Bapangadije bua kulonda njila wa muoyo wa Nzambi

Mpungilu ya “Njila wa Muoyo wa Nzambi” ivua ne malu a bungi bua bantu badi basue kusadila Nzambi! Muntu mukaji umue uvua mubuelamu wakumvuija mpungilu eu bu “tshikondo tshilenga tshia dilongesha, tshia dikankamija ne tshia dipeta butoke.”

MUNTU mukuabu wakamba ne: “kuvua malu a bungi adi asankisha, a kueleela meji ne a kumanya.” Tukonkononayi mpindieu ndongamu muine.

Yezu Kristo​—Njila, Bulelela ne Muoyo

Etshi tshivua tshiena-bualu tshia dituku dia kumpala dia mpungilu. (Yone 14:6) Muyuki wa kumpala wakumvuija tshipatshila tshia disangila dietu pamue mu mpungilu: bua kutulongeshabu malu a bungi bua njila mutambe buimpe, njila wa muoyo wa Nzambi. Yehowa udi ulongesha bantu bende mua kuendela mu njila yende. Udi ubalongesha ku butuangaji bua Bible, “mupika wa lulamatu ne wa budimu” ne spiritu munsantu. (Matayo 24:45-47, NW; Luka 4:1; 2 Timote 3:16) Ndiakalenga kayipu bua kuikala balongesha kudi Mfumu mukulu pa bionso!

Biumvuangane ne tshiena-bualu tshia dituku, muyuki wa nshindamenu uvua ne: “Tshia-bupikudi tshia Kristo​—Njila wa lupandu wa Nzambi.” Mu dikala ne nsombelu mumvuangane ne njila wa muoyo wa Nzambi, bidi ne mushinga mukole bua kumanya mudimu wa Yezu Kristo mu dilongolola dia Yehowa. Ngamba-malu wakamba ne: “Bu kakuyi mulambu wa tshia-bupikudi wa Yezu Kristo, muntu nansha umue, nansha muikale ne mitabuja kayi peshi bienzedi bia mushindu kayi, kavua mua kupeta muoyo wa kashidi kudi Nzambi.” Pashishe wakatela Yone 3:16 (NW), udi wamba ne: “Nzambi wakananga ba pa buloba bikole e kubapa Muanende umuepele mulela bua eu yonso udi uleja ditabuja kudiye kabutudibu kadi apete muoyo wa kashidi.” Kuleja ditabuja mu mulambu wa tshia-bupikudi wa Kristo kudi kulomba bua tuetu kupeta dimanya dijalame dia bulelela. Kudi kabidi kumvuija kulambula muoyo wetu kudi Yehowa, kuleja bualu ebu ku batismo wa mu mâyi, ne kuikala ne nsombelu mumvuangane ne tshilejilu tshiakafila Yezu Kristo.​—1 Petelo 2:21.

Tshitupa tshia mu mapingaja tshiakatuadija ne muyuki uvua ne tshiena-bualu tshia: “Njila wa dinanga katu upangila.” Mu muyuki eu muvua dikonkonona dia mvese ku mvese dia diumvuija didi disankisha difila kudi Paulo pa bidi bitangila dinanga, mu 1 Kolinto 13:4-8. Bakavuluija bateleji ne: dinanga dia didipangisha amue masanka didi tshimanyinu tshia Buena-Kristo ne se: dinanga Nzambi ne muntu nabu mbimanyinu bia mushinga mukole bia ntendelelu muanyisha kudi Yehowa.

Pashishe kuakalua muyuki mukosolola wa bitupa bisatu uvua ne tshiena-bualu tshia: “Baledi​—Buejayi Njila wa Nzambi mu lungenyi lua bana benu.” Baledi badi mua kuambuluisha bana babu bua kuenzela Nzambi mudimu pa kufila tshilejilu tshimpe mu dibala ne mu dilonga Dîyi diende. Badi mua kubueja bulelela mu lungenyi lua bana babu ku diambuluisha dia dilonga dia mu dîku dia pa tshibidilu, kuakaja dilonga edi bua kukumbaja majinga a dîku. Bidi kabidi bia mushinga bua kuambuluisha bana bua kuenzabu midimu ya tshisumbu ne mudimu wa buambi. Nansha mudi dikolesha bana bua kuluabu batshinyi ba Nzambi mu bulongolodi ebu bubi dikale difila lutatu, kuenza nunku kudi ne mafutu a bungi.

Muyuki mukosolola eu uvua mulonda kudi mukuabu wa: “Lekela Yehowa akufumbe bua mudimu wa butumbi.” Anu bu mudi mufumbi ufumba lueso lua dima, ke mudi Nzambi ufumba bantu badi basue kumuenzela mudimu. (Lomo 9:20, 21) Udi ubafumba pa kufila mibelu mu Dîyi diende ne ku butuangaji bua bulongolodi buende. Yehowa neatuambuluishe bua kukuata mudimu tshishiki ne makokeshi etu bituikale badiakaja ne bituasua kumulekela ulombola bidia bietu.

Pashishe kuakalonda tshitupa tshia ndongamu tshivua tshisankisha​—“Mudimu mu budimi bua bu-misionere.” Lelu’eu pa buloba bujima kudi basadidi bena Kristo 2 390 badibu bangata bu badi mu mulongo wa bu-misionere mu matunga 148. Badi bafila tshilejilu tshilengele tshia bulamatshi ne lukunukunu ne badi ne dianyisha diondoke bua diakalenga diabu dia kuenza mudimu mu madimi a ku ba bende. Mu tshitupa etshi tshia ndongamu mu mpungilu ya bukua-matunga, ba-misionere bakakula bua ntatu ne masanka a nsombelu wa bu-misionere.

Muyuki wa ndekelu wa dituku dia kumpala uvua ne tshiena-bualu tshia: “Kudi muoyo kunyima kua lufu anyi?” Lukonko elu ndupampakaje bukua-bantu munkatshi mua binunu bia bidimu. Bantu ba miaba yonso mbaluangane ne tshiena-bualu etshi. Mandamuna mafuikakaja nga bungi. Mmashilangane anu bu mudi bilele ne bitendelelu bia badi baafila bishilangane pabi. Kadi bantu badi dijinga ne kulonga bulelela.

Nenku, ngamba-malu wakamanyisha dipatuka dia broshire mupiamupia wa mêkala a bungi udi ne mabeji 32 wa: Ntshinyi tshidi tshitufikila patudi tufua? Broshire eu udi umvuija ntuadijilu wa dilongesha dia dibenga kufua dia anyima ne udi uleja mudi lungenyi elu lulue lua nshindamenu mu bitendelelu pabuipi ne bionso bidi pa buloba lelu’eu. Mu mushindu mutoke ne udi ukoka ntema, broshire eu udi ukonkonona tshidi Bible wamba bua anyima, bua tshinyi tudi tufua ne tshidi tshitufikila patudi tufua. Udi kabidi umvuija ditekemena didiku bua bafue ne badi ne muoyo. Broshire eu neikale dibenesha bua bantu badi bakeba bulelela miaba yonso.

Nudimuke bua mushindu unudi nuenda

Etshi tshivua tshiena-bualu tshiakanyine tshia dituku dibidi dia mpungilu. (Efeso 5:15) Ndongamu wa mu dinda wakela kashonyi pa diyisha ne mudimu wa dienza bayidi. Panyima pa dikonkonona dia mvese wa ku dituku, ndongamu wakatungunuka ne muyuki wa: “Tuambuluishayi bantu bua babuele mu njila udi ufikisha ku muoyo.” Mu dienza mudimu eu wa mitalu, bidi ne mushinga bua kuikala ne mmuenenu muimpe, bamanye se: dimanyisha bulelela kudi bakuabu ndiakalenga ne bujitu. Mu siekele wa kumpala B.B., bantu ba bungi bakabenga Dîyi dia Nzambi. Kadi nansha muvuaku buluishi, kuvua bantu ‘bavua badiakaje bimpe bua muoyo wa kashidi ne bakalua bena kuitabuja.’ (Bienzedi 13:48, 50, NW; 14:1-5) Nsombelu udi muomumue lelu’eu. Nansha mudi bantu ba bungi babenga bulelela bua mu Bible, tudi tutungunuka ne kukeba aba badi mua kubuitaba.​—Matayo 10:11-13.

Muyuki uvua ulonda wakakula bua lutatu lutuku bua kupeta bakuabu ne mukenji wa muoyo. Bu mudibi bitambe kukola mpindieu bua kupeta bantu ku mabu, tudi ne bua kudienzeja ne kuikala ne mbabi bituikala basue kupeta bantu ba bungi menemene ne mukenji wa Bukalenge. Mu matunga a bungi, bamanyishi ba lumu luimpe badi bapatula bipeta bilenga ku diambuluisha dia buambi bua ku telefone ne diyisha mu teritware wa bungenda, bapeta bantu badibu kabayi mua kumonangana nabu bipepele.

Muyuki uvua ne tshiena-bualu tshia: “Tulongeshayi bayidi bionso bivua Kristo mutumine dîyi” wakimanyina pa mushinga wa kulua bazanzamuke mu mudimu wetu. Nzanzu yetu ya dilongesha idi ikola patudi tulongela kudi bakuabu ne tutumikila dilongesha ditambe buimpe ditudi tupeta mu bisangilu bia tshisumbu. Patudi tulua bakazamuke mu dilongesha, tudi tupeta disanka dia bungi mu mudimu wetu wa kuambuluisha bantu bua balonge bulelela bua mu Bible.

Tshitupa tshia mu dinda tshiakajika ne muyuki uvua wakula bua diumvuija dia didilambula ne batismo. Bumue bua ku malu mamba kudi ngamba-malu buvua se: bitueyemena Nzambi ne muoyo mujima ne bituadienzeja muetu muonso bua kuenza disua diende, neatubeneshe ne neatukuatshishe. Muena meji wakafunda ne: ‘Umanye [Nzambi] bimpe mu bienzedi biebe bionso, yeye neakululamijile njila yebe.’ (Nsumuinu 3:6) Ditambuishangana ne musangelu divua muanda munene wa mpungilu uvua uleja ne: bantu ba bungi bakavua babange kuikala ne nsombelu mumvuangane ne njila wa muoyo wa Nzambi.

Panyima pa diikisha dia midi, tshitupa tshia mu mapingaja tshiakatuadija ne muyuki wa: “Tusadilayi ne ditekemena dia muoyo udi kauyi ndekelu mu lungenyi.” Dilongolola dia Nzambi dia kuikala ne bantu bena butumike bamuenzela mudimu kashidi pa buloba nedikumbane. Nenku, mmunyipu mudibi biakanyine bua tuetu kutangija lungenyi luetu, malu atudi tupangadija ne matekemena etu ku dienzela Yehowa mudimu batekemene muoyo wa tshiendelele! Nansha mutudi basue kulama bikole mu lungenyi “dituku dia Yehowa,” bidi ne mushinga mukole bua kuvuluka ne: tshipatshila tshietu ntshia kusadila Nzambi bua kashidi. (2 Petelo 3:12, NW) Dibenga kumanya tshikondo tshijalame tshikala Yezu mua kukumbaja disombuela dia Nzambi didi dituambuluisha bua kushala batabale ne ditupesha ku dituku dionso mpunga ya kufila tshijadiki tshia se: tudi tuenzela Yehowa mudimu katuyi ne bipatshila bia budisui.

Miyuki ibidi yakalonda yakakonkonona nshapita muinayi wa mukanda wa Paulo mutumina bena Efeso. Mu malu makonkonona muvua dibenesha ditudi nadi dia kuikala ne “mapa a bantu,” bantu balume bakumbane mu nyuma bateka kudi spiritu munsantu. Bakulu aba badi bafila mibelu ne buludiki bua diakalenga dietu dia mu nyuma. Mukanda wa Paulo mupudija ku spiritu udi kabidi ubela bena Kristo bua bavuale “bumuntu bupiabupia.” (Efeso 4:8, 24, NW) Bumuntu bua buena Nzambi budi ne ngikadilu bu mudi luse, bulenga, bupuekele bua mu lungenyi, bupole-malu, muoyo-mule ne dinanga.​—Kolosai 3:12-14.

Kudimuka bua mushindu utudi tuenda kudi kumvuija kudilama katuyi ne katoba ka mu bulongolodi ebu—ke tshivua tshiena-bualu tshia muyuki uvua ulonda. Bidi bikengela kuikala ne nkatshinkatshi mu disungula dia dijikija lutetuku, midimu ya mu nsombelu ne dipatshila bintu bia ku mubidi. Pa kutumikila mubelu wa mu Yakobo 1:27 wa kudilama katuyi ne katoba ka mu bulongolodi ebu, tudi tupeta nsombelu mukezuke ne kuondo ka muoyo kimpe ku mêsu kua Nzambi. Tudi kabidi mua kuikala ne nsombelu udi ne tshipatshila ne bu dibenesha netupete ditalala, dilubuluka dia mu nyuma ne balunda balengele.

Pashishe kuvua muyuki mukosolola wa bitupa bisatu uvua ne tshiena-bualu tshia: “Bansonga​—Londayi njila wa Nzambi.” Bamanye se: Nzambi mmubanange ne udi wanyisha madikolela abu bua kubingisha ntendelelu udi kayi kalema, bansonga badi ne bua kuibidija makokeshi abu a tshiumvuilu bua kumuenzela mudimu ne lulamatu. Mushindu umue wa kukolesha makokeshi a tshiumvuilu nkubala Dîyi dia Nzambi dituku dionso ne kuelangana meji pa bitudi tubalamu. Bituenza nunku, tudi mua kufika ku dimanya njila ya Yehowa. (Musambu 119:9-11) Tudi kabidi tukolesha makokeshi a tshiumvuilu pa kuitaba mibelu mishindame ya kudi baledi, bakulu ne ya mu mikanda ya Société. Ku diambuluisha dia dienza mudimu bimpe ne makokeshi abu a tshiumvuilu, bansonga badi bakandamena diditatshisha bua kupeta bintu bia ku mubidi, ngakuilu mubi ne dinekesha mu didiolola, malu adi aleja bulongolodi ebu budi kule ne Nzambi. Mu dilonda njila wa muoyo wa Nzambi, bansonga pamue ne bantu bakole badi mua kuya kumpala.

Muyuki wa ndekelu wa dituku edi uvua wa: “Bumuntu bua Mufuki ne njila yende.” Mumane kuleja ne: bantu miliyare mivule ki mbamanye Mufuki, ngamba-malu wakamba ne: “Diumvuija dilelela dia muoyo ndisuikila ku dimanya Mufuki, Nzambi wetu udi ne bumuntu; kuanyisha bumuntu buende; ne kulonda njila yende. . . . Kudi malu adi atangila bukua-bifukibua ne tuetu bine audi mua kuenza nawu mudimu bua kuambuluisha bantu bua kuitaba Mufuki ne kupeta diumvuija pa bualu buende.” Pashishe ngamba-malu wakakonkonona bijadiki bidi bileja dikalaku dia Mufuki wa meji ne wa dinanga. Muyuki eu wakajika ne dipatuka dia mukanda mupiamupia wa​—Y a-t-il un Créateur qui se soucie de vous? (Kudi Mufuki udi uditatshisha bua bualu buebe anyi?)

“Ke njila eu. Endelayimu”

Ke tshivua tshiena-bualu tshia dituku disatu dia mpungilu. (Yeshaya 30:21, NW) Ndongamu wakatuadija ne muyuki mukosolola wa bitupa bisatu mushindamene pa tshikena-kumona tshia ntempelo tshia Yehezekele. Tshikena-kumona etshi tshidi ne diumvuija dinene bua bantu ba Nzambi lelu’eu, bualu ntshisuikila ku ntendelelu udi kayi kalema mu tshikondo tshietu etshi. Mushindu wa kumvua tshikena-kumona etshi udi nunku: ntempelo munene wa mu nyuma wa Yehowa udi tshimfuanyi tshia ndongoluelu wende bua ntendelelu udi kayi kalema. Pavuabu bakonkonona malu a tshikena-kumona etshi, bateleji bakelangana meji pa tshidibu ne bua kuenza bua kukuatshisha mudimu muenza kudi batangidi ba dinanga ba ku bashadile bela manyi ne kudi aba balua bena mu kasumbu kalombodi.

Pashishe mu dinda amu, kuvua drama muimpe mutambe wa mu Bible muvua banayi bavuale bilamba bilenga bia mvuadilu wa kale. Drama uvua ne tshiena-bualu tshia: “Mêku​—Dibala Bible dituku dionso dikale njila wenu wa muoyo!” Wakaleja ditabuja ne dikima dia bena Ebelu basatu bakabenga bua kuinamina lupingu lua ngolo luibaka kudi Nebukadenesâ, Mukalenge wa Babulona. Tshipatshila tshia drama eu tshivua tshia kuleja ne: Bible kêna anu mukanda wa miyuki ya kale to, kadi mibelu yende idi bushuwa ne dikuatshisha kudi bansonga ne bantu bakole lelu’eu.

Tshitupa tshia mu mapingaja tshivua tshikondo tshia muyuki wa patoke: “Njila umuepele udi ufikisha ku muoyo wa kashidi.” Mumane kuleja malu a kale a dipona dia bukua-bantu mu mpekatu ne mu lufu, ngamba-malu wakajikija muyuki ne mêyi aa adi elesha meji: “Mvese wa mu Bible wa tshiena-bualu tshia dituku edi dia mpungilu uvua Yeshaya nshapita 30, mvese 21 (NW), udi wamba ne: ‘Matshi ebe neumvue dîyi kunyima kuebe diamba ne: “Ke njila eu. Endelayimu,” binuikala ne bua kuya ku dia balume anyi binuikala ne bua kuya ku dia bakaji.’ Mmunyi mutudi tumvua dîyi edi? Mpa kuteleja Bible Munsantu, Dîyi dia Nzambi, ne pa kulonda bulombodi budi Mulongeshi wetu Munene, Yehowa Nzambi, ufila ku butuangaji bua Bible ne bua bulongolodi buende bua bena Kristo bua matuku etu aa. Bushuwa, kuenza nunku ke njila umuepele udi ufikisha ku muoyo wa kashidi.”

Panyima pa tshikepeshilu tshia dilonga dia tshiena-bualu tshia Tshibumba tshia Nsentedi tshia lumingu alu kuvua muyuki wa ndekelu, uvua ne tshiena-bualu tshia: “Tungunukayi ne kuendela mu njila wa Yehowa.” Muyuki eu wakambulula mu tshikoso, malu manene a mu ndongamu. Pashishe ngamba-malu wakamanyisha dipangadika divua dileja dishindika dia kutungunuka ne kuikala ne muoyo mu njila wa Nzambi.

Bakakoma dipangadika edi ne mêyi aa adi asankisha: “Tudi batuishibue ne: kuikala ne nsombelu mumvuangane ne mêyi-maludiki ne mibelu ya mu Mifundu ke njila wa muoyo mutambe buimpe lelu’eu ne kudi kuasa tshishimikidi tshilenga bua matuku atshilualua, bua tuetu kumona mua kukuata bikole muoyo mulelela. Kupita bionso, tudi tuangata dipangadika edi bualu tudi banange Yehowa Nzambi ne mutshima wetu wonso, anyima, lungenyi, ne bukole buetu buonso!” Bateleji bonso bakashindika ditaba diabu pa kuandamuna ne dîyi dikole ne: eyo!

[Kazubu/​Tshimfuanyi mu dibeji 8]

Mudi Mufuki udi uditatshisha bua bualu buebe anyi?

Mukanda mupiamupia (mu Mfualansa) udi ne tshiena-bualu etshi udi ufila bijadiki bidi bituisha bua dikalaku dia Mufuki, Yehowa, ne udi uleja ngikadilu yende. Mukanda eu mmuenzela nangananga bantu badi balonge bikole mianda ya panu, kadi kabayi bitabuja Nzambi. Mukanda eu wa mabeji 192 neukoleshe kabidi ditabuja dia bantu badi bamane kuitabuja Nzambi, udiundisha dianyisha diabu bua bumuntu ne njila yende.

Mukanda eu kawena uleja ne: mubadi udi witabuja Nzambi nansha. Kadi, udi uleja mudi makebulula ne ngenyi ya bena meji ya matuku adi panshi aa bijadika dikalaku dia Mufuki. Udi ne nshapita kabukabu. Nshapita mikuabu idi ileja bua tshinyi tudi mua kuikala bashindike se: Bible mmufundisha kudi Nzambi. Mukanda mupiamupia eu udi kabidi uleja malu adi mu Bible mu tshikoso, udi usokolola bumuntu ne njila ya Mufuki. Mukanda eu kawena anu umvuija tshidi Nzambi mulekele makenga bungi nunku to, kadi udi kabidi umvuija muikalaye mua kuajikija bua kashidi.

[Bimfuanyi mu dibeji 7]

Bantu ba bungi bakatambula

[Bimfuanyi mu dibeji 7]

Muanetu Albert D. Schroeder, muena mu Kasumbu Kaludiki ka Bantemu ba Yehowa, udi uleja broshire mupiamupia

[Bimfuanyi mu mabeji 8, 9]

Drama uvua usankisha wakakankamija dibala dia Bible dituku dionso