Tuambuluishe ne dinanga badi baleja dijinga dia kumanya bivule
1 Pavua muanjelo wa Yehowa mulombole mulongi Filipe kudi muena Ethiopie kampanda uvua uleja dijinga dilelela dia kumanya bivule pa bidi bitangila Dîyi dia bulelela dia Nzambi, wakamulomba ne dinanga bua kumuambuluisha bua kumvua bivuaye ubala. (Bienz. 8:26-39) Tusombele tuenza bipitshidile bua kuambuluisha aba badi baleja dijinga dia kumanya bivule anyi? Tudi ne bua kuenza nanku, bualu tshimue tshitupa tshia bukenji butupa kudi Nzambi ntshia kuenza balongi. (Mat. 28:19, 20) Ntshinyi tshitudi mua kuenza bua kubambuluisha?
2 Tudilamine dîba ku lumingu luonso bua kuenza makumbula mapiamapia. Tudilongolole bua kupingana kukumbula bavua baleje dijinga dia kumanya bivule ne tuenze madikolela bua kutuadijiulula diyukidilangana pa Bible dituvua batuadije mu dikumbula dietu dia kumpala. Tulame mu lungenyi tshipatshila tshia kutuadija dilonga dia Bible. Tupingane pa tshibidilu kubakumbula bua kubaleja nimero ya ndekelu ya Tshibumba tshia Nsentedi ne ya Réveillez-vous! Pikala bantu baleja dijinga dilelela dia kumanya bivule, pamu’apa netubalombe bua kuenza abonema.
3 Mu dikumbula dia kumpala, binuikala bayukile pa mushinga wa Bible, udi mua kuambulula diyukidilangana pa kutumika ne lumue lua ku ngenyi-miludiki mifila mu dibeji dia 59 mu mukanda wa “Comment raisonner” ne kuamba mêyi bu aa:
◼ “Bamue badi bela meji ne: mibelu ya mu Bible kayena ne dikuatshisha dilelela mu tshikondo tshietu etshi. Udi wela meji bishi? [Lekela andamune.] Bu mukanda kampanda mua kutupesha mibelu mitambe buimpe idi itufikisha ku dikala ne nsombelu wa disanka mu dîku, katuenaku mua kuamba ne: udi ne dikuatshisha dilelela anyi? [Lekela andamune.] Pa bidi bitangila nsombelu wa dîku, malongesha ne bienzedi mbishintuluke, ne bipeta bitudi tumona lelu kabiena bimueneka bimpe. Bishilangane, mêku adi alonda tshidi Bible wamba adi bushuwa mashindame ne a disanka.” Bala Kolosai 3:18-21. Leja trakte wa Pourquoi avoir confiance en la Bible ne mumanyishe se: udi musue kuenza nende programe wa dilonga dia Bible kakuyi difutu.
4 Udi mua kutuadija diyukidilangana pa ngikadilu wa bafue mushindu’eu:
◼ “Kudi bia bungi bia kuamba pa ngikadilu wa bafue. Buebe wewe, ntshinyi tshidi tshitufikila patudi tufua? [Lekela andamune.] Bivule bia ku bitendelelu bidi bilongesha ne: tudi tutungunuka ne kuikala ne muoyo mu mushindu mukuabo. Bavule batu bakema pa kumanya tshidi Bible wamba pa muanda eu. [Bala Muambi 9:5.] Kadi, nansha mudi bafue bine kabayi ne dikalaku didibo bamanye, kabena babapua muoyo. Nzambi mmulaye bua kubapingaja ku muoyo muinshi mua bukokeshi bua Bukalenge buende.” Bulula mukanda wa Kuikala ne muoyo wa kashidi mu dibeji dia 162, ne nuyukile pa mumvuija ne bimfuanyi. Dilongolole bua kuenza dikumbula dipiadipia ne tshipatshila tshia kutuadija dilonga dia Bible.
5 Biwasua kufila mumvuija a bungi pa mmuenenu wa buena-nkristo pa mvita idi matunga aluangana, udi pamu’apa mua kuamba mêyi bu aa:
◼ “Bamue badi bela meji ne: mushindu umuepele wa kujikija bilumbu udi amu wa kuluangana. Udi mumone pebe bishi? [Lekela andamune.] Bible udi uleja mudi Nzambi ujinga bua bantu kusomba pamue mu ditalala. [Bala Lomo 12:17, 18.] Ebi nebienzeke pa buloba bujima muinshi mua bukokeshi bua Bukalenge bua Nzambi.” Angata broshire wa Dieu se soucie-t-il vraiment de nous? mu dibeji dia 25 ne dia 26. Umulombe bua upingane bua kumvuija bua tshinyi Yezu mmutulongeshe bua kusambila bua ‘disua dia Nzambi diezenke pa buloba bu mudidi dienzeka mu diulu.’—Mat. 6:10.
6 Mutungu muena Ethiopie uvua mumanye se: kavua mua kujingulula bu muntu kayi umuludika. (Bienz. 8:31) Ne dinanga, Filipe wakamutuadila diambuluisha divuaye ukengela. Tudi mua kuleja dinanga dietu dilelela bua bantu netu pa kubambuluisha bia muomumue.