MANDAMUNA A NKONKO YA MALU A MU BIBLE

Mmunyi mudi bena dibaka mua kuikala ne disanka?

Mibelu ya mu Bible idi ileja bena dibaka mudibu mua kuikala ne disanka itu ipatula bipeta bimpe bualu idi ifumina kudi Yehowa Nzambi Muenji wa dibaka. Idi itulongesha mua kuikala ne ngikadilu mimpe idi mua kuenza bua dibaka dikale dia disanka ne itudimuija bua kuepuka bikadilu bidi mua kunyanga dibaka. Idi kabidi itulongesha mua kuyukila bimpe bua disanka dikale mu dibaka.​—Bala Kolosayi 3:8-10, 12-14.

Mulume ne mukajende badi ne bua kupeshangana bunême ne kunemekangana. Padi yonso wa kudibu wanyisha muaba udi Nzambi mumupeshe mu dibaka, badi mua kuikala ne disanka.​—Bala Kolosayi 3:18, 19.

Tshia kuenza ntshinyi bua dibaka kunengadi?

Bena dibaka badi mua kushala kaba kamue bobu banangangane bikole. Nzambi udi utulongesha mua kunangangana. Yeye ne Muanende Yezu badi bilejilu bimpe bia dinanga dikole menemene.​—Bala 1 Yone 4:7, 8, 19.

Mulume ne mukajende bobu banemeke dibaka bu bualu budi Nzambi mulongolole, nebashale kaba kamue. Nzambi uvua muenze dibaka bua dikale muaba udi mulume ne mukaji mua kusomba mu buobumue ne bua kukuba mêku. Dibaka didi mua kunenga bualu Nzambi mmuenze mulume ne mukaji bua bikale bakumbajangana mu majinga abu a ku mubidi ne a mu lungenyi. Mmubafuke kabidi mu tshimfuanyi tshiende ne dijinga dia bobu kuidikija dinanga diende.​—Bala Genese 1:27; 2:18, 24.