Tukebayi diambedi Bukalenge bua Nzambi—Pa kufilafila milambo ya ditumbisha nayi

¹ Badi bakeba diambedi Bukalenge batu misangu yonso badiakaje bua kuakula bua Yehowa ne bua Bukalenge buende. (Mus. wa 145:11-13) Ku dituku ne ku dituku, tudi ne mishindu ya kubenesha dîna diende ne kumanyisha lumu luimpe. (Mus. wa 96:2) Kutumbisha Yehowa kuvua kuimpe kutambe bua mufundi wa Misambu uvua muamba ne: “Netubandishe matumbi bua Nzambi dituku dijima.” (Mus. wa 44:8) Bituikala ne mmuenenu bu eu, netuikale ne dijinga dia kudifila pa tshibidilu mu mudimu wa Bukalenge.

² Yehowa ki mmutufundile bungi bua mêba atudi ne bua kukumbaja mu buambi; kadi, udi utukankamija bua tuetu kumutumbisha “misangu yonso.” (Eb. 13:15) Bikala nsombelu wetu mukumbanyine, tudi ne bua kuenza madikolela bua kupitshisha dîba ku lumingu ne ku lumingu mu kutumbisha Yehowa. Ku luetu luseke bituikala tuenza nunku, tudi pamu’apa mua kudilongolola bua kuikala mpanda-njila muambuluishi ku musangu ne ku musangu peshi mene pa tshibidilu. Bua aba bakadi bampanda-njila bambuluishi, badi mua kupangadija bua kulua bampanda-njila ba pa tshibidilu.

³ Nansha nsombelu wetu muikale munyi, tudiku mua kufila mulambo wa ditumbisha nawu mutambe bunene anyi? Mitalu idi ifumina ku dianyisha. Dianyisha didi dikoleshibua ku diambuluisha dia dilonga dia Dîyi dia Nzambi dia muntu pa nkayende, ne bisangilu bia tshisumbu bidi bitusaka ku dileja dianyisha dietu ku bienzedi. Disesela ne tshisumi aba badi batumbisha Yehowa ne mitalu, ‘neditusake ku dinanga ne ku midimu milenga.’ (Eb. 10:24) Pa kubabidila menemene ngakajilu yonso miangata kudi tshisumbu, netuikale mua kufila mulambo mupite bunene wa ditumbisha nawu.

⁴ Muprofete mukaji Ana wakafila tshilejilu tshitambe buimpe mu mudimu wa Yehowa. Nansha mukavuaye ne mvula 84, “kavua upumbisha kuikala mu ntempelo nansha musangu umue, ukuata mudimu wa tshijila butuku ne munya.” (Luka 2:37) Uvua udifila ne anyima wende mujima mu midimu ya tshisumbu, ke biakamupetesha masankishibua manene. Muyuki wa mu Bible wa mudimu wende wa lulamatu udi buetu tuetu mpokolo wa dikankamija.

⁵ Paulo wakasengelela aba ‘badi ne bukole bua kuambula mateketa a aba badi kabayi ne bukole.’ (Lomo 15:1) Pamu’apa mu tshisumbu tshietu mudi mua kuikala bena nkristo badi mua kubabidila diambuluisha dietu dilenga ne makankamija etu. Mumanyishi kampanda udi mua kuikala anu ne dijinga dia kubikidibua bua kupatuka netu mu buambi, anyi dia mushindu wa kuenda ne kufika mu teritware. Mukuabo neatekete mu maboko ne netuikale pamu’apa bakumbanyine bua kumupesha diambuluisha didi dikengedibua bua mitalu yende bua mudimu wa Bukalenge kukolayi tshiakabidi. (1 Tes. 5:14) Mbabi yetu bua ‘kuabanyangana ne bansantu bilondeshile bidibo bakengela’ neyileje dijinga dietu dilelela dia kutumbisha bikole dîna dia Yehowa.—Lomo 12:13.

⁶ Katuena mua kubadika bionso bikadi Yehowa mutuenzele ne bialuaye kutuenzela. Katuena mua kumufuta nansha bia munyi bua mabenesha ende wonso. Ebi bionso bidi tubingila tulelela bua se: ‘tshintu tshionso tshidi tshieyela tshitumbishe Yehowa!’—Mus. wa 150:6.