Banjelu mbanganyi?

BUALU budi mukalenge kampanda wa ditunga divua dikokesha makuabu umona budi bumunyungulula mutu. Bantu bakuabu basatu bavuaye mukosele tshibawu tshia lufu mubele mu kapia kakole mbapanduke kabayi bafuamu to! Uvua mubapandishe nnganyi? Mukalenge au udi wambila bantu basatu abu ne: ‘Batumbishe Nzambi wenu, wakatuma muanjelu wende bua kupandisha bantu bende bakumueyemena.’ (Danyele 3:28) Mukalenge wa Babulona eu wakadimuena muvua banjelu bapandishe bantu. Kale bantu ba bungi bavua bitaba ne: banjelu batuku. Bantu ba bungi lelu batu bitaba pabu ne: banjelu batuku, ne kabidi batu babenzela malu kampanda. Kadi banjelu mbanganyi? Bakafumina kuepi?

Bible udi wamba ne: banjelu nnyuma anu bu mudi Nzambi muikale Nyuma. (Musambu 104:4; Yone 4:24) Banjelu batu ba bungi, miliyo ne miliyo. (Buakabuluibua 5:11) Bonso badi ne ‘bukitu ne bukole.’ (Musambu 103:20) Nansha mudibu ne ngikadilu ya buena ya bantu ne tshipedi tshia kudisunguila kabidi, ntuadijilu wabu mmushilangane ne wa bantu. Nzambi wakafuka banjelu kumpala kua kufukaye bantu ne buloba. Bible udi wamba ne: ‘pakajadika Nzambi bishimikidi bia buloba, mitoto ya nkesha [anyi banjelu] yakimba misambu diatshimue, ne bana balume bonso ba Nzambi bakela mbila yabu bua disanka diabu.’ (Yobo 38:4, 7) Badi babikila banjelu ne: mbana balume ba Nzambi, bualu Nzambi ke wakabafuka.

Nzambi wakafuka banjelu bua tshinyi? Mmudimu kayi ukadibu bakuatshilaku bantu? Kudiku malu adibu batuenzela lelu’eu anyi? Bu mudi banjelu ne budikadidi bua kudisunguila tshimpe ne tshibi, kudiku bamue bakalonda Satana Diabolo, kudivuijabu baluishi ba Nzambi anyi? Bible udi wandamuna nkonko eyi bimpe.