Tuenzayi Mudimu Ne Anyima Wetu Mujima
1 Tudi ne tubingila tuvule bua kuikala ne dianyisha kudi Yehowa. Tshilejilu, malu akenzaye ku kale, adiye wenza mpindieu ne atuenzelaye kabidi mu matuku atshilualua. Dianyisha dietu didi ne bua kutusaka ku dienza tshinyi? Musambu kampanda wa Davidi udi ufila diandamuna edi: ‘Nentumbishe Yehowa bikondo bionso, kumutumbisha kuanyi nekuikale mukana muanyi misangu yonso.’—Mus. wa 34:1.
2 Bible udi uleja patoke se: tudi ne bua kufila bumanyishi. Tudi tukumbaja mudimu’eu ‘ne anyima wetu mujima bualu tudi tuenzela Yehowa.’ (Kolos. 3:23, NW) Bituikala bulelela tuenza mudimu ne anyima wetu mujima, tudi mua kuukumbaja mu bualabale bua mushindu kayi? Patudi tuela meji bua dinanga dia Yehowa kutudi, mutshima wetu udi utusaka kakuyi mpata bua kuakula ne disuminyina bua bualu buende ne bua malongolola ende a dikema. Tudi ne dijinga dia kuenza tshionso tshitudi mua kuenza.
3 Tudi mua kuela meji mu mushindu mutshintshikila se: muntu udi usadila ne anyima wende mujima udi ujinga kuikala ne lungenyi lushindika pa mudimu wende wa tshijila. Mufundi wa Misambu uvua umueneka muikale ne mmuenenu eu pakambaye ne: ‘Misangu muanda-mutekete ku dituku ndi mukusamune.’ (Mus. wa 119:164, NW) Aba badi ne mmuenenu bu wa Davidi badi bababidila mishindu mibapetesha bua kusamuna Yehowa. Bilondeshile nsombelu wabu, badi benza muabu muonso bua kusadila ne mitalu.
4 Tudi ne bikondo bivule bia kusamuna Yehowa: Kabiena bikengela kuindila anu patuikala mu mudimu wa ku nzubu ne ku nzubu bua kumanyisha lumu luimpe nansha. Bena mudimu netu, balongi netu, bena mu dîku dietu ne bantu bamanyangana nabu badi bonso ne dijinga dia kuteleja mukenji wa Bukalenge. Patudi mu luendu, tudi mua kutuadija muyuki udi mua kutufikisha imue misangu ku difila bumanyishi kudi bena ku nzubu kampanda wa tshilala benyi, kudi bena mudimu mu nzubu kansanga wa tshidilu peshi kudi bapanyishi ba kasolonyi, anyi kudi bendeshi ba taxi. Ku metu tudi mua kufila bumanyishi kudi bena mutumba netu. Bituikala babuele mu lupitadi, tudi mua kufila bumanyishi bua mu mpukapuka kudi buondapi ne ba-minganga ne kudi babedi bakuabu.
5 Bumanyishi bua mu mpukapuka budi butuala bipeta: Dimue dituku Bantemu babidi bavua banyunguluka mu lupangu kampanda, bakatuadija kuyukidilangana ne nsongalume kansanga uvua wendakana ne muanende. Panyima pa matuku, muntu au ne mukajende bakalonda njila wa bulelela. Muntu eu wakafika ku diamba pashishe ne: matuku makese kumpala kua kumonanganaye ne Bantemu babidi aba bua musangu wa kumpala, uvua mulombe Nzambi ne: ‘Biwikalaku bushuwa, mpeteshe mushindu wa meme kukumanya.’ Buende yeye dipetangana diende ne Bantemu mu lupangu alu divua ndiandamuna dia Yehowa ku disambila diende.
6 Aba badi badifila ne anyima wabu mujima ne dijinga dia kufila diambuluisha dia mu nyuma kudi bantu nabu badi bapeta disanka divule. Mbamanye se: mudimu’eu udibu bakumbaja “ne mutshima musangisha” udi usankisha Yehowa.—1 Kul. 28:9, NW.