Lumu luimpe bua badipuekeshi
1 Tudi mu tshikondo tshialua Yehowa kukumbaja malumbuluisha ende. (Yehez. 9:5, 6) Bidi bikengela lelu’eu ne: badipuekeshi badimuijibue mu miaba yonso pa malu alualua, bua ne badilongolole. Yehowa mmufile kudi tshisamba tshiende bukenji bua “kumanyisha lumu luimpe kudi bena kalolo,” ebi bidi biumvuija bunangi buende. (Yesh. 61:1, 2) Bibejibeji bidi bituambuluisha bua kumanyisha lumu luimpe elu mu tshitupa tshinene tshia buloba.
2 Tshibumba tshia Nsentedi ne Réveillez-vous! bidi bitupesha tshiakudia tshia mu nyuma tshikole tshidi tshitukolesha ne tshitusaka ku dienza mudimu. Tshibumba tshia Nsentedi tshidi tshikankamija badipuekeshi pa kubamanyisha lumu luimpe lua se: Bukalenge bua Nzambi nebukudimune mu matuku makese aa buloba bua kuluabu mparadizu. Réveillez-vous! udi utupesha tubingila tushindame tua kuikala ne ditekemena mu mulayi wa Mufuki wa kujadika bulongolodi bupiabupia bua ditalala ne bukubi. Diabanya dia bibejibeji ebi dinene mmushindu wa pa lukasa wa kumanyisha lumu luimpe kudi badipuekeshi. Ngenyi kayi misonsodi diyukidilangana itudi mua kuzangika mu nimero ya matuku mashala aa?
3 Udi mua kuleja “Tshibumba tshia Nsentedi” tshia mu dia 1 Lumungulu pa kukoka ntema pa tshiena-bualu: “Babidilayi dibala Bible dituku dionso” ne kuela lukonko elu:
◼ “Mu kuebe kumona, mmushindu kayi utudi mua kubabidila dibala dia Bible? [Lekela muntu andamune.] Mu Lomo 15:4, Bible nkayende udi utuambuluisha bua kuela meji pa lukonko elu. [Bala Lomo 15:4.] Bantu ba bungi mu kartié badi ne Bible, kadi bakese tshianana mbadi ne dîba dia kumubala ku musangu ne ku musangu. Tudi bajadike ne: ditekemena dimuepele dia bushuwa bua matuku atshilualua ndifunda mu Bible ne mu dimubala netubeneshibue.” Sakidila nseke mikuabu mikumbanyine ne pashishe uleje bibejibeji.
4 “Tshibumba tshia Nsentedi” tshia mu dia 15 Lumungulu tshidi ne tshiena-bualu tshidi tshikoka ntema: “Muoyo mupiamupia bua bankambua betu.” Imue misangu netusonsole dijinga dia kumanya bia bungi kudi mututeleji pa kutumika ne mbuelelu eu:
◼ “Bantu ba bungi badi badiebeja mushindu uvua bankambua babu. Bu mukadibu bafue, bavule badi bamba ne: kabena mua kumanya bualu ebu nansha. Udiku wela meji ne: dimue dituku nekuikale mushindu wa kumanya bankambua betu anyi?” Lekela muntu andamune. Bala Yone 5:28, 29, ne wambile mukuteleji ne: Nzambi mmulaye bua kupesha bankambua betu muoyo mupiamupia pa buloba bukudimuna mparadizu.
5 Udi mua kuleja “Réveillez-vous!” wa mu dia 8 Lumungulu pa kuela lukonko ne:
◼ “Bua kuebe kumona, ntshinyi tshitudi ne bua kuenza bua muoyo kutusankishawu?” Lekela muntu andamune. Muleja tshiena-bualu: “Quel est le sens de la vie?” (Muoyo udi ne diumvuija kayi?) mu dibeji 26, ne bala tshidi Solomo muambe mu Muambi 2:11. Pashishe uzangike mubelu mufila mu nshapita 12, mvese 13. Usake mukuteleji bua kuitabaye tshibejibeji.
6 Biwafile bibejibeji, kupu muoyo bua kushiya Ngumu ya Bukalenge n° 34 (bikalayo mu stoke) kudi buonso bavua bapangile kuyipeta. Tudi ne bua kuikala badiakaje bua kuleja bantu mikanda, bamanye se: imue misangu neyibadibue kudi bena dîku bakuabu peshi kudi balunda babo balua kubakumbula. (1 Tim. 6:18) Lumu luimpe lutudi tuamba kudi badipuekeshi ludi mua kubapandisha.—— 1 Tim. 4:16.