Uvua mumanye anyi?

Bua tshinyi Yezu uvua muambilamu pavuaye mubikile bangenda mushinga bavua bapana nyama ku ntempelo mu Yelushalema ne: “banyengi”?

TUDI tubala mu Evanjeliyo wa Matayi ne: “Yezu wakabuela mu ntempelo, kuipataye bantu bonso bavua basumbisha ne basumba bintu mu ntempelo, kutonkolaye mêsa a bashintudi ba makuta ne bibasa bia basumbishi ba nyunyi ya nkutshi. Wakabambila ne: ‘Mbafunde ne: “Nebabikile nzubu wanyi ne: nzubu wa disambila,” kadi nuenu nudi bamuvuije tshisokomenu tshia banyengi.’”​—Mat. 21:12, 13.

Miyuki ya kale idi ileja ne: bantu bavua benda mushinga ku ntempelo bavua benzela bantu bavua babasumba bintu malu mu mushindu mubi, babashintula bintu ku mishinga mikole. Tshilejilu, nyunyi ya nkutshi ivua mushinga mukese menemene, too ne bapele bavua mua kuyisumba bua kuyilambula. Kadi, mikanda ya kale ya bena Yuda idi ileja ne: mu bidimu lukama bia kumpala, muntu uvua mua kusumba nyunyi ya nkutshi ibidi ku ndenale (dénar) wa or. Muntu uvua mua kuenza mudimu matuku 25 bua kupeta makuta a bungi aa. Nyunyi ya nkutshi yakabanda mushinga bikole, bipangisha too ne bapele bua kuyisumba. (Lew. 1:14; 5:7; 12:6-8) Labi Simeon ben Gamaliel wakafiika munda bikole bua bualu ebu, kufikaye too ne ku dikepesha bungi bua milambu ivuabu balombe bena Yuda bua kufila. Diakamue, mushinga wa nyunyi ya nkutshi ibidi wakapueka, kulua tshia lukama tshimue tshia ndenale wa or.

Anu mutudi mua kumona, bangenda mushinga ba ku ntempelo bavua bena lukuka ne bendela mushinga pambidi pa bantu. Ke bualu kayi Yezu uvua muambilamu pavuaye mubabikile ne: “banyengi.”