Indila ne lutulu

MULAMI uvua wela mbila ya bungi ne: “Mubuabua!” pavuaku kakuyi mubuabua wakamona se: pakelaye lubila pashishe ukeba diambuluisha kabakaluteleja. Bia muomumue lelu’eu, bantu ba bungi badi balengulula disemena pabuipi dia dituku dia Yehowa bualu mbumvue madimuija kaayi kubala adi mamueneke mikale a dishima. Muanda wa se: bantu ba bungi mbapangile kujingulula didimuija didi dikale dia bushuwa ne pashishe kuditeleja mmutumika nawu kudi muluishi munene wa Nzambi, Satana, “muanjelo [au] wa munya” wa dishima.​—2 Kolinto 11:14.

Lungenyi lua kudiumvua bakumbane ludi mua kuikala lua njiwu nansha bua aba badi basadile Yehowa munkatshi mua tshikondo kampanda. Bua tshinyi? Tangila didimuija difila kudi mupostolo Petelo mu siekele wa kumpala.

Ela meji bimpe

Mukanda muibidi wa Petelo mupudija ku spiritu uvua divuluija kudi bena nkristo ba kumpala ne kutudi tuetu kabidi. Udi ufunda ne: ‘Bananga, eu mmukanda muibidi katataka undi nnufundila; mu bubidi buayi ndi ntabuluja [“makokeshi enu a diela meji bimpe,” NW] bua kunuvuluija.’ (2 Petelo 3:1) Nnshindamenu kayi udi nende Petelo bua diditatshisha edi? Petelo udi uzangika dikalaku dia basekianganyi bena tuseku tudi tukepesha lungenyi ludi lukengedibua lua mitalu pa bidi bitangila tshikondo tshidi basadidi ba Nzambi bikale. Mpindieu ke tshikondo tshia kudimukila didingibua kudi bena nsenda. Nenku Petelo udi ubela babadi ba mukanda wende bua ‘kuvuluka mêyi akambibua diambedi kudi baprofete ba tshijila.’ (2 Petelo 3:2; Bienzedi 3:22, 23) Ntshinyi tshivua baprofete bambe?

Misangu ya bungi basadidi ba Nzambi ba lulamatu bakakoka ntema ya bantu ku mushindu uvua malumbuluisha a Nzambi majikije bubi. Petelo udi uvuluija babadi ba mukanda wende bua Mvula munene wa mu matuku a Nowa uvua Nzambi mutumike nende bu mushindu wa kushintulula malu pavua buloba buule tente ne bubi. Bushuwa Mvula wa kabutu au wa mudimbi wakatuisha bulongolodi bua tshikondo atshi ku ndekelu. Kadi Nzambi wakalama Nowa ne dîku diende mu buatu pamue ne bifukibua bia muoyo bivua bileja “tshintu tshionso tshidi ne muoyo.” Mianu ya kale ya pa buloba bujima idi ijadika bulelela bua muyuki eu wa mu Bible.a​—Genese 6:19; 2 Petelo 3:5, 6.

Petelo udi ubikila dibuela dia Nzambi mu malu a bantu bu ‘bualu budibu bapua muoyo’ kudi bamue. Pashishe bakuabu bavua baladisha mu didiumvua bakumbane kudi basekianganyi ba tshikondo atshi. Kadi, tuetu katuena ne bua kupua muoyo malu akadi Yehowa muenze. Petelo udi utulondela ne: ‘Bua dîyi diodimue diulu didiku katataka ne buloba kabidi biakabutshidibua bua kupia ne kapia bilamibue too ne ku dituku dia dilumbulula ne dia dibutuka dia bantu badi babenga Nzambi.’ (2 Petelo 3:7) Eyowa, Nzambi udi kabidi ne bua kubuela mu malu a bantu.

Nzambi kêna ne lujoko

Binunu bia bidimu bikadi bipite. Bua tshinyi Nzambi mmuindile mutantshi bule nenku bua kujikija ntatu ya bukua-bantu? Petelo udi kabidi wela kashonyi pa bualu bukuabu. Udi wamba ne: ‘Bananga, kanupu muoyo bua bualu ebu bumue ne: dituku dimue kudi Mukalenge [“Yehowa,” NW] didi bu bidimu tshinunu, ne bidimu tshinunu bidi bu dituku dimue.’ (2 Petelo 3:8) Mmuenenu wa Yehowa bua tshikondo mmushilangane ne wetu. Bua Nzambi wa tshiendelele, tshikondo tshia kubangila ku difukibua dia Adama too ne mpindieu katshiena nansha tshienza lumingu lumue. Kadi nansha tuetu bikale ne mmuenenu kayi wa tshikondo, bidimu tshinunu bionso ne dituku dionso bidi bipita bidi bitusemeja pabuipi menemene ne dikumbana dia dilongolola dia Yehowa.

“Dibungu dindila kaditu diboba lukasa” nkasumuinu kadi kumvuija ne: dindila patupu dia muanda kampanda ditu dimueneka bu didi dijingakaja dienzeka diawu. Kadi, Petelo udi ulomba bua ‘kuindila ne kulama bikole mu lungenyi dikalaku dia dituku dia Yehowa.’ (2 Petelo 3:12, NW) Mmunyi mutudi mua kudima mmuenenu wa mu lungenyi udi utulama batabale bua disemena pabuipi dia dibuela dia Nzambi mu malu a bantu?

Bienzedi bidi biakula bikole kupita mêyi

Petelo udi ushindamena pa malu ne bienzedi. Udi wakula bua “bienzedi binsantu bia nsombelu” pamue ne “malu a bulamate kudi Nzambi.” (2 Petelo 3:11, NW) Ntshinyi tshidi malu aa umvuija?

Musadidi mulelela wa Nzambi udi wenza malu mu mushindu udi usankisha Nzambi. Ditabuja dia mutendeledi mulelela wa mushindu’eu didi dimuenekela ku nsombelu wende. Ebi bidi bimusunguluja ne aba badi bakula patupu bua ditabuja Nzambi ne malaya ende. Pamu’apa udi mumone se: mudimu wa patoke wa Bantemu ba Yehowa udi ubateka ku luseke bu basunguluke. Batu bakumbula ku nzubu kuenu bua kukoka ntema ku malaya a Nzambi maleja mu Bible. Kadi badi kabidi bafila bumanyishi bua matekemena ne mitabuja abu muaba wonso udibu bapeta bantu.

Ntemu udi uditua mu dimanyisha ditabuja diende kudi bakuabu, mitabuja ende adi akola ne ashindama. Mêyi adiye wakula adi akolesha buenzeji bua ditabuja ne kabidi afila disanka dia munda ne disankishibua. Patudi tumanyisha lumu luimpe lua Bukalenge bua Nzambi, tudi kabidi tusankisha Yehowa. Tudi bamanye ne: ‘kêna upanga buakane bua kupuaye muoyo mudimu wetu ne dinanga dituakaleja bua dîna diende,’ anu bu mudi mupostolo Paulo, nyanende wa Petelo umanyisha.​—Ebelu 6:10; Lomo 10:9, 10.

Ntshipeta kayi tshidiku bua diditatshisha edi bua kumuangalaja lumu luimpe lua Bukalenge mu matuku aa a ku nshikidilu wa ndongoluelu eu mubi wa malu? Bantu ba mitshima milulame nkama ya binunu badi balonga mushindu wa kuikala mu malanda mashême ne Yehowa, bua kupetela dikuatshisha ku bulenga buende bukena butuakanyine ne bapeta disanka dilelela mu ditekemena dia muoyo wa tshiendelele mu buloba bua mparadizu.

Badianjile kumanya

Nansha mutudi bamanyine mu Bible ne: Yehowa Nzambi neashintulule malu mu tshikondo tshiende tshijadika, tudi ne bua kuteleja didimuija dikuabu didi Petelo ufila. “Badianjile kuikala ne dimanya edi, dimukayi bua kabanupambuishi nabu ku ntupakanyi ya bantu badi batupa ku mikenji, ne bua kanupangidi mu bushindame buenu.”​—2 Petelo 3:17, NW.

Bushuwa Yehowa uvua mudianjile kumanya ne: bamue bantu badi bapange ditabuja dikole bavua mua kutekeshibua mu mikolo kudi tshidi tshimueneka bu dijanguluka dia dibuela dia Nzambi mu malu a bantu. Uvua kabidi mumanye ne: buenzeji bua bantu badi babenga Nzambi buvua mua kunyanga basadidi bende balelela, anyi bumue, kumungutula ditabuja diabu dia se: disantuisha dia dîna dia Nzambi didi pabuipi. Nebikale bia njiwu bua kupanga kuikala bashindame mu matuku aa a nshikidilu.

Mpindieu ki ntshikondo tshia kuikala ne mpata anyi dielakana bua malu enza Yehowa. (Ebelu 12:1) Kadi, mpindieu ntshikondo tshia kudiundisha dianyisha bua tshidi lutulu lua Yehowa lufile​—ditekemena dia lupandu kudi bantu miliyo mivule badi balua bena mu musumba munene wa mu bukua-matunga ne bindile bua kupanduka ku dikenga dinene didi dilua kumpala. (Buakabuluibua 7:9, 14) Petelo udi ubela ne: “Tungunukayi ne kudiunda mu bulenga bukena butuakanyine ne mu dimanya dia Mfumu wetu ne Mupandishi Yezu Kristo. Butumbi buikale kudiye mpindieu too ne ku dituku dia tshiendelele.”​—2 Petelo 3:18, NW.

“Nudilame mu dinanga dia Nzambi”

Dikala ne mudimu wa bungi mu dimanyisha Bukalenge ne dibuela pa tshibidilu mu bisangilu bia bena nkristo bua ntendelelu ne dilonga Dîyi dia Nzambi bidi bitupesha bukubi. Nenku, katuakuikala ne dîba dia kutamba kuditatshisha bua nsombelu idi yenda inyanguka mu ndongoluelu eu mubi wa lelu. Buôwa ne tunyinganyinga kabiena ne bua kuikala ne muaba munene mu nsombelu wa bena nkristo balelela. (1 Kolinto 15:58) Patudi tutamba kuenzela Yehowa mudimu, dîba didi ditamba kupita ne lubilu lukole.

Yuda, muena mu tshikondo tshimue ne Petelo ne muanabu ne Yezu, udi utubela ne: ‘Nuenu, bananga, nudibake pa ditabuja dienu ditambe dia tshijila, nutendelele mu [“spiritu munsantu,” NW], nudilame mu dinanga dia Nzambi, nutekemene luse lua Mukalenge wetu Yezu Kristo too ne ku muoyo wa tshiendelele.’ (Yuda 20, 21, NW) Tangila mushinga wa mmuenenu muimpe udi mukolesha kudi dinanukila mu masambila. (1 Tesalonike 5:17) Pashishe Yuda udi usakidila ne: “Nufuile badi bela mpata luse: nubasungile bua kubapatula mu kapia. Nufuile bakuabo luse kabidi, luse lusangisha ne buowa; kadi nuikale ne lukuna too ne ku bilamba binyanga ne matoba a nkuka ya ku mibidi yabo.” (Yuda 22, 23, Muanda Mulenga Lelu) Mbia mushinga mukole bua kukoleshangana mu bikondo ebi bikole! Ne mbia mushinga bua kubenga kupona mu ditetshibua, kutumika ne ‘dituku [edi] dia lupandu’ dilepesha bu kabingila bua “tshikadilu tshia buendenda,” tshidi tshitangalake bikole mpindieu mu bulongolodi ebu bua lelu bunyanguke mu malu a tshitembu.​—Yuda 4, NW; 2 Kolinto 6:1, 2.

Mu diteleja mibelu ya dinanga ya Petelo, Paulo ne Yuda, ne mu dikala ne mudimu wa bungi ne mukazamuke mu mudimu wa Nzambi, udi mua kuindila ne lutulu dibuela dia Yehowa mu malu a bantu. Kadi newenze nanku anyi?

Kuelakanyi bua kumonangana ne Bantemu ba Yehowa ba mu tshitupa tshienu bua bakuambuluishe bua kukolesha ditabuja diebe mu dilaya dia muoyo wa kashidi dia Mufuki. Longa malu adibu balomba bua kukumbaja bua umone mua kuenza mudimu wa bumanyishi wikalabu kabayi mua kuenza kabidi ne watua ku nkomenu ne dikenga dinene didi dienda disemena pabuipi. (Mâko 13:10) Nenku newikale ne ditekemena dia kuikala ne muoyo mu bulongolodi bupiabupia bua buakane bulaya kudi Yehowa. (2 Petelo 3:13) Teleja mavuluija ende! Indila ne lutulu! Ikala ne mudimu wa bungi!

[Mêyi adi kuinshi]

[Tshimfuanyi mu dibeji 7]

Longa mpindieu pa bidi bitangila dilaya dia Nzambi dia Mparadizu

[Mêyi a dianyisha bua tshimfuanyi mu dibeji 5]

Mubuabua: Nyama/​Jim Harter/​Dover Publications, Inc.; mulami nsonga: Bana: A Pictorial Archive from Nineteenth-Century Sources/​Grafton/​Dover Publications, Inc.