Udi mutabale bua nsombelu idiku lelu anyi?

KUIKALA mutabale ku njiwu kudi mua kuikala bualu bua muoyo anyi bua lufu. Tudi mua kufila bu tshilejilu tshia muanda eu malu akenzeka mu bidiila bibidi bia mikuna itu iluka mudilu.

Mukuna wa Pelée mu tshidiila tshia Martinique mu Antilles, ùtù uluka mudilu wa njiwu ya bungi kupita yonso mu siekele eu wa 20, wakatudika mu dia 8 Lumungulu 1902. Wakashipa pabuipi ne bantu bonso 30 000 bavua basombele mu tshimenga tshivua kuinshi kuawu tshia Saint-Pierre.

Mu Kabalashipu 1991, Mukuna wa Pinatubo wakatudika tshivua tshikale pamu’apa ditudika ditambe bunene bua mu siekele eu. Diakenzekela mu tshitupa tshia Philippines tshivua ne bantu ba bungi ne diakashipa bantu batue ku 900. Kadi musangu eu malu abidi akambuluisha bua kupandisha bantu binunu bivule: (1) kuikala batabale ku njiwu ne (2) kudiakaja bua kuenza malu biumvuangane ne madimuija.

Tshienzedi tshikumbane tshiakapandisha mioyo

Mukuna wa Pinatubo uvua mutalale munkatshi mua nkama ya bidimu, kadi mu Tshisanga 1991 wakatuadija kuleja bimanyinu bia ditudika divua pabuipi ne kuenzeka. Luya ne lubungibungi lua mulùngu biakatuadija kupatukila ku lusongo luawu. Bantu bavua basombele muaba eu bakumvua buloba bukanka misangu milondangane, ne bitotshi bia mudilu bikuatakane bivua bimanyisha njiwu biakatuadija kupatuka mu mukuna eu. Bena sianse ba mu Tshilongelu tshia mu Philippines tshia malu a Mikuna itu iluka mudilu ne a Bikumina bakashala ne ntema ya bungi ne bakatuisha bamfumu kumpala kua dîba bua se: bivua ne bua kuikala bia meji bua kumbusha bantu 35 000 bavua basombele mu bimenga ne misoko bivua pabuipi apu.

Bushuwa bantu batu belakana bua kushiya nzubu yabu kakuyi kabingila, kadi dielakana diabu divua ditshimuna kudi filme wa video wakaleja bimpe njiwu ituku padi mukuna uluka mudilu. Tshimuangi tshinene tshiakenzeka pa dîba. Kunyima kua matuku abidi, kuakenzeka ditudika dikole diakakupa butu kilometre kibe muanda-mukulu mu lupepele. Pashishe bitotshi bia mudilu biakashipa bantu nkama mivule. Nansha nanku, kakuyi mpata bantu binunu bivule bavua bapanduke, bualu bavua babadimuije bua njiwu ne bavua benze malu biumvuangane ne madimuija au.

Dipanduka ku tshipupu tshia ku bianza bia bantu

Mu siekele wa kumpala wa mu Bikondo Bietu ebi, bena nkristo bavua basombele mu Yeruzaleme bavua pabu ne bua kupangadija bikalabu bavua ne bua kushiya nzubu yabu. Dinyema mu tshimenga atshi mu 66 B.B. diakabapandisha ku kabutu kakakuata bantu bakuabu bavua basombelamu ne bena Yuda binunu bivule bavua balue mu Yeruzaleme bua Pasaka wa mu 70 B.B. Bantu bapite pa muliyo mujima bavua munda mua tshimenga atshi tshinyungulula ne bimanu bua kusekelela Pasaka pavua biluilu bia bena Roma bijike mpunga yonso wa kunyemena. Nzala, diluila bukokeshi ne dibabunda kudi bena Roma kakuyi ditekesha biakafikisha ku lufu lua bantu bapite pa muliyo mujima.

Tshipupu etshi tshiakajikija buntomboji bua bena Yuda ku bukokeshi bua bena Roma katshiakalua katshiyi tshimanyisha nansha. Makumi mavule a bidimu kumpala, Yezu Kristo ukavua mudianjile kuamba ne: bavua ne bua kujingila Yeruzaleme. Wakamba ne: “Panuamona tshimenga tshia Yeruzaleme tshijingila kudi biluilu bia mvita, numanye ne: kabutu katshio kadi pabuipi. Diba adio, bantu bikala mu Yudeya banyeme, baye ku mikuna; bikala munda mua tshimenga bumuke, bikala mu mpata kabapinganyi mu tshimenga.” (Lukase 21:20, 21, Mukanda wa Mvidi Mukulu) Mêyi au avua matoke, ne balondi ba Yezu bakaateleja.

Eusèbe wa mu Césarée, mufundi wa malu a kale wa mu siekele muinayi, udi wamba ne: bena nkristo ba mu Yudeya mujima bakatumikila didimuija dia Yezu. Pavua bena Roma balekele kujingila Yeruzaleme bua musangu wa kumpala mu 66 B.B., bena nkristo ba bungi bena Yuda bakaya kusombela mu tshimenga tshia Bampangano tshia Pela mu Pérée, provense wa bena Roma. Mu dikala batabale bua nsombelu ivuaku tshikondo tshiabu ne mu ditumikila didimuija dia Yezu, bakapanduka ku tshidibu bumvuije bu ‘dijingila dikuate buôwa bikole ku akadi menzeke mu miyuki yonso ya bantu.’

Lelu’eu, bidi bilomba budimu bua muomumue ne tshienzedi tshisunguluke. Tshiena-bualu tshidi tshilonda netshiumvuije bua tshinyi bidi bikengela nanku.

[Mêyi a dianyisha bua tshimfuanyi mu dibeji 3]

Godo-Foto, West Stock