Malu muandamutekete audi mua kuenza bua dibala dia Bible kukuambuluishadi

Tshikandakanda tshikuabu tshidi tshiamba ne: “Bible ki mmukanda uvuabu batambe kupana anu mu bikondo bia kale to, kadi batshidi anu batungunuka ne kuupana bidimu bionso ebi kupita mikanda mikuabu.”​—TIME MAGAZINE.

Kangimba mukuabu wa mu ditunga dia Angleterre udi muende lumu diende Keith udi wamba ne: “Ntu mbala Bible imue misangu, kadi ndi mumone ne: ndi mupange mudimu wa kukuata.”

BIDI bikemesha bua kumona ne: bantu ba bungi badi ne Bible, kadi kabena bamuangata ne mushinga to. Bakuabu badi bangata malu adibu babala mu Bible ne mushinga wa bungi. Tshilejilu, mamu mukuabu diende Nancy udi wamba ne: “Katshia ngatuadija kubala Bible ne kuelangana meji pa malu andi mbalamu mu dinda dionso, ndi ndiumvua mukumbane bua kutantamena bualu buonso bundi mua kutuilangana nabu. Kubala Bible pa tshibidilu nkungambuluishe bikole bua kukepesha tunyinganyinga tundi muluangane natu mu bidimu 35 bishala ebi.”

Nansha biwikale kuyi muanji kubala Bible, bidiku bikuenza disanka paudi umona ne: mmuambuluishe bantu bakuabu badi bamubale anyi? Biwikale ukadi mutuadije kubala Bible, udiku musue bua dibala edi dikuambuluishe bikole anyi? Bikalabi nanku, enza malu muandamutekete adi alonda aa:

Bualu 1​—Umanye tshiudi ubadila Bible

◼ Bidi mua kukufikila bua kubala Bible anu bualu mmukanda udi ukusankisha anyi bualu udi udimona muenzejibue bua kumubala, anyi bua kumanya tshia kuenza mu bulongolodi ebu bubi. Kadi dimubala nedikuambuluishe bikole anu wewe ne dijinga dia kumanye bulelela pa bidi bitangila Nzambi. Udi kabidi mua kupeta masanka a bungi wewe umubala ne dijinga dia se: malu adimu alengeje nsombelu webe.

Badi batuleja mu Bible mushinga wa kumanya tshitudi tumubadila padibu bamufuanyikija ne lumuenu. Bible udi wamba ne: ‘Bualu bua bikala muntu mumvu wa dîyi, kayi muenji wadi, yeye udi bu muntu udi utangila mpala wende mene mu lumuenu; bua yeye udi uditangila, udi uya biende, udi upua muoyo lukasa bua mushindu wakadiye. Kadi udi utangilatangila mikenji miakane tshishiki ya budishikaminyi, ne udi ushalamu, kayi muikale mumvu udi upua muoyo, kadi muikale muenji wa mudimu udi uwenza, muntu eu neikale ne disanka mu kuenza kuende.’​—Yakobo 1:23-25.

Muntu udibu batele mu mvese eu uvua uditangila mu lumuenu, kadi upanga bua kuakaja tshimuenekelu tshiende. Imue misangu uvua muditangile anu lukasa lukasa anyi pamuapa kavua musue kudiakaja to. Tuetu katuyi tubala petu Bible pa tshibidilu anyi katuyi tutumikila bitudi tubalamu, kakutuambuluishe menemene to. Kadi tuetu tumubala ne dijinga dia kulua ‘benji’ anyi batumikidi ba dîyi ne tuenza bua malu atudi tubalamu alengeje meji ne bienzedi bietu, netupete disanka dilelela.

Bualu 2​—Keba Bible udibu bakudimune bimpe

◼ Udi mua kuikala ne Bible ya bungi idibu bakudimune mu muakulu wenu iudi mua kusungula bua kubala. Nansha mudi Bible yonso idibu bakudimune mua kukuambuluishe, umanye ne: kudi imue idibu bakudimune bilondeshile muvua bantu bakula kale ne mikuabu bilondeshile ngakuilu wa bena mukanda idi mua kukutatshisha bua kumvua Bible bimpe. (Bienzedi 4:13) Mu imue Bible idibu bakudimune, mbashintulule bulelela budimu ne bapingajamu malongesha a bantu. Tshilejilu, bamue mbumushe dîna dia Yehowa mu Bible ne bapingaje mianzu bu mudi: Nzambi, Mvidi Mukulu, Maweja anyi Mukalenge. Nanku paudi usungula Bible wa kubala, keba udibu bakudimune bimpe ne udi ne ngakuilu mupepele bua kumvua udi mua kukusankisha.

Bantu ba bungi batu babala Bible pa buloba bujima mbamone ne: Bible wa Traduction du monde Nouveau mmukudimune bimpe ne mmupepele bua kumumvua.a Tuangate tshilejilu tshia tatu mukuabu wa mu ditunga dia Bulgarie uvua mubuele mu bisangilu bia Bantemu ba Yehowa ne kumupeshabu wende Bible wa Traduction du monde nouveau. Wakalua kuamba ne: “Ndi mubale Bible kukadi bidimu bia bungi, kadi tshitu muanji kubala Bible udi mupepele bua kumvua ne udi munsankishe bikole bu eu to.”

Bualu 3​—Ikala usambila

◼ Udi mua kumvua Bible bimpe wewe mulombe muenaye bua akuambuluishe anu bu muvua Davidi mufundi wa misambu muenze. Wakamba ne: ‘Utabeje mêsu anyi, bua meme kumona malu a kukema a mu mikenji yebe.’ (Musambu 119:18) Ikala usambila Nzambi dîba dionso diudi ubala Dîyi diende, umulomba bua akuambuluishe bua kumvua bimpe biudi ubala. Udi kabidi mua kumuela tuasakidila bua mudiye mutupeshe Bible, bualu bu tuetu katuyi nende katuvua mua kumanya Nzambi to.​—Musambu 119:62.

Nzambi udiku mua kukuteleja paudi umulomba bua kumvua Bible anyi? Mona tshivua tshienzekela bana ba bakaji bakuabu babidi ba bidimu muinshi mua 20 ba mu ditunga dia Uruguay. Bualu buvuabu babale mu mukanda wa Danyele 2:44 buvua bubapite mutu, ke bobu kulomba Nzambi bua kubatuminaye muntu uvua mua kubambuluisha bua kubumvua. Patshivuabu bakuate Bible wabu ku bianza, Bantemu ba Yehowa babidi bakalua kuabu bua kubayisha, bobu kubabadila mvese anu uvuabu kabayi bumvue au, kubumvuijabu ne: Nzambi neabutule makalenge a bantu ne neajadike Bukalenge buende pa muaba wawu.b Bansongakaji aba bakatuishibue ne: Nzambi uvua muandamune disambila diabu.

Bualu 4​—Ikala ubala Bible dituku dionso

◼ Bantu ba bungi batu batuadija kubala Dîyi dia Nzambi anu padibu bapeta ntatu. Tshilejilu, muntu mukuabu wakamba mu mukanda uvuaye mufunde ne: panyima pa bena tshinyangu bamane kubumbule nzubu ibidi ya bisasa bile ya mu États-Unis mu dia 11/09/2001, “bantu bakatuadija kusumba Bible bikole diakamue.” Badi batulomba bua kubala Bible dituku dionso. Bible udi wamba ne: ‘Mukanda eu wa mikenji yanyi kawumuki mukana muebe; kadi welangane meji a mukanda eu munya ne butuku, udimuke mua kuenza malu onso adi mafundamu; pashishe neutute dikasa dimpe, newikale ne diakalengele.’​—Yoshua 1:8.

Tuangate tshilejilu tshia muntu udi ne disama dia mioyo udibu bambile bua kudia biakudia bidi bidisha mubidi bua tuetu kumvua bimpe mushinga udi nawu dibala dia Bible dituku dionso. Muntu eu yeye udia biakudia ebi anu padi disama dia mioyo dimujuka, bidiku mua kumuambuluisha anyi? Tòo. Udi ne bua kuikala ubidia dituku dionso bua bimuambuluishe bikole bua bubedi ebu. Ke mudibi kabidi bua dibala dia Bible, wewe umubala dituku dionso “neutute dikasa dimpe.”

Bualu 5​—Ikala ushintulula mishindu iudi ulonga Bible

◼ Kubala Bible kutuadijila ku Genese too ne ku Buakabuluibua nkuimpe, kadi udi mua kukeba mishindu mikuabu ya dibala idi mua kukuambuluisha. Mona imue ya kudiye.

Bala mvese idi yakula bua nsombelu wa muntu kampanda. Bala nshapita yonso anyi mikanda yonso idi yakula bua muntu kampanda uvua wenzela Nzambi mudimu, bu mudi:

• Yosefe: Genese 37–50.

• Luta: Luta 1–3.

• Yezu: Matayo 1-28; Mâko 1-16; Luka 1-24; Yone 1-21.c

Keba bua kumvua bimpe tshiena-bualu tshisunguluke. Bala mvese idi yakula bua tshiena-bualu atshi. Tshilejilu, keba tshiena-bualu tshidi tshiakula bua disambila, pashishe bala mibelu idi Bible ufila bua disambila ne mvese mikuabu idi yakula bua masambila.d

Ikala upatula dîyi paudi ubala. Wewe ubala Bible ne dîyi dikole, nebikuambuluishe bikole. (Buakabuluibua 1:3) Nudi kabidi mua kumubala ne dîyi dikole mu dîku, muntu yonso ubala tshiende tshitupa anyi nuangata miaba ya bantu badibu bakuile mu mvese inudi nubala. Bantu bakuabu batu basue kuteleja dibala dia Bible dimana kukuata mu bande. Mamu mukuabu udi wamba ne: “Bivua binkolele bua meme kutuadija kubala Bible, ke meme kutuadija kumutelejila ku tshisanji pamvua ngela bande. Mpindieu ndi mumone ne: Bible mmukanda muimpe mutambe kupita mikuabu.”

Bualu 6​—Ikala welangana meji pa biudi ubala

◼ Mushindu udi tshikondo tshienda tshiya ne malu adi atuenzekela mu nsombelu, bidi mua kutupangisha bua kuela meji pa malu atudi tubala. Kadi, anu mututu tutshiankunya biakudia ne tubimina biya mu tshifu bua kudishabi mubidi, ke mutudi kabidi ne bua kuela meji pa malu atudi tubala mu Bible bua kutuambuluishawu. Mushindu muimpe wa kuelangana meji pa bitudi babale nkuvuluka mu lungenyi malu atudi babale ne kudiebeja ne: ‘Mmalu kayi adi atangila Yehowa Nzambi andi mulonge? Mmunyi mudi malu aa mua kungambuluishe? Mmunyi mundi mua kuambila bakuabu malu aa?’

Tuetu tuela meji nunku pa malu atudi tubala, nealenge mutshima wetu ne neatusake bua tuikala anu tubala Dîyi dia Nzambi. Musambu wa 119:97 udi wamba ne: ‘Mona mundi munange mikenji yebe! Ndi ngelangana meji bualu buayi dinda too ne ku dilolo.’ Davidi mufundi wa musambu eu uvua welangana meji pa malu avuaye ubala dituku dionso. Bualu ebu buakamuambuluisha bua kunanga bikole malu avuaye ubala.

Bualu 7​—Keba bantu badi mua kukuambuluisha bua kumvua Bible

◼ Nzambi mmumanye ne: tuetu nkayetu katuena mua kudiumvuila bimpe menemene malu adi mu Bible to. Bualu nansha Bible muine udi uleja mudiye ne ‘manga malu adi makole pa kuajingulula.’ (2 Petelo 3:16) Mukanda wa Bienzedi udi wakula bua muena Etiopia kampanda uvua kayi mumvua bualu buvuaye ubala mu Bible. Nzambi wakamutumina umue wa ku bena mudimu bende bua kumumvuija. Bualu ebu buakasankisha muena Etiopie bikole bualu ‘wakaya biende mu njila wende usanka.’​—Bienzedi 8:26-39.

Dibala dia Bible didi mua kukuambuluishe pebe bikole anu wewe muitabe bua muntu kampanda akuambuluisha bua kumvua biudi ubala. Keba Bantemu ba Yehowa ba muaba uudi musombele, anyi bafundile mu adrese udi mu dibeji dinayi dia tshibejibeji etshi bua bakulongeshe Bible tshianana kuyi ufuta makuta.

[Mêyi adi kuinshi]