Ngikadilu wa ditabuja diebe mmuteta mpindieu

‘Bana betu, nububale bu disanka dionso panuapona mu mateta a mishindu ya bungi; bualu nudi bamanye ne: [“ngikadilu eu muteta,” NW] wa ditabuja dienu udi wenzeja ditantamana.’​—YAKOBO 1:2, 3.

1. Bua tshinyi bena nkristo badi ne bua kutekemena mateta a ditabuja diabu?

BENA NKRISTO balelela kabatu bajinga kukenga, ne kabena ne disanka nansha dikese bua bisama anyi dipuekeshibua milongo. Kadi, badi balama mu lungenyi mêyi adi kuulu eku mafunda kudi Yakobo muanabu ne Yezu. Kristo wakatokeshila bayidi bende bua se: bavua mua kutekemena dikengeshibua ne ntatu mikuabu bua dilamata diabu ku mêyi-makulu a Nzambi. (Matayo 10:34; 24:9-13; Yone 16:33) Nansha nanku, disanka didi mua kufumina ku mateta a nunku. Mmushindu kayi?

2. (a) Mmunyi mudi mateta a ditabuja dietu mua kufikisha ku disanka? (b) Pa bidi bitutangila, mmunyi mudi ditantamana mua kuenza mudimu wadi tshishiki?

² Kabingila kanene katudi tupetela disanka patudi mu mateta anyi matetshibua a ditabuja nka se: mateta aa adi mua kupatula mamuma mimpe. Anu mudi Yakobo wamba, kuikala ne dikima kumpala kua mateta anyi ntatu ‘kudi kuenzeja ditantamana.’ Tudi mua kupetela dikuatshisha ku didima ngikadilu au wa mushinga mukole wa bena nkristo. Yakobo wakafunda ne: ‘Ditantamana dikale ne mudimu wadi muimpe tshishiki, bua nuenu nuikale bakane tshishiki, bakumbane mu malu onso, kanuyi nupanga mu bualu [nansha] bumue.’ (Yakobo 1:4) Ditantamana didi ne muanda kampanda wa kuenza, “mudimu.” Musandu wadi ng’wa kutuvuija bakumbane mu malu onso, dituambuluisha bua kuikala bu bena nkristo ba nkatshinkatshi ne bapie. Pa nanku, mu dilekela mateta alonda njila wawu kakuyi dikeba mua kutumika ne mishindu idi kayiyi yumvuangana ne Mifundu bua kuafikisha ku ndekelu ne lukasa, ditabuja dietu didi ditetshibua ne dilengejibua. Bituikala tudi bapangile lutulu, luse, bulenga anyi dinanga mu dipita ne nsombelu kampanda anyi mu malanda etu ne bantu netu, ditantamana didi mua kutuvuija bakumbane bikole. Eyowa, dilondangana didi nenku: Mateta adi apatula ditantamana; ditantamana didi divudija ngikadilu ya buena-nkristo; ngikadilu eyi idi ipetesha disanka.​—1 Petelo 4:14; 2 Petelo 1:5-8.

3. Bua tshinyi katuena ne bua kupingana tshianyima bua buôwa bua mateta anyi matetshibua a ditabuja dietu?

³ Mupostolo Petelo pende wakazangika bua tshinyi katuena ne bua kutshina anyi kupingana tshianyima kumpala kua mateta a ditabuja dietu. Wakafunda ne: “Mu muanda eu nudi nusanka bikole, nansha mudibi bua tshitupa tshîpi mpindieu, bikalabi ne bua kuikala nanku, nudi bikale babungamija kudi mateta kabukabu, bua se: ngikadilu muteta wa ditabuja dienu, dia mushinga mutambe bukole kupita ngolo udi ujimina nansha mutubu bamuteta kudi kapia, bamone mua kudisangana bu kabingila ka disamuna ne butumbi ne bunême dîba dia disokolodibua dia Yezu Kristo.” (1 Petelo 1:6, 7, NW) Mêyi aa adi nangananga akankamija mpindieu bualu “dikenga dinene”​—tshikondo tshia disamuna, butumbi, bunême ne lupandu—​tshidi pabuipi menemene kupita mudi bamue mua kuela meji ne tshidi pabuipi menemene kupita dîba dituakalua bena kuitabuja.​—Matayo 24:21; Lomo 13:11, 12.

4. Mmunyi muakumvua muanetu kampanda wa balume bua mateta avuaye yeye ne bakuabu bena nkristo bela manyi bapete?

⁴ Mu tshiena-bualu tshishale, tudi bakonkonone mateta akapeta bashadile bela manyi kubangila mu 1914. Mateta aa avua kabingila ka disanka anyi? A. H. Macmillan wakafila mmuenenu eu udi utuleja matuku a kale: “Ndi mumone mateta makole a bungi akuata bulongolodi ne matetshibua a ditabuja dia aba badimu. Ne diambuluisha dia spiritu wa Nzambi buakapanduka ne buakatungunuka ne kulubuluka. Ndi mumone meji a kutungunuka ne kuindila Yehowa ne lutulu bua kutokeshaye ngumvuilu wetu wa malu a mu Mifundu pamutu pa kulubakana bua lungenyi lupialupia. . . . Nansha muvuaku makajilula atuvua mua kuenza mu mmuenenu yetu ku musangu ne ku musangu, abi kabivua mua kushintulula ndongoluelu wa luse wa tshia-bupikudi ne dilaya dia Nzambi dia muoyo wa tshiendelele. Nenku kabivua bitukengela kulekela matekemena avua kaayi makumbane anyi mashintuluka a mmuenenu bitekesha ditabuja dietu.”​—Tshibumba tshia Nsentedi, 15 Kabitende 1967, dibeji 566 (Mfual.).

5. (a) Mbipeta kayi bimpe biakafumina ku dipitshila mu mateta dia bashadile? (b) Bua tshinyi muanda wa ditetshibua udi ne bua kutusankisha mpindieu?

⁵ Bena nkristo bela manyi bakapanduka ku tshikondo tshia diteta tshia mu 1914-19 bavua bapikula ku buenzeji bukokeshi bua bulongolodi ebu ne ku bilele bivule bia ntendelelu ya Babilone. Bashadile aba bakaya kumpala bu tshisamba tshikezula ne tshilengeja, ne budisuile buonso bafila milambu ya disamuna kudi Nzambi ne bikale bashindike se: buobu, bu tshisamba, bavua banyishibue kudiye. (Yeshaya 52:11; 2 Kolinto 6:14-18) Dilumbuluisha divua dituadije ne Nzubu wa Nzambi, kadi kabavua ne bua kudijikija mu tshikondo kampanda tshijadika. Diteta ne disengulula bantu ba Nzambi didi ditungunuka. Aba badi batekemene bua kupanduka ku “dikenga dinene” didi disemena pabuipi bu bena mu “musumba munene” ditabuja diabu kabidi didi ditetshibua. (Buakabuluibua 7:9, 14, NW) Ebi bidi bienzeka mu mishindu mifuanangane ne malu akapeta bashadile bela manyi ne mu mishindu mikuabu kabidi.

Mmunyi muudi mua kutetshibua?

6. Mmushindu kayi umue wa diteta dikole didi bantu bavule bapete?

⁶ Bena nkristo ba bungi mbele meji bua lutatu lua kutantamena mateta adi alua bu mvita ya mpala ne mpala. Badi bavuluka luapolo elu: ‘[Bamfumu ba bena Yuda] bakabikila bapostolo, bakabakuma, bakabakandika ne: Kanuambi bualu mu dîna dia Yezu, bakabalekela. Bakumuka kumpala kua bena tshilumbuluidi basanka bualu bua bakabadibua ne: Mbakane bua kufuishibuabu bundu bualu bua dîna dia Yezu.’ (Bienzedi 5:40, 41) Ne muyuki wa lelu wa bantu ba Nzambi, nangananga mu mvita ya buloba bujima, udi uleja patoke ne: Bantemu ba Yehowa bavule bakapeta mitutu ne malu mapite bubi a ku bianza bia bakengeshanganyi.

7. Mmu bualabale kayi mudi bamue bena nkristo ba matuku etu aa batungunuke ne kuleja ditabuja?

⁷ Pa kutangila mudi bena nkristo bikale bakengeshibua, bulongolodi ebu kabuena buenza dishilangana nansha dikese pankatshi pa bashadile bela manyi ne musumba munene wa “mikoko mikuabo.” (Yone 10:16) Mu kupita kua bidimu, bena mu bisumbu ebi bionso bibidi mbatetshibue bikole mu dibela mu buloko ne nansha mu difuila ditabuja bua dinanga diabu dia Nzambi ne ditabuja diabu kudiye. Bisumbu ebi bionso bibidi bivua bikengela spiritu wa Nzambi, nansha bikale ne ditekemena kayi. (Fuanyikija ne Tshibumba tshia Nsentedi, 15 Kabalashipu 1996, dibeji 31.) Mu bidimu bia 1930 ne bia 1940 mu Allemagne wa bena Nazi, basadidi bavule ba Yehowa, pamue ne bana, bakaleja ditabuja dia pa buadi, ba bungi bavua batetshibue bikole menemene. Mu matuku adi panshi aa, bantu ba Yehowa mbapete diteta dia dikengeshibua mu matunga mavule bu mudi Burundi, Érythrée, Éthiopie, Malawi, Mozambique, R. D. Congo, Rwanda ne Singapour. Ne mateta a mushindu’eu atshidi atungunuka.

8. Mmunyi mudi mumvuija a muanetu umue wa balume muena mu Afrike aleja ne: diteta dia ditabuja dietu didi diumvuija bivule kupita ditantamena dikengeshibua ne mitutu?

⁸ Kadi, anu mutukadi bamone, ditabuja dietu didi kabidi ditetshibua mu mishindu mikuabu ya budimu bukole. Amue mateta kaena a buludiludi nansha mapepele kujingulula. Konkonona tshiudi mua kuenza kumpala kua amue a ku mateta adi alonda aa. Muanetu umue wa balume mu ditunga dia Angola muena bana dikumi uvua mu tshisumbu tshivua munkatshi mua tshikondo kampanda katshiyi tshimonangana ne bana betu buomekela majitu. Pashishe mushindu wakamueneka bua bakuabu kukumbulabu tshisumbu atshi. Bakamuebeja muvuaye wenza bua kudiisha dîku diende. Kabivua bipepele bua yeye kuandamuna, ne tshionso tshivuaye mua kuamba tshivua se: nsombelu uvua mukole. Uvua ne mushindu wa kudiisha bana bende nansha musangu umue ku dituku anyi? Wakandamuna ne: “Ee, ne lutatu. Tudi balonge mua kudikebulula ne bitudi nabi.” Pashishe ne dîyi dia dishindika, wakamba ne: “Kadi ki mmalu aa atudi batekemene mu matuku aa a ku nshikidilu anyi?” Ditabuja dia mushindu’eu ndia pa buadi pa buloba, kadi ki mbualu buenyi munkatshi mua bena nkristo ba bulamatshi, badi ne dieyemena dia tshishiki dia se: malaya a Bukalenge neakumbane.

9. Mmunyi mutudi tutetshibua pa bidi bitangila 1 Kolinto 11:3?

⁹ Musumba munene udi pawu muikale utetshibua pa bidi bitangila ngenzelu ya teokrasi. Tshisumbu tshia bena nkristo tshia pa buloba bujima ntshilombola bilondeshile mêyi-maludiki a Nzambi ne mêyi-makulu a teokrasi. Bualu ebu budi diambedi bumvuija kuitaba Yezu bu Mulombodi, eu udibu bateke bu Mfumu wa tshisumbu. (1 Kolinto 11:3) Dikokela dia ku budisuile dibaleja yeye ne Tatuende didi dimuenekela mu dieyemena dietu kudi bantu bateka bilondeshile teokrasi ne ku mapangadika masuikakaja ku dienza dietu dia disua dia Yehowa mu buobumue. Kusakidila apu, mu tshisumbu tshionso tshia muaba utudi, mudi balume bateka bua kulombola. Mbantu bapange bupuangane, bena bilema bitudi mua kumona bipepele; nansha nanku badi batubela bua kunemeka batangidi aba ne kubakokela. (Ebelu 13:7, 17) Utu imue misangu umona bualu abu bukole anyi? Budi bushuwa diteta kuudi wewe anyi? Bikalabi nanku, udi upetela dikuatshisha ku diteta edi dia ditabuja diebe anyi?

10. Nditeta kayi ditudi tupeta bua mudimu wa budimi?

¹⁰ Tudi kabidi bateta pa bidi bitangila masanka a mudimu ne bualu-bulomba bua kudifila pa tshibidilu mu mudimu wa budimi. Bua tuetu kupita diteta edi, tudi ne bua kujingulula ne: kudifila tshishiki mu mudimu kudi kumvuija bivule kupita buambi bukese menemene, anyi bua tshidingishilu. Vuluka mêyi a dianyisha a Yezu bua mukamba mupele wakafila biende bionso. (Mâko 12:41-44) Tudi mua kudikonka ne: ‘Ndi ndifila mu mushindu wa muomumue bua mudimu wanyi wa budimi anyi?’ Buonso buetu tudi ne bua kuikala Bantemu ba Yehowa bikondo bionso, badiakaje misangu yonso bua kukenkesha butoke buetu.​—Matayo 5:16.

11. Mmunyi mudi mashintuluka mu ngumvuilu anyi mibelu pa tshikadilu mua kuikala diteta?

¹¹ Diteta dikuabu ditudi mua kupeta ndisuikila ku bualabale bua dianyisha dietu bua butoke budi buenda buvula bumunyika pa bulelela bua mu Bible ne bua mibelu mifila kudi kasumbu ka mupika wa lulamatu. (Matayo 24:45) Imue misangu muanda eu udi ulomba makajilula mu tshikadilu tshia muntu nkayende, bu pakaluabi bitoke bua se: aba badi banua mfuanka badi ne bua kulekela bikalabu basue kushala mu tshisumbu.a (2 Kolinto 7:1) Anyi diteta didi mua kuikala mu ditaba dietu se: bidi bikengela kushintulula nganyishilu wetu wa mijiki anyi imue mishindu ya dijikija lutetuku.b Netuele mpata bua meji adi mu mubelu eu mufila anyi? Peshi netulekele spiritu wa Nzambi ufumba ngelelu wetu wa meji ne utuambuluisha bua kuvuala bumuntu bua bena nkristo?​—Efeso 4:20-24; 5:3-5.

12. Bidi bikengela tshinyi bua kukolesha ditabuja panyima pa muntu mumane kutambula?

¹² Munkatshi mua makumi a bidimu, bungi bua aba badi mu musumba munene budi buenda buvula, ne panyima pa batismo wabu badi batungunuka ne kukolesha malanda abu ne Yehowa. Ebi bidi biumvuija bivule kupita dibuela mu mpuilu wa bena nkristo, kuya mu bimue bisangilu ku Nzubu wa Bukalenge, anyi kuenza mudimu wa budimi mu mpukapuka. Bua kumvuija: Muntu udi mua kuikala mupatuke ku mubidi mu Babilone Munene, nsangilu wa pa buloba bujima wa bitendelelu bia dishima, kadi mmulekele bushuwa Babilone anyi? Utshidi mulamate ku malu au adi aleja lungenyi lua Babilone Munene​—lungenyi ludi lubengangana ne mêyi-makulu makane a Nzambi anyi? Udi upepeja nsombelu wa tshitembu ne lulamatu lua mu dibaka anyi? Udi uzangika bipatshila biende nkayende ne bia bintu bia ku mubidi kupita bipatshila bia mu nyuma anyi? Eyowa, mmushale kayi ditoba dia mu bulongolodi ebu anyi?​—Yakobo 1:27.

Petela dikuatshisha ku ditabuja diteta

13, 14. Ntshinyi tshidi bamue bantu benze panyima pa bamane kutuadija dilonda njila wa ntendelelu mulelela?

¹³ Bituikala bushuwa banyeme Babilone Munene ne bapatuke kabidi mu bulongolodi ebu, katutangidi bintu bidi kunyima nansha. Mu diumvuangana ne dîyi-diludiki didi mu Luka 9:62, bua muntu yonso wa kutudi, kutangila kunyima kudi mua kumvuija dipangila kuikala mukokedi wa Bukalenge bua Nzambi. Yezu wakamba ne: ‘Muntu mumane kukuata ku lukasu ludi ludima nalu tubalu, biatangilaye kunyima, yeye kêna muakanangane ne bukalenge bua Nzambi.’

¹⁴ Kadi bamue bakalua bena nkristo kale mbadifuanyikije pashishe ne ndongoluelu eu wa malu. Ki mbakandamene lungenyi lua bulongolodi ebu. (2 Petelo 2:20-22) Bitanaji bia mu bulongolodi ebu mbimine disankidila ne dîba diabu, nenku bidi bipangisha didiunda diabu. Pamutu pa kulama ngenyi ne mitshima yabu bijadika bikole pa Bukalenge bua Nzambi ne buakane buende, kuteka bintu ebi pa muaba wa kumpala mu nsombelu, mbapambuke bua kulonda bipatshila bia bintu bia ku mubidi. Anu buobu basakibue bua kujingulula ditabuja diabu ditekete ne ngikadilu wabu wa tshiuyuya ne kushintulula nsombelu wabu pa kukeba mibelu ya kudi Nzambi, tshianana badi mu njiwu ya kujimija malanda abu a mushinga mukole ne Yehowa ne bulongolodi buende.​—Buakabuluibua 3:15-19.

15. Bidi bilomba tshinyi bua kushala banyishibue kudi Nzambi?

¹⁵ Ditusangana banyishibue ne badilongolole bua kupanduka ku dikenga dinene didi disemena pabuipi ne lubilu ndisuikila ku didilama bakezuke, bikale ne mizabi yetu ‘mitokesha mu mashi a Muan’a mukoko.’ (Buakabuluibua 7:9-14, NW; 1 Kolinto 6:11) Bituikala katuyi tulama nsombelu mukezuke ne muakane ku mêsu kua Nzambi, mudimu wetu wa tshijila kawakuanyishibua. Bushuwa, yonso wa kutudi udi ne bua kujingulula ne: ngikadilu muteta wa ditabuja neatuambuluishe bua kutantamana ne bua kuepuka difuanyika kubengibua kudi Nzambi.

16. Mmu mishindu kayi mudi mashimi mua kumueneka mikale diteta dia ditabuja dietu?

¹⁶ Imue misangu, ngumu ya ku tudiomba ne bakokeshi ba panu batu bashiminyina bantu ba Nzambi malu, bakula bua mitabuja etu ne nsombelu wetu mu mushindu mubi. Kabiena ne bua kutukemesha, bualu Yezu udi uleja patoke ne: ‘ba pa buloba badi ne bua kutukina bualu katuena ba pa buloba.’ (Yone 17:14) Netulekele aba badi Satana mufofomije batutshingisha ne batutekesha ku muoyo ne batufikisha ku diumvua bundu bua lumu luimpe anyi? Netulekele bua mashimi pa bidi bitangila bulelela kuikalawu ne buenzeji pa dibuela dietu mu bisangilu pa tshibidilu ne pa mudimu wetu wa buambi anyi? Peshi netushale bashindame ne bikale ne dikima ne bapangadije kupita diambedi bua kutungunuka ne kumanyisha bulelela budi butangila Yehowa ne Bukalenge buende?

17. Ndishindika kayi didi mua kutusaka ku ditungunuka ne kuleja ditabuja?

¹⁷ Bilondeshile milayi ya mu Bible ikadi mikumbane, tudi mpindieu baye kule mu tshikondo tshia ku nshikidilu. Mbulelela se: matekemena etu mashila pa Bible bua bulongolodi bupiabupia ne buakane nealue bualu bua bushuwa budi busankisha. Kumpala kua dituku adi kulua, buonso buetu tulejayi ditabuja didi kadiyi kunyungisha mu Dîyi dia Nzambi ne tufile bijadiki bia ditabuja dietu pa kubenga kulekela diyisha lumu luimpe lua Bukalenge pa buloba bujima. Ela meji bua binunu bia bayidi bapiabapia badi batambula lumingu luonso. Bualu abu ki nkabingila kakumbane bua tuetu kujingulula ne: lutulu lua Yehowa bua dikumbaja dia dilumbuluisha diende ludi mua kufikisha ku lupandu lua bantu ba bungi menemene anyi? Katuenaku ne disanka bua mudi Nzambi muanyishe bua mudimu wa diyisha Bukalenge udi upandisha mioyo kutungunukawu anyi? Ne katuenaku ne musangelu bua mudi bantu miliyo mivule bitabe bulelela ne bikale baleja ditabuja diabu anyi?

18. Ntshinyi tshidi dipangadika diebe bua dienzela Yehowa mudimu?

¹⁸ Katuena bamanye mutantshi wanenga diteta edi didiku lelu dia ditabuja dietu. Kadi bualu bumue mbulelela: Yehowa udi ne dituku dijadika dia kulubula malu bua diulu ne buloba bibi bidiku lelu’eu. Mu dindila, tuikalayi bapangadije bua kuidikija ngikadilu mutumbuke wa ditabuja diteta muleja kudi Mupuangaji wa ditabuja dietu, Yezu. Ne tulondayi tshilejilu tshia bashadile bela manyi bakadi bakulakaje ne tshia bakuabu badi basadila ne dikima dionso munkatshi muetu.

19. Ntshinyi tshiudi mua kuikala mujadike se: netshitshimune bulongolodi ebu?

¹⁹ Tudi ne bua kuikala bapangadije bua kumanyisha kakuyi ditekesha lumu luimpe lua kashidi kudi ditunga dionso, tshisamba, muakulu ne bantu bonso mu dienza mudimu pamue ne muanjelu udi upapala munkatshi mua diulu. Tuenze bua bumvue dimanyisha dia muanjelu: ‘Nutshine Nzambi, numutumbishe, bualu bua dîba dia dilumbuluisha diende diakulua.’ (Buakabuluibua 14:6, 7) Penzeka dilumbuluisha adi dia Nzambi, ntshinyi tshikala tshipeta bua ngikadilu muteta wa ditabuja dietu? Katshiakuikala butshimunyi bua butumbi​—dipikudibua ku ndongoluelu wa malu udiku ne kubuela mu bulongolodi bupiabupia ne buakane bua Nzambi anyi? Pa kutantamena mateta a ditabuja dietu, netuikale ne mushindu wa kuamba anu bu muakamba mupostolo Yone ne: “Ebu mbutshimunyi budi butshimune bulongolodi ebu, ditabuja dietu.”​—1 Yone 5:4, NW.

[Mêyi adi kuinshi]

Udi muvuluke anyi?

◻ Mmunyi mudibi se: mateta a ditabuja dietu adi mua kuikala kabingila ka disanka?

◻ Ng’amue mateta kayi a ditabuja dietu adi kaayi mua kuikala mapepele kujingulula?

◻ Mmunyi mutudi mua kupeta disanka pa kutshimuna mateta a ditabuja dietu?

[Bimfuanyi mu dibeji 17]

A. H. Macmillan (kumpala ku dia bakaji) bu mu tshikondo tshivuaye yeye ne balombodi ba Société Watch Tower bela mu buloko kapayi bualu

Uvua mutumibue ku mpungilu mu tshimenga tshia Detroit, ku Michigan, mu 1928

Mu bidimu biende bia ndekelu, Muanetu Macmillan utshivua uleja ditabuja

[Tshimfuanyi mu dibeji 18]

Anu bu dîku edi, bena nkristo bavule mu Afrike mbaleje ngikadilu muteta wa ditabuja