Fuila bantu luse ne muoyo mujima

MÊYI A MU BIBLE: “Nutungunuke ne kufuilangana luse ne muoyo mujima nansha muntu yeye muikale tshilumbu ne mukuabu. Anu bu mudi Yehowa munufuile luse ne muoyo mujima, nudi ne bua kuenza penu nanku.”​—Kolosayi 3:13.

Bidi biumvuija tshinyi? Mu Bible badi bafuanyikija bubi ne dibanza, difuilangana luse badi badifuanyikija ne kulekeelangana dibanza. (Luka 11:4) Tshikandakanda kampanda tshidi tshiamba ne: mu Mifundu, muaku wa tshiena Greke udibu bakudimune ne: “kufuilangana luse” udi umvuija “kulekeela muntu dibanza, kubenga kudinana.” Nunku, patudi tufuila muntu udi mutuenzele bibi luse katuena tuindila bua enze bualu bukuabu budi buleja ne: mmulombe luse to. Patudi tufuila muntu luse kabiena bisua kumvuija ne: tudi banyishe bualu bubi budiye mutuenzele anyi bapepeje kanyinganyinga kadi bualu abu butukebele to. Kadi tudi basue amu kubukupula ku muoyo, nansha koku bualu budi buenza bua ‘tuikale tshilumbu’ ne muntu.

Bidiku mua kuenzeka nanku lelu anyi? Bu mutudi bantu bena mapanga, tutu tuenza bonso bibi. (Lomo 3:23) Nunku, mbimpe kuikala ne lungenyi lua kufuila bakuabu luse, bualu nansha ku tototo nansha ku ndandanda netujinge bua bakuabu batufuile petu luse. Kabidi tuetu ne lungenyi lua kufuilangana luse nebituambuluishe tuetu bine. Mushindu kayi?

Tuetu balame tshiji ne lukuna katuyi tufuila bantu luse, tudi tudienzela nkayetu bibi. Lungenyi lubi lua mushindu eu ludi mua kutupangisha bua kuikala ne disanka, lutuvuija bena dikenga mu nsombelu wetu. Ludi kabidi mua kutukebela masama. Tshikandakanda kampanda tshidi tshiamba ne: “Makebulula menza matuku mashale aa adi aleja mudi tshiji ne kulaminangana lukuna munda kupetesha disama dia muoyo.”​—Journal of the American College of Cardiology.

Kadi, tangila malu mimpe atudi tupeta patudi tufuila bantu luse. Tuetu tufuila bantu luse ne muoyo mujima tudi tulama buobumue ne ditalala, tudi kabidi tulama bimpe malanda etu ne bakuabu. Kadi bualu bua mushinga bunene mbua ne: tudi tuidikija Nzambi utu ubuikidila ne muoyo mujima benji ba mibi badi banyingalala; utu utulomba petu bua kuenza nanku.​—Mâko 11:25; Efeso 4:32; 5:1.