Udi mumanye anyi?
Bua tshinyi bivua bimpe bua muvua Yehowa muanyishile bena Isalele bua kufila tumanda nkutshi anyi nkudimba bu mulambu?
MIKENJI ivua yanyishila bantu bua kulambula Yehowa tumanda nkutshi anyi nkudimba. Misangu ya bungi mu mikenji pavuabu bakula bua milambu bavua batela nyunyi yonso ibidi eyi pamue, bamba ne: bavua mua kufila nyunyi umue pa muaba wa mukuabu. (Lew. 1:14; 12:8; 14:30) Bua tshinyi buvua bualu buimpe? Bualu tumanda nkutshi katuvua tumueneka bikole to. Bua tshinyi katuvua tumueneka?
Kamanda nkutshi
Tumanda nkutshi ntunyunyi tutu tuenza ngendu mile tutu tusombela mu Isalele tshikondo tshidiku luya. Mu ngondo wa dikumi tutu tumbuka ku sud tuya mu matunga mudi luya, tulua kupingana mu Isalele mu muvu wa luya. (Msol. 2:11, 12; Yel. 8:7) Kabivua bipepele bua bena mu Isalele wa kale kulambulabu tumanda nkutshi mu muvu wa mashika to.
Nkudimba
Ku lukuabu luseke, tunkudimba tuotu katutu tuenza ngendu to, tuvua mu Isalele dîba dionso. Bualu bukuabu buimpe mbua ne: ntunyunyi tuvua bantu bamuna kumbelu. (Fuanyikija ne Yone 2:14, 16.) Mu mukanda mukuabu mbafunde ne: “Mu misoko yonso ya mu ditunga dia Palestine ne mu bimenga bionso bavua anu bamuna tunkudimba. Ku lubanza luonso kuvua anu kazubu ka nkudimba anyi disoso mu tshimanu, muaba uvua tunyunyi mua kusombela.”(Bible Plants and Animals)—Fuanyikija ne Yeshaya 60:8.
Nkudimba mu disoso didi mu tshimanu
Nunku Yehowa uvua muleje muvuaye ne dinanga, kayi ne malu makole pavuaye witaba bua bena Isalele bamulambule tunyunyi tuvuabu mua kupeta bipepele dîba dionso.