“Nukebe mua kumanya malu adi ne mushinga wa bungi”

1, 2. Mmulayi kayi udi utangila matuku a ku nshikidilu uvua mua kuikala mukoke ntema ya bayidi ba Yezu? Bua tshinyi?

PETELO, Yakobo, Yone ne Andele bakavua bashale nkayabu ne Mfumuabu. Malu avua Yezu mubambile bua dibutuka dia ntempelo akabatonda bikole. (Mâko 13:1-4) Nunku, bakamuebeja ne: “Utuambile, malu aa neenzeke dîba kayi? Ntshimanyinu kayi tshialeja ne: ukadiku ne tshia ku nshikidilu kua ndongoluelu wa malu eu?” (Mat. 24:1-3) Yezu wakatuadija kubambila malu avua ne bua kuenzeka avua ne bua kushintulula nsombelu wa bantu ne avua aleja kabidi matuku a nshikidilu wa bulongolodi bubi bua Satana. Kudi bualu bumue buvua bukoke ntema ya bayidi ba Yezu. Pakabambila Yezu bua malu mabi avua ne bua kuenzeka bu mudi mvita, biyole bia nzala ne divulangana dia malu mabi, wakakula kabidi bua bualu kampanda buimpe buvua ne bua kuenzeka mu matuku a ku nshikidilu. Wakamba ne: “Nebayishe lumu luimpe elu lua Bukalenge pa buloba bujima budi bantu basombe bua luikale bujadiki kudi bisamba bionso, pashishe, nshikidilu nealue.”​—Mat. 24:7-14.

² Bayidi ba Yezu bakavua bayishe lumu luimpe lua Bukalenge ne Kristo. (Luka 8:1; 9:1, 2) Bavua mua kuikala bavuluke muvuaye mubambile ne: “Bia kunowa bidi bia bungi, kadi bena mudimu mbakese. Nunku, lombayi Mfumu wa dinowa bua atume bena mudimu mu dinowa diende.” (Luka 10:2) Kadi, mmunyi muvuabu mua kuyisha “pa buloba bujima budi bantu basombe” ne kufila “bujadiki kudi bisamba bionso”? Bena mudimu bavua ne bua kufumina kuepi? Bayidi aba kabavua mua kuikala bele meji bua mushindu wa dikema uvua mêyi adi mu Matayi 24:14 mua kukumbana to.

3. Mmunyi mudi mêyi adi mu Luka 21:34 akumbana lelu? Nnkonko kayi itudi ne bua kudiela?

³ Tudi mu matuku adi mêyi a tshiprofete a Yezu enda akumbana. Bantu miliyo ya bungi mbadisangishe bua kuyisha lumu luimpe lua Bukalenge pa buloba bujima. (Yesh. 60:22) Kadi Yezu uvua muleje ne: bivua mua kukolela bamue bua kudifila mu mudimu eu mu matuku a ku nshikidilu aa. Bavua ne bua kushala mu ditanaji ne ‘kunema bujitu.’ (Bala Luka 21:34.) Tudi tumona mudi mêyi au enda akumbana. Bamue batendeledi ba Nzambi kabena bateka malu a mushinga pa muaba wa kumpala to. Bualu ebu budi mua kumueneka mu mapangadika adibu bangata bua midimu ya kuenza, kulonga tulasa tua bungi, kuditua mu dikeba dia bintu bia ku mubidi ne dîba didibu bapitshisha mu manaya ne mu dijikija lutetuku. Bakuabu badi batshioka bua ntatu ne tunyinganyinga tua ku dituku ne dituku. Diebeja ne: ‘Ntshinyi tshintu meme ngenza? Ndiku nteka disua dia Nzambi pa muaba wa kumpala mu nsombelu wanyi anyi?’

4. a) Ntshinyi tshivua Paulo mulombe mu disambila bua bena Kristo ba mu Filipoyi? Bua tshinyi? b) Netukonkonone tshinyi mu tshiena-bualu etshi ne mu tshialonda? Bua tshinyi?

⁴ Bena Kristo ba mu bidimu lukama bia kumpala bavua ne bua kudienzeja bikole bua kuteka malu a mu nyuma pa muaba wa kumpala. Mupostolo Paulo wakamona ne: bivua bimpe bua kulombela bena Kristo ba mu Filipoyi Nzambi bua ‘bakebe mua kumanya malu adi ne mushinga wa bungi.’ (Bala Filipoyi 1:9-11.) Anu bu Paulo, bantu ba bungi ‘bakaleja dikima dia kuakula dîyi dia Nzambi kabayi batshina.’ (Filip. 1:12-14) Mu mushindu wa muomumue, bantu ba bungi lelu badi bayisha Dîyi dia Nzambi ne dikima. Kadi, kukonkonona malu adi bulongolodi bua Yehowa buenza mpindieu kudiku mua kutuambuluisha bua kuteka mudimu wa kuyisha udi ne mushinga wa bungi pa muaba wa kumpala anyi? Eyowa. Mu tshiena-bualu etshi netukonkonone malu adi Yehowa mulongolole bua mulayi udi mu Matayi 24:14 kukumbanawu. Bulongolodi buende mbutambe kudifila mu bualu kayi? Kumanya bualu ebu kudi mua kutusaka tuetu ne bena mu dîku dietu bua kuenza tshinyi? Mu tshiena-bualu tshialonda netumone tshidi mua kutuambuluisha bua kutungunuka ne kuenza mudimu wa Nzambi ne kuenda pamue ne bulongolodi bua Yehowa.

TSHITUPA TSHIA BULONGOLODI BUA YEHOWA TSHIA MU DIULU

5, 6. a) Bua tshinyi Yehowa uvua muleje mu tshikena kumona tshitupa tshia bulongolodi buende tshia mu diulu? b) Ntshinyi tshivua Yehezekele mumone mu tshikena kumona?

⁵ Kudi malu a bungi avua Yehowa mubenge kufundisha mu Dîyi diende. Tshilejilu, kavua muleje malu a bungi bua mudi buongo ne bintu bidi mu tshibuashibuashi bienza mudimu to, nansha muvua malu aa mua kutusankisha bikole. Kadi Yehowa uvua muleje malu adi atuambuluisha bua kumvua disua diende ne bua kuenza malu mu diumvuangana ne disua edi. (2 Tim. 3:16, 17) Bidi bituenza disanka bua mudi Bible utuleja amue malu adi atangila tshitupa tshia bulongolodi bua Yehowa tshidi katshiyi tshimueneka. Patudi tubala malu adibu baleje a mu diulu adi Yehowa mulongolole adi mu mukanda wa Yeshaya, wa Yehezekele, wa Danyele ne wa Buakabuluibua, bidi bitusankisha bikole. (Yesh. 6:1-4; Yeh. 1:4-14, 22-24; Dan. 7:9-14; Buak. 4:1-11) Mbienze anu bu ne: Yehowa udi umbusha tshilamba tshidi tshijika mu diulu ne utuanyishila bua kumona bidi bienzekamu. Udi utumanyisha malu aa bua tshinyi?

⁶ Yehowa mmusue bua tuikale bamanye ne: tudi tuenza tshitupa tshia bulongolodi buende bua mu diulu ne bua pa buloba. Tshitupa tshia bulongolodi bua Yehowa tshia mu diulu tshidi tshienza mudimu mukole bua kukumbaja disua dia Yehowa. Tshilejilu, Yehezekele wakamona tshitupa tshia bulongolodi bua Yehowa tshidi katshiyi tshimueneka tshileja kudi tshidiendelandela tshinene tshia mu diulu. Tshidiendelandela etshi tshivua mua kuya ne lukasa ne kukudimuka musangu umue kuditshi tshisua kuya. (Yeh. 1:15-21) Bu muditshi ne nkata idi inyunguluka, tshidi mua kuya ntanta mule. Yehezekele wakamona kabidi mu lupitapita mu tshikena kumona Muendeshi wa tshidiendelandela etshi. Yehezekele wakamba ne: ‘Ngakatangila tshintu bu tshiamu tshikunze tshinonoke, bu tshimfuanyi tshia kapia kanyunguluke nseke yonso. Etshi tshiakadi tshimfuanyi tshia butumbi bua Yehowa.’ (Yeh. 1:25-28) Bualu ebu buvua mua kuikala bukemeshe Yehezekele bikole. Wakamona muvua Yehowa ulombola bulongolodi buende ku diambuluisha dia nyuma wende. Tshilejilu etshi tshia mudi tshitupa tshia bulongolodi bua Yehowa tshia mu diulu tshienda tshidi tshitukemesha bikole.

7. Mmunyi mudi tshikena kumona tshia Danyele tshitupesha dieyemena?

⁷ Danyele wakamona pende malu a bungi atudi ne bua kueyemena. Wakamona Yehowa, “Wa Kale wa matuku a bungi” musombe mu nkuasa wa bukalenge uvua ne ndimi ya kapia. Nkuasa eu uvua ne nkata. (Dan. 7:9) Yehowa uvua musue bua Danyele amanye ne: bulongolodi buende budi buenza malu kampanda bua kukumbaja disua diende. Danyele wakamona kabidi muntu ‘mukuabu mufuane muana wa muntu,’ mmumue ne: Yezu uvuabu bapeshe bukokeshi bua kulombola tshitupa tshia bulongolodi bua Yehowa tshia pa buloba. Bukokeshi budibu bapeshe Kristo ebu kabuena anu bua bidimu bikese patupu to. Kadi mbua ‘tshiendelele, budi kabuyi mua kujimina, bukalenge buende mbukalenge budi kabuyi mua kubutudibua.’ (Dan. 7:13, 14) Bualu ebu budi butusaka bua kueyemena Yehowa ne kumanya malu adiye wenza. Mmupeshe Muanende Yezu ‘bukokeshi, butumbi ne bukalenge’ bualu mmukumbane. Yehowa udi weyemena Muanende. Nunku, tudi petu mua kueyemena bukokeshi bua Yezu.

8. Malu avua Yehowa muleje Yehezekele ne Yeshaya mu bikena kumona avua mabasake bua kuenza tshinyi? Adi atusaka petu ku dienza tshinyi?

⁸ Bikena kumona bia tshitupa tshia bulongolodi bua Yehowa tshidi katshiyi tshimueneka bidi bitusaka ku dienza tshinyi? Anu bu Yehezekele, malu adi Yehowa wenza adi atukemesha ne atusaka ku didipuekesha. (Yeh. 1:28) Kuelangana meji bua malu adi atangila bulongolodi bua Yehowa kudi kutusaka ku dienza bualu kampanda anu bu Yeshaya. Pavuaye mupete mpunga wa kuambila bantu bakuabu malu adi Yehowa wenza, wakakuata nende mudimu kayi welakana to. (Bala Yeshaya 6:5, 8.) Yeshaya uvua mujadike ne: uvua mua kutantamena lutatu kayi luonso ne diambuluisha dia Yehowa. Bia muomumue, malu makese atudi bamone adi atangila tshitupa tshia bulongolodi bua Yehowa tshidi katshiyi tshimueneka adi ne bua kutukemesha ne kutusaka ku dienza bualu kampanda. Bidi bitukankamija bua kumanya ne: tshitupa tshia bulongolodi etshi tshidi tshitungunuka ne kuya kumpala bua kukumbaja disua dia Yehowa.

TSHITUPA TSHIA BULONGOLODI BUA YEHOWA TSHIA PA BULOBA

9, 10. Bua tshinyi bidi bikengela bua kuikale tshitupa tshia bulongolodi bua Yehowa tshidi tshimueneka?

⁹ Yehowa mmuteke bulongolodi kampanda pa buloba ku diambuluisha dia Muanende budi buenza mudimu pamue ne tshitupa tshia bulongolodi buende tshidi katshiyi tshimueneka. Bua tshinyi bivua bikengela kuikale bulongolodi kampanda budi bumueneka bua kukumbaja mudimu udibu baleje mu Matayi 24:14? Tukonkononayi malu asatu.

¹⁰ Bua kumpala, Yezu uvua muleje ne: bayidi bende bavua mua kuyisha “too ne ku ntengu ya buloba.” (Bien. 1:8) Buibidi, bivua bikengela bulongolodi kampanda bua kufila biakudia bia mu nyuma ne kulama bantu bavua benza mudimu eu. (Yone 21:15-17) Buisatu, bavua ne bua kulongolola malu bua bantu badi benza mudimu wa kuyisha lumu luimpe badisangishe pamue bua kutendelela Yehowa ne kulonga mushindu wa kukumbaja mudimu eu. (Eb. 10:24, 25) Dikumbaja mudimu eu kadivua mua kuenzeka ku mpukapuka to. Bua bayidi ba Kristo kukumbajabu mudimu eu, bavua ne bua kuwulongolola bimpe.

11. Tudi tuleja ne: tudi tutua malu adi bulongolodi bua Yehowa bulongolole nyama ku mikolo mushindu kayi?

¹¹ Mmunyi mutudi tuleja ne: tudi tutua malu adi bulongolodi bua Yehowa bulongolole nyama ku mikolo? Umue mushindu munene, nkueyemena bantu badi Yehowa ne Yezu bateke bua kutulombola mu mudimu wa kuyisha. Kudi midimu ya bungi lelu pa buloba ivua bantu badi batangila mudimu wa buambi mua kuenza. Kadi ntshinyi tshidi tshitupa tshia bulongolodi bua Yehowa tshia pa buloba tshiteke pa muaba wa kumpala?

MBADIFILE MU “MALU ADI NE MUSHINGA WA BUNGI”

12, 13. Bakulu batu bakumbaja mudimu wabu mushindu kayi? Bua tshinyi bualu ebu budi butukankamija?

¹² Pa buloba bujima, mbateke bakulu bena Kristo badi bakumbane bua kutangila ne kutungunuja mudimu wa kuyisha Bukalenge miaba idibu basombele. Padi bana betu aba bangata mapangadika, badi bakeba buludiki budi mu Dîyi dia Nzambi, benza bua dikale ‘muendu ku makasa abu ne munya muteme mu njila wabu’ ne balomba Yehowa ne muoyo mujima bua abalombole.​—Mus. 119:105; Mat. 7:7, 8.

¹³ Anu bu bantu bavua balombola mu bidimu lukama bia kumpala, bakulu badi batangila mudimu wa kuyisha lelu mbadifile “mu mudimu wa dilongesha dîyi dia Nzambi.” (Bien. 6:4) Badi basanka bikole bua mudi mudimu wa buambi uya kumpala miaba idibu basombele ne pa buloba bujima. (Bien. 21:19, 20) Kabena belela bantu mikenji mipitepite bungi to. Kadi badi balonda Dîyi dia Nzambi ne buludiki bua nyuma wa Nzambi padibu balongolola malu adi ne mushinga bua kutuma mudimu wa kuyisha kumpala. (Bala Bienzedi 15:28.) Padi bana betu badi batangila mudimu wa buambi benza nunku, badi bafila tshilejilu tshimpe kudi bena Kristo bonso badi mu bisumbu bidibu.​—Ef. 4:11, 12.

14, 15. a) Mbalongolole malu kayi bua kutuma mudimu wa kuyisha lumu luimpe pa buloba bujima kumpala? b) Utu umvua munyi paudi utua mudimu wa kuyisha Bukalenge nyama ku mikolo?

¹⁴ Bantu ba bungi kabatu bamona mudimu mukole utu wenzeka misangu yonso bua kulongolola malongesha atu mu mikanda yetu, malu atutu tulonga mu bisangilu, mu mpuilu ne mpungilu to. Bantu binunu bia bungi badi benza mudimu wa budisuile bua kukudimuna biakudia bia mu nyuma ebi mu miakulu mitue ku 600 bua bantu ba bungi bafike ku dimanya “malu manene a dikema a Nzambi” mu miakulu yabu. (Bien. 2:7-11) Bana betu ba balume ne ba bakaji batshidi bansonga badi benza mudimu bua kupatula mikanda yetu ne kuyilamakaja ku diambuluisha dia biamu bidi bipatula mikanda ya bungi ne lukasa. Nunku batu batuma mikanda eyi mu bisumbu too ne bia miaba ya kule menemene.

¹⁵ Mbalongolole malu a bungi bua kutuambuluisha bua kuteka mudimu wa kuyisha lumu luimpe pa muaba wa kumpala mu tshisumbu tshitudi. Tshilejilu, bena budisuile ba bungi batu benza mudimu wa kuibaka Nzubu ya Bukalenge ne ya Mpuilu, bambuluisha miaba idi bipupu bienzeke peshi miaba idi bantu dijinga ne luondapu lua lukasa, balongolola mpuilu ne mpungilu, balongesha mu tulasa tua Nzambi ne benza midimu mikuabu. Batu benza midimu yonso eyi bua tshinyi? Bua kutungunuja mudimu wa lumu luimpe, kuambuluisha bantu badi benza mudimu eu bua kuikalabu bimpe mu nyuma ne kutuma ntendelelu mulelela kumpala. Tudiku mua kuamba ne: tshitupa tshia bulongolodi bua Yehowa tshia pa buloba ntshidifile mu malu adi ne mushinga wa bungi anyi? Eyowa, bidi nanku.

WIDIKIJE BULONGOLODI BUA YEHOWA

16. Mmalu kayi audi mua kukeba bua kulonga mu ntendelelu wa mu dîku anyi paudi udilongela?

¹⁶ Tutuku imue misangu tukeba tshikondo tshia kuela meji bua malu adi bulongolodi bua Yehowa buenza anyi? Bamue bena Kristo mbakebe dîba dia kuenza makebulula ne kuelangana meji pa malu aa padibu benza ntendelelu wa mu dîku anyi padibu badilongela pa nkayabu. Patudi tulonga bikena kumona bivua Yeshaya, Yehezekele, Danyele ne Yone bamone, tudi tumvua disanka dia bungi. Mukanda wa Les Témoins de Jéhovah: Prédicateurs du Royaume de Dieu ne mikanda mikuabu peshi matadi bidi mu muakulu wenu nebikuambuluishe bua kumanya bulongolodi buetu bimpe.

17, 18. a) Malu atudi balonge mu tshiena-bualu etshi mmakuambuluishe mushindu kayi? b) Nnkonko kayi itudi ne bua kudiela?

¹⁷ Kuelangana meji pa malu adi Yehowa wenza ku diambuluisha dia bulongolodi buende kudi kutuambuisha. Tuikalayi badisuike pamue ne bulongolodi buimpe ebu bua kuteka malu adi ne mushinga wa bungi pa muaba wa kumpala. Kuenza nunku nekutukoleshe bua tuikale badisuike anu bu Paulo wakamba ne: “Bu mutudi ne mudimu eu bilondeshile luse luvuabu batuleje, katuena tuwulekela to.” (2 Kol. 4:1) Wakakankamija kabidi benzejanganyi nende ba mudimu ne: “Katulekedi kuenza malu mimpe nansha, bualu netupuole mu tshikondo tshiakane tuetu katuyi batshioke.”​—Gal. 6:9.

¹⁸ Kudiku malu atudi ne bua kushintulula tuetu nkayetu peshi mu dîku dietu bua tuetu kukeba mua kumanya malu adi ne mushinga wa bungi mu malu atudi tuenza dituku dionso anyi? Tudiku mua kupepeja nsombelu wetu anyi kukepesha mêba atudi tujikija lutetuku bua kudifila bikole mu mudimu wa kuyisha udi ne mushinga wa bungi anyi? Mu tshiena-bualu tshialonda, netumone malu atanu atuambuluisha bua kuenda pamue ne bulongolodi bua Yehowa.