Ntatu ya pa buayi ya mêku adi ne bana ba ku dibaka dikuabu

MÊKU ADI NE BANA BA KU DIBAKA DIKUABU ADI MUA KUIKALA NE DISANKA! MMUSHINDU KAYI?

Mu bitupa bivule bia pa buloba mêku adi ne bana ba ku dibaka dikuabu mmalue kutangalaka bikole. Tshidibi, mêku aa adi ne ntatu ya pa buayi. Kakuyi mpata, lutatu lutambe bunene ndua dikolesha bana. Kadi bu mualeja biena-bualu bibidi bidi bilonda, kudi mushindu wa kukolesha bimpe bana ba ku dibaka dikuabu.

PA TSHIBIDILU, BATU BENDESHA LUMU LUBI BUA BATATU NE BAMAMU BADI MU DÎKU DIDI NE BANA ba ku dibaka dikuabu. patutshivua bana, bavule ba kutudi bakumvua kasumuinu ka muana kampanda, kela mu mishindu mishilashilangane. Muana eu bavua bamukengesha bikole kudi mukaj’a tatuende muena muoyo mubi. Bana ba ku Mputu badi balonga pabu muanu wa mukalenge mukaji kampanda muena mupongo uvua ukengesha muana wa bayende!

Mianu ya mushindu’eu idi ifila mmuenenu mujalame wa mêku adi ne bana ba ku dibaka dikuabu anyi? Baledi bonso badi ne bana ba ku dibaka dikuabu batu bushuwa bena muoyo mubi anyi? Tòo. Bavule ba kudibu batu bajingila bana ba muena dibaka nabu diakalenga. Kadi badi ne bua kupeta ntatu kampanda mikole ya mu nsombelu wa mu dîku didi ne bana ba ku dibaka dikuabu.

Ntatu ya dikolesha bana

Padi dibaka dia kumpala difua, misangu mivule bitu bualu bena dibaka kabavua banji kukola mu lungenyi. Mu dibaka dibidi, kusomba ne bana kudi mua kunyanga malanda. Luapolo kampanda idi ileja ne: mêku mapite pa 4 pa mêku 10 adi ne bana ba ku dibaka dikuabu, atu afua kumpala kua bidimu bitanu kabiyi bianji kukumbana.

Bantu batshidi bafumina ku diselangana kabena mua kujingulula dilubakana dia mu lungenyi, ngelakanyi bua muntu wa kuleja lulamatu ne meji a mukawu ne njiya bidi bijuka munda mua bana ba ku dibaka dia kumpala to. Bana aba badi mua kuela meji ne: muntu udi muselangane tshiakabidi ne muledi wabu mmuangate dinanga didi muledi udi mubalele mua kuikala nadi kudibu. Kabidi, muledi wa bana udibu balekele kudi muena dibaka nende udi mua kumona bikole bua kumvua mudi bana batungunuke ne kulamata tatuabu anyi mamuabu ukadi mumbuke kumbelu. Muana wa balume kampanda wakateta kumvuija malanda mimpe avuaye nawu ne tatuende mumuledi, wamba ne: “Mamu, ndi mumanye ne: Tatu uvua ukukengesha, kadi uvua ungenzela malu mimpe.” Mêyi a nunku, nansha mudiwu mamba ne muoyo umue, avua mua kufikisha mamu eu kudiumvuila tatuende wa muana eu tshiji tshikole.

Tatu kampanda wakamba ne: “Tshivua bushuwa mudilongolole bua kujikija ntatu yonso ivua itangila dikolesha bana ba mukajanyi nansha. Ngakaditua mu nsombelu eu, ngela meji ne: mpindieu bu mumvua musele mamuabu, mvua mulue tatuabu. Buanyi meme bivua bualu butekete! Tshivua ngumvua muvua bana aba balamate tatuabu mubaledi to, ne ngakenza bilema bia bungi.”

Bimvundu bidi mua kujuka nangananga bua dikela bana. Bitu bikengela kukela bana ne dinanga, kadi misangu ya bungi batu batombokela dikela edi nansha diodi difumina kudi muledi udi mubalele. Mmunyipu mudibi bikole menemene bua buobu kuitaba dikela didi difumina kudi eu udi muselangane ne muledi wabu! Pa tshibidilu, padibu bamukela, muana wa ku dibaka dikuabu utu upatula mêyi bu mudi: “Kuena nansha tatuanyi to!” Mmunyipu mudi mêyi a nunku asama muledi udi ne meji mimpe ku muoyo!

Bana ba ku dibaka dikuabu badi mua kukola bimpe anyi? Baledi badi mu dîku didi ne bana ba ku dibaka dikuabu, badi mua kuenza mudimu muimpe mu diibaka dîku anyi? Diandamuna ku nkonko yonso ibidi didi ne: eyowa, bikala bonso badi mu dîku dia mushindu’eu balonda mibelu ya mu Bible, Dîyi dia Nzambi difundisha ku spiritu.

[Tshimfuanyi mu dibeji 3]

“Kuena nansha tatuanyi to!”