Balongolola bua kuenza disua dia Yehowa

LELU eu pa buloba bujima, kudi malongolodi a bungi a malu a bitendelelu, a malu tshididi, a malu a bungenda mushinga ne a malu a mu nsombelu wa bantu. Malongolodi aa adi ne bipatshila ne mmuenenu ne ngenyi ne mushindu wa dienza malu bishilangane. Kadi kudi bulongolodi budi bushilangane ne malongolodi makuabu onso aa kule ne kule. Dîyi dia Nzambi didi dileja patoke ne: bulongolodi abu mbua Bantemu ba Yehowa.

² Udi ne diakalenga dia kuikala mu bulongolodi bua Yehowa. Bu muukadi mumanye tshidi disua dia Nzambi, ukadi mutuadije kudienza. (Mis. 143:10; Lomo 12:2) Udi wenzela Nzambi mudimu pamue ne tshisumbu tshia bana betu ba pa buloba bujima badi banangangane. (2 Kol. 6:4; 1 Pet. 2:17; 5:9) Anu muvua Dîyi dia Nzambi dilaye, bidi bikupetesha mabenesha ne masanka a bungi. (Nsu. 10:22; Mâko 10:30) Bu muudi wenza disua dia Yehowa mpindieu ne lulamatu, bualu ebu budi buenda bukulongolola bua matuku malenga atshilualua a kashidi.​—1 Tim. 6:18, 19; 1 Yone 2:17.

³ Mufuki wetu Munene udi ne bulongolodi bua pa buabu pa buloba, budi bulombodibua bilondeshile disua diende. Mbuena kuamba ne: budi bulombodibua kudi Yehowa, Mfumu udi ku mutu kua bionso. Tudi bamueyemene ne muoyo mujima. Yeye ke Mulumbuluishi wetu, Mutueledi wa mikenji ne Mukalenge wetu. (Yesh. 33:22) Bu mudiye Nzambi wa bulongame, mmulongolole malu bua ‘tuenze mudimu pamue nende’ bua kukumbaja disua diende.​—2 Kol. 6:1, 2.

⁴ Bu mukadi nshikidilu wa ndongoluelu wa malu eu musemene pabuipi bikole, tudi tuenda tuya kumpala ku bulombodi bua Mukalenge Kristo Yezu udi Nzambi musungule. (Yesh. 55:4; Buak. 6:2; 11:15) Yezu muine uvua muambe ne: bayidi bende bavua ne bua kuenza malu manene kupita ne avuaye muenze mu mudimu wende wa diyisha pavuaye pa buloba. (Yone 14:12) Bivua mua kuenzeka nanku, bualu bayidi ba Yezu bavua ne bua kuvulangana, bayisha mu teritware mutambe bunene munkatshi mua tshikondo tshile. Bavua ne bua kumanyisha lumu luimpe lua Bukalenge too ne ku ntengu ya buloba.​—Mat. 24:14; 28:19, 20; Bien. 1:8.

⁵ Ke tshidi tshienzeka lelu. Kadi anu mukavua Yezu muleje patoke, mudimu wa kuamba kua lumu luimpe eu newujike mu tshikondo tshidi Yehowa mujadike. Malu onso adi mu milayi idi mu Dîyi dia Nzambi adi aleja ne: dituku dinene dia Yehowa didi dikuatshisha buôwa dikadi pabuipi.​—Yoe. 2:31; Sef. 1:14-18; 2:2, 3; 1 Pet. 4:7.

⁶ Bu mutudi bamanye tshidi disua dia Yehowa mu matuku a ku nshikidilu aa, mbimpe tudienzeje bikole bua kuenza malu adi Nzambi utulomba. Nunku bidi bitulomba bua tumanye bimpe mudi bulongolodi bua Nzambi buenda ne tuenze nabu mudimu pamue mu malu onso. Malu a bulongolodi bua Nzambi ebu mmashindamene pa mêyi manene, pa mikenji, pa mêyi matuma, pa mêyi ne mikandu, ne pa malongesha a mu Bible.​—Mis. 19:7-9.

⁷ Padi batendeledi ba Yehowa balonda buludiki bua mu Bible, badi basomba ne benza mudimu pamue mu ditalala ne mu buobumue. (Mis. 133:1; Yesh. 60:17; Lomo 14:19) Ntshinyi tshidi tshikolesha malanda etu ne bana betu ba miaba yonso? Ndinanga. Tudi ne dinanga ne diodi ke didi ditusaka bua kuakolesha. (Yone 13:34, 35; Kolos. 3:14) Patudi tuenza malu mu mushindu udi Nzambi wanyisha, tudi tuenda pamue ne tshitupa tshia bulongolodi bua Yehowa tshia mu diulu.

TSHITUPA TSHIA BULONGOLODI BUA YEHOWA TSHIA MU DIULU

⁸ Baprofete bu mudi Yeshaya, Yehezekele ne Danyele bakamona bikena kumona bia tshitupa tshia bulongolodi bua Yehowa tshia mu diulu. (Yesh., nshap. 6; Yeh., nshap. 1; Dan. 7:9, 10) Mupostolo Yone wakamona pende tshikena kumona tshia mudi malu malongolola mu diulu ne wakaalonda mu tshikoso mu mukanda wa Buakabuluibua. Wakamona Yehowa musombe mu nkuasa wende wa bukalenge wa butumbi munyunguluka kudi banjelu bela mbila bamba ne: “Wa tshijila, wa tshijila, wa tshijila udi Yehowa Nzambi, Wa Bukole Buonso, uvuaku ne udiku ne udi ulua.” (Buak. 4:8) Yone wakamona kabidi ‘muana wa mukoko wa Nzambi muimane munkatshi mua nkuasa wa bukalenge.’ Muana wa mukoko wa Nzambi au n’Yezu Kristo.​—Buak. 5:6, 13, 14; Yone 1:29.

⁹ Tshikena kumona tshia Yehowa musombe mu nkuasa wa bukalenge atshi tshidi tshileja ne: yeye ke Mfumu wa bulongolodi ebu. 1 Kulondolola 29:11, 12 udi wamba bua Nzambi ne bua muaba wende mubandile ne: “Wewe Yehowa, bunene ne bukole ne bulengele ne butumbi ne bukokeshi mbiebe, bualu bintu bionso bidi mu diulu ne pa buloba mbiebe. Bukalenge mbuebe, wewe Yehowa. Wewe ke udi udibandisha bua wikale ku mutu kua bionso. Biuma ne butumbi bidi bifumina kuudi, udi ukokesha bintu bionso, mu tshianza tshiebe mudi bukokeshi ne bukole, ne tshianza tshiebe tshidi mua kuvuija muntu yonso munene ne kupesha bantu bonso bukole.”

¹⁰ Bu mudi Yezu Kristo wenza mudimu pamue ne Yehowa, udi ne muanzu mubandile mu diulu ne mbamupeshe bukokeshi bua bungi. Bulelela, Nzambi “wakateka . . . bintu bionso muinshi mua makasa ende ne kumutekaye ku mutu kua malu onso adi atangila tshisumbu.” (Ef. 1:22) Mupostolo Paulo wakamba bua Yezu ne: “Nzambi wakamupesha muaba mubandile ne wakamupesha dîna didi ku mutu kua dîna dikuabu dionso ne bulenga buonso, bua mu dîna dia Yezu tshinu tshionso tshia badi mu diulu ne badi pa buloba ne badi muinshi mua buloba tshitue panshi, ne bua ludimi luonso lumanyishe patoke ne: Yezu Kristo udi Mukalenge bua butumbi bua Nzambi Tatu.” (Filip. 2:9-11) Nunku tudi mua kueyemena bukokeshi buakane bua Yezu Kristo ne muoyo mujima.

¹¹ Mu tshikena kumona kampanda, muprofete Danyele wakamona Wa Kale wa Matuku a Bungi mu nkuasa wende wa bukalenge ne banjelu ‘binunu tshinunu bavua batungunuka ne kumuenzela mudimu, ne binunu 10 misangu binunu 10 bavua bimane kumpala kuende.’ (Dan. 7:10) Bible udi wamba bua tshiluilu tshia mu diulu tshia banjelu atshi ne: ‘nnyuma bua mudimu wa tshijila, mituma bua kuenzela bantu bapiana lupandu mudimu.’ (Eb. 1:14) Bifukibua bionso bia mu nyuma ebi mbilongolola mu ‘nkuasa ya makalenge, mamfumu, mbulamatadi, ne makokeshi.’​—Kolos. 1:16.

¹² Patudi tuangata dîba dia kuelangana meji a bintu bidi mu tshitupa tshia bulongolodi bua Yehowa tshia mu diulu, tudi mua kumvua bua tshinyi pavua Yeshaya ‘mumone Yehowa musombe mu nkuasa wa bukalenge mutumbuke ne mubandishibue muulu, ne baselafima bimane pa mutu pende,’ wakashiya dîyi wamba ne: “Diakabi dianyi! Nkadi anu mumane kufua, bualu ndi muntu udi ne mishiku kayiyi mikezuke, ne ndi musombele munkatshi mua bantu badi ne mishiku kayiyi mikezuke; bualu mêsu anyi mmamone Mukalenge, Yehowa wa biluilu muine!” Bushuwa, Yeshaya wakakema ne kudipuekeshaye pavuaye mumone bunene bua bulongolodi bua Yehowa. Biakamulenga bikole bualu pakumvuaye dîyi difuma mu diulu dilomba bua kuenza mudimu kampanda wa pa buawu wa dimanyisha malumbuluisha a Yehowa, wakamba ne: “Mmeme eu! Untume!”​—Yesh. 6:1-5, 8.

¹³ Kumanya bulongolodi bua Yehowa ne kubuanyisha kudi kufikisha bantu bende ku dienza malu anu bu Yeshaya. Padi bulongolodi ebu buenda buya kumpala, tudi tudienzeja bua kuenda nabu tshiapamue. Tudi tuenza nanku ne muoyo mujima bua kuleja mutudi beyemene bulongolodi bua Yehowa lelu eu.

BULONGOLODI BUA YEHOWA BUDI BUENDA BUYA KUMPALA

¹⁴ Mu nshapita wa kumpala wa mukanda wa Yehezekele mudi mêyi a buprofete adi aleja mudi Yehowa wendesha ditempu dinene dia mu diulu. Ditempu didi dikemesha edi didi dileja tshitupa tshia bulongolodi bua Yehowa budi kabuyi bumueneka. Yehowa udi udiendesha mu mushindu muimpe ne uya nadi kuonso kudiye musue.​—Mis. 103:20.

¹⁵ Lukata luonso lua ditempu edi ludi ne lukata lukuabu munda mualu lua bunene bumue nalu, mitshiamakanangane. Ke bualu kayi Bible udi wamba ne: nkata ayi ‘idi iya mu nseke yonso inayi.’ (Yeh. 1:17) Nkata eyi idi mua kushintulula diakamue luseke ludiyi iya. Kadi ditempu edi kadiena didiyila nkayadi kakuyi udi udilombola to. Yehowa kena ulekela bulongolodi buende buya kudibu busue kuya nansha. Yehezekele 1:20 udi wamba ne: “Bivua biya kuonso kuvua nyuma ubisaka bua kuya.” Nunku, Yehowa ke udi wenza bua bulongolodi buende buya kuonso kudi nyuma wende ubutuma. Mbimpe tudiebeje ne: ‘Ndiku ngenda tshiapamue ne bulongolodi ebu anyi?’

¹⁶ Kuenda tshiapamue ne bulongolodi bua Yehowa kakuena kulomba anu kubuela mu bisangilu ne kuya mu buambi to. Kadi kudi kumvuija nangananga kuya kumpala ne kukola mu nyuma. Tudi ‘tukeba mua kumanya malu adi ne mushinga wa bungi’ ne tudienzeja bua kuikala ne tshibidilu tshia kudia biakudia bia mu nyuma katuyi tushadila panyima to. (Filip. 1:10; 4:8, 9; Yone 17:3) Katupu kabidi muoyo ne: padibu bakula bua bulongolodi bidi biumvuija bulombodi buimpe ne dieleshangana diboko. Nunku mbimpe tumanye ne: bidi ne mushinga bua kuenza mudimu bimpe ne bintu bia mu nyuma ne bia ku mubidi bidi Yehowa mutupeshe bua kukumbaja mudimu wende. Patudi tuenda tshiapamue ne ditempu dia Yehowa dia mu diulu, tudi tuenza malu mu diumvuangana ne mukenji utudi tuyisha.

¹⁷ Bulongolodi bua Yehowa budi butuambuluisha bua kutungunuka ne kuenza disua dia Nzambi. Tuikale anu bavuluke ne: Yehowa ke udi wendesha ditempu dia mu diulu edi. Nunku patudi tuenda nadi tshiapamue, tudi tuleja ne: tudi tunemeka Yehowa ne tumueyemena yeye Dibue dietu. (Mis. 18:31) Bible udi ulaya ne: “Yehowa neapeshe bantu bende bukole. Yehowa neabeneshe bantu bende ne ditalala.” (Mis. 29:11) Bu mutudi mu tshitupa tshia bulongolodi bua Yehowa lelu, tudi tupeta bukole ne ditalala bidiye upesha batendeledi bende badiye mulongolole. Bushuwa, netutungunuke ne kupeta masanka anu tuetu batungunuke ne kuenza disua dia Yehowa mpindieu ne bua kashidi.