wenda anu unyanguka, ubiipa anu kubiipa. Bushuwa, bua kubenga kuabo kua butoke bua mu nyuma, bukua-bantu budi anu buenda bupueka mu dinyanguka. Etshi ke tshipeta tshia “nkuka ya didinga,” bilondeshile Paulo. Nkuka ya mubidi idi ibadinga bualu idi mua kumueneka bu idi kayiyi ne njiwu, kadi ku ndekelu, idi ibutula. (Ebelu 3:13) Pikalayi kayiyi miumushibue, nekupatuke dinyanguka ne lufu. (Lomo 6:21; 8:13) Ke bualu kayi bumuntu bukulukulu budi ne bua kuumushibua, kujiikibua bujima ne dipangadika dikole, anu mushindu udi muntu umusha tshilamba tshia kale ne tshia manyanu.
Bavuija bapiabapia mu “spiritu wa mu meji etu”
11. Dikudimuka dia mu nyuma didi ne bua kutuadijila penyi?
11 Muntu udi mupone mu bitotshi kêna anu ne bua kuumusha bilamba biende bia manyanu, kadi udi kabidi ne bua kuowa mâyi bimpe kumpala kua kuangata bilamba bimpe ne bitoke. Mbia muomumue menemene ne bidi Paulo wamba bu tshiidia tshibidi tshia kuela bua kutokeshibua: “Nudi ne bua kuvuijibua bapiabapia mu bukole budi bukokesha tshieledi tshienu tshia meji.” (Efeso 4:23) Anu bu muvuaye mumane kuamba, mu mvese wa 17 ne wa 18, matunga adi enda mu “ngenyi yawu ya tshianana” ne adi mu “mîdima ya mu lungenyi.” Nanku, mbiumvuike bimpe bua se: tshieledi tshia lungenyi, tshidi tshikale mpokolo wa lumvu ne lungenyi, ke muaba udi dikudimuka ne bua kutuadija. Mmunyi mudibi mua kuenjibua? Paulo wakumvuija ne: mpa kuandamuna bukole budi bukokesha tshieledi tshietu tshia lungenyi. Mbukole kayi buine?
12. Bukole budi bukokesha tshieledi tshia lungenyi ntshinyi?
12 Bukole budi bukokesha tshieledi tshietu tshia lungenyi budibo bamba kudi Paulo, nspiritu munsantu anyi? Tòo. Tshiambilu tshia se: “bukole budi bukokesha tshieledi tshienu tshia lungenyi” ntshikudimuna ku miaku eyi “spiritu wa mu meji enu.” Muaba nansha umue mu Bible, kabena bakula bua spiritu munsantu wa Nzambi bu tshintu tshia mu mubidi wa muntu. Muaku “spiritu” udi ne diumvuija dia “mueyelu,” kadi badi bawangata mu Bible “bua kumvuija bukole budi busaka muntu bua kuleja ngikadilu kampanda, dijinga kansanga anyi pa kuangata njila kankenge.” (Étude perspicace des Écritures, Mukanda 1, dibeji dia 810) Nenku, “spiritu wa mu meji” mbukole budi buendesha ne bukokesha meji etu, mbukole budi buinyika lungenyi luetu ku tshintu kampanda.
13. Bua tshinyi bukole buetu bua lungenyi budi ne bua kuvuijibua bupiabupia?
13 Dinyikibua dia ku tshileledi dia tshieledi tshia lungenyi tshipange bupuangane nditangile ku bintu bidi bimueneka ne mesu, ne bia ku mubidi. (Muambi 7:20; 1 Kolinto 2:14; Kolosai 1:21; 2:18) Nansha muntu yeye muvuule bumuntu bukulukulu ne bienzedi biabo bibi, pikalaye kayi mushintulule dijinga diende dia mu lungenyi dia mpekatu, nansha ku tototo, dijinga edi nedimusake bua kupingana ku bivuaye mumane kulekela. Tshilejilu, ki mmuvuabi bienzekele aba bakidikija mua kulekela kunua kua makanya, bunuavi bua mala, peshi bibidilu bikuabo bibi anyi? Bu bobo kabayi benze madikolela bua bukole budi bukokesha tshieledi tshiabo tshia lungenyi kuvuijibuabu bupiabupia, badi mua kuponamu tshiakabidi. Dishintulula dionso dilelela didi ne bua kuenjibua bituadijile mu dikudimuna dia tshieledi tshia lungenyi mu buondoke buatshi.—Lomo 12:2.
14. Mmunyi mudi bukole budi bukokesha tshieledi tshietu tshia lungenyi mua kuvuijibua bupiabupia?
14 Nenku, mmunyi mudi muntu mua kuenza bua se: bukole ebu bulue bupiabupia bua kusakabu tshieledi tshiende tshia lungenyi mu njila mululame? Muaku wa pa muanda “kuvuija mupiamupia” mu tshiena-Greke udi uleja bualu budi buenda buenjibua mpindieu, ne bua musangu mule. Nenku, bidi anu ku dilonga dia disuminyina dia Dîyi dia Nzambi dia bulelela ne pa kueleela meji pa diumvuija dia mushindu udi bukole budi bukokesha tshieledi tshia lungenyi mua kuvuijibua bupiabupia. Bakebuludi badi batumanyisha se: mu buongo buetu, dimanya kampanda dienze bu kapia ka nzembu didi diumuka ku nshinga umue too ne ku mukuabo, dienda disambuka majita adibo babikila ne synapses. Mukanda wa Le cerveau (angl.) udi wamba ne: “Tshivulukilu kampanda tshidi tshienjibua mu synapse padi tshimanyinu kansanga tshipitamu, tshishiya bidiatshidi biatshi.” Padi tshine tshimanyinu etshi tshipita musangu mukuabo, tshidi tshimanyika lukasa mu kajilu ka nere, ne kadi katshipitshisha ne lubilu lupita lua musangu wa kumpala. Pashishe, ebi bidi bipatula ngelelu wa meji mupiamupia munda mua muntu. Patudi anu pa tshibidilu tuvudija dimanya dimpe dia mu nyuma, mushindu mupiamupia wa kuela meji udi wibakibua, ne bukole budi bukokesha tshieledi tshietu tshia lungenyi budi buvuijibua bupiabupia.—Filipoi 4:8.
“Tuvualayi bumuntu bupiabupia”
15. Mmu ngumvuilu kayi mutudi mua kuakula bua bumuntu “bupiabupia”?
15 Ku ndekelu, Paulo udi wamba ne: “[Nudi ne bua] kuvuala bumuntu bupiabupia buakafukibua bilondeshile disua dia Nzambi mu buakane ne bulamatshi ku mikenji bilelela.” (Efeso 4:24) Eyowa, muena nkristo udi uvuala bumuntu bupiabupia. Muaku “bupiabupia” muaba eu, udi utangila ngikadilu kadi ki ntshikondo to. Mbuena kuamba ne: ki mbupiabupia mu ngumvuilu wa budi bupatuka mafuku awu. Kadi, mbupiabupia mu kabujima, mbumuntu “bufuka bilondeshile disua dia Nzambi.” Mu Kolosai 3:10, Paulo udi wangata ngakuilu wa muomumue ne wamba ne: budi “buenda buandamuka bupiabupia bilondeshile tshimfuanyi tshia Eu wakabufuka.” Mmushindu kayi udi bumuntu ebu buandamuka bupiabupia?
16. Bua tshinyi tudi mua kuamba ne: “bumuntu bupiabupia buakafukibua bilondeshile disua dia Nzambi”?
16 Yehowa Nzambi wakafuka Adama ne Eva bena dibaka ba kumpala mu tshimfuanyi ne tshifuanyikijilu tshiende. Bakapeshibua ngikadilu mimpe ya mu nsombelu ne ya mu nyuma idi ibasunguluja bikole ne nyama ne ibateka ku mutu kuayi. (Genese 1:26, 27) Nansha mudi ditomboka edi dibueje bukua-bantu mu mpekatu ne mu dipanga bupuangane, bu mutudi ndelanganyi ya Adama, tutshidi amu ne bukole bua kuleja ngikadilu mimpe ya mu nsombelu ne ya mu nyuma. Disua dia Nzambi ndia se: aba badi benza midimu ya ditabuja mu tshia-bupikudi bavuule bumuntu bukulukulu ne bikale ne “budikadidi bua bana ba Nzambi.”—Lomo 6:6; 8:19-21; Galatia 5:1, 24.
17. Bua tshinyi tudi mua kuamba ne: buakane ne bulamatshi ku mikenji mbimanyinu menemene bia bumuntu bupiabupia?
17 Buakane bulelela ne bulamatshi ku mikenji ke ngikadilu ibidi misunguluja kudi Paulo bu bimanyinu bia bumuntu bupiabupia. Ebi bidi bijadika kabidi se: bumuntu budi buvuijibua bupiabupia bilondeshile tshimfuanyi tshia Eu wakabufuka. Musambu wa 145:17 udi utuambila ne: “Yehowa udi muakane mu njila yende yonso ne mulamatshi wa mikenji mu midimu yende yonso.” Ne Buakabuluibua 16:5 udi wamba Yehowa ne: “Wewe, Udiku ne uvuaku, Mulamatshi wa mikenji, udi muakane.” Bushuwa, buakane ne bulamatshi ku mikenji ke ngikadilu idi ikengedibua bituikala basue kuikala ne nsombelu muakanyine udi mu diumvuangana ne tshimfuanyi tshia Nzambi bua kuleja butumbi buende. Tuikalayi bu Zekayi, tatuende wa Yone Mubatiji, wakasakibua ku spiritu munsantu bua kutumbisha Nzambi bua dipesha bantu bende “disanka dia kumuenzela mudimu munsantu ne bulamatshi ku mikenji ne buakane kakuyi ditshina kumpala kuende mu matuku etu wonso.”—Luka 1:74, 75.
“Tutungunukayi ne kuenda bu bana ba butoke”
18. Mmunyi mudi Paulo mutuambuluishe bua kumona njila ya bena mu bulongolodi ebu anu bu mudiyo menemene?
18 Kunyima kua tuetu bamane kukonkonona miaku ya Paulo idi mu Efeso 4:17-24, umue ku umue, tudi ne malu a bungi atudi mua kueleela meji. Mu mvese wa 17 too ne wa 19, Paulo udi utuambuluisha bua kumona njila ya bena mu bulongolodi ebu anu mudiyo. Pa kubenga dimanya dia Nzambi ne kupapisha mitshima yabo kudiye, aba batshidi mu bulongolodi ebu mbadikosolole ku mpokolo mulelela wa muoyo. Nenku, bu mudibo kabatshiyi ne tshipatshila peshi bulombodi mu nsombelu, madikolela abo mmamueneke ne: ng’a bupote ne ng’a patupu. Badi benda badiina mu dinyanguka dia mu nsombelu ne dia mu nyuma. Nnsombelu kayipu muenze luse! Ne nkabingila kayipu katudi naku bua kuikala bapangadike bua kutungunuka ne kuenda bu bana ba butoke!
19. Ndikankamija kayi dia ndekelu didi Paulo utupesha bua kutuambuluisha bua kuenda amu bu bana ba butoke?
19 Pashishe, mu mvese wa 20 ne wa 21, Paulo udi ushindamena pa mushinga wa kulonga bulelela bimpe bua katuikadi anu bantu badi badisangisha ne bulelela patupu, kadi, tuikale ne bulelela mu nsombelu wetu anu muakenza Yezu. Ku ndekelu, mu mvese wa 22 too ne wa 24, udi utubela bua kuvuula bumuntu bukulukulu ne kuvuala bupiabupia—kashidi ne dipangadika dikole. Pinapu, tudi ne bua kutungunuka ne kulombola makole etu a mu lungenyi mu njila muimpe ne wa mu nyuma. Kupita bionso, tudi ne bua kutangila kudi Yehowa bua kupeta diambuluisha mu dienda dietu bu bana ba butoke. “Bualu Nzambi ke udi wamba ne: ‘Butoke bukenke mu mîdima,’ ne wakakenkesha mitshima yetu bua kuyitokesha ne dimanya dia butumbi dia Nzambi, ku mpala wa Kristo.”—2 Kolinto 4:6.
Udi muvuluke anyi?
◻ Mmunyi mutudi mua ‘kulonga mua kumanya Kristo’ lelu’eu?
◻ Bua tshinyi bumuntu bukulukulu budi ne bua kuvuudibua kashidi?
◻ Bukole budi bukokesha tshieledi tshia lungenyi ntshinyi, ne mmunyi mudibo buvuijibua bupiabupia?
◻ Tela ngikadilu idi bimanyinu bia bumuntu bupiabupia.
[Tshimfuanyi mu dibeji 15]
Yezu wakamba ne: “Ndi njila ne bulelela ne muoyo”
[Tshimfuanyi mu dibeji 16]
‘Tuvuulayi bumuntu bukulukulu ne bienzedi biabo’—luonji, tshiji, bubi, bipendu, mêyi a bundu, ne dishima.—Kolosai 3:8, 9
[Tshimfuanyi mu dibeji 17]
“Tuvualayi bumuntu bupiabupia buakafukibua bilondeshile disua dia Nzambi mu buakane ne bulamatshi ku mikenji bilelela.”—Efeso 4:24