Badi ne disanka dia kuenza disua dia Nzambi
YEZU wakashila bena Kristo bonso tshilejilu tshia kulonda pakalombaye Tatuende ne: ‘Bualu buenjibue bu muudi musue, kabuenjibu bu mundi musue.’ (Luka 22:42) Lungenyi lua kukokela Nzambi ne budipuekeshi buonso badi nalu lelu eu kabidi kudi basadidi ba Nzambi bungi tshianana. Munkatshi muabu mudi kabidi balongi 52 ba kalasa ka 120 ka Gilada, Tshilongelu tshia Bible tshia Watchtower. Mu dia 11 dia ngondo muisatu 2006 dia kupesha balongi aba mapoloma, bavua ne disanka bualu bavua bindile bua kuya kuenza disua dia Nzambi mu matunga kabukabu, nansha mu ntatu mikole.
Ntshinyi tshidi tshisake balongi aba bua kuanyisha bua disua dia Nzambi dibalombole? Chris ne mukajende Leslie badibu batume bamisionere mu ditunga dia Bolivie badi baleja nunku: “Bu mutukadi badipidie, tudi bitabe bua kuenza tshionso tshidi bulongolodi bua Yehowa butulomba bua kuenza.” (Mâko 8:34) Jason ne mukajende Chere badibu batume mu ditunga dia Albanie badi bamba pabu ne: “Mudimu wonso utukadi benze mu bulongolodi bua Yehowa uvua anu ne yawu ntatu. Tshidibi tudi bafike ku dijingulula ne: Yehowa mmukumbanyine tuetu kumueyemena ne muoyo wetu mujima.”
Bakabakankamija bua kukokela disua dia Yehowa
George Smith wa mu Tshibambalu tshia malu a bimfuanyi ku Betele wakakangula tshialu ne disambila mu tshisangilu tshia dipesha balongi mapoloma. Stephen Lett wa mu Kasumbu Kaludiki ka mudimu wa Bantemu ba Yehowa uvua mulombodi wa programe wa difila dia mapoloma eu wakajingila bantu bonso bavuapu difika dilenga. Benyi bafume mu matunga 23 bavua bafike Muaba utu Tulasa tua Watchtower tuenzekela ku Patterson mu New York bua kubuelabu pabu mu tshibilu tshia disanka atshi. Muanetu Lett wakumvuija balongi aba ne: badi baya kuenza “muanda udi ulomba bukole bua bungi.” Wakakula bua ‘ngumbu ya mvita’ idi malongesha a dishima adi bamisionere bapiabapia aba ne bua kuya kushimbula ne bukole bua Mukanda wa Nzambi. (2 Kolinto 10:4, 5) Wakajikija wamba ne: “Nenuikale ne disanka bunenadi bualu Yehowa udi unuangata bua kushimbula ngumbu ya mvita idi mu meji a bantu badi banange malu makane badi miaba inudi nuya!”
Harold Jackson udi pende ku biro binene bidi bilombola midimu yetu pa buloba bujima wakenza muyuki uvua wamba ne: “Malu makese a kuvuluka.” Yeye kulejaye ne: bamisionere bapiabapia aba kabena ne bua kupua muoyo bua ‘kukeba diambedi bukalenge bua Nzambi ne buakane buende’ nansha. (Matayo 6:33) Badi ne bua kuvuluka ne: ‘dinanga didi dikolesha’ ne diodi ke didi diambuluisha muntu bua kuenza malu onso bimpe. (1 Kolinto 8:1) Ke kuluaye kuamba ne: “Nulekele dinanga bua dinulombole mu malanda enu ne bakuabu.”
Pashishe, Geoffrey Jackson wa mu Kasumbu Kaludiki uvua pende misionere katshia mu 1979 too ne mu 2003 kutataye pende lukonko elu lua ne: “Mbujitu buenu nuenu anyi?” Wakababela bua kuikalabu ne nkatshinkatshi bua mushindu udibu badimona ne bamona mudimu wabu. Bujitu bua bena Kristo mbua kukuata mudimu mukole wa dikuna maminu a bulelela ne wa diamiamina mâyi. Kadi Yehowa ke udi ne bujitu bua kukolesha bantu mu nyuma, bualu yeye ke ‘udi uadiundisha.’ (1 Kolinto 3:6-9) Muanetu Jackson e kuamba kabidi ne: “Bujitu budi Yehowa unubadila nuenu mbua kushala bakole mu nyuma. Kadi bujitu bupite bunene bunudi nabu mbujitu kayi? Mbua kunanga Yehowa, kunanga ne bantu banudi nuya kukuatshila mudimu.”
Mulongeshi wa mu Gilada Lawrence Bowen wakumvuija pende tshiena-bualu tshia se: “Numanye mushindu unudi ne bua kuenda.” Kulejaye balongi ne: pavua bena Isalele mu tshipela, Yehowa wakabalombola ne wakabakuba mu tshishima. (Ekesode 13:21, 22) Udi utulombola ne utukuba petu lelu ku diambuluisha dia tshisumbu tshia bena Kristo bela manyi tshidi ‘dikunji ne tshishindamenu bia malu malelela.’ (1 Timote 3:14, 15) Bamisionere bapiabapia aba badi ne bua kulamata bulelela bua mu Bible budi buludika bena bupuekele ne bubakuba.
Mulongeshi mukuabu wa mu Gilada diende Wallace Liverance wakabela balongi abu bua kabapu muoyo dîyi dia Nzambi didibu bumvua ‘kunyima’ kuabu nansha. Tudi tumvuila dîyi dia Nzambi ‘kunyima’ kuetu mu ngumvuilu wa se: kukadi bidimu nkama ne nkama bivuabu bajikije kufunda Bible. Kabidi, anu bu mulami wa mikoko udi panyima payi wenda uyitumina dîyi, ke mudi Yehowa pende panyima pa bantu bende ubalombola ne “mupika wa lulamatu ne wa budimu.” (Yeshaya 30:21; Matayo 24:45-47, NW) Kalasa ka Gilada nkambuluishe balongi aba bua kuvudija dianyisha didibu nadi bua kasumbu ka mupika eu. “Mupika” eu mmupatule too ne Bible wa Les Saintes Écritures—Traduction du monde nouveau. Muanetu Wallace wakakankamija balongi ubambila bua Bible eu ne: “Nuangate tshibutshilu tshia malu a mushinga mukole etshi, nulongeshe natshi bantu bakuabu.”—Matayo 13:52.
Kuenza disua dia Yehowa mu mudimu wa diyisha
Mark Noumair, udi pende mulongeshi mu Gilada, wakenza muyuki uvua wamba ne: “Bavua ne dijinga dikole dia kuyisha lumu luimpe,” kumvuijaye amue a ku malu avua balongi ba mu Gilada bamone mu mudimu wa diyisha patshivuabu balonga. (Lomo 1:15) Mandamuna a nkonko ya kelaye balongi akaleja ne: bavua ne dijinga dikole dia dikema dia kuyisha misangu yonso ivua mushindu umueka.
Mandamuna a nkonko ivua muanetu Kenneth Flodin muele batangidi bena ngendu basatu badi benzela mudimu wabu mu États-Unis mpindieu akakankamija kabidi balongi bikole. Richard Keller ne Alejandro Lacayo bavua benzele bumisionere kale mu Amerike ne bakaji babu bakumvuija mushindu uvuabu batantamene ntatu kabukabu mu mudimu eu ne amue a ku mabenesha avuabu bapetamu. Moacir Felisbino kulondaye pende malu avuaye mulonge pavuaye wenza mudimu pamue ne bamisionere mu ditunga dia Brésil muvuaye mukolele.
Bamisionere basatu bapiluke bavuabu bele nkonko kudi David Schafer ke Robert Jones, Woodworth Mills ne Christopher Slay. Bana betu basatu aba bakalonda muakamanyabu mua kueyemena Yehowa mu ntatu. Kujadikilabu balongi ne: malu adi bulongolodi bua Yehowa bubalongeshe mmabalongolole bimpe bua mudimu wabu wa bumisionere. Muanetu Mills wakumvuija mu tshikoso ne: “Tshivua tshipite kungambuluisha meme ki ntshitupa tshia dimanya dia Bible tshituvua balonge mu Gilada to, kadi mmalu amvua mulonge mu kalasa avua akula bua budipuekeshi ne dinanga.”
Guy Pierce wa mu Kasumbu Kaludiki uvua muenze muyuki uvua wamba ne: “Yehowa kakupangila nansha.” Bu muvua Adama mupangile, tudi mua kuamba ne: Nzambi uvua mupangile pende anyi? Nzambi uvua mupangile mua kufuka Adama muakane tshishiki bu mudi bakuabu bamba anyi? Nansha kakese, bualu “Nzambi wakafuka bantu ne mitshima mijalame.” (Muambi 7:29) Muanetu au wakamba ne: lulamatu lua Yezu pavuaye mu diteta dikole pa buloba nduleje ne: “Adama kavua ne tshia kudibingisha natshi pakenzaye bubi to.” Diteta divua Satana muele Adama mu budimi bua Edene divua ditekete kupita divua Yezu mutshimune. Pabi Adama yeye wakadipangila. Nansha nanku, Yehowa yeye kakupangila nansha. Disua diende nedikumbane anu kukumbana. (Yeshaya 55:11) Muanetu Pierce kuambilaye bamisionere bapiabapia abu ne: “Nudi ne ndiakalenga dia dikema dia kutumbisha Yehowa ne didifila. Yehowa ikale ne yonso wa kunudi kuonso kunuaya kumuenzela mudimu wa bumisionere.”
Pakajikija muanetu Lett uvua ulombola programe eu kuela bantu mioyo ya kudi bana betu ba ku biro bia Bantemu ba Yehowa bia mu matunga kabukabu, wakapesha balongi mapoloma abu ne kubaleja miaba idibu babatume. Ke Vernon Wisegarver ukadi mulale ku Betele muboboke kuimanyinaye bantu bonso bavuapu mu disambila dia ndekelu.
Programe wa difila dia mapoloma eu wakafikisha bantu 6 872 bavua babuelamu ku dipetulula kabidi tshisumi tshia kuenza disua dia Nzambi. (Musambu 40:8) Andrew ne mukajende Anna badi bajikije kalasa aka bakamba ne: “Tuvua balambule Yehowa muoyo wetu. Tuetu kumulaya bua kuenza tshionso tshidiye utulomba. Ke tshidi tshienzeke, bualu Yehowa mmutulombe bua kuya mu ditunga dia Cameroun.” Bobu ne bakuabu badibu bajikije nabu kalasa badi ne dijinga dikole dia kutuadija mudimu wabatuadila disanka divule. Bushuwa, badi ne disanka dia kuenza disua dia Nzambi.
[Kazubu mu dibeji 17]
MALU ADI ATANGILA BALONGI
Bungi bua matunga adibu bafumine: 6
Bungi bua matunga adibu babatume: 20
Bungi bua balongi: 52
Muayene wa bidimu: 35,7
Muayene wa bidimu bienza mu bulelela: 18,3
Muayene wa bidimu mu mudimu wa ku dîba ne ku dîba: 14,5
[Tshimfuanyi mu dibeji 18]
Kalasa ka 120 ka Gilada, Tshilongelu tshia Bible tshia Watchtower
Mu liste udi kuinshi eku mbabale milongo batuadijile kumpala baya batangile kunyima; mbafunde mêna babangile ku dia bakaji batangile ku dia balume mu mulongo wonso.
(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.