Tubambuluishe Bua Kusadilabu Tshiakabidi
1 Mumanye bimpe ne: njiwu ya mu nyuma ivua mialamine bena nkristo nende mupostolo Paulo wakafunda ne: “Tukadi dîba dia nuenu kukatamuka ku tulu, bualu mpindieu lupandu luetu ludi pabuipi menemene kutamba tshikondo tshituakalua bena kuitabuja.” (Lomo 13:11, NW) Paulo uvua unyingalala bua bana babu bavua babungila mu nyuma; uvua ne dijinga dia kubakankamija bua kupetululabu luya mu mudimu.
2 Tudi mua kuamba ne dijadika dionso ne: butuku bua bulongolodi bukulakaje ebu bukadi busemene pabuipi ne diya ku ditshia dia bulongolodi bupiabupia dikadi dimueneka. (Lomo 13:12) Tudi ne tubingila tulelela tua kuditatshisha bua bana betu badi balekele dienza mudimu wa buambi bua lumu luimpe pamue netu. Tshidimu tshishale, bamanyishi bapite pa 27 000 ba ku États-Unis bakapetulula luya mu mudimu. Mmushindu kayi utuambuluisha bena nkristo bakuabo bakena ne luya mu mudimu bua kusadilabu tshiakabidi Yehowa?
3 Tshidi bakulu mua kuenza: Bavule ba ku bena nkristo bakena ne luya mu mudimu ki mbalekele bulelela nansha; mbiimanyike patupu mudimu wa bumanyishi bua ditekeshibua mu maboko, bua ntatu yabu, bua bunangi bua bintu bia ku mubidi peshi bua tunyinganyinga tua mu nsombelu. (Luka 21:34-36) Mu mushindu mukumbane, mbiakanyine bua kuambuluisha bamanyishi kumpala kua kabayi banji kujimija luya mu mudimu. Biatuadija mumanyishi kufila luapolo lua mudimu utumpika ngondo mikuabu, sekretere wa tshisumbu neamanyishe mulombodi wa dilonga dia mukanda dituye ubuela. Mapangadika neangatshibue bua kumukumbulabu kudi bakulu. Bakulu aba badi ne bua kudienzeja bua kujadika tshidi tshitamba kukebesha bualu ebu ne diambuluisha didibu mua kumupesha.—Tangila Tshibumba tshia Nsentedi tshia mu dia 15 Kabitende 1993, mabeji 20 -3.
4 Mushindu utudi mua kufila diambuluisha: Bavule ba kutudi mbamanye muntu kampanda wakajimija luya luende mu mudimu. Udi mua kuikala muntu utuvua balamakane nende bikole matuku mashale. Ntshinyi tshitudi mua kuenza bua kumuambuluisha? Bua tshinyi kubenga kufika kuende bua dikumbula dîpi? Muambile ne: nudi bapangile dikalaku diende. Ikala muena disanka ne muibakianganyi. Mumanyishe ne: údi úditatshisha bua bualu buende kadi kabiyi kumuleja ne: ùdi ne disama dia mu nyuma nansha. Ulonde malu adi akankamija peshi makuabu malu mimpe atudi tupetela mu tshisumbu. Yukila nende ne musangelu bua mpuilu wa distrike wa “Batuadi ba mukenji wa ditalala dia Nzambi.” Bikala mpuilu’eu kayi muanji kuenzeka, umukankamije bua kubuelamu. Ditantshila tshiakabidi tshisumbu nedimuambuluishe imue misangu kupita tshintu kayi tshionso. Mulomba bua nuenu kuya nende pamue mu bisangilu. Manyisha bakulu bua mushindu udiye mukuandamune pa bualu ebu.
5 Padi muena nkristo ukavua mujimije luya luende mu mudimu ubangulula dibuela mu bisangilu, udi pamu’apa udiumvua bibi padiye umona aba bavuaye mumanye. Kanumuebeji ne: “Úvuá penyi?” Bishilangane, muambuluishayi bua kudiumvuaye muakidila bilenga. Nuyukile nende. Umumanyishe kudi aba badiye kayi mumanye. Usombe ku luseke luende dîba dia bisangilu ne ujadike né udi ne mukanda wa misambu ne mikuabu idi ikonkononyibua. Umukankamije bua kuluaye tshiakabidi ne umuambile ne: udikù bua kumuambuluisha pikalaku dijinga.
6 Bu mudi Yehowa ne Yezu bikala ne dinanga diondoke bua aba badi bapambuka, badi basanka padi bantu ba mushindu’eu bapetulula bukole bua mu nyuma. (Mal. 3:7; Mat. 18:12-14) Netupete disanka dia muomumue, bituafika ku diambuluisha bena nkristo bua kusadilabu Yehowa tshiakabidi.