Bamanyishi ba Bukalenge badi balonda

Tutumikayi ne mpunga yonso

BANTEMU BA YEHOWA mbamanyike buloba bujima bua mudimu wabu wa dilongesha Bible. Kadi badi kabidi balombola ndongamu idi ifila bipeta bikuabu bimpe mu nsangilu wa bantu. Mudimu eu wa patoke mmuakidila bimpe, anu bu mudibi bileja kudi malu mamona adi alonda aa a mu ditunga dia Équateur.

◻ Balombodi ba tshiapu tshinene tshidi tshienza mmuenu bavua basue kulongolola miyuki pa malu a mushinga a mu dîku bua bena mudimu babu. Mulombodi wa malu a bena mudimu wakabikila bansaserdose bavule bena Katolike bua kubuelamu kadi kavua mupete diandamuna nansha dimue. Nsaserdose umue wakamuambila ne: bansaserdose bakese menemene ke bavua bakumbaje malu-malomba bua kuakula pa tshiena-bualu atshi mu mushindu wa se: pamu’apa muntu nansha umue kavua mua kulua. Umvua bualu abu, Ntemu kampanda muena mudimu wakalongolola bua muanetu wa balume utu misangu mivule utumika mu teritware wa bangenda kukumbulaye tshiapu atshi.

Dituku mene diakalonda, Ntemu eu wakamonangana ne mulombodi wa malu a bena mudimu muikale ne biena-bualu bia kulonga bia dileja. Liste wa biena-bualu uvua muangatshila mu mikanda kabukabu ya Société Watch Tower. Mulombodi wakakema. Wakasungula biena-bualu bisatu bua kuyukidilapu​—malanda mimpe ne bantu, mêyi-maludiki ku muaba wa mudimu, ne mêyi-maludiki mu dîku. Nenku bakalongolola bua kukonkonona mamanyisha aa ne bena mudimu bonso.

Bavua batapulule bena mudimu mu bisumbu muanda-mutekete bia bantu 30 ku tshisumbu tshionso, pashishe bana betu basatu ba balume bakumbane bakabaleja mamanyisha aa. Bipeta bivua munyi? Bena mudimu ndambu bakalomba bua kubakumbulabu ku mabu, ne bakabanya mikanda 216 idi yambuluisha bua kulonga Bible. Balombodi bakakema bikole mu mushindu wa se: bakalomba Bantemu bua kulongolola mulongolongo mukuabu wa miyuki.

◻ Matuku adi panshi aa, ditunga dia Équateur diakapatula mukenji udi wanyisha bua kulongesha malu a Nzambi mu tulasa. Muanetu wa bakaji misionere wakakumbula mukaji kampanda mutangidi wa tshilongelu tshipuekele ne wakamuebeja mushindu uvua mukenji mupiamupia muikale ne dikuatshisha. Mutangidi eu wakamumvuija ne: bavua batete bua kutuadija ndongamu wa ntendelelu wa Mariya kadi kabavua bakumbaje bualu nansha bumue. Pakamba muanetu wa bakaji ne: ntendelelu bu au uvua mua kutatshisha bana bavua kabayi bena Katolike, mutangidi eu wakitaba. Misionere wakamba ne: “Kabidi, tudi ne ndongamu wa dilongesha mêyi-maludiki a tshitembu mangata mu Bible udi kayi wenzeja muntu bua kuitaba tshitendelelu tshisunguluke.” Mutangidi eu wakandamuna ne: “Ndîba kayi diudi mua kulua? Dia buabua anyi?” Panyima pa misionere mumane kumuleja mukanda wa Telejayi Mulongeshi munene, bakangata dipangadika dia se: bavua mua kukonkonona nshapita wa “Badi bapole malu badi ne disanka.”

Mu dialukila diende, misionere eu wakenza mêba asatu mu dikumbula tulasa tushilangane muanda-mutekete ne mutangidi eu muikale uteleja pende. Panyima pa diyukila ne kalasa kitanu, mulongi umue wakamba ne: “Madame, suaku ukumbule kalasa kisambombo. Misangu yonso batu bakeba kutukuma ne kutuadija mvita!” Mulongeshi kampanda wakamba ne: “Tshikisu ntshiena-bualu tshia mushinga. Bidi bitukengela dîba dia bungi bua kuyukila pa muanda eu.”

Bakalongolola bua kualukila kukumbula tshilongelu etshi bua kuyukila pa biena-bualu bu mudi butumike ne dishima. Too ne mpindieu, bipeta bidi bikale bisankisha menemene. Mpindieu padi muanetu wa bakaji eu misionere upita mu musesu, bana badi balua lubilu bua kumuela muoyo ne kumuela nkonko ya mu Bible. Bakuabu ne disanka dionso badi bamumanyisha kudi baledi babu. Kusakidila apu, mmutuadije dilonga dia Bible dia kumbelu ne babidi ba ku bana balongi.