Tubabidilayi Kalasa Ka Mudimu Wa Teokrasi Bua 1996—Tshitupa 2
1 Katupa kîpi panyima pa diunzuludibua dia Kalasa ka Mudimu wa Teokrasi mu 1943, filiale kampanda wa Société wakamba ne: “Ndongoluelu eu mupita bulenga mmuambuluishe banabetu ba bungi, bavua bela meji ne: kabavua mua kuakula munkatshi mua bantu, bua kuluabu, mu tshikondo tshîpi, ba-ngamba-malu balenga ne bamanyishi bakumbane.” Kalasa nkatungunuke ne kufila dishidimuna dishindame ditudi bonso tukengela.
2 Dibala dia Bible: Aba badi benza muyuki ki mbadi bababidila nkayabu Kalasa nansha. Bushuwa, tudi tupeshibua bonso mudimu: dibala dia Bible dia ku lumingu. Programe wa Kalasa udi uleja nshapita itudi ne bua kubala lumingu luonso. Mifundu idi ne mavuluija mavule adi ela kashonyi pa mushinga wa kubala Bible dituku dionso. (Yosh. 1:8; Mus. 1:2; Bienz. 17:11) Dibala edi didi ne mushinga bua makanda etu a mu nyuma; didi didisha lungenyi ne mutshima. Pa kubala Bible minute mipite pa itanu ku dituku, netuikale mua kulonda programe wa ku lumingu. Ku ndekelu kua tshidimu, netuikale babala nshapita mipita pa 150 ya mu Dîyi dia Nzambi. Bitualama Bible pa muaba mupepele bua kumupeta, netuikale ne mushindu wa kubala tshitupa kampanda dituku dionso.
3 Muyuki wa ndongeshilu: Bua kusaka banabetu ba balume ne ba bakaji bua kusadilabu Yehowa mu lulamatu ne mitalu, ngamba-malu udi wenza muyuki wa ndongeshilu udi ne bua kuikala mulongeshi wa tshitembu, bua kumvuija malu makonkonona ne kufikisha aba badi bamuteleja ku didima dianyisha kudi Nzambi, ku Dîyi diende ne ku bulongolodi buende. Bakulu ne basadidi ba mudimu nebafike ku tshipatshila etshi ku diambuluisha dia didilongolola dilenga, pa kushindamija muyuki wabu pa tshiena-bualu, pa kuakula ne dituishibua ne pa kuvuija malu makanzabale. (Eb. 4:12) Bidi ne mushinga bua ngamba-malu kulondaye dîba dimupesha. Mukanda wa “Toute Écriture” mmuule ne malu adi atangila Bible ne mudi mulongolongo wa bitupa bia Mifundu bidi bikoka ntema, bitudi mua kubabidila mu nyuma. Mukanda wa Prédicateurs udi ulonda muyuki wa bulongolodi bua Yehowa budi bumueneka ne ulonda malu akenzeka mu nsombelu wa bantu balelela bakaleja ditabuja, mitalu, didifila ne dinanga. Tudi ne bua kumanya bia bungi pa bidi bitangila malu etu a kale a Teokrasi ne mushindu udi Yehowa ubenesha tshisamba tshiende mu matuku a lelu.
4 Malu manene a mu dibala dia Bible: Bana betu badi bapeshibua mudimu eu badi ne bua kusungula mvese ya pa buayi yalejabu mushinga wayi bua tshisumbu. Nenku bidi bikengela bua kubalabu nshapita milongolola, kuelanganapu meji ne kuenza makebulula pa mvese misungula bua kupeta mumvuija adi mua kutokesha ngumvuilu wayi. Ku ndekelu kua mukanda wa Index des publications de la Société Watch Tower, kudi “Index biblique”, udi mua kutuambuluisha bikole patudi tukeba mamanyisha pa mvese kampanda. Muanetu udi wenza muyuki eu udi ne bua kujingulula bimpe malu ne kuepuka dibuela mu malu akena mu diumvuangana ne aa adi akonkononyibua. Kena ne bua kulongolola mumvuija mapite pa adiye mua kufila mu mushindu muakanyine mu minute isambombo.
5 Yonso wa kutudi udi mua kupetela masanka ku Kalasa ka Mudimu wa Teokrasi. Kadi mua kutuambuluisha bua kulengeja makokeshi etu a bu-ngamba-malu ne a bulongeshi. Dibabidila bikole ndongoluelu eu nedituambuluishe bushuwa bua kuenza ne: ‘dikola dietu dimueneke patoke.’—1 Tim. 4:15, NW.