Mmushindu kayi udi dimanya bulelela pa inferno mua kukuambuluisha?
BANTU batu balongesha ne: inferno mmuaba wa kukengeshila bantu babi badi banyangila Yehowa Nzambi lumu ne babipisha ngikadilu yende. Pabi, Bible udi wamba ne: Nzambi neabutule bantu babi. (2 Tesalonike 1:6-9) Kadi, tshiji tshiakane tshia Nzambi ki ngikadilu wende munene to.
Nzambi katu muena muoyo mubi anyi mukengeshi wa bantu babi nansha. Udi mene webeja ne: “Ndi ne disanka bua lufu lua bantu babi anyi?” (Yehezekele 18:23) Bikala Nzambi kayi usanka bua lufu lua bantu babi, mmunyi mudiye mua kuikala usanka bua kubatangila bakenga mu mudilu tshiendelele?
Ngikadilu mutambe bunene wa Nzambi ndinanga. (1 Yone 4:8) Nunku, ‘Yehowa udi wenzela bantu bonso bimpe; luse luende ludi pa mutu pa bintu bionso biakafukeye.’ (Musambu 145:9) Nunku, Nzambi mmusue pende bua tumunange ne muoyo mujima.—Matayo 22:35-38.
Tshinyi tshiakusaka bua kuenzela Nzambi mudimu: mbua buôwa bua inferno anyi mbua dinanga?
Dilongesha dia se: anyima idi ikenga mu inferno didi disaka bantu bua kutshina Nzambi bua kabakengeshi to. Pabi, muntu udi ulonga bulelela pa bidi bitangila Nzambi ne umunanga, muntu au neikale ne ditshina dimpe dia Nzambi. Musambu wa 111:10 udi wamba ne: ‘Ditshina dia Yehowa didi tshibangidilu tshia meji; badi batumikila mikenji yende badi ne dijingulula dia malu.’ Kutshina kua Nzambi kua nunku, ki mbuôwa bua mudiye ukengesha bantu to, kadi nkutshina Mufuki ne kanemu ka bungi menene. Ditshina edi didi ditusaka bua kutshina bua katumufikishi munda.
Tangila muvua kulonga bulelela pa inferno kuambuluishe Kathleen mamu wa bidimu 32 uvua munu wa bintu bia lulengu. Mamu eu uvua munange masanka ne tshikisu, mudikine ne muditua anu mu bundumba. Mamu Kathleen udi wamba ne: “Mvua pamuapa ntangila muananyi wa bakaji wa tshidimu tshimue ne ndiela meji, ‘ntangila malu andi mmuenzela. Ndiambila ne: nebangoshe mu inferno wa kadilu bua malu aa.’” Kathleen wakadienzeja bua kulekela kunua bintu bia lulengu, kadi bivua anu bikole. Mamu eu wakamba ne: “Mvua musue kuikala muntu mulenga, kadi malu anyi onso ne malu onso a pa buloba avua anu mabi. Nanku, kakuvua tshivua mua kumvuija muntu mulenga to.”
Pashishe mamu Kathleen wakatuilangana ne Bantemu ba Yehowa. Udi wamba ne: “Ngakalonga ne: kabatu buosha bantu mu inferno to. Malu avua Bible wamba avua malelela. Meme kumvua disulakana dia dikema pangakamanya ne: kakuena diosha dia bantu mu inferno to.” Kadi mamu eu wakalonga kabidi ne: Nzambi mmulaye bua kumbusha bantu babi pa buloba ebu ne bantu bakane nebasombapu tshiendelele. (Musambu 37:10, 11, 29; Luka 23:43) Mamu Kathleen wakamba ne disanka ne: “Ndi mpindieu ne ditekemena dilelela dia kuikala ne muoyo wa kashidi mu Mparadizu!”
Mamu Kathleen uvua mua kulekela dinua dia bintu bia lulengu eku katshiyi ne buôwa bua kuya mu inferno anyi? Mamu eu udi wamba ne: “Pamvua ngumvua nyota mikole ya kunua diamba, mvua nsambila ndomba Yehowa Nzambi diambuluisha. Mvua ngelela meji pa mushindu udi Nzambi umona bienzedi bibi bia nunku, ne ntshivua musue kumunyingalaja to. Yehowa wakangandamuna.” (2 Kolinto 7:1) Dijinga divua nadi Kathleen dia kubenga kunyingalaja Nzambi diakamuambuluisha bua kulekela dinua dia bintu bia lulengu.
Kunanga Nzambi ne kumutshina ke malu adi mua kusaka muntu bua kuenza disua dia Nzambi bua kupetaye masanka a tshiendelele. Kadi, ditshina dia makenga a mu inferno kadiena ne tshididi mua kuenza nansha tshimue. Mufundi wa Misambu wakamba ne: ‘Ba diakalenga mbantu bonso badi batshina Nzambi, benda mu njila yende.’—Musambu 128:1, MMM.
[Kazubu/Bimfuanyi mu dibeji 9]
NNGANYI WAPATUKA MU INFERNO?
Bakudimunyi ba imue Bible badi babuejakaja miaku ibidi ya mu tshiena Greke eyi: Geenna ne Haides, bayikudimuna yonso ibidi ne: “inferno.” Bilondeshile Bible, muaku eu Geenna udi uleja kabutu ka kashidi kadi muntu kayi mua kubishibua to. Kadi, bua bantu badi mu Haides anyi Hades, badi bobu ne ditekemena dia kubishibua ku lufu.
Ke bualu kayi, panyima pa Yezu mumane kufua ne mubishibue, mupostolo Petelo wakajadikila bantu bua Yezu ne: ‘Kabakamushiya mu Muaba wa Bafue,’ anyi mu inferno. (Bienzedi 2:27, 31, 32; Musambu 16:10) Muaku udibu bakudimune ne: “Muaba wa Bafue” anyi inferno mu mvese eu, mmufumine ku muaku wa tshiena Greke Haides. Yezu kavua muya mu muaba kampanda wa kadilu to. Hades nansha “inferno” ndukita. Kadi ki nganu Yezu nkayende ukadi Nzambi mupatule mu Hades to.
Bible udi wamba bua dibika dia bantu ku lufu ne: ‘Lufu ne Muaba wa Bafue biakapatula bafue bakadimu.’ (Buakabuluibua 20:13, 14) Kushiya mu “Muaba wa Bafue” mutupu nekumvuije ne: Nzambi neabishe bantu bonso badiye mumone bakumbane bua kuikalabu kabidi ne muoyo. (Yone 5:28, 29; Bienzedi 24:15) Nditekemena dilenga dia dikema dia kumona balunda betu ne balela betu bapatuka mu nkita! Yehowa Nzambi wa dinanga dia tshiendelele neakumbaje bualu ebu.