Bua tshinyi kuitabuja Yezu Kristo?

“NANSHA bantu ba bungi badi kabayi bena Kristo batu bitabuja ne: uvua mulongeshi munene ne muena meji. Bushuwa, ng’umue wa ku bantu bavua ne buenzeji bukole butambe pa buloba.” (The World Book Encyclopedia) Nnganyi au? N’Yezu Kristo muenji wa Buena-Kristo.

Kadi nansha mudi tshibungu etshi tshiamba nanku, bua bantu miliyo nkama ne nkama ku Asie ne miaba mikuabu, Yezu Kristo mmuenyi kudibu. Badi mua kumuvulukila anu ku dîna patupu mu mikanda ya tulasa tua bikadilu. Nansha mu bitendelelu bia Bukua-buena-Kristo, kudi bashikuluji ba malu a Nzambi ne bamfumu ba bitendelelu badi bamba ne: katuena bamanye Yezu menemene ne badi bela mpata bua bulelela bua miyuki idi itangila nsombelu wende idi mu Evanjeliyo inayi ya mu Bible.

Bafundi ba Evanjeliyo bavua bafuikakaja muyuki wa nsombelu wa Yezu anyi? Nansha kakese. Kunyima kua yeye mumane kukonkonona miyuki ya mu Evanjeliyo, Will Durant, mufundi wa malu a kale mumanyike bimpe wakafunda ne: “Bu bantu ba tshianana bungi bukese mu tshipungu tshimuepele bafuikakaje mu lungenyi muntu wa bukole ne mukoki wa bakuabu kudiye, [muena] nsombelu mutambe kupeluka ne tshitembelu tshia dikema tshia buena-muntu bu nunku, bivua kuikala tshishima tshikena kuitaba kutamba tshionso tshia ku ebi bidibu balonde mu Evanjeliyo. Kunyima kua siekele ibidi ya dikeba bilema mu dikonkonona Bible, mianda mifunda mu tshikoso idi itangila nsombelu, ngikadilu ne ndongeshilu wa Kristo, idi anu yumvuika bimpe ndambu ne idi itamba kukoka ntema mu nsombelu wa bena ku Mputu.”

Nansha nanku, kudi bantu badi bamona Yezu Kristo bu muntu udi kayi muakanyine ntema yabu bua malu avua aba bavua badiangate bu balondi bende benze. Bamue bena mu ditunga dia Japon badi mua kuamba ne: ‘Bena Kristo bakela bombe wa nikleere mu tshimenga tshia Nagasaki.’ ‘Ne Nagasaki uvua ne bena Kristo ba bungi kupita bavua mu bimenga bivule bia mu Japon.’ Kadi, udi mua kudiula munganga bua disama dia mubedi bikala mubedi kayi ulonda mibelu ya doktere anyi? Bantu bavule badi badiamba mudibu bena Kristo mbalengulule mêyi a Yezu a mushindu wa kujikija ntatu ya bukua-bantu. Kadi Yezu wakaleja mushindu wa kujikija ntatu yetu ya buatshia buila pamue ne tunyinganyinga tudi natu bukua-bantu pa buloba bujima. Ke bua tshinyi, tudi tukulomba bua ubale tshiena-bualu tshidi tshilonda ne udimuene ne: uvua muntu wa mushindu kayi.