Dikeba bua kumanya malu atshilualua a kueyemena

KATUPA kîpi kunyima kua yeye mumane kudia bumfumu mu 336 K.B.B., mukalenge wa mu Makedonia wakalua kumanyika bu Aleksandre Munene wakaya kudi mutempi wa mbuku wa mu Delphes, tshimenga tshia munkatshi mua ditunga dia Grèce. Mu matuku atshivua alua uvua mulongolole bua kutshimuna matunga mavule a mu tshikondo atshi. Kadi dijinga diende divua bua nzambi amushindikile ne: muanda uvuaye wipatshila uvua ne bua kukumbana. Bilondeshile mianu ya kale, dituku diakafikaye ku Delphes, kabivua bianyishibue bua kutempesha mbuku to. Bu muvuaye kayi musue kualukila kayi ne diandamuna, Aleksandre wakasuminyina, kuenzejaye muakuidi mukaji au bua amumanyishe malu atshivua alua. Ku tshimfula muoyo, mukaji au wakela lubila ne: “Ah, nsongalume, kakuena muntu nansha umue wakutshimuna!” Mukalenge eu utshivua nsonga wakangata dîyi adi bu lubuku lulelela luvua lumuleja ne: basalayi bende bavua ne bua kutshimuna mu mvita.

Pabi, Aleksandre uvua mua kumanya malu malelela avua mua kuenzeka mu mvita ivuaye mulongolole bu yeye mukonkonone milayi idi mu mukanda wa Danyele udi mu Bible. Mu mushindu mujalame, milayi eyi yakamanyisha muvua Aleksandre ne bua kutshimuna matunga a bungi mu tshikondo tshîpi. Batu bamba ne: Aleksandre wakapeta mushindu wa kumona malu avua Danyele mufunde bua bualu buende. Bilondeshile Josèphe, muena Yuda mushikuluji wa miyuki ya kale, pakabuela mukalenge wa mu Makedonia mu Yelushalema, bakamuleja mulayi wa Danyele​—pamu’apa uvua nshapita wa 8 wa mukanda eu. (Danyele 8:5-8, 20, 21) Bilondeshile bidibu bamba bua mulayi eu, basalayi ba Aleksandre kabakela tshimenga etshi mvita nansha.

Dijinga dia ku tshifukilu didi nadi bantu

Nansha yeye mukalenge anyi muntu wa tshianana, wa kale anyi wa lelu​—muntu yonso utu ujinga bua kumanya malu atshilualua a kueyemena. Bu mutudi bifukibua bia lungenyi, tuetu bantu tutu tukonkonona mianda ya kale, tudi bamanye malu adiku lelu, ne tudi nangananga tukeba kumanya malu atshilualua. Kasumuinu ka bena Chine kadi kamba ne: “Muntu udi ukokesha bua kudianjila kumanya malu atshilualua matuku asatu kumpala udi ushala mubanji munkatshi mua bidimu binunu ne binunu.”

Mu bipungu bia bungi, bantu miliyo mivule mbatete bua kumanya malu atshilualua pa kuya kuebeja bavuabu bangata bu nzambi. Angata tshilejilu tshia bena Greke ba kale. Bavua ne batempi ba mbuku bansantu bungi kabuyi kubala, bu mudi ba mu tshimenga tshia Delphes, tshia Délos ne tshia Dodone, muvuabu baya bua kuebeja nzambi yabu mianda ya tshididi anyi ya mvita, kabidi ne malu a muntu nkayende bu mudi luendu, dibaka ne bana. Ki ng’anu bakalenge ne bamfumu ba basalayi, kadi ne bantu ba bisa bionso kabidi ne ba mu bimenga binene bivua ne yabi mbulamatadi bavua bakeba mibelu ya kudi ba-spiritu ku butuangaji bua batempi ba mbuku.

Bilondeshile mulongeshi kampanda, mpindieu kudi “divulangana dia malongolodi adi madifile mu dilonga dia malu atshilualua.” Nansha nanku, bantu ba bungi badi balengulula Bible​—mpokolo umuepele mulelela wa milayi. Kabena bitaba ne: milayi ya mu Bible idi ne malu adibu benda bakeba to. Bamue bashikuluji badi baya kule, bafuanyikija milayi ya mu Bible ne malu avuabu badianjile kumanyisha kudi batempi ba mbuku ba kale. Ne misangu mivule bedi ba mpata ba tshikondo tshietu etshi kabatu bitaba milayi ya mu Bible nansha.

Tudi tukulomba bua wewe nkayebe ukonkonone malu mafundamu. Ntshinyi tshidi difuanyikija milayi ya mu Bible ne malu adi batempi ba mbuku bamanyishe dileja? Udiku mua kueyemena milayi ya mu Bible kupita malu avua batempi ba mbuku ba kale bamanyishe anyi? Udiku mua kulekela milayi ya mu Bible iludika nsombelu webe anyi?

[Tshimfuanyi mu dibeji 3]

Bible wakadianjila kumanyisha ne: Aleksandre uvua ne bua kutshimuna matunga a bungi mu tshikondo tshîpi

[Mêyi a dianyisha]

Cortesía del Museo del Prado, Madrid, Espagne

[Tshimfuanyi mu dibeji 4]

Aleksandre Munene

[Mêyi a dianyisha]

Musei Capitolini, Roma

[Mêyi a dianyisha bua tshimfuanyi mu dibeji 2]

TSHIZUBU: General Titus and Alexander the Great: Musei Capitolini, Roma