Yehowa, Nzambi “mudiakaje bua kubuikidila”

“Wewe, O Yehowa, udi muimpe ne mudiakaje bua kubuikidila.”​—MUSAMBU 86:5, NW.

1. Mbujitu kayi bunême buvua Mukalenge Davidi muambule, ne mmunyi muakapetaye busambi bua mutshima wende mulubakane?

MUKALENGE DAVIDI wa Izalele wa kale uvua mumanye muvua bujitu bua kuondo ka muoyo kadi ne dipila. Wakafunda ne: ‘Bualu bua malu mabi anyi akuula, akupita pa mutu panyi. Bu bujitu bunene, adi atamba kunnemena bujitu. Ngakupanga ne ndi mutshibuke bikole; ndi ntua mikemu bualu bua dipampakana dia mu mutshima wanyi.’ (Musambu 38:4, 8) Nansha nanku, Davidi wakapeta busambi bua mutshima wende mulubakane. Uvua mumanye se: nansha mudi Yehowa mukine mpekatu, kêna ukina muenji wa mpekatu​—bikalaye bushuwa munyingaladi ne bialekelaye njila wende wa mpekatu. (Musambu 32:5; 103:3) Muikale witabuja tshishiki didiakaja dia Yehowa bua kuleja luse kudi bantu banyingaladi, Davidi wakamba ne: “Wewe, O Yehowa, udi muimpe ne mudiakaje bua kubuikidila.”​—Musambu 86:5, NW.

2, 3. (a) Patudi tuenza mpekatu, mbujitu kayi butudi mua kuambula bu tshipeta, ne bua tshinyi bualu ebu budi ne dikuatshisha? (b) Kudi njiwu kayi ‘bituatambibua’ kudi didipisha? (c) Ndishindika kayi didi Bible utupesha bua didiakaja dia Yehowa bua kubuikidila?

² Patudi tuenza mpekatu, tuetu petu tudi mua kuambula bujitu budi buzaza bua kuondo ka muoyo kadi kasama bu tshipeta tshia bualu ebu. Nyanji eyi ya dinyingalala nya pa tshibidilu, idi mene ne dikuatshisha. Idi mua kutusaka ku diela bidia bilenga bua kulongolola bilema bietu. Kadi, didipisha nditshimune bamue bena nkristo. Mutshima wabu wa didipisha udi mua kubambila ne disuminyina se: Nzambi kakubabuikidila tshishiki, nansha buobu banyingalale mushindu kayi. Mukuabu muanetu wa bakaji wakamba pavuaye wela meji bua tshilema tshivuaye muenze, ne: “Nnyanji mibi menemene paudi wela meji ne: pamu’apa Yehowa kakukunanga kabidi.” Mene panyima pa yeye mumane kunyingalala ne kuitaba mibelu miambuluishi ya kudi bakulu ba tshisumbu, wakatungunuka ne kudiumvua kayi muakanyine dibuikidila dia Nzambi. Udi umvuija ne: “Kakuena dituku dipita dindi tshiyi ndomba Yehowa dibuikidila diende.” ‘Bituatambibua’ kudi didipisha, Satana udi mua kuteta mua kutusaka bua kuteketa mu mikolo, bua tuetu kudiumvua ne: katuena bakanyine kuenzela Yehowa mudimu.​—2 Kolinto 2:5-7, 11.

³ Kadi bushuwa awu ki mmushindu utu Yehowa umona malu! Dîyi diende didi ditushindikila ne: patudi tuleja dinyingalala dia bushuwa ne dia muoyo mujima, Yehowa udi pabuipi, mudiakaje mene bua kubuikidila. (Nsumuinu 28:13) Nenku biwikala umona se: kuena mua kupeta dibuikidila dia Nzambi, pamu’apa tshidi tshikukengela ntshia kupeta ngumvuilu mutambe buimpe udi uleja kabingila ne mushindu udiye ubuikidila.

Bua tshinyi Yehowa udi “mudiakaje bua kubuikidila”?

4. Ntshinyi tshidi Yehowa uvuluka pa bidi bitangila ngikadilu wetu, ne mmunyi mudi bualu ebu ne buenzeji pa mushindu udiye utuangata?

⁴ Tudi tubala ne: “Bilema bietu udi ubisemeja kule netu, mutantshi bu wa kudi diba dipatukila ne kudidio dibuelela. Bu mudi tatu [“uleja luse kudi bana bende, Yehowa mmuleje luse kudi,” NW] badi bamutshina.” Bua tshinyi Yehowa mmudiakaje bua kuleja luse? Mvese udi ulonda udi wandamuna ne: “Udi mumanye tshidibo batufimbe natshio, udi muvuluke ne: tudi lupuishi.” (Misambo 103:12-14, MMM) Eyowa, Yehowa kêna upua muoyo bua se: tudi bifukibua bia lupuishi, tudi ne bufuba anyi butekete bidi bikale tshipeta tshia dipanga bupuangane. Tshiambilu tshia se: mmumanye “tshidibo batufimbe natshio” tshidi tshituvuluija ne: Bible udi ufuanyikija Yehowa ne mufumbi, ne tuetu bu ngesu idiye ufumba.a (Yelemiya 18:2-6) Mufumbi udi ukuata ngesu yende ya dîma ne bukole kadi mu mushindu mulenga, muikale mumanye bimpe ngikadilu wayi. Nenku, Yehowa pende, Mufumbi Munene, udi upolesha malu etu nende bilondeshile bufuba bua ngikadilu wetu wa bantu bena mpekatu.​—Fuanyikija ne 2 Kolinto 4:7.

5. Mmunyi mudi mukanda wa Lomo umvuija bukole bua lukole lua mpekatu ku mubidi wetu wa butekete?

⁵ Yehowa udi umvua mudi mpekatu muikale ne bukole. Mifundu idi yumvuija mpekatu bu bukole bua mujobo budi bukuate muntu mu lukole lua lufu. Nenku dikuatshika kudi mpekatu didi ne bukole bua mushindu kayi? Mu mukanda wa Lomo, mupostolo Paulo muenzeja ku spiritu udi umvuija bualu ebu mu miaku milenga ne: Tudi “muinshi mua mpekatu,” anu mudi basalayi muinshi mua kamanda kabu (Lomo 3:9, NW); mpekatu ‘mmukokeshe’ pa bukua-bantu bu mukalenge (Lomo 5:21); ‘udi muikale’ munda muetu (Lomo 7:17, 20); ‘mukenji’ wende udi ukuata mudimu munda muetu kashidi, bushuwa uteta bua kukontolola ngikadilu wetu. (Lomo 7:23, 25) Mmvita bukole kayipu itudi nayi bua kukandamena buenzeji bukole bua mpekatu pa mubidi wetu wa butekete!​—Lomo 7:21, 24.

6. Mmunyi mudi Yehowa umona aba badi bakeba luse luende ne mutshima munyingaladi?

⁶ Pa nanku, Nzambi wetu wa luse mmumanye se: katuena mua kuleja butumike bupuangane, kakuyi ditangila bungi bua misangu idi mitshima yetu mua kujinga kumulejabu. (1 Bakelenge 8:46) Ne dinanga dionso udi utushindikila ne: patudi tukeba luse luende lua bu-tatu ne mutshima munyingaladi, neatubuikidile. Mufundi wa misambu Davidi wakamba ne: ‘Milambu idi Nzambi mua kuitabuja idi mutshima wa majiya. Wewe Nzambi, kuena upetula mutshima wa majiya ne udi unyingalala bualu bua bubi buawu.’ (Musambu 51:17) Yehowa kakubenga nansha kakese peshi kupidia mutshima wa majiya ne udi munyingalaja kudi bujitu bua dipila. Mu mushindu mulenga bualu ebu budi bumvuija didiakaja dia Yehowa bua kubuikidila!

7. Bua tshinyi katuena mua kulambulukila pa luse lua Nzambi?

⁷ Kadi ebi bidi biumvuija ne: tudi mua kulambulukila pa luse lua Nzambi, kutumika ne dipanga bupuangane dietu bu kabingila bua kuenza mpekatu anyi? Nansha kakese! Yehowa ki mmulombola kudi nyanji ya patupu. Luse luende ludi ne mikalu. Kakubuikidila nansha kakese aba badi ne muoyo mupape benza mpekatu ne budimu ku budisuile, kabayi banyingalala. (Ebelu 10:26-31) Ku lunga luseke, padiye umona mutshima ‘wa majiya ne udi unyingalala,’ udi “mudiakaje bua kubuikidila.” (Nsumuinu 17:3) Tutangilayi imue ya ku ngakuilu ya mushinga mitumika nayi mu Bible bua kumvuija bujima bua dibuikidila dia Nzambi.

Mmunyi mudi Yehowa ubuikidila tshishiki?

8. Ntshinyi tshidi Yehowa wenza bushuwa padiye utulekelela mpekatu yetu, ne bualu ebu budi ne bua kuikala ne buenzeji kayi kutudi?

⁸ Mukalenge Davidi munyingaladi wakamba ne: ‘Ngakatonda bubi buanyi kuudi, tshiakasokoka dipambuka dianyi ku buakane. Ngakamba ne: Nentonde matomboka anyi kudi Yehowa; ne wewe wakandekelela dipila dia bubi buanyi.’ (Musambu 32:5, disendamija miaku ndietu.) Tshiambilu tshia se: “wakandekelela” ndikudimuna dia muaku wa tshiena-Ebelu udi umvuija nangananga “kujula,” “kuambula, kuambula kuya ne.” Ditumika nawu apa didi diumvuija ‘kumbusha dipila, bubi, dipanga.’ Nenku Yehowa wakajula mpekatu ya Davidi ne kuyaye nayi, mu mêyi makuabu. (Fuanyikija ne Lewitiki 16:20-22.) Kakuyi mpata, ebi biakapolesha nyanji ya dipila ivua Davidi muambule. (Fuanyikija ne Musambu 32:3.) Tuetu petu tudi mua kuikala ne dieyemena dia tshishiki kudi Nzambi utu ufua luse bua mpekatu ya aba badi bakeba dibuikidila diende pa tshishimikidi tshia ditabuja diabu mu mulambu wa tshia-bupikudi wa Yezu Kristo. (Matayo 20:28; fuanyikija ne Yeshaya 53:12.) Bena mpekatu idi Yehowa ujula nenku ne uya nayi kabiena bibalomba bua kutungunuka ne kuambula bujitu bua nyanji ya dipila bua mpekatu ya kale.

9. Mêyi a Yezu a se: “Utulekele mabanza etu” adi umvuija tshinyi?

⁹ Yezu wakatumika ne malanda adi pankatshi pa bafidi ba mabanza ne bangatshi ba mabanza bua kumvuija mudi Yehowa ubuikidila. Tshilejilu, Yezu wakatubela bua kusambila ne: “Utulekele mabanza etu.” (Matewuse 6:12, MMM) Nenku Yezu wakafuanyikija “mpekatu” ne “mabanza.” (Luka 11:4, NW) Patudi tuenza mpekatu, tudi tulua “bena dibanza” kudi Yehowa. Muaku wa pa muanda wa tshiena-Greke mukudimuna ne: ‘kulekela’ udi mua kumvuija “kupitshisha, kulekelela dibanza, pa kubenga kudilomba.” Mu ngumvuilu kampanda, padi Yehowa ubuikidila, udi ujimija dibanza divuaye mua kuikala mutufundile. Nenku benji ba mpekatu banyingaladi badi mua kupeta busambi. Yehowa kakubalomba nansha kakese bua kufuta dibanza didiye mujimije!​—Musambu 32:1, 2; fuanyikija ne Matayo 18:23-35.

10, 11. (a) Ntshimfuanyi kayi tshidi tshileja kudi muaku “ijimine,” udi mu Malu Menza 3:19, (MMM)? (b) Mmunyi mudi dibuikidila dia Yehowa dia tshishiki diumvuija ne tshimfuanyi?

¹⁰ Mu Malu Menza 3:19, (MMM), Bible udi utumika ne ngakuilu mukuabu mukole wa tshimfuanyi bua kumvuija dibuikidila dia Nzambi: “Nanku, dilengejayi, nukudimune mioyo yenu, bua mibi yenu ijimine.” Muaku “ijimine” udi ufumina ku muaku wa pa muanda wa tshiena-Greke udi mua kumvuija “kukupula, kubuitshidija, kushipa anyi kubutula” patudi tutumika nawu mu ngakuilu wa mfuanyikijilu. Bilondeshile bamue bashikuluji, lungenyi lumvuija ndua dikupula bintu bifunda ku tshianza. Mmunyi muvuabi bienzeka? Mâyi a mukanda matumika nawu pa tshibidilu kale avua menza ne bintu bisambakaja bu mudi: karbone, budimbu, ne mâyi a patupu. Katupa kîpi panyima pa dienza mudimu ne mâyi a mukanda a nunku, muntu uvua mua kuangata kalamba katalaja mu mâyi ne kukupula mifundu.

¹¹ Mu bualu ebu mudi tshimfuanyi tshilengele tshidi dileja mudi dibuikidila dia Yehowa dikale dia tshishiki. Padiye utubuikidila mpekatu yetu, mbienze anu bu se: udi wangata kalamba ne uyikupula. Katuena ne bua kumvua buôwa bua se: neatulamine mpekatu ya nunku mu matuku atshilualua, bualu Bible udi usokolola tshintu tshikuabu bua luse lua Yehowa tshidi bushuwa tshikemesha: Padiye ubuikidila, udi upua muoyo!

‘Tshiena mvuluka mpekatu wabu kabidi’

12. Padi Bible wamba ne: Yehowa udi upua mpekatu yetu muoyo, bidi biumvuija ne: kêna mua kuyivuluka kabidi anyi, ne bua tshinyi udi wandamuna nanku?

¹² Ku butuangaji bua muprofete Yelemiya, Yehowa wakalaya bua badi mu tshiovo tshipiatshipia ne: ‘Nembabuikidile mibi yabu, ne tshiena mvuluka [“mpekatu wabu,” NW] kabidi.’ (Yelemiya 31:34) Ebi bidi biumvuija ne: padi Yehowa ubuikidila kêna mua kuvuluka kabidi mpekatu anyi? Mbikole bua kuikalabi nanku. Bible udi utuambila bua mpekatu ya bantu ba bungi bavua Yehowa mubuikidile, pamue ne Davidi. (2 Samuele 11:1-17; 12:1-13) Kakuyi mpata, Yehowa utshidi mumanye bilema biakenzabu, ne ke mutudi petu. Muyuki wa mpekatu yabu, pamue ne wa dinyingalala diabu ne dibuikidila dibaleja kudi Nzambi, mmulama bua diakalenga dietu. (Lomo 15:4) Nenku, ntshinyi tshidi Bible umvuija padiye wamba ne: Yehowa kêna ‘uvuluka’ mpekatu ya badiye ubuikidila?

13. (a) Ntshinyi tshidi mu diumvuija dia muaku wa pa muanda wa tshiena-Ebelu muandamuna ne: ‘kuvuluka’? (b) Padi Yehowa wamba ne: ‘Tshiena mvuluka mpekatu wabu kabidi,’ ntshinyi tshidiye utushindikila?

¹³ Muaku wa pa muanda wa tshiena-Ebelu muandamuna ne: ‘kuvuluka’ udi umvuija bivule kupita ditutshila patupu muoyo ku malu mapite. Bilondeshile mukanda kampanda (Theological Wordbook of the Old Testament), muaku eu udi ne “dinga diumvuija dia kuenza bualu buakanyine.” Nenku mu ngumvuilu eu, ‘kuvuluka’ mpekatu kudi kumvuija kuenzela benji ba mpekatu bibi. Pakamba muprofete Hoshea bua bena Izalele batomboke ne: “Yeye [Yehowa] neavuluke bubi buabo,” muprofete uvua umvuija ne: Yehowa uvua ne bua kubenzela bibi bua dibenga kunyingalala diabu. Nenku, mvese udi utungunuka ne: “Neatangile tshilumbu tshia mpekatu yabu.” (NW) (Hoshea 9:9) Ku lunga luseke, padi Yehowa wamba ne: ‘Tshiena mvuluka mpekatu wabu kabidi,’ udi utushindikila ne: diakamue padiye ubuikidila muenji wa mpekatu munyingaladi, kakumuenzela bibi bua mpekatu ayi mu tshikondo kampanda tshidi kumpala. (Yehezekele 18:21, 22) Nenku udi upua muoyo mu ngumvuilu wa se: kêna ujululula mpekatu yetu misangu ne misangu bua kutupisha anyi kutunyoka misangu ne misangu. Pa nanku Yehowa udi utuleja tshilejilu tshilenga tshia tuetu kuidikija mu malu etu ne bakuabu. Padi makokangana ajuka, mbitambe buimpe bua kubenga kutungunuka ne kuvuluka bilema biuvua kumpala muitabe bua kubuikidila.

Tuambe tshinyi bua bipeta bia mpekatu yetu?

14. Bua tshinyi dibuikidila kadiena diumvuija ne: muenji wa mpekatu munyingaladi mmuepula ku bipeta bionso bia njila wende mubi?

¹⁴ Didiakaja dia Yehowa bua kubuikidila didi diumvuija ne: muenji wa mpekatu munyingaladi mmuepula ku bipeta bionso bia njila wende mubi anyi? Kabiena nanku to. Katuena mua kuenza mpekatu kakuyi dinyoka. Paulo wakafunda ne: ‘Tshintu tshionso tshidi muntu ukuna, ntshiotshi tshiapuoleye.’ (Galatia 6:7) Tudi mua kupeta bimue bipeta bibi bia tshienzedi tshietu anyi malu etu, kadi panyima pa mumane kutubuikidila, Yehowa kêna utukebela dikenga. Padi malu a mukodi ajuka, muena nkristo kêna ne bua kuela meji ne: ‘Pamu’apa Yehowa udi umpesha dinyoka bua mpekatu ya kale.’ (Fuanyikija ne Yakobo 1:13.) Ku lukuabu luseke, Yehowa kêna utuepula ku bipeta bionso bia bienzedi bietu bibi. Dishipa dia mabaka, mafu kaayi melela meji, masama a mu tshiendenda, dijimija dieyemena ne kanemu​—bionso ebi bidi mua kuikala bipeta bia dibungama bia mpekatu, ne Yehowa kakutukuba bua kabitufikidi. Vuluka ne: nansha muakabuikidilaye Davidi bua mpekatu yende ivua itangila Bath-sheba ne Uriya, Yehowa kakakuba Davidi ku bipeta bibi biakalonda panyima.​—2 Samuele 12:9-14.

15, 16. Mmunyi muvua mukenji mufunda mu Lewitiki 6:1-7 ukuatshisha udibu benzele bibi pamue ne muenji wa bibi?

¹⁵ Mpekatu yetu idi mua kuikala kabidi ne bikuabu bipeta bibi. Tshilejilu, tangila muyuki udi mu Lewitiki nshapita 6. Mikenji ya Mozese idi yakula apa bua padi muntu wenza tshilema tshinene mu diangata bintu bia muena Izalele nende pa kuiba, kunyenga anyi kuibila. Pashishe muenji wa mpekatu udi uvila mudiye kayi ne dipila, upeta mene dikamakama dia kuditshipa bia dishima. Etshi ntshilumbu tshia muntu ne muinende. Kadi pashishe, kuondo ka muoyo kadi kalubakaja muenji wa bibi eu ne udi utonda mpekatu wende. Bua kupetaye dibuikidila dia Nzambi, udi ne bua kuenza malu makuabu asatu: kupingaja bivuaye muangate, kufuta udiye muenzele bibi tshibawu tshia 20 pa lukama, ne kulambula tshimpanga tshia mukoko bu mulambu wa dipila. Pashishe, mukenji udi wamba ne: ‘Muakuidi neafile mulambu wa kumubuikidila nawu bubi kudi Yehowa ne bubi buakenzeye nebuikale bubuikidibue.’​—Lewitiki 6:1-7; fuanyikija ne Matayo 5:23, 24.

¹⁶ Mukenji eu uvua ndongoluelu wa luse wa kudi Yehowa. Uvua ukuatshisha udibu benzele bibi, muena bintu bivuabu bapingaja ne kakuyi mpata uvua ne disulakana divule pavua muenji wa bibi ndekelu wa bionso witaba mpekatu wende. Pine apu kabidi mukenji eu uvua ukuatshisha muntu uvua ne kuondo ka muoyo kamusaka ndekelu wa bionso bua kuitaba dipila diende ne kulongolola tshilema tshiende. Bushuwa, bu yeye mubenge bua kuenza nanku, Nzambi kavua mua kumubuikidila.

17. Padi mpekatu yetu mibungamije bakuabu, ntshinyi tshidi Yehowa mutekemene bua tuetu kuenza?

¹⁷ Nansha mutudi katuyi muinshi mua Mikenji ya Mozese, idi itupesha busunguluji bua mushinga mukole bua meji a Yehowa, pamue ne mmuenenu wende pa bidi bitangila dibuikidila. (Kolosai 2:13, 14) Padi mpekatu yetu mitape bakuabu anyi mibabungamije, Yehowa udi usanka patudi tuenza tshitudi mua kuenza bua ‘kulongolola tshilema.’ (2 Kolinto 7:11, NW) Ebi bidi biumvuija ditaba mpekatu yetu, dipila dietu, ne kulomba nansha luse kudi utudi benzele bibi. Pashishe tudi mua kulomba Yehowa pa tshishimikidi tshia mulambu wa Yezu ne kupeta disulakana dia kuondo ka muoyo kakezuke ne dishindika dia se: Nzambi mmutubuikidile.​—Ebelu 10:21, 22.

18. Ndinyoka kayi didi mua kulua pamue ne dibuikidila dia Yehowa?

¹⁸ Anu mudi muledi yonso wa dinanga, Yehowa udi mua kubuikidila pamue ne ndambu wa dinyoka. (Nsumuinu 3:11, 12) Muena nkristo munyingaladi udi pamu’apa ne bua kumbuka mu mudimu wende wa disadila bu mukulu, musadidi wa mudimu, anyi mpanda-njila. Bidi mua kumunyingalaja bua kujimija bua tshikondo kampanda masanka ende a mudimu avua a mushinga mukole kudiye. Kadi dinyoka dia nunku kadiena diumvuija ne: muntu eu mmujimije dianyisha dia kudi Yehowa anyi se: Yehowa mmubenge kumubuikidila. Kabidi, tudi ne bua kuvuluka ne: dinyoka dia kudi Yehowa ntshijadiki tshia dinanga diende kutudi. Kuditaba ne kuditumikila bidi bua diakalenga dietu ne bidi mua kutufikisha ku muoyo wa kashidi.​—Ebelu 12:5-11.

19, 20. (a) Biwikala muenze bilema, bua tshinyi kuena ne bua kuela meji ne: kuena mua kupeta luse lua Yehowa? (b) Mbualu kayi butuamona mu tshiena-bualu tshidi tshilonda?

¹⁹ Mmunyipu mudibi bikolesha bua kumanya se: tudi tusadila Nzambi udi “mudiakaje bua kubuikidila”! Yehowa udi umona bivule kupita mpekatu ne bilema bietu. (Musambu 130:3, 4) Mmumanye tshidi mu mitshima yetu. Wewe mumvue ne: mutshima webe mmubungame ne udi ne majiya bua malu mabi a kale, kuambi ne: kuena mua kupeta luse lua Yehowa. Nansha wewe mua kuikala muenze bilema kayi, biwikala munyingalale bushuwa, muele bidia bua kulongolola tshilema, ne musambile ne muoyo mujima bua kupeta dibuikidila dia Yehowa pa tshishimikidi tshia mashi mapumuna a Yezu, udi mua kupeta dieyemena dia tshishiki dia se: mêyi a mu 1 Yone 1:9 adi akukumbanyina: ‘Bituatonda [“mpekatu,” NW] yetu, yeye udi wa kueyemenyibua ne udi ne buakane bua kubuikidila [“mpekatu,” NW] yetu ne bua kutulengeja ku malu mabi onso.’

²⁰ Bible udi utukankamija bua kuidikija dibuikidila dia Yehowa mu malu etu ne bakuabu. Kadi, mmu bualabale kayi mutudi mua kubuikidila ne kupua muoyo padi bakuabu batuenzela bibi? Netutangile bualu ebu mu tshiena-bualu tshidi tshilonda.

[Mêyi adi kuinshi]

Newandamune munyi?

◻ Bua tshinyi Yehowa udi “mudiakaje bua kubuikidila”?

◻ Mmunyi mudi Bible umvuija bujima bua dibuikidila dia Yehowa?

◻ Padi Yehowa ubuikidila, mmu ngumvuilu kayi mudiye upua muoyo?

◻ Ntshinyi tshidi Yehowa mutekemene bua tuetu kuenza padi mpekatu yetu mibungamije bakuabu?

[Tshimfuanyi mu dibeji 12]

Padi mpekatu yetu mibungamije bakuabu, Yehowa mmutekemene bua tuetu kulongolola bilema