Kuvuluka dinanga dianyi dia kumpala nkungambuluishe bua kutantamena ntatu

TUVUA mu tshidimu tshia 1970. Mvua mu bulalu bua disama mu lupitadi lunene lua mu Valley Forge mu Phoenixville, mu tshimenga tshia Pennsylvanie mu États-Unis. Munganga uvua ungangata luendu lua mashi mu minite 30 yonso. Mvua musalayi ne mvua ne bidimu 20, mvua ne disama dibi menemene. Munganga uvua mumpitshile ku bidimu ndambu wakatuadija kupampakana bualu luendu luanyi lua mashi luvua luende lupueka. Meme kumuebeja ne: “Kutu muanji kumona mutu muntu ukula muoyo anyi? Tshimfuanyi tshiende tshiakashintuluka, yeye kungandamuna ne: “Tshitu muanji kumona to.”

Tshikondo atshi, tshivua mumanye muvua nsombelu wanyi mua kuikala to. Kadi mmunyi mungakafika mu lupitadi amu? Ndi nnulondela amue malu a mu nsombelu wanyi.

MUMVUA MUBUELE MU MVITA

Ngakasama pamvua ngenza mudimu bu muambuluishi mu nzubu wa dipandangana mu tshikondo tshia mvita mu Vietnam. Mvua musue kuambuluisha bantu bavua basama ne bavua batapike ne mvua ne tshipatshila tshia kulua munganga mupandianganyi. Ngakaya mu Vietnam mu ngondo wa 7 mu 1969. Anu bu bantu bonso bavua bafikamu, bakampesha lumingu lujima bua kumona mudi midimu yenzeka miaba yonso ne bua meme kuibidilangana ne mêba a muaba au ne luya lukole ludimu.

Matuku makese meme mumane kutuadija mudimu wa dipandangana mu lupitadi lua mu Mékong Delta, mu Dong Tam, ndeke mikese ya bungi yakalua ne basalayi bavua ne mputa. Mvua munange bantu bikole ne mvua musue kuenza mudimu, nunku ngakatuadija kubondopa diakamue. Bavua balongolola bantu bavua ne mputa ne baya nabu lukasa mu kontenere mikese ivua ne biamu bivua bifila mashika ivua milongolola bua kupandilamu bantu. Mu kontenere yonso muvua munganga uvua upandangana, munganga uvua utua bantu buanga bua kukepesha diumvua dia bisama ne baminganga bakuabu babidi. Bonso bavua badienzeja bua kusungila mioyo ya bantu. Ngakamona mabuki makuabu mu bibuta binene bifike avuabu kabayi batulule mu ndeke ayi. Bakangambila ne: mu bibuta abi muvua bitupa bia mibidi ya basalayi bivuabu bakose mu mvita. Ke mushindu umvua mubuele mu mvita.

NDI NKEBA NZAMBI

Pantshivua nsonga, mvua mumanye amue malu a mu Bible avua Bantemu ba Yehowa balongesha. Mamu uvua ulonga Bible ne Bantemu, kadi kavua mufike ku ditambula to. Mvua musue kusomba ku luseke lua mamu pavuabu bamulongesha Bible. Tshikondo atshi, tuakapitshila ku Nzubu wa Bukalenge ne tatu uvua musele mamu. Ngakamuebeja ne: “Ntshinyi etshi?” Wakangandamuna ne: “Musangu nansha umue kusemenyi pabuipi ne bantu aba to.” Bu mumvua mumunange bikole ne mumueyemene, ngakateleja tshivuaye mungambile. Nunku, ngakalekela kuyukila ne Bantemu ba Yehowa.

Pangakumbuka mu Vietnam, ngakapeta dijinga dia kumanya Nzambi. Malu onso amvua mumone avua antatshisha mu lungenyi. Bivua bimueneka ne: kakuvua muntu nansha umue uvua mumanye tshivua tshienzeka mu Vietnam to. Ndi mvuluka muvua bantu bavua bakeba mashintuluka babikila basalayi ba mu États-Unis ne: bashipi ba bana, bualu luapolo luvua luleja ne: bavua bashipa bana bavua kabayi ne bualu mu mvita.

Bua kujikija nzala imvua nayi bua dîyi dia Nzambi, ngakatuadija kubuela mu bitendelelu bishilashilangane. Mvua munange Nzambi, kadi malu amvua mmona mu bitendelelu ebi kaavua ansankisha to. Ndekelu wa bionso, ngakaya mu Nzubu wa Bukalenge wa Bantemu ba Yehowa wa mu Delray Beach mu tshimenga tshia Floride. Muvua mu Dia lumingu mu ngondo 2 mu 1971.

Pangakabuelamu, muyuki wa patoke ukavua ku ndekelu, nunku meme kushala bua kulonda dilonga dia Tshibumba tshia Nsentedi. Tshiena mvuluka tshiena-bualu tshituvua balonge to, kadi ntshidi muvuluke muvua bana bakese babulula Bible yabu bua kupeta mvese. Bualu ebu buakansankisha bikole! Mvua nteleja ne mmona bivua bienzeka ne ntema yonso. Pankavua ngumbuka ku Nzubu wa Bukalenge, muanetu wa balume uvua ne bidimu bitue ku 80 wakalua kundi. Dîna diende divua Jim Gardner. Wakampesha mukanda wa Bulelela budi bufikisha ku muoyo wa kashidi ne kungambilaye ne: “Angata koku mukanda eu.” Tuakumvuangana bua kutuadija kulonga Bible mu Dinayi mu dinda.

Mvua ne bua kuya ku mudimu mu Dia lumingu dilolo. Mvua ngenza mudimu mu lupitadi kampanda lua muntu mu Boca Raton mu tshimenga tshia Floride, mumvua munganga wa mu tshibambalu tshia bena masama a tshimpitshimpi. Mvua ntuadija mudimu butuku pa dîba dia 23 too ne mu dinda pa dîba dia 7. Bu muvuaku kakuyi mutoyi, ngakapeta mushindu wa kubala mukanda wa Bulelela au. Munganga uvua ku mutu kuetu wakalua muaba umvua, kundiafulaye mukanda, kutangila tshizubu tshiawu ne kungambila ne dîyi dikole ne: “Udi musue kulua pebe Ntemu anyi?” Meme kumudiafula mukanda ne kumuambila ne: “Ntshidi nguwubala, kadi ndi mumanye ne: nendue anu Ntemu wa Yehowa.” Wakanshiya, meme kujikija kuwubala butuku abu.

Kumpala kua kutuadija kulonga Bible ne muanetu Gardner, ngakamuebeja ne: “Mpindieu netulonge tshinyi?” Wakangandamuna ne: “Mukanda umvua mukupeshe au.” Meme kumuambila ne: “Nkadi muwubale wonso.” Muanetu Gardner kungambilaye ne bulenga ne: “Mbimpe, kadi tuanji kukonkonona nshapita wa kumpala eu.” Ngakakema bua malu amvua tshiyi mumvue kumpala. Uvua mumbadishe mvese ya bungi mu Bible wanyi wa King James ivua mifunda mu maleta makunze. Ngakamanya Nzambi mulelela, Yehowa. Tuakalonga nshapita isatu ya mu mukanda wa Bulelela mu dinda adi ne muanetu Gardner umvua mbikila ne: Jim. Tuakatungunuka ne kulonga nshapita isatu mu Dinayi dionso mu dinda. Mvua munange bikole malu atuvua tulonga au. Mvua ne diakalenga dia kundongeshabu kudi muanetu muela manyi eu uvua mumanyangane ne muanetu Charles Russell.

Mbingu mikese pashishe, bakanganyishila bua kulua mumanyishi wa lumu luimpe. Jim wakangambuluisha mu malu a bungi avua antatshisha ne bua kuyisha ku nzubu ne ku nzubu. (Bien. 20:20) Bu mutuvua tuyisha ne Jim, ngakafika ku dinanga mudimu eu. Ntshidi mmona mudimu wa buambi bu diakalenga dinene. Ndi ne disanka dia bungi dia kuikala muenzejanganyi wa mudimu ne Nzambi.​—1 Kol. 3:9.

DINANGA DIANYI DIA KUMPALA BUA YEHOWA

Mpindieu ndi nnuambila bualu budi butangila dinanga dianyi dia kumpala bua Yehowa. (Buak. 2:4) Pantu mvuluka tunyinganyinga tua mu tshikondo tshia mvita, dinanga edi ditu dingambuluisha bua kututantamena ne kutantamena ntatu mikuabu ya bungi.​—Yesh. 65:17.

Ndi mvuluka dimue dituku dia pa buadi mu tshidimu tshia 1971. Bavua bafuma ku dingipata mu nzubu uvua baledi banyi banganyishile bua kusombela. Tatu uvua musele mamu kavua musue bua muntu ikale Ntemu wa Yehowa mu lubanza luende to. Tshivua ne makuta a bungi tshikondo atshi to. Mu lupitadi mumvua ngenzela mudimu bavua bamfuta panyima pa mbingu ibidi yonso, ne mvua mfuma ku ditula makuta a bungi bua kusumba bilamba bua kumona mua kuyisha ne kuikala ne tshimuenekelu tshimpe bu muleji mpala wa Yehowa. Mvua ne ndambu wa makuta amvua mulame, kadi avua mu banke wa mu Michigan, mu provense mumvua mukolele. Nunku ngakasombela mu mashinyi anyi bua matuku makese. Mvua nya kukosa miedi ne kuowa mâyi muaba wa kuangatshila kasolonyi uvua nkumba.

Dimue dituku mu tshikondo tshimvua musombele mu mashinyi, ngakafika ku Nzubu wa Bukalenge mêba abidi kumpala kua tshisangilu tshia buambi kutuadija. Mvua mfuma ku mudimu mu lupitadi. Pamvua musombe kumfundu kua Nzubu wa Bukalenge muaba uvua muntu nansha umue kayi mua kummona, ngakavuluka malu a mu Vietnam: mipuya ya bantu bavuabu buoshe ne dimona muvua mashi apueka mu mputa biakatuadija kumbungamija bikole. Mu lungenyi luanyi, mvua anu bu ne: mvua ngumvua ne mmona bansongalume bansengelela bamba ne: “Ndiku mua kupanda anyi? Ndiku mua kupanda anyi?” Mvua mumanye ne: bavua ne bua kufua, kadi mvua ngenza muanyi muonso bua kubakankamija tshiyi mbambila ne: bavua ne bua kufua to. Pamvua musombe muaba au, mvua mubungame bikole.

Ngakasambila binsonji bienda bipueka. (Mus. 56:8) Ngakatuadija kuela meji bikole bua ditekemena dia dibishibua dia bantu ku lufu. Pashishe meme kupeta lungenyi lua ne: ku diambuluisha dia dibika dia bantu ku lufu, Yehowa Nzambi neumbushe dishipangana dionso dimvua mumone ne kanyinganyinga kamvua naku ne kavua naku bantu bakuabu. Nzambi neajule bansongalume abu ku lufu, ne nebapete mushindu wa kumanya bulelela pa bidi bimutangila. (Bien. 24:15) Dîba adi, ngakananga Yehowa bikole ne muoyo wanyi mujima. Tshiena mua kupua dituku edi muoyo to. Katshia anu ku dituku adi, ndi ngenza muanyi muonso nangananga pandi mu ntatu ne mu nsombelu mikole bua kubenga kujimija dinanga dianyi dia kumpala bua Yehowa.

YEHOWA MMUNGENZELE MALU MIMPE

Patuku mvita, bantu batu benza malu mabi. Meme panyi mvua muenze. Kadi kuelangana meji bua mvese ibidi imvua munange bikole kuakangambuluisha. Mvese wa kumpala ke Buakabuluibua 12:10, 11. Mvese eu udi uleja ne: badi batshimuna Diabolo ne dîyi dia bumanyishi buetu ne mashi a Muana wa mukoko. Mvese muibidi ke Galatiya 2:20. Mvese eu mmungambuluishe bua kumanya ne: Kristo Yezu uvua mufue “bua bualu buanyi.” Yehowa udi ungelela meji ku diambuluisha dia mashi a Yezu, ne mmumfuile luse bua malu amvua muenze. Kumanya bualu ebu nkungambuluishe bua kuikala ne kondo ka muoyo kimpe ne nkunsake bua kuenza muanyi muonso bua kuambuluisha bakuabu bua kumanyabu bulelela budi butangila Yehowa, Nzambi wa luse.​—Eb. 9:14.

Pandi mvuluka malu a mu nsombelu wanyi, ndi ne dianyisha dia bungi bua mudi Yehowa untabalela misangu yonso. Tshilejilu, dituku diakamanya Jim ne: mvua musombele mu mashinyi anyi, wakaya nanyi kudi muanetu wa bakaji kampanda uvua ne nzubu umvua mua kusombela. Ndi mutuishibue ne: Yehowa uvua muenze mudimu ne Jim ne muanetu wa bakaji au bua meme kupeta muaba muimpe wa kusomba. Yehowa n’Nzambi muimpe be! Udi utabalela batendeledi bende ba lulamatu.

NDI NDONGA MUA KUIKALA NE TSHISUMI NE BUKALANGA

Mu ngondo 5 mu 1971, mvua ne bua kuya mu Michigan bua kuenza midimu kampanda. Kumpala kua kumbuka mu tshisumbu tshia Delray Beach tshia mu Floride, ngakuwuja mikanda mu mashinyi anyi, meme kuya mu njila munene udibu babikila ne: Interstate 75 mutangile ku Nord. Kumpala kua meme kufika mu provense wa Géorgie, mikanda yonso ikavua mijike. Mvua muyishe lumu luimpe lua Bukalenge ne tshisumi mu miaba mishilashilangane. Mvua ngimana ku nzubu ya buloko ne miaba mikuabu ya kuikishila ivua ne nkumba bua kupesha bantu trakte. Too ne lelu, ndi ndiebeja bikala lumue lua ku ntete ya bulelela imvua mukune lutoloke.​—1 Kol. 3:6, 7.

Kadi ndi ngamba malu onso patoke ne: musangu wa kumpala ungakalonga bulelela, tshivua ne bukalanga to, nangananga pamvua nyukila ne bena mu dîku dietu. Bu muvua dinanga dianyi dia kumpala bua Yehowa disaba munda muanyi, mvua mbayisha ne dikima dionso tshiyi ndia tshibanga. Mvua munange tutuanyi John ne tutuanyi Ron bikole, ne mvua mbenzeja bua bitabe bulelela. Ngakalua kubalomba luse bua dipanga dianyi dia malu. Kadi ntu anu nsambila bua bitabe bulelela. Katshia anu dîba adi, Yehowa mmundongeshe, mpindieu ndi ne bukalanga pandi nyisha ne ndongesha bantu.​—Kolos. 4:6.

BANTU BAKUABU BANDI MUNANGE

Pandi mvuluka dinanga dindi nadi bua Yehowa, tshiena mpua muoyo bantu bakuabu bandi munange mu nsombelu wanyi to.Muntu mukuabu wa mushinga mukole undi munange mmukajanyi Susan. Mvua mumanye ne: mvua dijinga ne muntu uvua mua kungambuluisha bua kukumbaja mudimu wanyi wa Bukalenge. Susan mmukaji mushindame mu nyuma. Ndi mvuluka dimue dituku dimvua muye kumutangila patutshivua tutantshilangana. Ngakapeta Susan musombe mu lutanda lua nzubu wabu mu Cranston mu tshidiila tshia Rhode. Uvua ubala Tshibumba tshia Nsentedi ne Bible wende. Tshivua tshinkemeshe tshivua ne: uvua ubala tshiena-bualu tshisakidila ne wenda ubala mvese ivuamu. Meme kudiambila ne: ‘Eu mmukaji udi munange Nzambi bikole!’ Tuakaselangana nende mu ngondo wa 12 mu 1971, ne ndi ne disanka bua mudiye ku luseke luanyi ne ungambuluisha katshia anu ku tshikondo atshi. Ndi mmuanyisha bikole bualu mmunnange ne mmunange kabidi Yehowa bikole.

Tudi balele ne Susan bana ba balume babidi, Jesse ne Paul. Yehowa uvua nabu pavuabu benda bakola. (1 Sam. 3:19) Bu mudibu banange bulelela, mbatupeteshe lumu. Mbatungunuke ne kuenzela Nzambi mudimu bualu mbavuluke dinanga diabu dia kumpala bua Yehowa. Yonso wa kudibu ukadi muenze mudimu wa ku dîba ne ku dîba bidimu bipite pa 20. Ndi kabidi ne disanka bua bakaji babu Stephanie ne Racquel, bandi ngangata bu bana banyi balela. Bana banyi ba balume bonso babidi mbasele bakaji badi banange Yehowa Nzambi ne muoyo wabu wonso ne anyima wabu mujima.​—Ef. 6:6.

Pangakatambula, ngakenza mudimu munkatshi mua bidimu 16 mu tshidiila tshia Rhode, mumvua mupete balunda bimpe. Ndi mvuluka malu mimpe a bakulu batuvua benze nabu mudimu. Ndi kabidi ne dianyisha bua batangidi bena ngendu ba bungi bavua bangambuluishe. Ndi ne diakalenga dinene dia kuenza mudimu pamue ne bantu badi balame dinanga diabu dia kumpala bua Yehowa. Mu 1987, tuakaya kuyisha mu Caroline wa ku Nord muaba uvua dijinga dinene, tuakapetamu kabidi balunda bimpe.a

Mu ngondo wa 8 mu 2002, bakatubikila meme ne Susan ku Betele wa mu Patterson mu États-Unis. Mvua ngenza mudimu ku Biro bia mudimu, Susan yeye uvua mu tshibambalu tshia disukula bilamba. Uvua munange mudimu eu bikole. Pashishe mu ngondo wa 8 mu 2005, ngakapeta diakalenga dia kulua muena mu Kasumbu Kaludiki. Mudimu eu uvua undomba bua kuikala ne budipuekeshi. Pavua mukajanyi wela meji bua majitu atuvua nawu, bua mudimu ne dienza ngendu, bivua bimusamisha mutu. Susan katu umvua bimpe bua kuenza ngendu ku ndeke to, kadi tutu tuenza ngendu ya bungi ne ndeke. Susan udi wamba ne: mêyi mimpe atu bakaji ba bena mu Kasumbu Kaludiki bakuabu bamuambila, mmamuambuluishe bua kuntua nyama ku mikolo bikole menemene. Bushuwa, ke tshituye wenza ne ndi mumunange bua bualu abu.

Ndi ne foto ya bungi mu biro bianyi ne idi ne mushinga wa bungi kundi. Idi imvuluija nsombelu muimpe umvua nende. Ndi mupete masanka a bungi bua mundi muenze muanyi muonso bua kuvuluka dinanga dianyi dia kumpala bua Yehowa.