Udi muvuluke anyi?

Udiku mumone nimero ya ndekelu ya Tshibumba tshia Nsentedi mikale ne mushinga mukuatshishi kuudi anyi? Nenku bua tshinyi kubenga kuteta tshivulukidi tshiebe ne nkonko idi ilonda eyi?

◻ Ndishilangana kayi didi pankatshi pa ‘dituku dia Mukalenge’ ne “dituku dia Yehowa”? (Buakabuluibua 1:10; Yoele 2:11)

‘Dituku dia Mukalenge’ didi dikonga dikumbana dia bikena-kumona 16 bileja mu Buakabuluibua nshapita 1 too ne 22 ne malu a nshindamenu avua Yezu mudianjile kuamba mu diandamuna ku lukonko lua bayidi bende luvua lutangila tshimanyinu tshia dikalaku diende. Bu butumbuke bua dituku dia Mukalenge, dituku dia Yehowa didi dikuatshisha buôwa didi dibudika padiye ukumbaja dilumbuluisha pa bulongolodi ebu bunyanguke bua Satana. (Matayo 24:3-14; Luka 21:11)​—15/12, dibeji 11.

◻ Ng’imue ngikadilu kayi ya pa buayi ya Bible wa Makarios?

Dîna dia Yehowa didi dimueneka misangu mipite pa 3 500 mu Bible wa Makarios. Mushikuluji kampanda wa mikanda ya malu a Nzambi ya tshiena-Russie wakamba ne: “Nkudimuinu eu mmulamate ku mifundu ya tshiena-Ebelu, ne muakulu wa nkudimuinu eu mmukezuke ne mmuakanyine malu adimu.”​—15/12, dibeji 27.

◻ “Bulelela” buvua Yezu muambe se: nebutupikule ntshinyi? (Yone 8:32)

Mu ditela “bulelela,” Yezu uvua umvuija mamanyisha menzeja ku spiritu wa Nzambi​—nangananga mamanyisha adi atangila disua dia Nzambi—​adi matulamina mu Bible.​—1/1, dibeji 3.

◻ Yehu ne Yehonadaba ba matuku etu aa mbanganyi?

Yehu udi tshimfuanyi tshia Yezu Kristo, udi muleja mpala pa buloba kudi “Izalele wa Nzambi,” bena nkristo bela manyi. (Galatia 6:16, NW; Buakabuluibua 12:17) Anu bu muakapatuka Yehonadaba bua kusambakena ne Yehu, “musumba munene” wa mu matunga mavule mmupatuke bua kukuatshisha baleji-mpala ba Yezu ba pa buloba. (Buakabuluibua 7:9, 10; 2 Bakelenge 10:15)​—1/1, dibeji 13.

◻ ‘Kuenda ne Nzambi’ kudi kumvuija tshinyi? (Genese 5:24; 6:9, NW)

Kudi kumvuija ne: aba bakenza nunku, bu mudi Henoke ne Nowa, bavua ne nsombelu wakafila tshijadiki tshia ditabuja dikole kudi Nzambi. Bakenza tshivua Yehowa mubambile ne bakakaja nsombelu wabu mu diumvuangana ne tshivuabu bamanye pa bivua bimutangila ku diambuluisha dia malanda ende ne bukua-bantu.​—15/1, dibeji 13.

◻ Bua tshinyi muntu udi ne bua kudianjila kuenza madilongolola bua lufu ludi mua kumufikila mu mpukapuka?

Mu ngumvuilu kampanda, kudianjila kuenza malongolola bu nunku ndipa dipesha dîku diebe. Kudi kuleja dinanga. Kudi kujadika dijinga dia ‘kupetesha bena mu nzubu muebe bidibu bakengela’ nansha pawikala kutshiyi kabidi nabu. (1 Timote 5:8, NW)​—15/1, dibeji 22.

◻ Ntshinyi tshivua “tshipungidi tshia kale” tshikumbaje? (2 Kolinto 3:14, NW)

Tshivua ne malu avua mundidimbi wa tshipungidi tshipiatshipia ne, ku milambu yatshi mifila misangu ne misangu, tshiakaleja dikengela dikole dia muntu dia kupikudibua ku mpekatu ne lufu. Tshivua ‘ndeji uvua ufikisha kudi Kristo.’ (Galatia 3:24)​—1/2, dibeji 14.

◻ Mmu mishindu kayi mudi tshipungidi tshipiatshipia tshikale tshia tshiendelele? (Ebelu 13:20)

Tshia kumpala: kabakupingaja tshikuabu pa muaba watshi bu muvuabu benze ne tshipungidi tshia Mikenji. Tshibidi: bipeta bia mudimu watshi mbia kashidi. Ne tshisatu: bakokedi ba Bukalenge bua Nzambi ba pa buloba nebatungunuke ne kupetela masanka ku ndongoluelu wa tshipungidi tshipiatshipia mu Milenyume.​—1/2, dibeji 22.

◻ Mmasanka kayi adi afumina ku dikala ne dianyisha?

Musangelu udi muntu upeta bua dikala muena dianyisha didi difuma mu mutshima udi wambuluisha ku dipeta disanka ne ditalala diende. (Fuanyikija ne Nsumuinu 15:13, 15.) Bu mudidi ngikadilu mulenga, dianyisha didi dikuba muntu ku nyanji mibi bu mudi tshiji, mukawu ne njiya.​—15/2, dibeji 4.

◻ Mmu bipungidi kayi mudibu babueje bantu balela ku spiritu?

Tshipungidi tshipiatshipia, tshidi Yehowa wenza ne bena mu Izalele wa mu nyuma, ne tshipungidi tshia Bukalenge, tshidi Yezu wenza ne balondi ba mu makasa ende bela manyi. (Luka 22:20, 28-30)​—15/2, dibeji 16.

◻ Mbibilu kayi binene bisatu bivua bena Izalele balombibue bua kubuela?

Tshibilu tshia Mampa kaayi mela Luevene, tshivua tshilua diakamue panyima pa Kupita kua Yehowa kua mu dia 14 Nizan; Tshibilu tshia Mbingu, mu dituku dia 50 kumbukila ku dia 16 Nizan; ne Tshibilu tshia Disangisha, anyi Tshibilu tshia Mitanda, mu ngondo wa muanda-mutekete. (Dutelonome 16:1-15)​—1/3, mabeji 8, 9.

◻ Bua tshinyi ndiakalenga bua kubuela mu masangila a bena nkristo?

Yezu wakamba ne: “Ndi bianyi munkatshi mua bantu babidi anyi basatu badi badisangisha mu dina dianyi.” (Matayo 18:20; 28:20) Kabidi, mushindu wa mushinga udi difila dia biakudia bia mu nyuma dienzeka nku diambuluisha dia bisangilu bia tshisumbu ne masangila manene. (Matayo 24:45)​—1/3, dibeji 14.

◻ Dîna dia Nimerode ndifume penyi?

Bashikuluji kabukabu badi bitaba mmuenenu wa se: dîna dia Nimerode kadivua dîna dinyika ku tshilelelu. Kadi, badi badiangata bu dîna dimuinyika pashishe bua diakanangane ne ngikadilu wende wa buntomboji kunyima kua ngikadilu eu mumane kumueneka patoke.​—15/3, dibeji 25.

◻ Mmunyi mudi dîku dikale ne mushinga mu nsangilu wa bantu?

Dîku ntshintu tshidi tshikengedibua bua bantu. Miyuki ya kale idi ileja ne: padi ndongoluelu wa dîku unyanguka, bukole bua binsanga ne bua matunga butu buteketa. Nenku dîku didi ne buenzeji bua buludiludi pa dishindama dia nsangilu ne pa diakalenga dia bana ne bipungu bitshilualua.​—1/4, dibeji 6.

◻ Mbijadiki kayi bisatu bidi bileja ne: Bible n’Dîyi dia Nzambi?

(1) Mmujalame mu malu a sianse; (2) udi ne mêyi-maludiki akena ashikila adi ne dikuatshisha bua nsombelu wa lelu; (3) udi ne milayi misunguluke ikadi mikumbane, anu bu mudi malu menzeke kale aleja.​—1/4, dibeji 15.