Nkonko ya babadi

Batismo bua bafue ntshinyi?

Pakafunda mupostolo Paulo bua dibishibua dia mu diulu, wakamba bualu bukuabu bua mushinga mukole. Tudi tubala mu Mukanda wa Nzambi ne: ‘Badi babatijibua bua bantu bafue nebenze tshinyi? Bikala bantu bafue kabayi babishibua ku lufu, badi babatijibua bualu buabu bua tshinyi?’ Mukanda wa Mvidi Mukulu (Mishonyi, MMV) mmukudimune mvese eu ne: “Bamue badi babatue mu mayi mu dina dia bantu bafue bavuabu kabayi batue nanku. Padi bafue kabayi babike ku lufu, tshidibu batekemena kupeta ntshinyi? Diba adi badi banyisha bua babatue nanku bua tshinyi?”​—1 Kolinto 15:29.

Muaba eu Paulo uvua usua kuamba ne: badi ne muoyo batambule mu dîna dia bantu bavua bafue kabayi batambule anyi? Ke mudi Bible eyi ne mikuabu isua kuleja. Kadi patudi tukonkonona bimpe bimpe mvese yonso ya mu Bible ne tshiena-Gelika tshia ntuadijilu tshivua Paulo mufunde, bidi bitufikisha ku lumvu lukuabu. Paulo uvua uleja ne: bena Kristo bela manyi bavua batambule anyi binyibue mu mâyi mu nsombelu uvua ne bua kubafikisha ku lufu lua lulamatu lua buena lua Kristo. Pashishe, bavua balua kubishibua bua kuikala ne muoyo wa mu nyuma bu Kristo.

Bible udi ujadika diumvuija edi. Mu mukanda uvua Paulo mutumine bena Lomo, wakafunda ne: ‘Kanuena bamanye ne: tuetu bonso bakabatijibua mu Kristo Yezu, tuakabatijibua mu lufu luende?’ (Lomo 6:3) Mu mukanda wende mutumina bena Filipoi, Paulo wakamba muvuaye ‘mudisange [ne Kristo] mu bisama biende, ne kumufuana ku lufu luende, bua ngamona kubika ku bafue bu meme mua kukufika.’ (Filipoi 3:10, 11, MMM) Paulo uvua usua kuamba ne: nsombelu wa bayidi bela manyi ba Kristo ngua kushala ne lulamatu mu mateta, kututakena ne lufu dituku dionso, ne pashishe kulua kufua mu lulamatu ne kunyima dibishibua dia mu diulu dilonda.

Bidi bia mushinga bua kumona ne: mu mvese itudi batele eyi ne mikuabu idi yakula bua batismo mu diumvuangana ne lufu, badi bakula bua bantu badi ne muoyo bakavua batambule, kadi kabena bakula bua bantu bakadi bafue nansha. Paulo wakambila kabidi bena Kristo bela manyi ne: ‘Nuakajikibua nende mu dibatiza, munuakabishibua nende munda muadi kabidi, bualu bua ditabuja dienu dia mu kuenza kua Nzambi wakamubisha munkatshi mua bafue.’​—Kolosai 2:12.

Mu tshiena-Gelika kadianjidi (anyi préposition) hyper, kadibu bakudimune mu 1 Kolinto 15:29 ne: “bua” anyi “mu dîna dia” mu Bible ya bungi kadi mua kumvuija kabidi “bua tshipatshila tshia.” Mu diumvuangana ne mvese mikuabu ya mu Bible, Bible wa Les Saintes Écritures​—Traduction du monde nouveau mmukudimune mvese eu bimpe ne: “Ntshinyi tshienza aba badi benda batambula ne tshipatshila tshia kuikala bafue? Bikalabu bulelela kabayi ne bua kujula bafue, bua tshinyi badi kabidi benda batambula ne tshipatshila tshia kuikala bafue?”