Tudi Tukengela Tshisumbu
1 Bana balume ba Koré bakaleja dinanga diabu bua tshisumbu tshia Yehowa mu miaku eyi: “Kusomba dituku dimue mu nzubu muebe, nkupite kusomba matuku tshinunu mu muaba mukuabo.” (Mus. wa 84:11, MMM) Bua kuabu kumona, bukua-bantu kabuvua mua kupetesha muntu nsombelu mupite eu buimpe nansha. Biwikala ne mmuenenu eu, newikale ne bua kuteka tshisumbu tshia Buena-nkristo pa muaba wa mushinga mu nsombelu webe.
2 Katshia ku mbangilu watshi, tshisumbu tshia Buena-nkristo tshidi tshibabidila patoke dibenesha dia Nzambi. (Bienz. 16:4, 5) Muntu nansha umue wa kutudi kêna ne bua kutshitangila bu tshintu tshia mushinga mukese peshi kutshimona amu bu mushindu wa kusangila popamue. Tshisumbu “nkaaba ka didisanga” ka Bantemu ba Yehowa ba misoko yonso. Tudi badisangishe apa mu buobumue bua kulongeshibua kudi Yehowa ne kulongamijibua bua mudimu wa Bukalenge.—Yesh. 2:2, NW.
3 Tshisumbu tshia Buena-nkristo mmushindu wa kumpalampala utudi tulongeshibua bulelela. (1 Tim. 3:15) Bayidi ba Yezu badi ne bua kuikala ‘buonso mu buobumue,’ ne kuikala mu buobumue ne Nzambi, mu buobumue ne Kristo, mu buobumue bamue ne bakuabu. (Yone 17:20, 21, NW; tangila kabidi Yeshaya 54:13.) Pa buloba bujima, bana betu bena nkristo badi bitabuja malongesha ne mêyi-maludiki a mu Bible ne baatumikila.
4 Tudi bashidimunyibue ne bakajibue bua mudimu wetu wa kuenza bayidi. Ngondo yonso, Tshibumba tshia Nsentedi, Réveillez-vous! ne Mudimu wetu wa Bukalenge bidi bifila mibelu miakanyine bua kutuadija diyukidilangana dia mu Bible. Bisangilu bidi ne tshipatshila tshia kutuleja mua kumona ne kusonsola dijinga dia bantu dia kumanya bia bungi. Didiunda pa buloba bujima didi dishindika ne: mudimu eu udi ne dikuatshisha dia badi mu diulu.—Mat. 28:18-20.
5 Ku diambuluisha dia tshisumbu, tudi matuku wonso ‘basakibue ku dinanga ne ku midimu milenga.’ (Eb. 10:24, 25, NW) Bakoleshibue ku mutshima, netutantamene mateta mu lulamatu. Batangidi balenga badi batuambuluisha bua kutantamena disuyakajibua ne tunyinganyinga. (Muambi 4:9-12) Bituamba kupambuka, tudi tupeta mibelu miakanyine. Kudiku bulongolodi bukuabu budi bufila diambuluisha dia dinanga dia mushindu’eu anyi?—1 Tes. 5:14.
6 Yehowa udi wanyisha bua tuetu kushala pabuipi ne bulongolodi buende bua buobumue buetu kukubibuabu. (Yone 10:16) Tshisumbu tshidi tshituambuluisha bua kulama malanda ne mupika wa lulamatu bu mudi pa kututekela batangidi bena ngendu bua kutukankamija. Bua diandamuna dietu dilenga ku bulombodi ebu bulenga, tudi tusemena bamue kudi bakuabu, ne ebi bidi bituambuluisha bua kushala ne bukole bua mu nyuma.
7 Tshisumbu ndongoluelu wa ntaku bua dikubibua dietu mu nyuma. Bu kakuyi tshisumbu, kakuvua mushindu wa kusadila Yehowa biakane nansha. Nenku, tushalayi pabuipi ne ndongoluelu eu wa Yehowa. Tutumikayi bua kukumbaja bipatshila bia tshisumbu ne tutumikilayi ne muoyo umue mibelu itudi tupetelaku. Ke mushindu umuepele utualeja dianyisha dietu bua tshisumbu.—Mus. wa 27:4.