Semena pabuipi ne Muteleji wa masambila

BANTU ba bungi badi badiamba mudibu bitabuja Nzambi kabena mua kumvuija bua tshinyi badi ne ditabuja edi to. Kabena mua kumvuija bua tshinyi misangu ya bungi bitendelelu bidi bienza malu mabi anyi bua tshinyi Nzambi mmulekele makenga. Tshiabu tshidibu bamanye nkusambila Nzambi udibu kabayi bumvua.

Kadi wewe udi mua kusemena kudi Nzambi. Udi mua kukolesha ditabuja diebe paudi umanya Nzambi, ne diodi nedikusake ku dimunanga ne ku dimuangata ne mushinga. Ditabuja dilelela ndimanyine pa bijadiki. (Ebelu 11:1) Wewe mulonge bulelela pa bidi bitangila Nzambi, neumumanye ne newikale uyukila nende bu mulunda. Tukonkonone nsombelu ya bamue bantu bavua ne tshibidilu tshia kusambila nansha muvuabu kabayi bitaba ne: Nzambi udiku.

◼ Patricia utuvua batele mu tshiena-bualu tshia kumpala udi wamba ne: “Dituku dikuabu dimvua ne balunda banyi batue ku dikumi, bakatuadija kuyukila malu a ntendelelu. Ngakabambila ne: mvua mupatuke mu nzubu muetu bua kubenga kuteleja dikokangana divua pankatshi pa papa wanyi, uvua kayi witaba ne: Nzambi udiku, ne Ntemu wa Yehowa mukuabu uvua mulue kututangila. Umue wa ku balunda banyi wakangambila ne: ‘Pamuapa Bantemu ba Yehowa badi mua kuikala bamba malu malelela.’

“Mukuabu pende kuambaye ne: ‘Katuenaku mua kuanji kuya mu bisangilu biabu bua kudiumvuila anyi?’ Ke tshituakenza. Nansha mutuvua anu ne mpata, bamue ba kutudi bakatungunuka ne kubuela mu bisangila anu bualu Bantemu bavua ne musangelu wa bungi kutudi.

“Kadi dituku dikuabu mu Dia lumingu ngakumvua bualu buakashintulula ngelelu wanyi wa meji. Ngamba-malu wakumvuija bua tshinyi bantu badi bakenga. Katshia tshivua muanji kumanya ne: ku tshibangidilu bantu bavua bapuangane, ne pashishe bubi ne lufu biakalua bua muntu umue ne kutampakana kudi bantu bonso. Ngamba-malu wakumvuija kabidi bua tshinyi lufu lua Yezu luvua ne mushinga bua kupingaja bukua bantu ku nsombelu uvua muntu wa kumpala mujimije.a (Lomo 5:12, 18, 19) Ngakumvua diakamue malu onso bimpe. Meme kumvua ne: ‘Kudi Nzambi udi uditatshisha bua bualu buetu.’ Ngakatungunuka ne kulonga Bible, ne diakamue meme kumona ne: bua musangu wa kumpala mu nsombelu wanyi, ndi mua kusambila panyi muntu mulelela.”

◼ Allan utuvua kabidi batele mu tshiena-bualu tshia kumpala udi wamba ne: “Dituku dikuabu Bantemu ba Yehowa bakalua kuetu, mukajanyi kubabuejaye mu nzubu bualu malu avuabu bamuambile bua muoyo wa kashidi pa buloba avua mamusankishe. Bivua bitonde. Ke meme kushiya benyi kumpala kua nzubu, meme kuya kudi mukajanyi mu tshikuku ne kumuambila ne: ‘Ki mbimpe kuikala mukutakane to. Kuena mua kuitaba malu a mushindu eu to!’

“Mukajanyi wakangandamuna ne: ‘Mbimpe, kadi anji yaku kudibu aku bua ubaleje ne: malu adibu bamba nga dishima.’

“Mu kuamba kuimpe, tshivua ne tshia kubapisha natshi to. Kadi bavua ne musangelu wa dikema kundi, ne kunshilabu mukanda uvua uleja bikala muoyo uvua mufukibue anyi uvua mudiluile nkayawu ku mpukapuka. Malu avuamu avua mumvuike bimpe ne avua ne bijadiki, ke meme kuangata dipangadika dia kumanya malu a bungi pa bidi bitangila Nzambi. Ngakatuadija kulonga Bible ne Bantemu ba Yehowa, ne mu matuku makese meme kujingulula ne: malu amvua ngumvua kumpala pa bidi bitangila bitendelelu mmashilangane bikole ne tshidi Bible wamba. Bu mumvua ngenda ndonga malu adi atangila Yehowa, ngakatuadija kumusambila mu mushindu musunguluke menemene. Mvua ne imue ngikadilu ivua kayiyi mimpe to, nunku ngakalomba Yehowa diambuluisha. Ndi ne dishindika dia ne: Yehowa wakandamuna masambila anyi.”

◼ Andrew wa mu ditunga dia Angleterre udi wamba ne: “Nansha mumvua ne wanyi ngelelu wa meji pa bidi bitangila Nzambi ne mulamate bikole ku malu a siyanse, mvua ngitabuja dilongesha dia ne: bintu mbidienze anu bualu ke muvua bantu bakuabu bamba ne: bidi nanku. Mvua mbenga ne: Nzambi kenaku bua malu mabi adi enzeka pa buloba.

“Kadi imue misangu mvua ngela meji ne: ‘Bikala Nzambi udiku, bua tshinyi bionso ebi bidi bienzeka. Bua tshinyi kudi dishipangana divule ne mvita?’ Pamvua mu ntatu, mvua imue misangu ndomba diambuluisha mu disambila, kadi tshivua mumanye muntu umvua nsambila to.

“Pashishe muntu mukuabu wakapesha mukajanyi kadibeji kakuabu kapatula kudi Bantemu ba Yehowa kavua ne tshiena-bualu tshia ne: Bulongolodi ebu nebupanduke anyi? Nkavua mudiele lukonko elu misangu ya bungi. Kadibeji aka kakansaka bua kudiela lukonko elu pa bidi bitangila Bible: ‘Mandamuna adi Bible ufila adi ne mushinga menemene anyi?’ Panyima pa matuku, pamvua mu fete kampanda, muntu mukuabu wakampesha mukanda uvua ne tshiena-bualu tshia ne: La Bible: Parole de Dieu ou des hommes?b Pamvua mujingulule ne: malu adi Bible wamba adi apetangana ne a siyanse mulelela, ngakamona ne: ndi ne bua kulonga malu a bungi pa bidi bitangila Bible. Nunku pakandomba umue wa ku Bantemu ba Yehowa bua kulonga nanyi Bible, ngakitaba. Pangakumvua bimpe disua dia Yehowa, ngakadiumvua ne: mvua mumumanye bu muntu wetu mulelela eu, muntu umvua mua kuambila bualu mu disambila mudilekelele.”

◼ Jan, uvua mukolele mu Mishonyi mu tshimenga tshia Londres udi wamba ne: “Lubombo ludi mu bitendelelu ne divulangana dia makenga biakansaka bua kulekela malu a bitendelelu. Ngakalekela kabidi kuya mu kalasa, meme kutuadija kuimba misambu ne kuimbila bantu kidare bua bamfute makuta. Malu au akenzeka tshikondo tshingakapetangana ne Pat. Uvua mukolele mu dîku dia bena Katolike ne kubilekelaye pende anu bu meme.

“Tuvua basombele mu nzubu ukavuabu balekele, pamue ne bantu bakuabu ba bungi bavua balekele pabu kulonga kalasa bavua badifila ku malu a bitendelelu bia ku Est. Butuku, tuvua tupitshisha mêba a bungi bua kuyukila bua kumanya tshidi kuikala ne muoyo kumvuija. Nansha mumvua meme ne Pat katuyi tuitaba ne: Nzambi udiku, tuvua tuela meji ne: kuvua mua kuikala bukole kampanda budi bufuke muoyo.

“Patuakaya ku Nord kua Angleterre bua kukeba mudimu wa kuimba misambu, tuakalelaku muanetu wa balume. Butuku bukuabu muana kusama, ne meme kudimona nkadi nsambila Nzambi umvua tshiyi ngitabuja. Pashishe, nsombelu wanyi ne Pat wakanyanguka, meme kumushiya kuangata muana kuya nende. Meme kusambila kabidi ndomba diambuluisha ne meji a ne: kudi mua kuikala muntu udi uteleja masambila anyi. Tshivua mumanye ne: Pat pende uvua usambila to.

“Anu dituku adi, Bantemu ba Yehowa babidi bakakokola ku tshiibi tshia Pat ne kumuleja imue mibelu mimpe ya mu Bible. Pat wakambikila ku telefone ungebeja ni mvua musue kulonga panyi Bible ne Bantemu pamue nende. Mu matuku makese tuakalonga ne: bua kusankisha Nzambi, tuvua ne bua kufundisha dibaka dietu kua mbulamatadi. Bivua bimueneka bualu bukole, bualu nsombelu wetu kavua muimpe to.

“Tuvua basue kumanya malu a bungi pa bidi bitangila dikumbana dia milayi ya mu Bible, bua tshinyi makenga adiku, ne tshidi Bukalenge bua Nzambi bumvuija. Ku kakese ku kakese tuakumvua ne: Nzambi udi uditatshisha bua bantu, ne tudi ne bua kuenza tshidiye utulomba. Tuakaselangana. Meji adi mu Dîyi dia Nzambi avua matuambuluishe bua kukolesha bana betu basatu. Tuakajadika ne: Yehowa uvua muteleje masambila etu.”

Konkonona nkayebe bijadiki bia dikalaku dia Nzambi

Anu bu bantu bakuabu ba bungi, bantu batudi batele mu tshiena-bualu etshi kabavua babashime kudi tshitendelelu tshia dishima to, bavua bafike ku dijingulula bua tshinyi Nzambi mmulekele makenga. Kuenaku mumone ne: dimanya dijalame dia mu Bible ke divua diambuluishe bantu aba bua kujadika ne: Yehowa udi bushuwa uteleja masambila anyi?

Udiku musue kukonkonona bijadiki bidi bileja ne: Nzambi udiku anyi? Bantemu ba Yehowa nebikale ne disanka dia kukuambuluisha bua kulonga bulelela pa bidi bitangila Yehowa ne muudi mua kusemena pabuipi ne ‘Muteleji wa masambila.’​—Musambu 65:2, NW.

[Mêyi adi kuinshi]

[Lungenyi lunene lua mu dibeji 10]

“Pangakumvua bimpe disua dia Yehowa, ngakadiumvua ne: mvua mumumanye bu muntu wetu mulelela eu, muntu umvua mua kuambila bualu mu disambila mudilekelele”

[Tshimfuanyi mu dibeji 9]

Ditabuja dilelela ndimanyine pa bijadiki ne dijinga dia kumanya bulelela pa bidi bitangila Nzambi