Bamanyishi ba Bukalenge badi balonda

Bansonga badi basamuna Nzambi mu République Démocratique du Congo

KUKADI siekele mivule, ne musangelu wonso mufundi wa misambu wakalomba bansonga bua kusamunabu Mukalenge wa tshiendelele ne: ‘Bansongalume ne bansongakaji kabidi, bantu banunu ne bana . . . , batumbishe dîna dia Yehowa, bualu bua dîna diende nkayadi didi ditumbishibua.’ (Musambu 148:12, 13) Malu mamona adi alonda aa a mu République Démocratique du Congo adi aleja patoke disanka edi kadiyi kufuanyikija.

• Muena kumbelu kuvua mpanda-njila kampanda wa pa buende ufutshila wakakatshila ngikadilu wa Bantemu ba Yehowa. Nanku, wakanyisha bua Bantemu kulongabu Bible ne Fifi, muanende wa bakaji wa bidimu bitanu. Panyima pa mumane kumona didiunda dia Fifi mu dilonga dia mukanda wa Miyuki ya mu Mukanda wa Nzambi,a tatuende wakamuanyishila bua kubuela mu bisangilu ku Nzubu wa Bukalenge. Kuine aku, Fifi kulongaye misambu ya Bukalenge ya mu mukanda wa misambu wa Bantemu. Wakatamba kunanga musambu wa nimero 4, udi ne mutu wa bualu wa se: “La promesse divine d’un Paradis” (Dilaya dia Nzambi dia Mparadizu).

Dimue edi tatuende wa Fifi wakapangadija bua kuya nende mu ekleziya wende. Tshiakakemesha bantu bonso ntshia se: Fifi wakabenga bua kuimba misambu ya ekleziya. Bua tshinyi? Bualu uvua mumvue ne: misambu mimba mu ekleziya wa tatuende kayivua mu diumvuangana ne bivuaye mulonge mu Bible. Ne dikima dionso, wakimba musambu wende wa Bukalenge wa pa muoyo pamutu pa mikuabu ayi.

Panyima pa bamane kuteta misangu mivule bua kushintulula lungenyi luende, kadi kakuyi bipeta bimpe, balombodi ba ekleziya bakapangadija bua kuipata Fifi mu ekleziya, muana eu wa bidimu bitanu! Nansha muvuaku ngenzelu eu wa kanyawu, tatuende wakashala mupuwe. Uvua ne disanka dia bungi bua muvua Fifi mulamate bikole ku tshivuaye witabuja. Tatuende wa Fifi ne mamuende bonso mbasue bua yeye kutungunuka ne didisangisha ne Bantemu ba Yehowa.

• Pavua muana mukuabu wa balume dîna diende Lukodi mupangadije bua kulonga Bible ne Bantemu ba Yehowa, tatuende wakabenga ne muoyo umue. Umue musangu pavua Lukodi udilongolola bua kuya mu tshisangilu ku Nzubu wa Bukalenge, tatuende wakamukanyina ne muele. Munga musangu tatuende wa Lukodi wakamututa ne mutshi munene, kumutapaye mputa pa nyima. Nansha muvuaku buluishi ebu bukole, Lukodi wakalamata bikole ku dipangadika diende dia kulua Ntemu wa Yehowa. Wakatungunuka ne kudiunda ne wakatambula. Mpindieu udi usadila bu mpanda-njila wa pa tshibidilu.

Sona, muakunyi wa Lukodi wa bakaji, wakakema bikole bua dipangadika dia muanabu, ke yeye pende kubanga kulonga Bible ne Bantemu ba Yehowa. Kadi, bua kumupangisha dilonga, tatuabu wakatuma Sona ku tshilongelu tshia mu musoko mukuabu, muaba uvua kauyi Bantemu. Nansha nanku, Sona uvua ne tshibidilu tshia kuambila bakuabu malu avuaye mulonge. Bu tshipeta, muanda eu wakasankisha muanabu mukuabu wa bakaji.

Pakumvua Bantemu ba mu musoko uvua pabuipi apu lumu lua mudimu wa diyisha dia Sona, bakaya kumumona ne bakalongolola bua ikale ne dilonga dia Bible dia pa tshibidilu ku nzubu. Wakatungunuka ne kudiunda ne katupa kîpi kulamataye ku luseke lua muanabu bu Ntemu wa Yehowa muditshipe ne mutambule. Kabidi, muanabu mukuabu wa bakaji au udi mpindieu mumanyishi udi kayi mutambule, ne dilonga dia mukanda didi dienzeka mu musoko au.

Mmunyipu mudibi bilenga ne bikolesha padi bansonga baditua mu disamuna dîna dia Yehowa!

[Mêyi adi kuinshi]