SEMENA PABUIPI NE NZAMBI
“Tungunukayi ne kulomba, nebanupeshe”
“Mukalenge, tulongesha mua kusambila.” (Luka 11:1) Ke dilomba divua umue wa ku bayidi ba Yezu mumulombe. Mu diandamuna dia Yezu, wakakula bua bilejilu bibidi bidi bitulongesha mushindu utudi mua kusambila ne mudi Nzambi mua kututeleja. Ukadiku mudiebeje bikala Nzambi uteleja masambila ebe anyi? Bikalabi nanku, diandamuna dia Yezu nedikusankishe.—Bala Luka 11:5-13.
Tshilejilu tshia kumpala ntshimanyine pa muntu udi usambila. (Luka 11:5-8) Mu bualu ebu, muntu udi upeta muenyi mundankulu ne kena ne biakudia bia kumupesha to. Bidi bimulomba bua kuenza malu ne lukasa. Nansha mukadi dîba diya bikole, udi uya ku nzubu kua mulunda wende bua kumulomba ndambu wa mampa. Kadi mulunda wende udi wanji kubenga bua kujuka bualu yeye ne bena mu dîku diende bakadi balale. Kadi bua dinanukila diende, muntu udi mupete muenyi eu udi utungunuka ne kulomba too padi mulunda wende ujuka ne umupesha ndambu wa bintu.a
Ntshinyi tshidi tshilejilu etshi tshitulongesha bua mushindu wa kusambila? Yezu udi utuleja bua kuikala ne tshisumi, mbuena kuamba ne: kutungunuka ne kulomba, kukeba ne kukokola. (Luka 11:9, 10) Bua tshinyi? Yezu uvuaku usua kuamba ne: patudi tusambila tudi bu bantu badi bakokola ku tshiibi tshia Nzambi tshidiye kayi musue kutukanguila anyi? Tòo. Yezu uvua usua kuleja ne: Nzambi kena bu mulunda uvua welakana bua kujuka to. Kadi Nzambi mmusue kuandamuna masambila a bantu badi bamulomba ne ditabuja. Tudi tuleja ditabuja dia mushindu eu patudi tusuminyina ne kusambila. Patudi tutungunuka ne kulomba tudi tuleja ne: tudi bulelela dijinga ne tshitudi tulomba ne tudi tuitabuja ne: Nzambi udi mua kutupeshatshi bikalatshi mu diumvuangana ne disua diende.—Mâko 11:24; 1 Yone 5:14.
Tshilejilu tshibidi ntshimanyine pa Yehowa “Muteleji wa masambila.” (Musambu 65:2, NW) Yezu udi ukonka ne: “Tatu kayi wa munkatshi muenu udi muanende umulomba mushipa, yeye umupesha nyoka pamutu pa mushipa? Anyi yeye mumulombe diyi, umupesha kaminyiminyi?” Diandamuna nditoke bualu kakuena tatu udi mua kupesha bana bende bintu bibi to. Pashishe Yezu udi ufila diumvuija bua tshilejilu etshi wamba ne: Bikala baledi bena mapanga bamanye mua kupesha bana babu “bintu bimpe, mmunyi muapanga Tatu wa mu diulu kutamba kupesha badi bamulomba nyuma muimpe?” Ndipa dimpe ditambe didiye upesha bana bende ba pa buloba badi bamulomba.b—Luka 11:11-13; Matayi 7:11.
Nzambi mmusue kuandamuna masambila a bantu badi bamulomba ne ditabuja
Ntshinyi tshidi tshilejilu etshi tshitulongesha bua Yehowa, “Muteleji wa masambila”? Yezu udi utulomba bua kumona Yehowa bu Tatu udi utabalela bana bende ne ubakumbajila majinga abu. Ke bualu kayi batendeledi ba Yehowa badi mua kudiumvua bapepele bua kumuleja majinga a mu mioyo yabu. Bobu bamanye ne: Yehowa udi uditatshisha bua diakalenga diabu, nebikale pabuipi bua kuitaba diandamuna didiye ubapesha nansha diodi kadiyi dipetangana ne tshivuabu batekemene.c
Mvese ya mu Bible ya kubala mu ngondo muinayi
a Tshilejilu tshia Yezu etshi tshidi tshileja bibidilu ne bilele bitu bienzeka mu nsombelu wa matuku onso. Bena Yuda bavua bamona diakidila benyi bu bualu bua tshijila. Bena mu dîku bavua benza mampa a bungi bua dituku, nunku bavua ne tshilele tshia kusombangana bintu dîba divua muntu upeta bualu bua lukasa. Kabidi bena dîku bobu bapele, bavua balala bonso panshi mu nzubu umue.
b Yezu uvua utamba kuamba ne: “Mmunyi muapanga,” bua kuleja mudi Yehowa mudiakaje bua kuambuluisha bantu, ke bua tshinyi Yezu udi wakula kumpala bua tatu wa pa buloba pashishe bua Tatu wa mu diulu.
c Bua kumanya malu makuabu bua mushindu wa kusambila ne mudi Nzambi mua kututeleja, bala nshapita wa 17 mu mukanda wa Bible utu ulongesha tshinyi menemene? mupatula kudi Bantemu ba Yehowa.