Tuidikijayi Ditabuja Diabu
1 Mupostolo Paulo mmumvuije ditabuja bu: “dindila dishindame dia malu atudi batekemene, dileja patoke dia malelela adi kaayi amueneka ne mêsu.” Udi usakidila ne: ‘mbikole bua kulengelela Nzambi bikala muntu kayi ne ditabuja.’ (Eb. 11:1, 6, NW) Paulo mmutukankamije bua tuetu kuula tente ne ditabuja, kudileja mu bienzedi bietu ne kudikeba.—2 Kol. 4:13; Kolos. 2:7; 2 Tim. 2:22.
2 Mu Bible mudi bilejilu bivule bia ditabuja. Mu Ebelu nshapita wa 11, Paulo mmuleje mulongolongo wa bantemu bavua baleje ditabuja dikole mu ditetshibua kayi dionso. Kudi Abele, mufuila ditabuja wa kumpala. Mbakule bua Nowa, bualu wakaleja ditshina Nzambi ku ditabuja diende, ebi bivua ne mushinga bua kupandisha dîku diende. Abrahame mmutumbishibue bua ditabuja ne butumike biende. Kudi kabidi Mozese, bualu wakatungunuka ne kutantamana bua ditabuja, anu bu uvua umona eu ukena-umueka. Bilejilu ebi bivua bivule, ne Paulo wakamba ne: dîba nedipangike biatungunukaye ne kulonda malu onso adi mabitangile. Ndianyishapu kayi ditudi nadi dia kukolesha ditabuja dietu pa kutabalela “bienzedi bia tshijila” ne ‘bia bulamate kudi Nzambi!’—2 Petelo 3:11, NW.
3 Mu siekele wa kumpala, Yezu wakela lukonko elu: ‘Kadi palua muana wa muntu, neasangane ditabuja pa buloba anyi?’ (Luka 18:8) Kadi lelu’eu, kudiku bilejilu bidi bimueneka bia ditabuja munkatshi muetu anyi? Tutuku tumona bantu balume ne bakaji, bansonga ne bana, baleja ditabuja dikena ditenkakana kudi Yehowa, anu muvuabi kudi basadidi ba Nzambi ba tshikondo tshia kale anyi?
4 Bilejilu bia ditabuja bia buena-lelu: Bilejilu bilenga bia ditabuja ki mbipangike lelu’eu nansha! Ditabuja dia batangidi badi batulombola didi diakanyine kuidikija. (Eb. 13:7) Kadi kabena anu nkayabu badi baleja ditabuja dia tshitembu nansha. Tshisumbu tshionso tshidi ne bena lulamatu badi bananukila mutantshi mule mu mudimu wa Yehowa, misangu mivule bakama tshipepela ne mvula.
5 Bana betu ba bakaji badi batantamena buluishi bua babayabu bena tshikisu, munkatshi mua bidimu bivule, badi amu bakumbanyine dianyishibua. Batatu ne bamamu mbadienzeje bua kujikija lutatu lua didikoleshila bana. Munkatshi muetu mudi bakaji bakamba bakulakaje badi badifila mu midimu yonso ya mu tshisumbu, pabi, bamue ba kudibu kabena nansha ne dîku didi mua kubakuatshisha. (Tangila Luka 2:37.) Ditabuja dia aba badi batantamena masama a munanunanu didi ditukemesha matuku onso. Bavule badi batungunuka ne kusadila ne lulamatu nansha mudiku bipumbishi bidi bibapangisha bua kupeta masanka a pa mutu a mudimu wa teokrasi. Bamue Bantemu bansonga mbaleje ditabuja diabu ne bukitu buonso nansha mudiku buluishi bua mu tulasa. Bulamate buetu kudi Nzambi budi bukoleshibua patudi tumona bampanda-njila ba lulamatu badi bananukila ku tshidimu ne ku tshidimu, ne batantamena ntatu mikole. Anu bu muakamba Paulo, bituajinga kulonda malu onso atu mafikile bana betu aba mu mudimu wa Bukalenge ne midimu yabu yonso ya ditabuja, dîba nedipangike bua kubiumvuija!
6 Bilejilu ebi bia ditabuja bidi bitusamba ne bitukankamija. (1 Tes. 3:7, 8) Tudi ne kabingila ka kuidikija ditabuja diabu, bualu aba ‘badi benza malu ne lulamatu badi basankisha Yehowa.’—Nsum. 12:22.