Ditabuja dia bena nkristo neditetshibue

‘Bonso kabena ne ditabuja.’​—2 TESALONIKE 3:2.

1. Mmunyi mudi miyuki ya kale mileje ne: bantu bonso kabena ne ditabuja?

MU MIYUKI ya kale, kuvua balume, bakaji ne bana bavua ne ditabuja dilelela. Muleji ngikadilu “dilelela” mmuakanyine bualu bantu bakuabu miliyo mbaleje mushindu kampanda wa ditabuja didi dikale bu tshitabataba, lukasa lua kuitabuja kakuyi nshindamenu anyi kabingila kakole. Misangu mivule ditabuja dia nunku ditu ditangila nzambi ya dishima anyi mishindu ya ntendelelu idi kayiyi mu diumvuangana ne Wa-Bukole-Buonso, Yehowa, ne Dîyi diende disokolola. Nenku mupostolo Paulo wakafunda ne: ‘Bonso kabena ne ditabuja.’​—2 Tesalonike 3:2.

2. Bua tshinyi mbia mushinga wa bungi bua tukonkonone ditabuja dietu?

² Kadi mêyi a Paulo adi umvuija ne: kale mu tshikondo atshi bamue bavua ne ditabuja dilelela ne, pa nanku, bamue badi nadi lelu’eu. Babadi bavule ba tshikandakanda etshi badi bajinga bua kuikala ne ditabuja dilelela dia mushindu’eu ne kudikolesha kabidi​—ditabuja diumvuangane ne dimanya dijalame dia bulelela bua Nzambi. (Yone 18:37; Ebelu 11:6) Ke mudibi buebe wewe anyi? Nanku bidi bikengela bua ujingulule ne wikale mudilongolole bua muanda wa se: ditabuja diebe neditetshibue. Bua tshinyi tudi mua kuamba nanku?

3, 4. Bua tshinyi tudi ne bua kutangila kudi Yezu pa bidi bitangila mateta a ditabuja?

³ Tudi ne bua kuitaba ne: Yezu Kristo udi ne mushinga wa bungi bua ditabuja dietu. Bushuwa, Bible udi wakula bua bualu buende bu Mupuangaji wa ditabuja dietu. Bidi nanku bua malu akamba Yezu ne akenzaye, nangananga mushindu wakakumbajaye milayi. Wakakolesha nshindamenu udi bantu mua kushimikila ditabuja dilelela. (Ebelu 12:2; Buakabuluibua 1:1, 2) Pabi, tudi tubala ne: Yezu uvua ‘muteyibue mu malu onso muomumue atudi tuteyibua nawu, kayi ne bubi.’ (Ebelu 4:15) Eyowa, ditabuja dia Yezu divua ditetshibue. Pamutu pa kututekesha mu mikolo anyi kutukuatshisha buôwa, muanda eu udi ne bua kutukolesha.

⁴ Mu dipitshila mu mateta makole too ne ku lufu lua pa mutshi, Yezu “wakayila ditumikila.” (Ebelu 5:8) Wakajadika ne: bantu badi mua kuikala ne nsombelu mumvuangane ne ditabuja dilelela nansha mateta a mushindu kayi mua kubafikila. Bualu ebu budi buangata diumvuija dia pa buadi patudi tuela meji bua tshiakamba Yezu bua balondi bende ne: ‘Nuvuluke dîyi dingakanuambila ne: Mupika kêna mutambe mfumu wende.’ (Yone 15:20) Bushuwa, bua balondi bende mu tshikondo tshietu etshi, Yezu wakadianjila kumanyisha ne: “Bisamba bionso nebikale n’enu lukuna bua dina dianyi.”​—Matayo 24:9.

5. Mmunyi mudi Mifundu ileja ne: netupete mateta?

⁵ Ku ntuadijilu kua siekele eu, dilumbuluisha diakabanga ne nzubu wa Nzambi. Mifundu yakadianjila kuamba ne: ‘Tshikondo tshia dilumbuluisha kubangadi ku ba mu nzubu wa Nzambi tshiakulua, ne biadianjiladi kubanga kutudi, ku nshikidilu kua badi kabayi batumikila lumu luimpe lua Nzambi nekuikale tshinyi? Ne biasungidibua muntu muakane anu ne bualu bukole, muntu udi kayi wa Nzambi ne udi mubi neamueneke kudi kunyi?’​—1 Petelo 4:17, 18.

Bua tshinyi ditabuja nditetshibue?

6. Bua tshinyi ditabuja ditetshibue didi ne mushinga mukole?

⁶ Mu ngumvuilu kampanda, ditabuja didi kadiyi ditetshibue kadiena ne mushinga muteta, ne ngikadilu wadi udi ushala kayi mumanyike. Udi mua kudifuanyikija ne sheke kayi muanji kupetela mfranga. Udi mua kuikala mupete sheke bua mudimu uudi muenze, bua bintu biudi mufile, anyi mene bu dipa kampanda. Sheke udi mua kumueneka muakane, kadi udi nanku anyi? Mmuakanyine bushuwa bungi bua mfranga budi bumuenekapu anyi? Bia muomumue, ditabuja dietu didi ne bua kuikala dipite tshimuenekelu patupu anyi diamba mukana tshianana. Didi ne bua kutetshibua bituikala basue kujadika ne: didi ne mushinga mukuatshishi ne ngikadilu mulelela. Padi ditabuja dietu ditetshibue, tudi mua kumona se: ndikole ne didi ne mushinga. Diteta didi kabidi mua kusokolola malu makuabu adi akengela bua kulengeja anyi kukolesha ditabuja dietu.

7, 8. Mateta a ditabuja dietu adi afumina penyi?

⁷ Nzambi udi ulekela dikengeshibua ne mateta makuabu a ditabuja bitufikila. Tudi tubala ne: ‘Muntu kambi biende pamuteyabu ne: Ndi muteyibue kudi Nzambi; bualu bua Nzambi kêna mumanye mua kuteyibua ne malu mabi, ne yeye muine kêna uteya muntu.’ (Yakobo 1:13) Nnganyi, peshi ntshintu kayi tshidi tshikeba mateta bu aa? N’Satana, bulongolodi ebu ne mubidi wetu mupange bupuangane.

⁸ Tudi mua kuitaba ne: Satana udi ne buenzeji bukole pa bulongolodi ebu, pa ngelelu wabu wa meji ne pa njila yabu. (1 Yone 5:19) Ne pamu’apa tudi bamanye ne: udi usonsuela bena nkristo dikengeshibua. (Buakabuluibua 12:17) Kadi tudi batuishibue bia muomumue se: Satana udi ukeba kutupambuisha pa kulobesha mubidi wetu mupange bupuangane, ulembeleja bilobeshi bia mu bulongolodi ebu ku mêsu kuetu, mutekemene se: netukuatshike ku ndobo, tubenga kutumikila Nzambi, ne tufika ku dibengibua kudi Yehowa anyi? Bushuwa, ngenzelu ya Satana kayena ne bua kutukemesha, bualu wakatumika ne budimu bua muomumue pavuaye ukeba bua kuteta Yezu.​—Matayo 4:1-11.

9. Mmunyi mutudi mua kupetela dikuatshisha ku bilejilu bia ditabuja?

⁹ Ku diambuluisha dia Dîyi diende ne tshisumbu tshia bena nkristo, Yehowa udi uteka kumpala kuetu bilejilu bilelela bia ditabuja bitudi mua kuidikija. Paulo wakabela ne: “Bana betu, ikalayi nungidikija meme, mesu enu atangile amu badi balonda tshilejilu tshituvua banuleje.” (Bena Filipi 3:17, MMM) Bu muvuaye umue wa ku basadidi bela manyi ba Nzambi ba mu siekele wa kumpala, Paulo uvua upita kumpala mu dienza midimu ya ditabuja nansha muakapetaye mateta makole. Ku ndekelu kua siekele eu wa 20, katuena bapangile bilejilu bia muomumue bia ditabuja. Mêyi adi mu Ebelu 13:7 adi akuata mudimu mpindieu ne bukole bua bungi anu bu muvuawu enza pakaafunda Paulo, ne: ‘Nuvuluke bantu [badi] banukokesha, bakanuambila dîyi dia Nzambi; nuela meji a nshikidilu wa tshikadilu tshimpe tshia mioyo yabu, nuidikije ditabuja diabu.’

10. Mbilejilu kayi bisunguluke bia ditabuja bitudi nabi mu bikondo bidi panshi ebi?

¹⁰ Mubelu au udi ne bukole bua pa buabu patudi tutangila mushindu udi tshikadilu tshia bashadile bela manyi tshilue kumueneka. Tudi mua kutangila tshilejilu tshiabu ne kuidikija ditabuja diabu. Diabu nditabuja dilelela, didi mateta malengeje. Buikale ne ntuadijilu mukese mu bidimu bia 1870, buena-muntu bua bena nkristo bua buloba bujima buakadiunda. Bu tshipeta tshia ditabuja ne ditantamana dia bela manyi aba kubangila tshikondo atshi, Bantemu ba Yehowa bapite pa miliyo itanu ne tshitupa badi mpindieu bayisha ne balongesha Bukalenge bua Nzambi. Tshisumbu tshia batendeledi balelela ba lukunukunu tshidiku mpindieu pa buloba bujima ntshijadiki tshikole tshia ditabuja ditetshibue.​—Tito 2:14.

Ditabuja nditetshibue bua 1914

11. Mmunyi muvua tshidimu tshia 1914 tshikale tshia mushinga bua C. T. Russell ne banyanende?

¹¹ Bidimu bivule kumpala kua dibudika dia mvita ya kumpala ya buloba bujima, bashadile bela manyi bavua bikale bamanyisha ne: tshidimu tshia 1914 tshivua ne bua kuikala tshikondo tshia mushinga mu milayi ya mu Bible. Kadi, amue a ku matekemena abu dîba diawu kadivua dianji kukumbana, ne mmuenenu wabu wa malu avua ne bua kuenzeka kavua mujalame menemene. Tshilejilu, C. T. Russell, mulombodi wa kumpala wa Société Watch Tower, ne banyanende bakamona se: bivua bikengela kuenza mudimu muvule wa buambi. Bakabala ne: “Evanjeliyo eu wa bukalenge neayishibue mu buloba bujima bu bumanyishi mu matunga onso; ne pashishe nshikidilu nealue.” (Matayo 24:14, King James Version) Kadi mmunyi muvua kasumbu kabu katambe bukese mua kuenza nanku?

12. Mmunyi muvua umue wa ku banyanende ba Russell muandamune ku bulelela bua mu Bible?

¹² Tangila muvua muanda eu muikale ne buenzeji kudi A. H. Macmillan, nyanende wa Russell. Mulela mu Canada, Macmillan kavua muanji kukumbaja bidimu 20 pakapetaye mukanda wa Russell wa Le plan des âges (1886). (Mukanda eu, mubikila kabidi ne: Le plan divin des âges, wakalua Volime 1 wa mukanda muabanya bikole wa Études des Écritures. Volime 2, Le temps est proche [1889], wakafunkuna 1914 bu ndekelu wa “bikondo bia Bampangano.” [Luka 21:24, KJ]) Butuku buine buakatuadija Macmillan dibala, wakela meji ne: “Eyo, bidi biumvuika bu bulelela!” Mu muvu wa été wa 1900, wakapetangana ne Russell mu mpungilu wa Balongi ba Bible, bu muvuabu babikila Bantemu ba Yehowa tshikondo atshi. Katupa kîpi Macmillan wakatambula e kutuadijaye kuenza mudimu ne Muanetu Russell ku tshilombuelu tshia Société mu New York.

13. Ndutatu kayi luvua Macmillan ne bakuabu bamone pa bidi bitangila dikumbana dia Matayo 24:14?

¹³ Bashindamene pa dibala diabu dia Bible, bena nkristo abu bela manyi bakafunkuna 1914 bu tshidimu tshia dishintuluka dinene mu dilongolola dia Nzambi. Kadi Macmillan ne bakuabu bakadiebeja muvua diyisha mu matunga didianjila kuamba mu Matayo 24:14 mua kuenzeka mu tshikondo tshîpi tshivua tshishale. Wakamba pashishe ne: “Ndi mvuluka mumvua ngakula bualu abu ne Muanetu Russell misangu ne misangu, ne uvua wamba ne: ‘Mbimpe muanetu, anu mu New York nkayamu tudi ne bena Yuda ba bungi bapite badi mu Yeruzaleme. Tudi ne bena Irlande ba bungi muaba eu bapite badi mu Dublin. Ne tudi ne bena Italie ba bungi bapite badi mu Roma. Mpindieu tuetu babapete muaba eu, abi nebikale dipeta bantu ba buloba bujima ne mukenji.’ Kadi abi kabivua pabuipi ne kusankisha bieledi bietu bia lungenyi. Nenku tuakela meji bua kupatula ‘Foto-drama.’”

14. Kumpala kua 1914, mmudimu kayi wa pa buawu uvuabu batuadije?

¹⁴ “Foto-drama” uvua muanda wa tshikuma. Uvua filme wa bimfuanyi bizola bia mekala, bileja pamue ne miyuki ya mu Bible ne mijiki mikuata pa mikaba ya fono. Mu 1913, Tshibumba tshia Nsentedi tshiakamba bua mpungilu wa mu Arkansas, ku États-Unis, ne: “Bakasuika dîyi dimue ne: dîba divua dikumbane bua kutumika ne bimfuanyi bidi binyunga mu dilongesha malelela a mu Bible. . . . [Russell] wakumvuija ne: uvua wenza mudimu mu dilongolola dine adi munkatshi mua bidimu bisatu ne tshikondo atshi ukavua mupete nkama ya bimfuanyi bilengele bikala, kakuyi mpata, mua kukoka misumba mivule ne kumanyisha Evanjeliyo, ne kuambuluisha bantu bua baleje kabidi ditabuja diabu kudi Nzambi.”

15. “Foto-drama” wakapatula bipeta bia mushindu kayi?

¹⁵ “Foto-drama” wakakumbaja bualu abu panyima pa dimuleja dia mbangilu mu Tshiongo 1914. Bidi bilonda ebi nduapolo ya mu Tshibumba tshia Nsentedi tshia mu  914:

Tshia 1 Tshisanga: “Panyima pa mumane kumona bitupa bibidi, ministre kampanda wakamba ne: ‘Ndi mumone anu tshia bisatu tshimue tshia FOTO-DRAMA WA BUFUKI, kadi nkadi mulongeleku malu mavule adi atangila Bible kupita angakalonga mu bidimu bianyi bisatu bia malonga mu seminere wa teoloji.’ Muena Yuda kansanga, panyima pa dimubandila wakamba ne: ‘Ndi mupatukemu bu muena Yuda mutambe buimpe kupita pangakabuelamu.’ Bansaserdose bavule bena Katolike ne ba-mansere bakaya bua kumona DRAMA ne bakaleja dianyisha dia bungi. . . . Anu kopi ya DRAMA dikumi ne ibidi ke ikadi mijike mpindieu. . . . Nansha nanku tukadi bafike mu bimenga makumi asatu ne tshimue ne tudi tuenzamu maleja a drama . . . Ku dituku dionso bantu bapite pa binunu makumi asatu ne bitanu badi babandila, bateleja, bakatshila, bela meji ne bapeta dibenesha.”

Tshia 15 Kabalashipu: “Bimfuanyi mbimvuije muena lukunukunu lua bungi bua kutangalaja Bulelela, ne mbivudije dinanga dianyi bua Tatu wa mu Diulu ne bua Mukuluetu musuibue Yezu. Dituku dionso ntu ndombela FOTO-DRAMA WA BUFUKI ne bonso badi badifile mu dimuleja dibenesha divule dia kudi Nzambi . . . Ndi musadidi wenu mu [Mukalenge], F. W. KNOCHE.​—Iowa.”

Tshia 15 Kashipu: “Tudi ne disanka dia kuleja buenzeji bulenga budi bimfuanyi bishiye mu tshimenga etshi, ne tudi bajadike bimpe ne: bumanyishi ebu bupesha bantu, badi kabidi benda batumika nabu bua kusangisha bantu bavule badi bafila tshijadiki tshia mudibu mabue a mushinga madisunguila kudi Mfumu nkayende. Tudi bamanye balongi ba Bible ba bungi badi mpindieu badisangishe ne Kasumbu muaba eu bu tshipeta tshia mudimu wa Foto-drama. . . . Muanenu wa bakaji mu Mukalenge, EMMA L. BRICKER.”

Tshia 15 Kasuabanga: “Tudi bashindike se: nenuikale ne disanka dia kupeta ngumu bua bumanyishi bulenga budibu benda bafila ku diambuluisha dia FOTO-DRAMA WA BUFUKI mu nzubu wa London Opera House, mu Kingsway. Tshianza tshilombodi tshia Mukalenge ntshimueneke mu mushindu wa dikema mu kanungu konso ka dileja edi didi bana betu basankidila bikole . . . Munkatshi mua babandidi betu muvua bantu ba nsombelu yonso ne ba mishindu yonso; tudi bamone bavule ba ku bamfumu ba bitendelelu munkatshi mua babandidi. Mudiambike kampanda . . . wakalomba tiké bua yeye ne mukajende kuluabu kumumona kabidi. Munga mulombodi wa Ekleziya wa Angleterre mmubuele mu DRAMA eu misangu ya bungi, ne . . . mmulue ne balunda bende bavule bua badimuenaye. Bepiskopo babidi bavuamu pabu, ne bantu ba bungi ba bunême.”

Tshia 1 Tshisua-munene: “Meme ne mukajanyi tudi bushuwa tusakidila Tatu wetu wa mu Diulu bua dibenesha dinene ne kadiyi kutua mushinga didi ditufikile ku diambuluisha diebe [Muanetu Russel]. Uvua FOTO-DRAMA webe mulengele uvua mutufikishe ku dipeta ne ditaba Bulelela . . . Tudi ne volime yebe isambombo ya ÉTUDES DES ÉCRITURES. Idi ne diambuluisha dia bungi.”

Diandamuna ku mateta mu tshikondo atshi

16. Bua tshinyi tshidimu tshia 1914 tshiakalua ne diteta dia ditabuja?

¹⁶ Kadi netuambe tshinyi pavua bena nkristo aba ba muoyo umue ne badifile bamone se: ditekemena diabu dia kuikala basangisha ne Mukalenge mu 1914 kadivua dikumbane? Bela manyi abu bakapitshila mu tshikondo tshia mateta tshia pa buatshi. Tshibumba tshia Nsentedi tshia 1 Kasuabanga 1914 (Angl.), tshiakamanyisha ne: “Tuvulukayi ne: tudi mu tshikondo tshia mateta.” Bua muanda eu, mukanda wa Les Témoins de Jéhovah: Prédicateurs du Royaume de Dieu (1993) udi wamba ne: “Bidimu bia kubangila mu 1914 too ne mu 1918 bivua bushuwa bimueneke bikale ‘tshikondo tshia mateta’ bua Balongi ba Bible.” Bavua mua kuanyisha bua ditabuja diabu kuikaladi dilengeja ne ngelelu wabu wa meji kuikalaye muakaja bua kumonabu mua kuditua mu mudimu munene uvua kumpala anyi?

17. Mmunyi muakumvua bela manyi ba lulamatu bua dishala pa buloba panyima pa 1914?

¹⁷ Tshibumba tshia Nsentedi tshia 1 Kabitende 1916 (Angl.) tshiakamba ne: “Tuvua tuela meji ne: mudimu wa Dinowa wa kusangisha Ekleziya [bela manyi] uvua mua kuikala mukumbane kumpala kua ndekelu wa Bikondo bia Bampangano; kadi bualu nansha bumue mu Bible kabuvua buleja nunku. . . . Tudi tunyingalala bua mudi mudimu wa Dinowa utungunuka anyi? . . . Mmuenenu utudi nende mpindieu, bana betu basuibue, udi ne bua kuikala wa dianyisha dikole kudi Nzambi, dianyisha divule bua Bulelela bulengele budiye mutupeshe diakalenga dia kumona ne budibu batufunkuna nabu, ne lukunukunu luvule mu diambuluisha bua kufikisha bakuabu ku dimanya Bulelela abu.” Ditabuja diabu divua dikale ditetshibue, kadi bakakama diteta adi ne kuditshimuna. Kadi tuetu bena nkristo tudi ne bua kuikala bamanye ne: mateta a ditabuja adi mua kuikala a bungi ne mashilangane.

18, 19. Mmateta kayi makuabu a ditabuja akalonda bua bantu ba Nzambi katupa kîpi panyima pa lufu lua muanetu Russell?

¹⁸ Tshilejilu, mushindu mukuabu wa diteta wakafikila bashadile katupa kîpi panyima pa lufu lua Muanetu Charles Taze Russell. Divua diteta dia bulamatshi ne ditabuja diabu. Nnganyi uvua “mupika wa lulamatu” wa mu Matayo 24:45 (NW)? Bamue bakela meji ne: uvua Muanetu Russell nkayende, ne bakabenga diakamue bua kuenza mudimu pamue ne ndongoluelu mipiamipia ya bulongolodi. Bu yeye muikale mupika, ntshinyi tshivua bana betu aba ne bua kuenza mpindieu ukadiye mufue? Bavua ne bua kulonda muntu kampanda uvuabu bafume ku disungula, peshi tshikondo tshivua tshikumbane musangu au bua kujingulula ne: Yehowa uvua wenza mudimu, ki ng’anu ne muntu umue, kadi ne kasumbu kajima ka bena nkristo bu tshia-mudimu peshi kasumbu ka mupika anyi?

¹⁹ Diteta dikuabu diakafikila bena nkristo balelela mu 1918 pavua bakokeshi ba mu bulongolodi ebu, basaka kudi bamfumu ba Bukua-buena-nkristo, ‘bapangadijile [bulongolodi bua Yehowa] malu mabi avua alonda mikenji.’ (Musambu 94:20) Bakapumuina Balongi ba Bible dikengeshibua dia tshinyangu mu Amerike wa ku Nord ne ku Mputu. Buluishi busonsola kudi bamfumu ba bitendelelu buakakola menemene mu dia 7 Lumungulu 1918, pavua mbulamatadi wa États-Unis mutume mêyi bua kukuata J. F. Rutherford ne bavule ba munkatshi mua banyanende, pamue ne A. H. Macmillan. Bakababanda muvuabu basakangana ku buntomboji, ne bakokeshi bakabenga didilumbuluila diabu bu bantu bavua kabayi ne bualu.

20, 21. Anu muvuabi bidianjila kuamba mu Malaki 3:1-3, mmudimu kayi uvua muenzeke munkatshi mua bela manyi?

²⁰ Nansha muvuawu kauyi mumanyike bimpe mu tshikondo atshi, mudimu wa dikezula uvua wenda wenzeka, anu mudibi biumvuija mu Malaki 3:1-3: ‘Nnganyi wamanya mua kushala polaa mu dituku dia kulua kuende? Nnganyi washindama pamuenekaye? Bualu bua [mutuadi wa mukenji wa tshipungidi] neikale bu kapia ka mukunjiji wa biamu, ne bu nsabanga wa musukudi wa bilulu. Yeye neashikame panshi ukunjija ne ulengeja tshiamu tshia argent, nealengeje bana ba Lewi. Neabakenkeshe bu or ne argent, bua buobu bikale kudi Yehowa bu bantu badi bafila milambu kudiye mu buakane.’

²¹ Pavua Mvita ya Kumpala ya Buloba bujima mitangile ku ndekelu, bamue Balongi ba Bible bakapeta diteta dikuabu dia ditabuja​—né bavua mua kulama ndubidilu mukole mu malu a busalayi a mu bulongolodi ebu. (Yone 17:16; 18:36) Bamue kabakenza nanku. Nenku mu 1918, Yehowa wakatuma ‘mutuadi wa mukenji wa tshipungidi,’ Kristo Yezu, ku ndongoluelu wa ntempelo Wende wa mu nyuma bua kukezula kasumbu kakese ka batendeledi Bende ku manyanu a mu bulongolodi ebu. Aba bavua badifile bua kuleja ditabuja dilelela bakalongela ku malu mamona ne bakaya kumpala, ne lukunukunu luonso batungunuka ne kuyisha.

22. Bua mateta a ditabuja, mbualu kayi budi bushale bua kukonkonona?

²² Malu atudi bamone aa kaena patupu malu a kale adi asankisha. Mmasuikakane buludiludi ne nsombelu wa mu nyuma udiku mpindieu wa tshisumbu tshia Yehowa tshia pa buloba bujima. Kadi tukonkononayi mu tshiena-bualu tshidi tshilonda amue a ku mateta a ditabuja adi bantu ba Nzambi bikale bapeta lelu’eu ne tumone mutudi mua kuatantamena bimpe.

Udi muvuluke anyi?

◻ Bua tshinyi bantu ba Yehowa badi ne bua kutekemena bua se: ditabuja diabu neditetshibue?

◻ Mmadikolela a mushindu kayi avua menza kumpala kua 1914 bua kutangalaja mukenji wa Nzambi?

◻ “Foto-drama” uvua tshinyi, ne wakapatula bipeta kayi?

◻ Mmunyi muvua malu akenzeka mu lupolo lua 1914-18 mambuluishe bua kuteta bela manyi?

[Tshimfuanyi mu dibeji 12]

Batangile ku ndekelu kua siekele wa 19, bantu ba mu matunga mavule bavua balonga Bible ku diambuluisha dia mulongolongo wa mikanda ya “L’Aurore du Millénium,” wakabikilabu pashishe ne: “Études des Écritures”

[Tshimfuanyi mu dibeji 13]

Mukanda wa kudi C. T. Russell muikale ne mêyi a mbangilu mafunda a kukuata pa mikaba muakambaye ne: “‘Foto-drama wa bufuki’ mmuleja kudi IBSA​—International Bible Students Association. Tshipatshila tshiende ntshia kulongesha bantu patoke malu a Nzambi ne a sianse, ne kubingisha Bible”

[Tshimfuanyi mu dibeji 15]

Démétrius Papageorge wakaya wenda uleja “Foto-drama wa bufuki.” Pashishe, bavua bamuele mu buloko bua ndubidilu wende wa Buena-nkristo