Bualu busokome bua masama

OWMADJI MUANA MUKESE UDI UUPA MUNDA. Mamuende Hawa udi utshina bua kavu kujika mâyi mu mubidi. Hawa uvua mumvue se: muana wa tatuende mukuabu wa bakaji wakafuisha muanende wa mu tshiadi bua disama dia muomumue pavuaye mupingane mu musoko wabu. Kakuende wa Owmadji, mamuende muenu wa Hawa, udi ujinga kuya ne Owmadji kudi munganga wa kabukulu. Udi wamba ne: “Mukishi mmutue muana disama. Uvua mubenge kumuluatshisha kakaba ka buanga kavua mua kumulama, mpindieu mona muudi mukebesha malu!”

MALU bu aa mmatampakane bikole miaba ya bungi pa buloba. Bantu miliyo nkama ne nkama badi bitabuja ne: mikishi ke idi ikebesha masama mu musokoko. Mmuomu anyi?

Muakatuadija bualu busokome

Pamu’apa kutu witabuja ne: mikishi anyi spiritu itu kayiyi imueneka ke itu ikebesha masama. Udi mene mua kudiebeja bua tshinyi bantu badi bitabuja bualu ebu, eku bamanyi bapiluke bamba ne: tuishi kampanda ke tudi tukebesha masama a bungi. Kadi tuvulukayi se: bantu kabavua bamanye menemene tshidi tuishi etu tukese nansha. Bivua amu nanku too ne pakenzabu tshiamu tshia mikroskope kudi Antonie van Leeuwenhoek mu bidimu bia 1600. Pashishe bantu bakabanga kumona tuishi tutu katuyi tumueneka ku mêsu. Nansha nanku, anu mu bidimu bia 1800 ke muakafika bamanyi bapiluke ku dijingulula diumvuangana didiku pankatshi pa masama ne tuishi tutu tukebesha mabedi ku diambuluisha dia malu avua Louis Pasteur musokolole.

Bu muvua bantu kabayi bamanye tshidi tshikebesha masama katshia kuonso aku, bitabataba ne ngenyi ya se: masama onso mmakebesha kudi spiritu mibi biakavula. Tshibungu kampanda tshidi tshileja mushindu uvua lungenyi elu mua kuikala lutuadije. Tshidi tshiamba ne: kale baminganga bavua buondopa masama ne miji mishilashilangane, mabeji a mitshi ne tshionso tshivuabu mua kuikala natshi. Bimue bia ku bintu ebi, bivua biambuluisha. Kunyima munganga uvua usakidila mikiya ne malu mapite bungi avua kaayi nansha ne mushinga bua kusokoka tshivua tshiondapa menemene. Nanku munganga uvua ushala mushindike se: bantu nebamupinganyine bua kukeba luondapu kudiye. Ke muakalua diondapangana bualu busokoka, ne biakasaka bantu ku dinyemena kudi makole adi kaayi a panuapa bua kupeta diambuluisha.​—The New Encyclopædia Britannica.

Ngondapilu eyi ya kabukulu itshidiku mu matunga a bungi. Bavule batu bamba ne: mikishi ya bankambua ke idi ikebesha masama. Bakuabu batu bamba ne: Nzambi ke udi ututua masama bu dinyoka bua mpekatu yetu. Nansha patu bantu bashidimuke bajingulula tshidi disama menemene, batu mua kutungunuka ne kutshina buenzeji bua makole adi kaayi a panu.

Bena mupongo ne baminganga ba kabukulu badi babuelela ditshina edi bua kukengesha bantu. Kadi, ntshinyi tshitudi ne bua kuitaba? Bidiku ne dikuatshisha bua kunyemena kudi spiritu bua kukuba bukole bua mubidi anyi? Ntshinyi tshidi Bible wamba?