3 Wambuluisha bua kutantamena ntatu

Kudi ntatu itudi katuyi mua kuepuka anyi idi kayiyi mua kujika mpindieu. Tshilejilu, wewe mufuishe muntu uudi munange anyi muikale ne disama dia munanunanu, udi mua kushikila, kadi udi mua kupeta mishindu ya kutantamena lutatu luebe alu. Bible udi mua kukuambuluisha mu nsombelu mikole ya nunku anyi?

DISAMA DIA MUNANUNANU

Rose udi wamba ne: “Ndi ne disama kampanda dia ku tshilelelu didi dinsamisha mubidi bikole dîba dionso. Nsombelu wanyi mmunyanguke bikole.” Bumue bua ku malu avua atamba kumutatshisha buvua bua ne: kuvua misangu ivuaye kayi mua kutuma lungenyi luende ku dilonga diende dia Bible ne ku malu makuabu adi atangila ntendelelu wende. Kadi mêyi a Yezu adi mu Matayi 19:26 akamuambuluisha bikole. Adi amba ne: “Bua Nzambi malu onso adi mua kuenzeka.” Rose wakalua kumanya ne: kudi mishindu ya bungi ya kulonga. Bu muvua disama diende dienza bua bimukolele misangu mikuabu bua kubala, wakatuadija kuteleja dibala dia Bible ne dia mikanda mikuabu mu mêyi makuata.a Udi wamba ne: “Bu mishindu ayi kayiyiku, tshiena mumanye mumvua mua kulama malanda anyi ne Nzambi to.”

Padi Rose unyingalala bua mudiye kayi mua kuenza malu avuaye wenza kumpala, mêyi adi mu 2 Kolinto 8:12 adi amukankamija. Adi amba ne: “Bikala dijinga didianjile kuikalaku, mbianyishibue nangananga bilondeshile bidi muntu nabi, kadi ki mbilondeshile bidi muntu kayi nabi to.” Mêyi aa adi avuluija Rose ne: Nzambi udi usanka bua malu adiye wenza, bualu udi wenza bionso bidiye mua kuenza bilondeshile nsombelu wende.

TUNYINGANYINGA TUKOLE

Delphine, utukadi batele mu biena-bualu bishale, udi uvuluka wamba ne: “Meme mumane kujimija muananyi wa bakaji wa bidimu 18, kanyinganyinga kamvua naku kavua kakole menemene kamfikisha too ne ku didiebeja ni mvua mua kutungunuka ne kuikala ne muoyo. Malu onso akashintuluka.” Kadi mêyi a mu Musambu wa 94:19 akamukolesha bikole. Adi amba ne: “Pavua tunyinganyinga tumpite bukole, wewe wakansamba, wewe kumpesha ditalala.” Delphine udi wamba ne: “Ngakasambila Yehowa bua angambuluishe bua mpete malu a kuenza avua mua kungambuluisha bua kukepesha kanyinganyinga kanyi.”

Wakadifila mu dienza mudimu wa nsongo wa budisuile. Mu bungi bua matuku, wakalua kudifuanyikija ne mpemba ya kufunda nayi: nansha lupemba luolu lutshibuke lutu anu luambuluisha bua kufunda. Bia muomumue, nansha muvuaye muzengela panshi, wakalua kumona ne: utshivua anu mua kuambuluisha bantu bakuabu. Udi uvuluka wamba ne: “Ngakalua kumona diakamue ne: pamvua nkankamija bantu bamvua ndonga nabu Bible ne mêyi manene a mu Bible ne mmuenenu wa malu udimu, bivua mushindu uvua Yehowa utekesha kanyinganyinga kanyi ne unsamba.” Wakafunda mêna a bantu badibu batele mu Bible bavua bapete tunyinganyinga tukole mu nsombelu wabu. Wakamona ne: “Buonso buabu bavua basambila bikole.” Wakalua kumona kabidi ne: “Muntu kena mua kutantamena kanyinganyinga padiye kayi ubala Bible to.”

Kulonga Bible nkulongeshe kabidi Delphine bualu bukuabu ebu: kutuishila mêsu ku matuku adi alua, kubenga kuatuishila pa malu akadi menzeke. Ditekemena didi mu Bienzedi 24:15 diakamusamba. Mêyi adi mu mvese eu adi amba ne: “Nekuikale dibishibua dia bantu ku lufu, dia bakane ne dia badi kabayi bakane.” Mmushindike menemene ne: Yehowa neabishe muanende anyi? Delphine udi wandamuna wamba ne: “Ndi ndimona nkadi ne muananyi wa bakaji matuku adi alua. Dituku dituamonangana ndienze anu bu ne: dikadi dimana kusungula, anu bu ne: tukadi badiele mu kajengu mu kalandriye ka Tatuanyi wa mu diulu. Ndi ndimona tukadi basombe nende mu kabudimi ketu ka bilongo anu bu mumvua mumumone dituku divuaye muledibue ne mumunange dituku adi.”

a Mikanda ya bungi mikuata mu mêyi nunku idi mu site wa jw.org.

Bible udi mua kukuambuluisha bua kupeta busambi nansha mu bikondo bia ntatu mikole

MMUNYI MUDI NZAMBI MUA KUTUAMBULUISHA?

Bible udi ufila diandamuna ditoke. Udi wamba ne: “Yehowa udi pabuipi ne bonso badi bamubila, ne bonso badi bamubila mu bulelela. Udi ukumbaja dijinga dia bonso badi bamutshina; udi umvua muadi wabu wa dilomba diambuluisha, ne udi ubasungila.” (Misambu 145:18, 19) Bualu ebu kabuenaku busankisha anyi? Kadi mmunyi mudi Nzambi mua kuandamuna masambila a bantu badi bakeba buludiki kudiye ne muoyo mujima?

UDI UTUPESHA BUKOLE:

Ntatu idi misangu ya bungi mua kututekesha mu maboko anyi kututshiokesha ku mubidi, mu lungenyi, ne mu nyuma. (Nsumuinu 24:10) Kadi Yehowa “udi upesha muntu udi mutshioke bukole, upesha badi kabayi ne bukole dikanda dionso.” (Yeshaya 40:29) Mupostolo Paulo uvua mutantamene ntatu mikole wakamba ne: “Bua malu onso ndi ne bukole ku diambuluisha dia yeye udi umpesha bukole.” (Filipoyi 4:13) Nyuma wa Nzambi uvua upesha Paulo bukole. Wewe pebe udi mua kulomba Nzambi bua akupeshe nyuma muimpe.—Luka 11:13.

UDI UTUPESHA MEJI:

Udi mua kuenza tshinyi wewe dijinga ne diambuluisha bua kumvua mibelu ya mu Bible ne kuyitumikila? Muyidi Yakobo wakafunda ne: “Nunku bikala umue wa kunudi mupangile meji, atungunuke ne kualomba kudi Nzambi, bualu yeye udi upesha bantu bonso ne tshianza tshilekelela, kayi ubatobolola, ne nebamupeshawu.” (Yakobo 1:5) Udi mua kuenza malu mu diumvuangana ne masambila ebe wewe ubala Bible ne utumikila malongesha adimu. (Yakobo 1:23-25) Wewe wenza nunku, neudimuene mudi mibelu idimu mikale ya meji.

UDI UTUPESHA DITALALA:

Nansha wewe ne malu adi akusamisha mutu bikole, Yehowa udi mua kukuambuluisha bua kutukija. Dîyi diende didi diamba ne: “Kanusamishi mutu bua tshintu nansha tshimue, kadi mu malu onso, ku diambuluisha dia disambila ne disengelela pamue ne disakidila, numanyishe Nzambi milombu yenu; ne ditalala dia Nzambi didi dipite dijingulula dionso dia malu nedilame mioyo yenu ne bieledi bienu bia meji ku butuangaji bua Kristo Yezu.” (Filipoyi 4:6, 7) Kuenaku mua kulomba Yehowa bua akupe ditalala anyi?

Kadi udi mua kuenza tshinyi ntatu yebe yoyi kayiyi mijike ne lukasa? Kuena mua kuamba diakamue ne: Nzambi mmukulekele to. Nansha ntatu yebe yoyi itungunuka, Nzambi udi mua kukupesha dikima ne bukole bua kunanukila. (1 Kolinto 10:13) Bible udi kabidi ulaya ne: tshikondo netshilue tshikala ntatu yetu ne bua kujika kashidi!