Yehowa n’Nzambi wa bulelela
“Wewe [Yehowa] ke udi umpikula. Wewe [Nzambi] wa bulelela.”—MUSAMBU 31:6, MMM [31:5].
1. Nsombelu uvua mushindu kayi mu diulu ne pa buloba pavuaku kakuyi dishima?
KUVUA tshikondo kampanda tshivua dishima kadiyiku to. Bifukibua bia mu nyuma bipuangane mu diulu bivua bisadila Mufuki wabi, “[Nzambi] wa bulelela.” (Musambu 31:6, MMM [31:5]) Kakuvua dishima anyi didinga to. Yehowa uvua wambila bana bende ba mu nyuma malu avua malelela. Wakenza nanku bualu uvua mubanange ne kabidi bualu uvua uditatshisha bikole bua diakalenga diabu. Nsombelu uvua wa muomumue pa buloba. Yehowa wakafuka muntu mulume wa kumpala ne muntu mukaji wa kumpala, ne ku diambuluisha dia njila uvuaye mulongolole, uvua misangu yonso ubambila malu mu mushindu mutoke, mululame ne wa bulelela. Bivua ne bua kuikala bualu bua disanka be!
2. Nnganyi wakabueja dishima mu bantu, ne mbua tshinyi?
2 Kadi dimue dituku, muana umue wa Nzambi wa mu nyuma wakadivuija ne dikamakama dionso nzambi, muluishi wa Yehowa. Tshifukibua tshia mu nyuma etshi tshidibu babikila ne: Satana Diabolo tshiakakeba bua bikale batshitendelela. Bua kukumbajaye ku dikokesha bakuabu, Satana wakabangisha dishima. Pakenzaye nunku, wakalua ‘muena mashimi ne tatu wawu.’—Yone 8:44.
3. Ntshinyi tshiakenza Adama ne Eva pakabashima Satana, ne mbipeta kayi biakapatuka?
3 Ku butuangaji bua nyoka, Satana wakambila Eva, muntu mukaji wa kumpala ne: bu yeye mua kushipa mukenji wa Nzambi ne kudia tshimuma tshikandika, kavua mua kufua to. Atshi tshivua dishima. Wakamuambila kabidi ne: pavuaye udia tshimuma atshi, uvua mua kulua bu Nzambi, kumanya malu mimpe ne mabi. Atshi tshivua dishima dikuabu kabidi. Nansha muvuabu kumpala kabayi banji kushima Eva musangu nansha umue, pamu’apa uvua mua kuikala mujadike ne: malu avuaye umvuila kudi nyoka kaavua mu diumvuangana ne tshivua Nzambi muambile bayende Adama to. Kadi wakapangadika bua kuitaba tshia Satana ne kubenga tshia Yehowa. Bakamushima, yeye kuangata tshimuma atshi e kutshidia. Pashishe, bayende Adama pende wakadia tshimuma atshi. (Genese 3:1-6) Anu bu Eva, katshia kuonso eku Adama kavua muanji kumvuaku bualu bua dishima to, ne yeye ki nguakadingabu nansha. (1 Timote 2:14) Malu akenzaye akaleja ne: uvua mubenge Mufuki wende. Bipeta bibi biakamueneka mu bukua-bantu. Bua dipanga butumike dia Adama, mpekatu ne lufu, kutentekapu ne dinyanguka dia malu ne makenga bungi kabuyi kubala biakatangalaka mu ndelanganyi yende yonso.—Lomo 5:12.
4. (a) Mmalu kayi a dishima avua Satana muambe mu Edene? (b) Ntshinyi tshitudi ne bua kuenza bua Satana katupambuishi?
4 Mashimi akatangalaka pawu. Tudi ne bua kuikala bamanye ne: malu a mashimi au avua Satana muambe mu Edene avua mushindu wa kuluisha bulelela bua Yehowa. Satana wakasua kuleja ne: Nzambi uvua ubashima ne upangisha mulume wa kumpala ne mukaji wa kumpala tshintu kampanda tshimpe. Kadi kabivua nanku to. Dipanga butumike dia Adama ne Eva kadiakabapetesha masanka to. Bakafua amu muvua Yehowa muambe. Nansha nanku, Satana wakatungunuka ne kushiminyina Yehowa malu, too ne tshikondo tshiakalua mupostolo Yone kufunda ku bukole bua nyuma muimpe bidimu nkama mivule bimane kupita ne: Satana udi ‘mudingi wa ba pa buloba bonso.’ (Buakabuluibua 12:9) Bua Satana Diabolo katupambuishi, tudi ne bua kueyemena bulelela bua Yehowa ne bua Dîyi diende. Mmunyi mutudi mua kupeta ne kukolesha dieyemena dietu dia Yehowa ne kukandamena didinga ne mashimi bia Muluishi wa Nzambi?
Yehowa mmumanye bulelela
5, 6. (a) Ndimanya kayi didi nadi Yehowa? (b) Dimanya dia bantu didi munyi pa kudifuanyikija ne dia Yehowa?
5 Bible udi wamba misangu ne misangu ne: Yehowa ng’ewu “wakafuka bintu bionso.” (Efeso 3:9) Yeye ke ‘wakafuka diulu ne buloba ne mâyi manene ne bintu bionso bidimu.’ (Bienzedi 4:24) Bu mudi Yehowa muikale Mufuki, udi mumanye bulelela pa bidi bitangila tshintu tshionso. Tshilejilu, fuanyikija ne: muntu kampanda udi udienzela plan ne udibakila nzubu wende yonso mujima yeye nkayende kutuadijila ku ntaku too ne ku musaka. Neamanye nzubu au munda ne panyima ne neamumanye bikole kupita mupitshi yonso wa mu njila. Bantu batu bamanye bimpe bintu bitubu benza buobu nkayabu. Bia muomumue, Mufuki mmumanye bintu bionso biakafukaye.
6 Muprofete Yeshaya wakumvuija bimpe bunene bua dimanya didi nadi Yehowa. Tudi tubala ne: “Ukadi mupime mayi a mbu mu tshianza tshiende nganyi? Ukadiku muidikije bunene bua diulu ne ntanta wende wa tshianza nganyi? Ukadi musangishe lusenga mu [tshipiminu] bua kulubadika nganyi? Ukadi mupime mikuna nansha tukuna pa tshitempelu nganyi? Utu uludika lungenyi lua [Yehowa] nganyi? Mmuntu kayi ukadi mumupe meji? Utu [Yehowa] ukonka bua kumupesha meji nganyi? Utu umujinguluila malu, umuleja njila wa kupeta lungenyi nganyi?” (Yeshaya 40:12-14, MMM) Bushuwa, Yehowa udi “Nzambi wa [dimanya]” ne udi “ne [dimanya] tshishiki.” (1 Samuele 2:3; Yobo 36:4; 37:16) Dimanya ditudi tuetu nadi ndikese be, pa kudifuanyikija ne diende! Nansha mudi bantu bapete dimanya dinenanenayi, ngumvuilu wetu wa bintu bifuka kêna ufika nansha kakese ‘ku kala kua bienzedi [bia Nzambi]’ to. Bidi anu bu “dinunganyi” kumpala kua ‘mukungulu wa bukole.’—Yobo 26:14.
7. Ntshinyi tshivua Davidi mujadike pa bidi bitangila dimanya dia Yehowa, ne tudi ne bua kuikala bamanye tshinyi bua bualu abu?
7 Bu mudi Yehowa ke wakatufuka, nanku mmutumanye bimpe menemene. Mukalenge Davidi uvua mumanye bualu ebu. Wakafunda ne: ‘Yehowa, wewe wakutangila munda muanyi, wakummanya! Wewe muine udi mumanye pangashikama panshi ne pangajuka; udi ujingulula meji anyi pantshidi kule. Wewe udi ujingulula kuenda kuanyi ne kulala kuanyi panshi, udi mumanye bienzedi bianyi bionso. Bua dîyi kadiyi dianji kuikala ku ludimi luanyi, ne mona, wewe Yehowa udi mudimanye tshishiki.’ (Musambu 139:1-4) Bulelela, Davidi uvua mumanye ne: bantu badi ne budikadidi bua kudisunguila malu adibu benza, ne Nzambi mmutupeshe mushindu wa kumutumikila anyi kubenga kumutumikila. (Dutelonome 30:19, 20; Yoshua 24:15) Nansha nanku, Yehowa mmutumanye bimpe kupita mutudi badimanye tuetu. Mmusue bua tuikale bimpe, ne udi ne bukole bua kulombola biendedi bietu. (Yelemiya 10:23) Bushuwa, kakuena mulongeshi, kakuena mumanyi kampanda mupiluke anyi mufidi wa mibelu udi mukumbane bua kutulongesha bulelela ne kutupesha meji ne disanka to.
Yehowa udi muena bulelela
8. Tshidi tshileja ne: Yehowa udi muena bulelela ntshinyi?
8 Padi muntu mumanye bulelela, kabiena amu bileja ne: neikale ne bua kubuakula misangu yonso anyi kuikala muena bulelela to. Tshilejilu, Diabolo kakanyisha bua ‘kuimana mu bulelela’ to. (Yone 8:44) Kadi Yehowa yeye udi ‘muule tente ne bulelela.’ (Ekesode 34:6) Mukanda wa Nzambi udi ujadika misangu yonso bulelela bua Yehowa. Mupostolo Paulo wakamba ne: ‘Nzambi kêna mumanye mua kushima’ ne Nzambi ‘kêna mua kudinga.’ (Ebelu 6:18; Tito 1:2) Bulelela ntshitupa tshinene tshia bumuntu bua Nzambi. Tudi mua kueyemena Yehowa bualu udi muena bulelela; katu wela bena lulamatu bende mâyi ku makasa, katu ubashima to.
9. Ndiumvuanga kayi didi pankatshi pa dîna dia Yehowa ne bulelela?
9 Dîna dia Yehowa didi dijadika bulelela buende. Dîna dia Nzambi didi diumvuija ne: “Eu udi uvuija.” Ebi bidi bileja ne: Yehowa udi ukumbaja bionso bidiye ulaya ku kakese ku kakese. Kakuena muntu nansha umue udi ne bukole bua kuenza nunku to. Bu mudi Yehowa muikale Mutambe Bunene, kakuena tshintu nansha tshimue tshidi mua kupangisha dikumbana dia malu ende adiye mulongolole to. Yehowa kêna amu muena bulelela to, udi kabidi ne bukole ne meji a kukumbaja bionso bidiye wamba.
10. (a) Mmunyi muvua Yoshua mudimuene bulelela bua Yehowa? (b) Mmilayi kayi ya Yehowa iudi mudimuene mikumbane?
10 Yoshua uvua umue wa ku bantu ba bungi bakamona mianda ya dikema yakajadika bulelela bua Yehowa. Yoshua uvua mu Ejipitu pavua Yehowa mutume mu ditunga edi bipupu dikumi, ne Yehowa uvua mudianjile kumanyisha dilua dia tshionso tshia kudibi tshimue ku tshimue. Munkatshi mua malu makuabu akakumbana, Yoshua wakamona dikumbana dia milayi ya Yehowa ya kupikula bena Isalele mu Ejipitu ne kubabueja mu Buloba Bulaya pa kutshimuna biluilu bia bena Kanana bivua bibaluisha. Pakavuaye mikolo ku tshina, Yoshua wakambila bakulu ba tshisamba tshia Isalele ne: ‘Monayi, lelu eu nkadi pa kuya mu njila utu waya bonso pa buloba: nudi bamanye mu mitshima yenu yonso ne mu mioyo yenu yonso ne: kanuakapanga tshintu tshimpe tshimue tshiakanulaya Yehowa, Nzambi wenu; nuakapeta bintu bionso, kanuakapanga tshintu [nansha] tshimue.’ (Yoshua 23:14) Nansha muuvua kuyi mudimuene bishima biakenza Yoshua, kutuku ukadi mudimuene bulelela bua milayi ya Nzambi mu nsombelu webe anyi?
Yehowa udi usokolola bulelela
11. Ntshinyi tshidi tshileja ne: Yehowa mmusue kumanyisha bukua-bantu bulelela?
11 Fuanyikijabi muledi kampanda udi ne dimanya dia bungi kadi muikale uyikila ne bana bende anu mu mpukapuka. Nenku kuenaku ne dianyisha bua mudi Yehowa kayi muikale bu muledi wa nunku eu anyi? Yehowa katu anu umanyisha bukua-bantu malu patupu to, kadi utu kabidi uyikila nabu misangu ne misangu. Mukanda wa Nzambi udi umubikila ne: Mulongeshi anyi “Muyishi [Munene].” (Yeshaya 30:20) Bua muoyo wende mulenga, too ne badi kabayi basue kumuteleja, udi ubambila malu. Tshilejilu, wakatuma Yehezekele bua kuyisha bantu bavua Yehowa mumanye bimpe ne: kabavua mua kuteleja mukenji wende to. Yehowa wakamba ne: ‘Muana wa muntu, [ndaku] kudi ba mu tshisamba tshia bena Isalele, ubambile mêyi andi mbatumina.’ Panyima wakamuambila ne: ‘Kabena bakumvuila; bualu bua kabena bumvua dîyi dianyi; bualu bua bonso ba mu tshisamba tshia bena Isalele badi ne mitu mikole bu dibue ne mitshima ya tshitshiu.’ Au uvua mudimu mukole be, kadi Yehezekele wakaukumbaja ne lulamatu luonso, ne pa kuenza nanku wakaleja luse lua Yehowa. Biwikale ne lutatu mu mudimu wa kuyisha kadi muikale utungunuka ne kueyemena Nzambi, bulelela neakukoleshe muakakoleshaye muprofete wende Yehezekele.—Yehezekele 3:4, 7-9.
12, 13. Mmishindu kayi mishilangane idi Nzambi muenze nayi mudimu bua kumanyisha bantu malu?
12 Yehowa mmusue bua “bantu bonso basungidibue, bafike ku dimanya dia malu malelela.” (1 Timote 2:4) Mmuakule ku butuangaji bua baprofete, bua banjelo, kuakula kabidi too ne ku butuangaji bua Muanende munanga Yezu Kristo. (Ebelu 1:1, 2; 2:2) Yezu wakambila Pilato ne: ‘Ngakuledibua bua bualu ebu, ngakuluila pa buloba bua bualu ebu, ne bua kuamba malu malelela. Muntu yonso wa bulelela udi umvua dîyi dianyi.’ Pilato uvua ne mushindu menemene wa kumvuila bulelela budi butangila tshidi Yehowa muenze bua kufila lupandu buludiludi mukana mua Muana wa Nzambi. Kadi Pilato kavua musue bulelela to, ne kavua musue bua Yezu amulongeshe nansha. Wakandamuna ne kapeja konso ne: “Bulelela ntshinyi?” (Yone 18:37, 38) Ndiakabipu kayi buende yeye! Kadi ba bungi bakateleja bulelela buvua Yezu umanyisha. Wakambila bayidi bende ne: ‘Mêsu enu adi ne disanka, bualu adi amona; matshi enu adi ne disanka kabidi, bualu adi umvua.’—Matayo 13:16.
13 Yehowa mmulame bulelela ku diambuluisha dia Bible ne udi upetesha bantu ba miaba yonso mushindu wa kubupeta. Bible udi uleja malu anu mushindu udiwu menemene. Udi wakula bua ngikadilu ya Nzambi, malu adiye mulongolole bua kuenza, mikenji yende ne nsombelu mulelela udi nende bantu. Yezu wakambila Yehowa mu disambila ne: ‘Dîyi diebe mbulelela.’ (Yone 17:17) Bua bualu ebu, Bible mmukanda wa pa buawu. Wuowu nkayawu ke mukanda uvuabu bafunde ku bukole bua Nzambi, udi yeye mumanye bionso. (2 Timote 3:16) Bible ntshintu tshia mushinga mukole tshipesha bukua-bantu ne tshidi basadidi ba Nzambi banange bikole. Bidi bia meji patudi tubala Bible dituku dionso.
Tulamatayi bulelela bikole
14. Ng’amue malu kayi adi Yehowa mulaye bua kukumbaja, ne bua tshinyi tudi ne bua kumueyemena?
14 Tudi ne bua kuangata malu adi Yehowa utuambila mu Dîyi diende ne mushinga wa bungi. Udi tshidiye wamba ne: udi, ne neakumbaje tshidiye muambe ne: neenze. Ke bua tshinyi tudi ne bua kueyemena Nzambi. Tudi mua kuitaba bualu ebu padi Yehowa wamba ne: ‘Neadisombuele kudi bantu badi kabayi bamanye Nzambi ne kudi badi kabayi batumikila lumu luimpe lua Mukalenge wetu Yezu.’ (2 Tesalonike 1:8) Tudi kabidi ne bua kuitabuja Yehowa padiye wamba ne: mmunange badi benza malu makane padiye wamba ne: neapeshe badi bamuitabuja muoyo wa tshiendelele, ne padiye wamba ne: neajikije ntatu, ne nansha miadi ne lufu mene neabijikije. Yehowa wakaleja patoke bulelela bua bualu ebu mu tshiakambilaye mupostolo Yone etshi, ne: ‘Funda, bualu bua mêyi aa adi mêyi a kueyemena ne malelela.’—Buakabuluibua 21:4, 5; Nsumuinu 15:9; Yone 3:36.
15. Ng’amue malu kayi a dishima adi Satana utangalaja?
15 Satana mmushilangane bikole ne Yehowa. Pamutu pa kupesha bantu butoke, utu ubadinga. Bua kukumbaja tshipatshila tshiende tshia kumusha bantu mu ntendelelu mulelela, Satana udi utangalaja malu a bungi a dishima. Tshilejilu, Satana udi mua kujinga bua kutuitabijija ne: Nzambi udi netu kule menemene, ne kêna nansha uditatshisha bua makenga adi pa buloba to. Kadi Bible udi uleja ne: Yehowa udi uditatshisha bikole bua bifukibua biende ne kabidi bidi bimutonda bikole padiye umona malu mabi ne makenga. (Bienzedi 17:24-30) Satana mmusue kabidi bua bantu kumona ne: kuipatshila malu a mu nyuma nkupitshisha kua dîba patupu. Kadi Mukanda wa Nzambi wouwu udi utujadikila ne: ‘Nzambi kêna upanga buakane bua kupuaye muoyo wa mudimu wenu ne wa dinanga dinuakaleja bua dîna diende.’ Udi kabidi wamba patoke ne: Nzambi “Udi mufutshi wa badi bamukeba.”—Ebelu 6:10; 11:6.
16. Bua tshinyi bena Kristo badi ne bua kushala batabale mu nyuma ne kulamata bikole ku bulelela?
16 Pa bidi bitangila Satana, mupostolo Paulo wakafunda ne: ‘Nzambi wa tshikondo etshi mmufofomije mêsu a meji a badi kabayi bitabuja, bua dinkenke dia lumu luimpe lua butumbi bua Kristo, udi tshimfuanyikiji tshia Nzambi kaditemi kudibu.’ (2 Kolinto 4:4) Anu bu muakashimaye Eva, Satana Diabolo mmushime bamue bantu bikole. Bakuabu badi balonda dikasa dia Adama, eu uvuabu kabayi badinge to, kadi wakapangadika ku disua diende yeye nkayende bua kubenga kutumikila mukenji wa Nzambi. (Yuda 5, 11) Nunku, bidi ne mushinga wa bungi menemene bua bena Kristo kushalabu batabale mu nyuma ne kulamatabu bikole ku bulelela.
Yehowa udi ulomba ‘ditabuja didi kadiyi ne lubombo’
17. Tudi ne bua kuenza tshinyi bua Yehowa kutuanyishaye?
17 Bu mudi Yehowa muikale muena bulelela mu malu ende onso, udi ujinga bua badi bamutendelela bikale pabu bena bulelela. Mufundi wa Misambu wakamba ne: ‘Yehowa, mmuntu kayi washikama mu nzubu webe wa ntenta? Washikama mu mukuna webe wa tshijila nnganyi? Nyeye udi wenda mu buakane, udi wenza malu makane, udi wamba mêyi malelela mu mutshima wende.’ (Musambu 15:1, 2) Kabiyi mpata, bua bena Yuda bakimba musambu ne mêyi aa, ditela mukuna wa tshijila mu mêyi a musambu au diakatuma meji abu ku Mukuna wa Siona, muaba uvua Mukalenge Davidi muye ne mushete wa tshipungidi, ku ntenta uvuaye muase muaba au. (2 Samuele 6:12, 17) Mukuna au ne ntenta au bidi bileja mu tshimfuanyi muaba udi Yehowa usombela. Muaba au ke uvua bantu mua kusemena kudi Yehowa bua kumulomba bua kubanyishaye.
18. (a) Tshidi tshilombibue bua kuikala mulunda wa Nzambi ntshinyi? (b) Ntshinyi tshituamona mu tshiena-bualu tshidi tshilonda?
18 Muntu yonso udi musue kuikala mulunda wa Yehowa udi ne bua kuamba bulelela ‘mu mutshima wende,’ kadi ki ng’anu ku mishiku patupu to. Balunda balelela ba Nzambi badi ne bua kuikala ne mutshima udi musue bulelela ne kuleja ne: bushuwa badi ne ‘ditabuja [dia] kadiyi ne lubombo,’ bualu malu a bulelela atu afumina mu mutshima. (1 Timote 1:5; Matayo 12:34, 35) Mulunda wa Nzambi katu udingangana to, bualu ‘Yehowa udi [ukina] bantu badi badinga bakuabu.’ (Musambu 5:6) Pa buloba bujima, Bantemu ba Yehowa badi benza muabu muonso bua kuikala bena bulelela, ne batu benza nanku bua kuidikija Nzambi wabu. Tshiena-bualu tshidi tshilonda netshiakule bua bualu ebu.
Newandamune munyi?
• Bua tshinyi Yehowa mmumanye bulelela pa bidi bitangila bintu bionso?
• Ntshinyi tshidi tshileja ne: Yehowa udi muena bulelela?
• Mmunyi mudi Yehowa mumanyishe bulelela?
• Pa bidi bitangila bulelela, ntshinyi tshidibu batulomba?
[Bimfuanyi mu dibeji 10]
Nzambi wa bulelela mmumanye malu onso adi atangila bidiye mufuke
[Bimfuanyi mu mabeji 12, 13]
Malu adi Yehowa mulaye neakumbane