Neusamune Yehowa anyi?

“ANU bu mudi dîna diebe‚ Ô Nzambi‚ ke mudi disamunyibua diebe difika too ne ku mfudilu kua buloba.” Mêyi aa ng’a mu musambu wa tshi-profete muimba kudi bana ba balume ba Kora. (Musambu wa 48:10, NW) Lelu’eu, tshisumbu tshia bukole tshia tu-ngimba tshienza ne miliyo ne miliyo ya Bantemu ba Yehowa tshidi tshisamuna Nzambi ne tshimanyishisha dîna diende pa kuamba lumu luimpe lua Bukalenge buende. Pa kuenza nunku mu matunga 232 ne bidiila bia mbuu ne mu miakulu mipite pa 300‚ bushuwa mbafike mu ngumvuilu muena-dîna too ne ku “mfudilu kua buloba.”

Ntshinyi tshidi tshisaka bantu bena nshidimukilu‚ bisa‚ ne miakulu bishilangane bua kusamuna Yehowa? Ndianyisha diabu bua dimanya dijalame dia Dîyi dia Nzambi, Bible, didi kabingila kanene. Bulelela bua mu nyuma mbubapikule ku bitabataba ne ku bupika bua mitabuja a bitendelelu bu mudi dia dikengeshibua dia kashidi. (Yone 8:32) Bulelela mbubambuluishe kabidi bua kuanyisha ngikadilu ya Nzambi ya mpatshi‚ bu mudi dinanga‚ bukole‚ meji, ne buakane budi bubatamijibua kudi dilekelelangana bilema. Kufika ku dijingulula bua tshinyi Nzambi wakafila Muanende umuepele, Yezu Kristo, bu mulambu wa tshia-bupikudi bua bukua-bantu kudi kusaka bantu bakane ku disamuna ne ku disadila Yehowa.

Bilondeshile mukanda wa mu Bible wa Buakabuluibua, tshisumbu tshia tu-ngimba tshia mu diulu tshidi tshimanyisha ne: “Wewe, Yehowa Nzambi wetu, udi muakanyine bua kupeta butumbi, buneme, ne bukole, bualu wewe wakafuka bintu bionso, ne bua disua diebe biakafika ku dikalaku ne biakafukibua.” (Buakabuluibua 4:11, NW) Disamuna dia mushindu’eu kadiena difumina ku didiumvua benzejibua patupu to. Bishilangane‚ didi difumina ku kanemu bua Yehowa.

Samuna Nzambi pa kumanyisha lumu luimpe

Mu disamuna Yehowa, muntu udi widikija tshilejilu tshitambe buimpe tshia Yezu Kristo, musamunyi munene wa Nzambi. Kulonda makasa a Yezu kudi kulomba didifila mu mudimu wa dimanyisha lumu luimpe lua Bukalenge bua Nzambi. (Matayi 4:17, 23; 24:14, NW) Mudimu eu wa buambi ke udi mulue madikolela matambe bunene menza pa buloba bujima mu disamuna Yehowa.

Mudimu eu wa buambi udi ne mushinga mutambe bunene bualu Bible mu butoke buonso udi uusuikakaja ku lupandu. Tudi tubala mu Lomo 10:13-15 (NW) ne: “‘Yonso wabila dîna dia Yehowa neapandishibue.’ Kadi, mmunyi muabilabo eu udibo kabayi ne ditabuja kudiye? Ne mmunyi muitabujabo eu udibo kabayi bumvue bakula bualu buende? Ne mmunyi mumvuabo pikalaku kakuyi muntu udi ulongesha? Mmunyi mualongeshabo pikalabo kabayi batumibue? Anu muakafundabo se: ‘Mbulengele kayipu budi nabu makasa a badi bamanyisha lumu luimpe lua bintu bimpe!’”

Tshidimu tshishale nkayatshi‚ Bantemu ba Yehowa bakapitshisha mêba mapite pa muliyare mujimu mu mudimu wa buambi. Ne mbipeta kayipu bimpe bidi bifumina ku disamuna Nzambi edi! Bantu batue ku 314 000 mbadisangishe ne tshisumbu tshia tu-ngimba tshia basamunyi pa kuleja tshimanyinu tshia didifila diabu kudi Yehowa pa kutambula batismo wa mâyi.

Kadi, ntshinyi tshidi mua kuambibua bua bantu 12 288 917 bakabuela mu Tshivulukilu tshia lufu lua Kristo mu 1994? Munkatshi muabu muvua bantu bapite pa 7 000 000 badi kabayi banji kusamuna Yehowa bu bamanyishi ba lumu luimpe. Kadi dikalaku diabu mu tshibilu etshi tshia mushinga mukole didi, ndekelu wa bionso, mua kusakidila mikuabo miliyo mivule ku tshisumbu tshia tu-ngimba tua basamunyi [ba Nzambi]. Ntshinyi tshidi mua kuenjibua bua kuambuluisha basankididi ba bulelela aba bua kuluabo basamunyi ba Yehowa?

Diambuluisha didiku

Bantu bavule basankididi ba bulelela badi ne dijinga dia kusamuna Yehowa, kadi eku badiumvua se: kabena mua kufika ku dikumbaja malu malomba. Mbimpe bua bavuluke mêyi a muimbi wa misambu aa: “Nembandishe meso ku mikuna: kuafumina diambuluisha dianyi nkunyi? Diambuluisha dianyi didi difuma kudi Mfumu udi muenze diulu ne buloba.” (Musambu 121:1, 2, Mukenji Mulenga) Bua kuamba patoke, muimbi wa misambu wakabandisha mêsu ende ku mikuna ya Yeruzaleme kuvua ntempelo wa Yehowa ne tshisombedi tshia mbulamatadi wa teokrasi pa buloba. Ku ebi, tudi ne tubingila bua kufila nkomenu wa se: diambuluisha didi dikengedibua bua kusamuna Nzambi ne kumanyisha mukenji wa Bukalenge didi difumina anu kudi Yehowa ne bulongolodi buende.​—Musambu 3:4; Danyele 6:10.

Lelu’eu, bantu badi bajinga kusamuna Yehowa badi mua kutekemena dikuatshisha dia dinanga didi difumina ku bulongolodi buende bua pa buloba. Tshilejilu, Bantemu ba Yehowa badi bafila diambuluisha pa kulombola malonga a Bible a ku nzubu kakuyi difutshisha mfranga ne bantu badi basankidila bulelela. Programe eu wa dishidimuna udi ulomba bivule kupita kulonga patupu malongesha a mu Bible. Udi wambuluisha mulongi bua kukolesha dianyisha bua bidiye ulonga ne bua bulongolodi budi Yehowa utumika nabu.

Mu diumvuangana ne ebi‚ Ntemu udi ulombola dilonga dia Bible udi uteta bua kuikala ne dishindika dia se: malelela mapiamapia masokolola kaena alenga anu tshieledi tshia lungenyi apo ne mutshima pawo. Ne mulongeshi kêna ne bua kudikanda bua kuleja mulongi mushindu udi Yehowa utumika ne bulongolodi Buende bua kukumbaja dilongolola Diende pa buloba. Broshire wa Bantemu ba Yehowa​—Mu buobumue bua kuenza disua dia Nzambi pa buloba bujima ne kasete ka video ka Les Témoins de Jéhovah: un nom, une organisation mbidijadike mudibi biambuluisha bikole mu dikumbaja malu aa.

Bisangilu bia bena nkristo bidi pabi bikuata mudimu munene mu dikuatshisha aba balua pamu’apa basamunyi ba Yehowa. Ku dia mudiata mbala menemene dia dilonga dia Bible, mulongi udi mua kulombibua bua kubuela mu bisangilu bia tshisumbu. Kunyima, neajingulule mushinga wa dibuela pa tshibidilu ne difila mumvuija mu bisangilu bionso bia bena nkristo. (Ebelu 10:24, 25) Batangidi badi mua kupetesha diambuluisha dikena kutua mushinga bua bena kuitabuja nabu ne bua aba balua pamu’apa basamunyi ba Yehowa pa kulongolola bisangilu bidi biibaka mu nyuma ne bikuatshisha.

Ambuluisha bana bua kusamunabu Yehowa

Bana badi munkatshi mua bantu bavule badi mua kulua bamanyishi ba lumu luimpe mu matuku makese adi kumpala eku. Ba-tatu badi nangananga bilondeshile Bible ne bujitu bua kukolesha bana babu “mu mibelu ne manyoka pamue ne buludiki bua lungenyi bia Yehowa.” (Efeso 6:4, NW) Padibo balongeshibue bimpe kudi baledi banangi ne batumikidi ba Nzambi, nansha bana batekete menemene badi mua kukolesha dijinga dia kusamuna Yehowa.

Muana kampanda wa bakaji mutekete ku Argentine wakaya misangu ne misangu kudi bakulu ba mu tshisumbu munkatshi mua ngondo mivule, ubalomba diambuluisha bua amone mua kufika ku dikumbana tshishiki bu mumanyishi wa Bukalenge. Kunyima, baledi bende ne bakulu bakapunga ku dîyi bua kumupa dianyisha bua kuluaye mumanyishi udi kayi muanji kutambuishibua. Udi mpindieu ufila biakane mukenji wa Bukalenge ku biibi. Nansha mudi muana mutekete wa bakaji eu ne bidimu bitanu patupu ne kayi mumanye kubala‚ mmukuate ku muoyo muaba udi imue mvese ya mu Bible. Kunyima kua mumane kupeta mvese kampanda, udi ulomba muena nzubu bua kumubala, ne pashishe ufila diumvuija.

Mbimueneke patoke se: baledi ne bakulu badi mua kuenza bivule pa kukankamija ne kuambuluisha aba badi benda balubuluka too ne ku dilua basamunyi ba Yehowa.​—Nsumuinu 3:27.

Malanda a tshiendelele ne Yehowa

Kadi, netuambe tshinyi buebe wewe, biwikala mumane kudisangisha ne Bantemu ba Yehowa kukadi tshikondo kampanda kadi kuyi muanji kudisuika kudibo mu mudimu wabu wa buambi? Bidi mua kuikala bimpe bua wewe kudiebeja nkonko idi ilonda eyi: ‘Ndiku ngitabuja se: ndi mupeta bulelela ne se: Yehowa udi Nzambi umuepele mulelela anyi? Ndiku mutuishibue se: Bukalenge bua Nzambi ke dijandula dimuepele dia ntatu ya bukua-bantu anyi? Ndiku mulekele bitendelelu bionso bia dishima, bibidilu ne bienzedi bia mu bulongolodi ebu bidi bipetula Yehowa anyi? Ndiku ne dinanga diondoke bua Nzambi ne bua malu ende makane adiye ulomba anyi?’ (Musambu wa 97:10) Biwikala mua kuandamuna mu bululame buonso ne: eyowa ku nkonko eyi, ntshinyi tshidi tshikukanda bua kusamuna Yehowa?​—Fuanyikija ne Bienzedi 8:36.

Kusamuna Yehowa kudi kulomba bivule kupita kumanyisha patupu lumu luimpe. Pawikala mupete dimanya dijalame, muikale ne ditabuja dilelela, ne muakaja nsombelu webe bilondeshile malu adi Nzambi ulomba, udi ne bua kushemeja malanda ebe a pa nkayebe ne Nzambi. Mmunyi? Mpa kuditshipa kudiye mu disambila ne pashishe kuleja tshimanyinu tshia diditshipa edi ku batismo wa mâyi. Muoyo wa kashidi mmusuikakaja ku bualu ebu. Pa nanku, enza malu mpindieu mu diumvuangana ne mubelu wa Yezu eu: “Nubuelele ku tshiibi tshibumbakane; bualu njila munene ne mualabale udi ufikisha ku kabutu, ne bavule badi bayilamu; kadi tshiibi tshibumbakane ne njila mufimpakane ng’udi ufikisha ku muoyo, ne bakese ke badi bamupeta.”​—Matayi 7:13, 14, NW.

Etshi ki ntshikondo tshia kuelakana, bualu ndongoluelu eu wa malu ukadi pabuipi ne nshikidilu wende wa kabutu. Ela diakamue biidia bidi bikengedibua bua kushemeja malanda a tshiendelele ne Yehowa. Eyowa, etshi ntshikondo tshia kuandamuna biakane ku lukonko elu: neusamune Yehowa anyi?